Chapter 8

vaiśaṃpāyana uvāca |
evamuktaḥ sa bībhatsurmātulena paraṃtapaḥ |
durmanā dīnamanasaṃ vasudevamuvāca ha || 1 ||
[Analyze grammar]

nāhaṃ vṛṣṇipravīreṇa madhubhiścaiva mātula |
vihīnāṃ pṛthivīṃ draṣṭuṃ śaktaściramiha prabho || 2 ||
[Analyze grammar]

rājā ca bhīmasenaśca sahadevaśca pāṇḍavaḥ |
nakulo yājñasenī ca ṣaḍekamanaso vayam || 3 ||
[Analyze grammar]

rājñaḥ saṃkramaṇe cāpi kālo'yaṃ vartate dhruvam |
tamimaṃ viddhi saṃprāptaṃ kālaṃ kālavidāṃ vara || 4 ||
[Analyze grammar]

sarvathā vṛṣṇidārāṃstu bālavṛddhāṃstathaiva ca |
nayiṣye parigṛhyāhamindraprasthamariṃdama || 5 ||
[Analyze grammar]

ityuktvā dārukamidaṃ vākyamāha dhanaṃjayaḥ |
amātyānvṛṣṇivīrāṇāṃ draṣṭumicchāmi māciram || 6 ||
[Analyze grammar]

ityevamuktvā vacanaṃ sudharmāṃ yādavīṃ sabhām |
praviveśārjunaḥ śūraḥ śocamāno mahārathān || 7 ||
[Analyze grammar]

tamāsanagataṃ tatra sarvāḥ prakṛtayastathā |
brāhmaṇā naigamāścaiva parivāryopatasthire || 8 ||
[Analyze grammar]

tāndīnamanasaḥ sarvānnibhṛtāngatacetasaḥ |
uvācedaṃ vacaḥ pārthaḥ svayaṃ dīnatarastadā || 9 ||
[Analyze grammar]

śakraprasthamahaṃ neṣye vṛṣṇyandhakajanaṃ svayam |
idaṃ tu nagaraṃ sarvaṃ samudraḥ plāvayiṣyati || 10 ||
[Analyze grammar]

sajjīkuruta yānāni ratnāni vividhāni ca |
vajro'yaṃ bhavatāṃ rājā śakraprasthe bhaviṣyati || 11 ||
[Analyze grammar]

saptame divase caiva ravau vimala udgate |
bahirvatsyāmahe sarve sajjībhavata māciram || 12 ||
[Analyze grammar]

ityuktāstena te paurāḥ pārthenākliṣṭakarmaṇā |
sajjamāśu tataścakruḥ svasiddhyarthaṃ samutsukāḥ || 13 ||
[Analyze grammar]

tāṃ rātrimavasatpārthaḥ keśavasya niveśane |
mahatā śokamohena sahasābhipariplutaḥ || 14 ||
[Analyze grammar]

śvobhūte'tha tataḥ śaurirvasudevaḥ pratāpavān |
yuktvātmānaṃ mahātejā jagāma gatimuttamām || 15 ||
[Analyze grammar]

tataḥ śabdo mahānāsīdvasudevasya veśmani |
dāruṇaḥ krośatīnāṃ ca rudatīnāṃ ca yoṣitām || 16 ||
[Analyze grammar]

prakīrṇamūrdhajāḥ sarvā vimuktābharaṇasrajaḥ |
urāṃsi pāṇibhirghnantyo vyalapankaruṇaṃ striyaḥ || 17 ||
[Analyze grammar]

taṃ devakī ca bhadrā ca rohiṇī madirā tathā |
anvāroḍhuṃ vyavasitā bhartāraṃ yoṣitāṃ varāḥ || 18 ||
[Analyze grammar]

tataḥ śauriṃ nṛyuktena bahumālyena bhārata |
yānena mahatā pārtho bahirniṣkrāmayattadā || 19 ||
[Analyze grammar]

tamanvayustatra tatra duḥkhaśokasamāhatāḥ |
dvārakāvāsinaḥ paurāḥ sarva eva nararṣabha || 20 ||
[Analyze grammar]

tasyāśvamedhikaṃ chatraṃ dīpyamānāśca pāvakāḥ |
purastāttasya yānasya yājakāśca tato yayuḥ || 21 ||
[Analyze grammar]

anujagmuśca taṃ vīraṃ devyastā vai svalaṃkṛtāḥ |
strīsahasraiḥ parivṛtā vadhūbhiśca sahasraśaḥ || 22 ||
[Analyze grammar]

yastu deśaḥ priyastasya jīvato'bhūnmahātmanaḥ |
tatrainamupasaṃkalpya pitṛmedhaṃ pracakrire || 23 ||
[Analyze grammar]

taṃ citāgnigataṃ vīraṃ śūraputraṃ varāṅganāḥ |
tato'nvāruruhuḥ patnyaścatasraḥ patilokagāḥ || 24 ||
[Analyze grammar]

taṃ vai catasṛbhiḥ strībhiranvitaṃ pāṇḍunandanaḥ |
adāhayaccandanaiśca gandhairuccāvacairapi || 25 ||
[Analyze grammar]

tataḥ prādurabhūcchabdaḥ samiddhasya vibhāvasoḥ |
sāmagānāṃ ca nirghoṣo narāṇāṃ rudatāmapi || 26 ||
[Analyze grammar]

tato vajrapradhānāste vṛṣṇivīrakumārakāḥ |
sarva evodakaṃ cakruḥ striyaścaiva mahātmanaḥ || 27 ||
[Analyze grammar]

aluptadharmastaṃ dharmaṃ kārayitvā sa phalgunaḥ |
jagāma vṛṣṇayo yatra vinaṣṭā bharatarṣabha || 28 ||
[Analyze grammar]

sa tāndṛṣṭvā nipatitānkadane bhṛśaduḥkhitaḥ |
babhūvātīva kauravyaḥ prāptakālaṃ cakāra ca || 29 ||
[Analyze grammar]

yathāpradhānataścaiva cakre sarvāḥ kriyāstadā |
ye hatā brahmaśāpena musalairerakodbhavaiḥ || 30 ||
[Analyze grammar]

tataḥ śarīre rāmasya vāsudevasya cobhayoḥ |
anviṣya dāhayāmāsa puruṣairāptakāribhiḥ || 31 ||
[Analyze grammar]

sa teṣāṃ vidhivatkṛtvā pretakāryāṇi pāṇḍavaḥ |
saptame divase prāyādrathamāruhya satvaraḥ |
aśvayuktai rathaiścāpi gokharoṣṭrayutairapi || 32 ||
[Analyze grammar]

striyastā vṛṣṇivīrāṇāṃ rudatyaḥ śokakarśitāḥ |
anujagmurmahātmānaṃ pāṇḍuputraṃ dhanaṃjayam || 33 ||
[Analyze grammar]

bhṛtyāstvandhakavṛṣṇīnāṃ sādino rathinaśca ye |
vīrahīnaṃ vṛddhabālaṃ paurajānapadāstathā |
yayuste parivāryātha kalatraṃ pārthaśāsanāt || 34 ||
[Analyze grammar]

kuñjaraiśca gajārohā yayuḥ śailanibhaistathā |
sapādarakṣaiḥ saṃyuktāḥ sottarāyudhikā yayuḥ || 35 ||
[Analyze grammar]

putrāścāndhakavṛṣṇīnāṃ sarve pārthamanuvratāḥ |
brāhmaṇāḥ kṣatriyā vaiśyāḥ śūdrāścaiva mahādhanāḥ || 36 ||
[Analyze grammar]

daśa ṣaṭca sahasrāṇi vāsudevāvarodhanam |
puraskṛtya yayurvajraṃ pautraṃ kṛṣṇasya dhīmataḥ || 37 ||
[Analyze grammar]

bahūni ca sahasrāṇi prayutānyarbudāni ca |
bhojavṛṣṇyandhakastrīṇāṃ hatanāthāni niryayuḥ || 38 ||
[Analyze grammar]

tatsāgarasamaprakhyaṃ vṛṣṇicakraṃ maharddhimat |
uvāha rathināṃ śreṣṭhaḥ pārthaḥ parapuraṃjayaḥ || 39 ||
[Analyze grammar]

niryāte tu jane tasminsāgaro makarālayaḥ |
dvārakāṃ ratnasaṃpūrṇāṃ jalenāplāvayattadā || 40 ||
[Analyze grammar]

tadadbhutamabhiprekṣya dvārakāvāsino janāḥ |
tūrṇāttūrṇataraṃ jagmuraho daivamiti bruvan || 41 ||
[Analyze grammar]

kānaneṣu ca ramyeṣu parvateṣu nadīṣu ca |
nivasannānayāmāsa vṛṣṇidārāndhanaṃjayaḥ || 42 ||
[Analyze grammar]

sa pañcanadamāsādya dhīmānatisamṛddhimat |
deśe gopaśudhānyāḍhye nivāsamakarotprabhuḥ || 43 ||
[Analyze grammar]

tato lobhaḥ samabhavaddasyūnāṃ nihateśvarāḥ |
dṛṣṭvā striyo nīyamānāḥ pārthenaikena bhārata || 44 ||
[Analyze grammar]

tataste pāpakarmāṇo lobhopahatacetasaḥ |
ābhīrā mantrayāmāsuḥ sametyāśubhadarśanāḥ || 45 ||
[Analyze grammar]

ayameko'rjuno yoddhā vṛddhabālaṃ hateśvaram |
nayatyasmānatikramya yodhāśceme hataujasaḥ || 46 ||
[Analyze grammar]

tato yaṣṭipraharaṇā dasyavaste sahasraśaḥ |
abhyadhāvanta vṛṣṇīnāṃ taṃ janaṃ loptrahāriṇaḥ || 47 ||
[Analyze grammar]

mahatā siṃhanādena drāvayantaḥ pṛthagjanam |
abhipeturdhanārthaṃ te kālaparyāyacoditāḥ || 48 ||
[Analyze grammar]

tato nivṛttaḥ kaunteyaḥ sahasā sapadānugaḥ |
uvāca tānmahābāhurarjunaḥ prahasanniva || 49 ||
[Analyze grammar]

nivartadhvamadharmajñā yadi stha na mumūrṣavaḥ |
nedānīṃ śaranirbhinnāḥ śocadhvaṃ nihatā mayā || 50 ||
[Analyze grammar]

tathoktāstena vīreṇa kadarthīkṛtya tadvacaḥ |
abhipeturjanaṃ mūḍhā vāryamāṇāḥ punaḥ punaḥ || 51 ||
[Analyze grammar]

tato'rjuno dhanurdivyaṃ gāṇḍīvamajaraṃ mahat |
āropayitumārebhe yatnādiva kathaṃcana || 52 ||
[Analyze grammar]

cakāra sajyaṃ kṛcchreṇa saṃbhrame tumule sati |
cintayāmāsa cāstrāṇi na ca sasmāra tānyapi || 53 ||
[Analyze grammar]

vaikṛtyaṃ tanmahaddṛṣṭvā bhujavīrye tathā yudhi |
divyānāṃ ca mahāstrāṇāṃ vināśādvrīḍito'bhavat || 54 ||
[Analyze grammar]

vṛṣṇiyodhāśca te sarve gajāśvarathayāyinaḥ |
na śekurāvartayituṃ hriyamāṇaṃ ca taṃ janam || 55 ||
[Analyze grammar]

kalatrasya bahutvāttu saṃpatatsu tatastataḥ |
prayatnamakarotpārtho janasya parirakṣaṇe || 56 ||
[Analyze grammar]

miṣatāṃ sarvayodhānāṃ tatastāḥ pramadottamāḥ |
samantato'vakṛṣyanta kāmāccānyāḥ pravavrajuḥ || 57 ||
[Analyze grammar]

tato gāṇḍīvanirmuktaiḥ śaraiḥ pārtho dhanaṃjayaḥ |
jaghāna dasyūnsodvego vṛṣṇibhṛtyaiḥ saha prabhuḥ || 58 ||
[Analyze grammar]

kṣaṇena tasya te rājankṣayaṃ jagmurajihmagāḥ |
akṣayā hi purā bhūtvā kṣīṇāḥ kṣatajabhojanāḥ || 59 ||
[Analyze grammar]

sa śarakṣayamāsādya duḥkhaśokasamāhataḥ |
dhanuṣkoṭyā tadā dasyūnavadhītpākaśāsaniḥ || 60 ||
[Analyze grammar]

prekṣatastveva pārthasya vṛṣṇyandhakavarastriyaḥ |
jagmurādāya te mlecchāḥ samantājjanamejaya || 61 ||
[Analyze grammar]

dhanaṃjayastu daivaṃ tanmanasācintayatprabhuḥ |
duḥkhaśokasamāviṣṭo niḥśvāsaparamo'bhavat || 62 ||
[Analyze grammar]

astrāṇāṃ ca praṇāśena bāhuvīryasya saṃkṣayāt |
dhanuṣaścāvidheyatvāccharāṇāṃ saṃkṣayeṇa ca || 63 ||
[Analyze grammar]

babhūva vimanāḥ pārtho daivamityanucintayan |
nyavartata tato rājannedamastīti cābravīt || 64 ||
[Analyze grammar]

tataḥ sa śeṣamādāya kalatrasya mahāmatiḥ |
hṛtabhūyiṣṭharatnasya kurukṣetramavātarat || 65 ||
[Analyze grammar]

evaṃ kalatramānīya vṛṣṇīnāṃ hṛtaśeṣitam |
nyaveśayata kauravyastatra tatra dhanaṃjayaḥ || 66 ||
[Analyze grammar]

hārdikyatanayaṃ pārtho nagaraṃ mārtikāvatam |
bhojarājakalatraṃ ca hṛtaśeṣaṃ narottamaḥ || 67 ||
[Analyze grammar]

tato vṛddhāṃśca bālāṃśca striyaścādāya pāṇḍavaḥ |
vīrairvihīnānsarvāṃstāñśakraprasthe nyaveśayat || 68 ||
[Analyze grammar]

yauyudhāniṃ sarasvatyāṃ putraṃ sātyakinaḥ priyam |
nyaveśayata dharmātmā vṛddhabālapuraskṛtam || 69 ||
[Analyze grammar]

indraprasthe dadau rājyaṃ vajrāya paravīrahā |
vajreṇākrūradārāstu vāryamāṇāḥ pravavrajuḥ || 70 ||
[Analyze grammar]

rukmiṇī tvatha gāndhārī śaibyā haimavatītyapi |
devī jāmbavatī caiva viviśurjātavedasam || 71 ||
[Analyze grammar]

satyabhāmā tathaivānyā devyaḥ kṛṣṇasya saṃmatāḥ |
vanaṃ praviviśū rājaṃstāpasye kṛtaniścayāḥ || 72 ||
[Analyze grammar]

dvārakāvāsino ye tu puruṣāḥ pārthamanvayuḥ |
yathārhaṃ saṃvibhajyainānvajre paryadadajjayaḥ || 73 ||
[Analyze grammar]

sa tatkṛtvā prāptakālaṃ bāṣpeṇāpihito'rjunaḥ |
kṛṣṇadvaipāyanaṃ rājandadarśāsīnamāśrame || 74 ||
[Analyze grammar]