Chapter 2

yudhiṣṭhira uvāca |
neha paśyāmi vibudhā rādheyamamitaujasam |
bhrātarau ca mahātmānau yudhāmanyūttamaujasau || 1 ||
[Analyze grammar]

juhuvurye śarīrāṇi raṇavahnau mahārathāḥ |
rājāno rājaputrāśca ye madarthe hatā raṇe || 2 ||
[Analyze grammar]

kva te mahārathāḥ sarve śārdūlasamavikramāḥ |
tairapyayaṃ jito lokaḥ kaccitpuruṣasattamaiḥ || 3 ||
[Analyze grammar]

yadi lokānimānprāptāste ca sarve mahārathāḥ |
sthitaṃ vitta hi māṃ devāḥ sahitaṃ tairmahātmabhiḥ || 4 ||
[Analyze grammar]

kaccinna tairavāpto'yaṃ nṛpairloko'kṣayaḥ śubhaḥ |
na tairahaṃ vinā vatsye jñātibhirbhrātṛbhistathā || 5 ||
[Analyze grammar]

māturhi vacanaṃ śrutvā tadā salilakarmaṇi |
karṇasya kriyatāṃ toyamiti tapyāmi tena vai || 6 ||
[Analyze grammar]

idaṃ ca paritapyāmi punaḥ punarahaṃ surāḥ |
yanmātuḥ sadṛśau pādau tasyāhamamitaujasaḥ || 7 ||
[Analyze grammar]

dṛṣṭvaiva taṃ nānugataḥ karṇaṃ parabalārdanam |
na hyasmānkarṇasahitāñjayecchakro'pi saṃyuge || 8 ||
[Analyze grammar]

tamahaṃ yatratatrasthaṃ draṣṭumicchāmi sūryajam |
avijñāto mayā yo'sau ghātitaḥ savyasācinā || 9 ||
[Analyze grammar]

bhīmaṃ ca bhīmavikrāntaṃ prāṇebhyo'pi priyaṃ mama |
arjunaṃ cendrasaṃkāśaṃ yamau tau ca yamopamau || 10 ||
[Analyze grammar]

draṣṭumicchāmi tāṃ cāhaṃ pāñcālīṃ dharmacāriṇīm |
na ceha sthātumicchāmi satyametadbravīmi vaḥ || 11 ||
[Analyze grammar]

kiṃ me bhrātṛvihīnasya svargeṇa surasattamāḥ |
yatra te sa mama svargo nāyaṃ svargo mato mama || 12 ||
[Analyze grammar]

devā ūcuḥ |
yadi vai tatra te śraddhā gamyatāṃ putra māciram |
priye hi tava vartāmo devarājasya śāsanāt || 13 ||
[Analyze grammar]

vaiśaṃpāyana uvāca |
ityuktvā taṃ tato devā devadūtamupādiśan |
yudhiṣṭhirasya suhṛdo darśayeti paraṃtapa || 14 ||
[Analyze grammar]

tataḥ kuntīsuto rājā devadūtaśca jagmatuḥ |
sahitau rājaśārdūla yatra te puruṣarṣabhāḥ || 15 ||
[Analyze grammar]

agrato devadūtastu yayau rājā ca pṛṣṭhataḥ |
panthānamaśubhaṃ durgaṃ sevitaṃ pāpakarmabhiḥ || 16 ||
[Analyze grammar]

tamasā saṃvṛtaṃ ghoraṃ keśaśaivalaśādvalam |
yuktaṃ pāpakṛtāṃ gandhairmāṃsaśoṇitakardamam || 17 ||
[Analyze grammar]

daṃśotthānaṃ sajhillīkaṃ makṣikāmaśakāvṛtam |
itaścetaśca kuṇapaiḥ samantātparivāritam || 18 ||
[Analyze grammar]

asthikeśasamākīrṇaṃ kṛmikīṭasamākulam |
jvalanena pradīptena samantātpariveṣṭitam || 19 ||
[Analyze grammar]

ayomukhaiśca kākolairgṛdhraiśca samabhidrutam |
sūcīmukhaistathā pretairvindhyaśailopamairvṛtam || 20 ||
[Analyze grammar]

medorudhirayuktaiśca chinnabāhūrupāṇibhiḥ |
nikṛttodarapādaiśca tatra tatra praveritaiḥ || 21 ||
[Analyze grammar]

sa tatkuṇapadurgandhamaśivaṃ romaharṣaṇam |
jagāma rājā dharmātmā madhye bahu vicintayan || 22 ||
[Analyze grammar]

dadarśoṣṇodakaiḥ pūrṇāṃ nadīṃ cāpi sudurgamām |
asipatravanaṃ caiva niśitakṣurasaṃvṛtam || 23 ||
[Analyze grammar]

karambhavālukāstaptā āyasīśca śilāḥ pṛthak |
lohakumbhīśca tailasya kvāthyamānāḥ samantataḥ || 24 ||
[Analyze grammar]

kūṭaśālmalikaṃ cāpi dusparśaṃ tīkṣṇakaṇṭakam |
dadarśa cāpi kaunteyo yātanāḥ pāpakarmiṇām || 25 ||
[Analyze grammar]

sa taṃ durgandhamālakṣya devadūtamuvāca ha |
kiyadadhvānamasmābhirgantavyamidamīdṛśam || 26 ||
[Analyze grammar]

kva ca te bhrātaro mahyaṃ tanmamākhyātumarhasi |
deśo'yaṃ kaśca devānāmetadicchāmi veditum || 27 ||
[Analyze grammar]

sa saṃnivavṛte śrutvā dharmarājasya bhāṣitam |
devadūto'bravīccainametāvadgamanaṃ tava || 28 ||
[Analyze grammar]

nivartitavyaṃ hi mayā tathāsmyukto divaukasaiḥ |
yadi śrānto'si rājendra tvamathāgantumarhasi || 29 ||
[Analyze grammar]

yudhiṣṭhirastu nirviṇṇastena gandhena mūrchitaḥ |
nivartane dhṛtamanāḥ paryāvartata bhārata || 30 ||
[Analyze grammar]

sa saṃnivṛtto dharmātmā duḥkhaśokasamanvitaḥ |
śuśrāva tatra vadatāṃ dīnā vācaḥ samantataḥ || 31 ||
[Analyze grammar]

bho bho dharmaja rājarṣe puṇyābhijana pāṇḍava |
anugrahārthamasmākaṃ tiṣṭha tāvanmuhūrtakam || 32 ||
[Analyze grammar]

āyāti tvayi durdharṣe vāti puṇyaḥ samīraṇaḥ |
tava gandhānugastāta yenāsmānsukhamāgamat || 33 ||
[Analyze grammar]

te vayaṃ pārtha dīrghasya kālasya puruṣarṣabha |
sukhamāsādayiṣyāmastvāṃ dṛṣṭvā rājasattama || 34 ||
[Analyze grammar]

saṃtiṣṭhasva mahābāho muhūrtamapi bhārata |
tvayi tiṣṭhati kauravya yātanāsmānna bādhate || 35 ||
[Analyze grammar]

evaṃ bahuvidhā vācaḥ kṛpaṇā vedanāvatām |
tasmindeśe sa śuśrāva samantādvadatāṃ nṛpa || 36 ||
[Analyze grammar]

teṣāṃ tadvacanaṃ śrutvā dayāvāndīnabhāṣiṇām |
aho kṛcchramiti prāha tasthau sa ca yudhiṣṭhiraḥ || 37 ||
[Analyze grammar]

sa tā giraḥ purastādvai śrutapūrvāḥ punaḥ punaḥ |
glānānāṃ duḥkhitānāṃ ca nābhyajānata pāṇḍavaḥ || 38 ||
[Analyze grammar]

abudhyamānastā vāco dharmaputro yudhiṣṭhiraḥ |
uvāca ke bhavanto vai kimarthamiha tiṣṭhatha || 39 ||
[Analyze grammar]

ityuktāste tataḥ sarve samantādavabhāṣire |
karṇo'haṃ bhīmaseno'hamarjuno'hamiti prabho || 40 ||
[Analyze grammar]

nakulaḥ sahadevo'haṃ dhṛṣṭadyumno'hamityuta |
draupadī draupadeyāśca ityevaṃ te vicukruśuḥ || 41 ||
[Analyze grammar]

tā vācaḥ sa tadā śrutvā taddeśasadṛśīrnṛpa |
tato vimamṛśe rājā kiṃ nvidaṃ daivakāritam || 42 ||
[Analyze grammar]

kiṃ nu tatkaluṣaṃ karma kṛtamebhirmahātmabhiḥ |
karṇena draupadeyairvā pāñcālyā vā sumadhyayā || 43 ||
[Analyze grammar]

ya ime pāpagandhe'smindeśe santi sudāruṇe |
na hi jānāmi sarveṣāṃ duṣkṛtaṃ puṇyakarmaṇām || 44 ||
[Analyze grammar]

kiṃ kṛtvā dhṛtarāṣṭrasya putro rājā suyodhanaḥ |
tathā śriyā yutaḥ pāpaḥ saha sarvaiḥ padānugaiḥ || 45 ||
[Analyze grammar]

mahendra iva lakṣmīvānāste paramapūjitaḥ |
kasyedānīṃ vikāro'yaṃ yadime narakaṃ gatāḥ || 46 ||
[Analyze grammar]

sarvadharmavidaḥ śūrāḥ satyāgamaparāyaṇāḥ |
kṣātradharmaparāḥ prājñā yajvāno bhūridakṣiṇāḥ || 47 ||
[Analyze grammar]

kiṃ nu supto'smi jāgarmi cetayāno na cetaye |
aho cittavikāro'yaṃ syādvā me cittavibhramaḥ || 48 ||
[Analyze grammar]

evaṃ bahuvidhaṃ rājā vimamarśa yudhiṣṭhiraḥ |
duḥkhaśokasamāviṣṭaścintāvyākulitendriyaḥ || 49 ||
[Analyze grammar]

krodhamāhārayaccaiva tīvraṃ dharmasuto nṛpaḥ |
devāṃśca garhayāmāsa dharmaṃ caiva yudhiṣṭhiraḥ || 50 ||
[Analyze grammar]

sa tīvragandhasaṃtapto devadūtamuvāca ha |
gamyatāṃ bhadra yeṣāṃ tvaṃ dūtasteṣāmupāntikam || 51 ||
[Analyze grammar]

na hyahaṃ tatra yāsyāmi sthito'smīti nivedyatām |
matsaṃśrayādime dūta sukhino bhrātaro hi me || 52 ||
[Analyze grammar]

ityuktaḥ sa tadā dūtaḥ pāṇḍuputreṇa dhīmatā |
jagāma tatra yatrāste devarājaḥ śatakratuḥ || 53 ||
[Analyze grammar]

nivedayāmāsa ca taddharmarājacikīrṣitam |
yathoktaṃ dharmaputreṇa sarvameva janādhipa || 54 ||
[Analyze grammar]