Chapter 13

vaiśaṃpāyana uvāca |
bhojāḥ pravrajitāñśrutvā vṛṣṇayaścāndhakaiḥ saha |
pāṇḍavānduḥkhasaṃtaptānsamājagmurmahāvane || 1 ||
[Analyze grammar]

pāñcālasya ca dāyādā dhṛṣṭaketuśca cedipaḥ |
kekayāśca mahāvīryā bhrātaro lokaviśrutāḥ || 2 ||
[Analyze grammar]

vane te'bhiyayuḥ pārthānkrodhāmarśasamanvitāḥ |
garhayanto dhārtarāṣṭrānkiṃ kurma iti cābruvan || 3 ||
[Analyze grammar]

vāsudevaṃ puraskṛtya sarve te kṣatriyarṣabhāḥ |
parivāryopaviviśurdharmarājaṃ yudhiṣṭhiram || 4 ||
[Analyze grammar]

vāsudeva uvāca |
duryodhanasya karṇasya śakuneśca durātmanaḥ |
duḥśāsanacaturthānāṃ bhūmiḥ pāsyati śoṇitam || 5 ||
[Analyze grammar]

tataḥ sarve'bhiṣiñcāmo dharmarājaṃ yudhiṣṭhiram |
nikṛtyopacaranvadhya eṣa dharmaḥ sanātanaḥ || 6 ||
[Analyze grammar]

vaiśaṃpāyana uvāca |
pārthānāmabhiṣaṅgeṇa tathā kruddhaṃ janārdanam |
arjunaḥ śamayāmāsā didhakṣantamiva prajāḥ || 7 ||
[Analyze grammar]

saṃkruddhaṃ keśavaṃ dṛṣṭvā pūrvadeheṣu phalgunaḥ |
kīrtayāmāsa karmāṇi satyakīrtermahātmanaḥ || 8 ||
[Analyze grammar]

puruṣasyāprameyasya satyasyāmitatejasaḥ |
prajāpatipaterviṣṇorlokanāthasya dhīmataḥ || 9 ||
[Analyze grammar]

arjuna uvāca |
daśa varṣasahasrāṇi yatrasāyaṃgṛho muniḥ |
vyacarastvaṃ purā kṛṣṇa parvate gandhamādane || 10 ||
[Analyze grammar]

daśa varṣasahasrāṇi daśa varṣaśatāni ca |
puṣkareṣvavasaḥ kṛṣṇa tvamapo bhakṣayanpurā || 11 ||
[Analyze grammar]

ūrdhvabāhurviśālāyāṃ badaryāṃ madhusūdana |
atiṣṭha ekapādena vāyubhakṣaḥ śataṃ samāḥ || 12 ||
[Analyze grammar]

apakṛṣṭottarāsaṅgaḥ kṛśo dhamanisaṃtataḥ |
āsīḥ kṛṣṇa sarasvatyāṃ satre dvādaśavārṣike || 13 ||
[Analyze grammar]

prabhāsaṃ cāpyathāsādya tīrthaṃ puṇyajanocitam |
tathā kṛṣṇa mahātejā divyaṃ varṣasahasrakam |
ātiṣṭhastapa ekena pādena niyame sthitaḥ || 14 ||
[Analyze grammar]

kṣetrajñaḥ sarvabhūtānāmādirantaśca keśava |
nidhānaṃ tapasāṃ kṛṣṇa yajñastvaṃ ca sanātanaḥ || 15 ||
[Analyze grammar]

nihatya narakaṃ bhaumamāhṛtya maṇikuṇḍale |
prathamotpāditaṃ kṛṣṇa medhyamaśvamavāsṛjaḥ || 16 ||
[Analyze grammar]

kṛtvā tatkarma lokānāmṛṣabhaḥ sarvalokajit |
avadhīstvaṃ raṇe sarvānsametāndaityadānavān || 17 ||
[Analyze grammar]

tataḥ sarveśvaratvaṃ ca saṃpradāya śacīpateḥ |
mānuṣeṣu mahābāho prādurbhūto'si keśava || 18 ||
[Analyze grammar]

sa tvaṃ nārāyaṇo bhūtvā harirāsīḥ paraṃtapa |
brahmā somaśca sūryaśca dharmo dhātā yamo'nalaḥ || 19 ||
[Analyze grammar]

vāyurvaiśravaṇo rudraḥ kālaḥ khaṃ pṛthivī diśaḥ |
ajaścarācaraguruḥ sraṣṭā tvaṃ puruṣottama || 20 ||
[Analyze grammar]

turāyaṇādibhirdeva kratubhirbhūridakṣiṇaiḥ |
ayajo bhūritejā vai kṛṣṇa caitrarathe vane || 21 ||
[Analyze grammar]

śataṃ śatasahasrāṇi suvarṇasya janārdana |
ekaikasmiṃstadā yajñe paripūrṇāni bhāgaśaḥ || 22 ||
[Analyze grammar]

aditerapi putratvametya yādavanandana |
tvaṃ viṣṇuriti vikhyāta indrādavarajo bhuvi || 23 ||
[Analyze grammar]

śiśurbhūtvā divaṃ khaṃ ca pṛthivīṃ ca paraṃtapa |
tribhirvikramaṇaiḥ kṛṣṇa krāntavānasi tejasā || 24 ||
[Analyze grammar]

saṃprāpya divamākāśamādityasadane sthitaḥ |
atyarocaśca bhūtātmanbhāskaraṃ svena tejasā || 25 ||
[Analyze grammar]

sāditā mauravāḥ pāśā nisundanarakau hatau |
kṛtaḥ kṣemaḥ punaḥ panthāḥ puraṃ prāgjyotiṣaṃ prati || 26 ||
[Analyze grammar]

jārūthyāmāhutiḥ krāthaḥ śiśupālo janaiḥ saha |
bhīmasenaśca śaibyaśca śatadhanvā ca nirjitaḥ || 27 ||
[Analyze grammar]

tathā parjanyaghoṣeṇa rathenādityavarcasā |
avākṣīrmahiṣīṃ bhojyāṃ raṇe nirjitya rukmiṇam || 28 ||
[Analyze grammar]

indradyumno hataḥ kopādyavanaśca kaśerumān |
hataḥ saubhapatiḥ śālvastvayā saubhaṃ ca pātitam || 29 ||
[Analyze grammar]

irāvatyāṃ tathā bhojaḥ kārtavīryasamo yudhi |
gopatistālaketuśca tvayā vinihatāvubhau || 30 ||
[Analyze grammar]

tāṃ ca bhogavatīṃ puṇyāmṛṣikāntāṃ janārdana |
dvārakāmātmasātkṛtvā samudraṃ gamayiṣyasi || 31 ||
[Analyze grammar]

na krodho na ca mātsaryaṃ nānṛtaṃ madhusūdana |
tvayi tiṣṭhati dāśārha na nṛśaṃsyaṃ kuto'nṛju || 32 ||
[Analyze grammar]

āsīnaṃ cittamadhye tvāṃ dīpyamānaṃ svatejasā |
āgamya ṛṣayaḥ sarve'yācantābhayamacyuta || 33 ||
[Analyze grammar]

yugānte sarvabhūtāni saṃkṣipya madhusūdana |
ātmanyevātmasātkṛtvā jagadāsse paraṃtapa || 34 ||
[Analyze grammar]

naivaṃ pūrve nāpare vā kariṣyanti kṛtāni te |
karmāṇi yāni deva tvaṃ bāla eva mahādyute || 35 ||
[Analyze grammar]

kṛtavānpuṇḍarīkākṣa baladevasahāyavān |
vairājabhavane cāpi brahmaṇā nyavasaḥ saha || 36 ||
[Analyze grammar]

vaiśaṃpāyana uvāca |
evamuktvā tadātmānamātmā kṛṣṇasya pāṇḍavaḥ |
tūṣṇīmāsīttataḥ pārthamityuvāca janārdanaḥ || 37 ||
[Analyze grammar]

mamaiva tvaṃ tavaivāhaṃ ye madīyāstavaiva te |
yastvāṃ dveṣṭi sa māṃ dveṣṭi yastvāmanu sa māmanu || 38 ||
[Analyze grammar]

narastvamasi durdharṣa harirnārāyaṇo hyaham |
lokāllokamimaṃ prāptau naranārāyaṇāvṛṣī || 39 ||
[Analyze grammar]

ananyaḥ pārtha mattastvamahaṃ tvattaśca bhārata |
nāvayorantaraṃ śakyaṃ vedituṃ bharatarṣabha || 40 ||
[Analyze grammar]

tasminvīrasamāvāye saṃrabdheṣvatha rājasu |
dhṛṣṭadyumnamukhairvīrairbhrātṛbhiḥ parivāritā || 41 ||
[Analyze grammar]

pāñcālī puṇḍarīkākṣamāsīnaṃ yādavaiḥ saha |
abhigamyābravītkṛṣṇā śaraṇyaṃ śaraṇaiṣiṇī || 42 ||
[Analyze grammar]

pūrve prajānisarge tvāmāhurekaṃ prajāpatim |
sraṣṭāraṃ sarvabhūtānāmasito devalo'bravīt || 43 ||
[Analyze grammar]

viṣṇustvamasi durdharṣa tvaṃ yajño madhusūdana |
yaṣṭā tvamasi yaṣṭavyo jāmadagnyo yathābravīt || 44 ||
[Analyze grammar]

ṛṣayastvāṃ kṣamāmāhuḥ satyaṃ ca puruṣottama |
satyādyajño'si saṃbhūtaḥ kaśyapastvāṃ yathābravīt || 45 ||
[Analyze grammar]

sādhyānāmapi devānāṃ vasūnāmīśvareśvaraḥ |
lokabhāvana lokeśa yathā tvāṃ nārado'bravīt || 46 ||
[Analyze grammar]

divaṃ te śirasā vyāptaṃ padbhyāṃ ca pṛthivī vibho |
jaṭharaṃ te ime lokāḥ puruṣo'si sanātanaḥ || 47 ||
[Analyze grammar]

vidyātapo'bhitaptānāṃ tapasā bhāvitātmanām |
ātmadarśanasiddhānāmṛṣīṇāmṛṣisattama || 48 ||
[Analyze grammar]

rājarṣīṇāṃ puṇyakṛtāmāhaveṣvanivartinām |
sarvadharmopapannānāṃ tvaṃ gatiḥ puruṣottama || 49 ||
[Analyze grammar]

tvaṃ prabhustvaṃ vibhustvaṃ bhūrātmabhūstvaṃ sanātanaḥ |
lokapālāśca lokāśca nakṣatrāṇi diśo daśa |
nabhaścandraśca sūryaśca tvayi sarvaṃ pratiṣṭhitam || 50 ||
[Analyze grammar]

martyatā caiva bhūtānāmamaratvaṃ divaukasām |
tvayi sarvaṃ mahābāho lokakāryaṃ pratiṣṭhitam || 51 ||
[Analyze grammar]

sā te'haṃ duḥkhamākhyāsye praṇayānmadhusūdana |
īśastvaṃ sarvabhūtānāṃ ye divyā ye ca mānuṣāḥ || 52 ||
[Analyze grammar]

kathaṃ nu bhāryā pārthānāṃ tava kṛṣṇa sakhī vibho |
dhṛṣṭadyumnasya bhaginī sabhāṃ kṛṣyeta mādṛśī || 53 ||
[Analyze grammar]

strīdharmiṇī vepamānā rudhireṇa samukṣitā |
ekavastrā vikṛṣṭāsmi duḥkhitā kurusaṃsadi || 54 ||
[Analyze grammar]

rājamadhye sabhāyāṃ tu rajasābhisamīritām |
dṛṣṭvā ca māṃ dhārtarāṣṭrāḥ prāhasanpāpacetasaḥ || 55 ||
[Analyze grammar]

dāsībhāvena bhoktuṃ māmīṣuste madhusūdana |
jīvatsu pāṇḍuputreṣu pāñcāleṣvatha vṛṣṇiṣu || 56 ||
[Analyze grammar]

nanvahaṃ kṛṣṇa bhīṣmasya dhṛtarāṣṭrasya cobhayoḥ |
snuṣā bhavāmi dharmeṇa sāhaṃ dāsīkṛtā balāt || 57 ||
[Analyze grammar]

garhaye pāṇḍavāṃstveva yudhi śreṣṭhānmahābalān |
ye kliśyamānāṃ prekṣante dharmapatnīṃ yaśasvinīm || 58 ||
[Analyze grammar]

dhigbalaṃ bhīmasenasya dhikpārthasya dhanuṣmatām |
yau māṃ viprakṛtāṃ kṣudrairmarṣayetāṃ janārdana || 59 ||
[Analyze grammar]

śāśvato'yaṃ dharmapathaḥ sadbhirācaritaḥ sadā |
yadbhāryāṃ parirakṣanti bhartāro'lpabalā api || 60 ||
[Analyze grammar]

bhāryāyāṃ rakṣyamāṇāyāṃ prajā bhavati rakṣitā |
prajāyāṃ rakṣyamāṇāyāmātmā bhavati rakṣitaḥ || 61 ||
[Analyze grammar]

ātmā hi jāyate tasyāṃ tasmājjāyā bhavatyuta |
bhartā ca bhāryayā rakṣyaḥ kathaṃ jāyānmamodare || 62 ||
[Analyze grammar]

nanvime śaraṇaṃ prāptānna tyajanti kadācana |
te māṃ śaraṇamāpannāṃ nānvapadyanta pāṇḍavāḥ || 63 ||
[Analyze grammar]

pañceme pañcabhirjātāḥ kumārāścāmitaujasaḥ |
eteṣāmapyavekṣārthaṃ trātavyāsmi janārdana || 64 ||
[Analyze grammar]

prativindhyo yudhiṣṭhirātsutasomo vṛkodarāt |
arjunācchrutakīrtistu śatānīkastu nākuliḥ || 65 ||
[Analyze grammar]

kaniṣṭhācchrutakarmā tu sarve satyaparākramāḥ |
pradyumno yādṛśaḥ kṛṣṇa tādṛśāste mahārathāḥ || 66 ||
[Analyze grammar]

nanvime dhanuṣi śreṣṭhā ajeyā yudhi śātravaiḥ |
kimarthaṃ dhārtarāṣṭrāṇāṃ sahante durbalīyasām || 67 ||
[Analyze grammar]

adharmeṇa hṛtaṃ rājyaṃ sarve dāsāḥ kṛtāstathā |
sabhāyāṃ parikṛṣṭāhamekavastrā rajasvalā || 68 ||
[Analyze grammar]

nādhijyamapi yacchakyaṃ kartumanyena gāṇḍivam |
anyatrārjunabhīmābhyāṃ tvayā vā madhusūdana || 69 ||
[Analyze grammar]

dhigbhīmasenasya balaṃ dhikpārthasya ca gāṇḍivam |
yatra duryodhanaḥ kṛṣṇa muhūrtamapi jīvati || 70 ||
[Analyze grammar]

ya etānākṣipadrāṣṭrātsaha mātrāvihiṃsakān |
adhīyānānpurā bālānvratasthānmadhusūdana || 71 ||
[Analyze grammar]

bhojane bhīmasenasya pāpaḥ prākṣepayadviṣam |
kālakūṭaṃ navaṃ tīkṣṇaṃ saṃbhṛtaṃ lomaharṣaṇam || 72 ||
[Analyze grammar]

tajjīrṇamavikāreṇa sahānnena janārdana |
saśeṣatvānmahābāho bhīmasya puruṣottama || 73 ||
[Analyze grammar]

pramāṇakoṭyāṃ viśvastaṃ tathā suptaṃ vṛkodaram |
baddhvainaṃ kṛṣṇa gaṅgāyāṃ prakṣipya punarāvrajat || 74 ||
[Analyze grammar]

yadā vibuddhaḥ kaunteyastadā saṃchidya bandhanam |
udatiṣṭhanmahābāhurbhīmaseno mahābalaḥ || 75 ||
[Analyze grammar]

āśīviṣaiḥ kṛṣṇasarpaiḥ suptaṃ cainamadaṃśayat |
sarveṣvevāṅgadeśeṣu na mamāra ca śatruhā || 76 ||
[Analyze grammar]

pratibuddhastu kaunteyaḥ sarvānsarpānapothayat |
sārathiṃ cāsya dayitamapahastena jaghnivān || 77 ||
[Analyze grammar]

punaḥ suptānupādhākṣīdbālakānvāraṇāvate |
śayānānāryayā sārdhaṃ ko nu tatkartumarhati || 78 ||
[Analyze grammar]

yatrāryā rudatī bhītā pāṇḍavānidamabravīt |
mahadvyasanamāpannā śikhinā parivāritā || 79 ||
[Analyze grammar]

hā hatāsmi kuto nvadya bhavecchāntirihānalāt |
anāthā vinaśiṣyāmi bālakaiḥ putrakaiḥ saha || 80 ||
[Analyze grammar]

tatra bhīmo mahābāhurvāyuvegaparākramaḥ |
āryāmāśvāsayāmāsa bhrātṝṃścāpi vṛkodaraḥ || 81 ||
[Analyze grammar]

vainateyo yathā pakṣī garuḍaḥ patatāṃ varaḥ |
tathaivābhipatiṣyāmi bhayaṃ vo neha vidyate || 82 ||
[Analyze grammar]

āryāmaṅkena vāmena rājānaṃ dakṣiṇena ca |
aṃsayośca yamau kṛtvā pṛṣṭhe bībhatsumeva ca || 83 ||
[Analyze grammar]

sahasotpatya vegena sarvānādāya vīryavān |
bhrātṝnāryāṃ ca balavānmokṣayāmāsa pāvakāt || 84 ||
[Analyze grammar]

te rātrau prasthitāḥ sarve mātrā saha yaśasvinaḥ |
abhyagacchanmahāraṇyaṃ hiḍimbavanamantikāt || 85 ||
[Analyze grammar]

śrāntāḥ prasuptāstatreme mātrā saha suduḥkhitāḥ |
suptāṃścainānabhyagacchaddhiḍimbā nāma rākṣasī || 86 ||
[Analyze grammar]

bhīmasya pādau kṛtvā tu sva utsaṅge tato balāt |
paryamardata saṃhṛṣṭā kalyāṇī mṛdupāṇinā || 87 ||
[Analyze grammar]

tāmabudhyadameyātmā balavānsatyavikramaḥ |
paryapṛcchacca tāṃ bhīmaḥ kimihecchasyanindite || 88 ||
[Analyze grammar]

tayoḥ śrutvā tu kathitamāgacchadrākṣasādhamaḥ |
bhīmarūpo mahānādānvisṛjanbhīmadarśanaḥ || 89 ||
[Analyze grammar]

kena sārdhaṃ kathayasi ānayainaṃ mamāntikam |
hiḍimbe bhakṣayiṣyāvo na ciraṃ kartumarhasi || 90 ||
[Analyze grammar]

sā kṛpāsaṃgṛhītena hṛdayena manasvinī |
nainamaicchattadākhyātumanukrośādaninditā || 91 ||
[Analyze grammar]

sa nādānvinadanghorānrākṣasaḥ puruṣādakaḥ |
abhyadravata vegena bhīmasenaṃ tadā kila || 92 ||
[Analyze grammar]

tamabhidrutya saṃkruddho vegena mahatā balī |
agṛhṇātpāṇinā pāṇiṃ bhīmasenasya rākṣasaḥ || 93 ||
[Analyze grammar]

indrāśanisamasparśaṃ vajrasaṃhananaṃ dṛḍham |
saṃhatya bhīmasenāya vyākṣipatsahasā karam || 94 ||
[Analyze grammar]

gṛhītaṃ pāṇinā pāṇiṃ bhīmaseno'tha rakṣasā |
nāmṛṣyata mahābāhustatrākrudhyadvṛkodaraḥ || 95 ||
[Analyze grammar]

tatrāsīttumulaṃ yuddhaṃ bhīmasenahiḍimbayoḥ |
sarvāstraviduṣorghoraṃ vṛtravāsavayoriva || 96 ||
[Analyze grammar]

hatvā hiḍimbaṃ bhīmo'tha prasthito bhrātṛbhiḥ saha |
hiḍimbāmagrataḥ kṛtvā yasyāṃ jāto ghaṭotkacaḥ || 97 ||
[Analyze grammar]

tataśca prādravansarve saha mātrā yaśasvinaḥ |
ekacakrāmabhimukhāḥ saṃvṛtā brāhmaṇavrajaiḥ || 98 ||
[Analyze grammar]

prasthāne vyāsa eṣāṃ ca mantrī priyahito'bhavat |
tato'gacchannekacakrāṃ pāṇḍavāḥ saṃśitavratāḥ || 99 ||
[Analyze grammar]

tatrāpyāsādayāmāsurbakaṃ nāma mahābalam |
puruṣādaṃ pratibhayaṃ hiḍimbenaiva saṃmitam || 100 ||
[Analyze grammar]

taṃ cāpi vinihatyograṃ bhīmaḥ praharatāṃ varaḥ |
sahito bhrātṛbhiḥ sarvairdrupadasya puraṃ yayau || 101 ||
[Analyze grammar]

labdhāhamapi tatraiva vasatā savyasācinā |
yathā tvayā jitā kṛṣṇa rukmiṇī bhīṣmakātmajā || 102 ||
[Analyze grammar]

evaṃ suyuddhe pārthena jitāhaṃ madhusūdana |
svayaṃvare mahatkarma kṛtvā nasukaraṃ paraiḥ || 103 ||
[Analyze grammar]

evaṃ kleśaiḥ subahubhiḥ kliśyamānāḥ suduḥkhitāḥ |
nivasāmāryayā hīnāḥ kṛṣṇa dhaumyapuraḥsarāḥ || 104 ||
[Analyze grammar]

ta ime siṃhavikrāntā vīryeṇābhyadhikāḥ paraiḥ |
vihīnaiḥ parikliśyantīṃ samupekṣanta māṃ katham || 105 ||
[Analyze grammar]

etādṛśāni duḥkhāni sahante durbalīyasām |
dīrghakālaṃ pradīptāni pāpānāṃ kṣudrakarmaṇām || 106 ||
[Analyze grammar]

kule mahati jātāsmi divyena vidhinā kila |
pāṇḍavānāṃ priyā bhāryā snuṣā pāṇḍormahātmanaḥ || 107 ||
[Analyze grammar]

kacagrahamanuprāptā sāsmi kṛṣṇa varā satī |
pañcānāmindrakalpānāṃ prekṣatāṃ madhusūdana || 108 ||
[Analyze grammar]

ityuktvā prārudatkṛṣṇā mukhaṃ pracchādya pāṇinā |
padmakośaprakāśena mṛdunā mṛdubhāṣiṇī || 109 ||
[Analyze grammar]

stanāvapatitau pīnau sujātau śubhalakṣaṇau |
abhyavarṣata pāñcālī duḥkhajairaśrubindubhiḥ || 110 ||
[Analyze grammar]

cakṣuṣī parimārjantī niḥśvasantī punaḥ punaḥ |
bāṣpapūrṇena kaṇṭhena kruddhā vacanamabravīt || 111 ||
[Analyze grammar]

naiva me patayaḥ santi na putrā madhusūdana |
na bhrātaro na ca pitā naiva tvaṃ na ca bāndhavāḥ || 112 ||
[Analyze grammar]

ye māṃ viprakṛtāṃ kṣudrairupekṣadhvaṃ viśokavat |
na hi me śāmyate duḥkhaṃ karṇo yatprāhasattadā || 113 ||
[Analyze grammar]

athaināmabravītkṛṣṇastasminvīrasamāgame |
rodiṣyanti striyo hyevaṃ yeṣāṃ kruddhāsi bhāmini || 114 ||
[Analyze grammar]

bībhatsuśarasaṃchannāñśoṇitaughapariplutān |
nihatāñjīvitaṃ tyaktvā śayānānvasudhātale || 115 ||
[Analyze grammar]

yatsamarthaṃ pāṇḍavānāṃ tatkariṣyāmi mā śucaḥ |
satyaṃ te pratijānāmi rājñāṃ rājñī bhaviṣyasi || 116 ||
[Analyze grammar]

pateddyaurhimavāñśīryetpṛthivī śakalībhavet |
śuṣyettoyanidhiḥ kṛṣṇe na me moghaṃ vaco bhavet || 117 ||
[Analyze grammar]

dhṛṣṭadyumna uvāca |
ahaṃ droṇaṃ haniṣyāmi śikhaṇḍī tu pitāmaham |
duryodhanaṃ bhīmasenaḥ karṇaṃ hantā dhanaṃjayaḥ || 118 ||
[Analyze grammar]

rāmakṛṣṇau vyapāśritya ajeyāḥ sma śucismite |
api vṛtrahaṇā yuddhe kiṃ punardhṛtarāṣṭrajaiḥ || 119 ||
[Analyze grammar]

vaiśaṃpāyana uvāca |
ityukte'bhimukhā vīrā vāsudevamupasthitā |
teṣāṃ madhye mahābāhuḥ keśavo vākyamabravīt || 120 ||
[Analyze grammar]