Chapter 82

bhīṣma uvāca |
ye ca gāḥ saṃprayacchanti hutaśiṣṭāśinaśca ye |
teṣāṃ satrāṇi yajñāśca nityameva yudhiṣṭhira || 1 ||
[Analyze grammar]

ṛte dadhighṛteneha na yajñaḥ saṃpravartate |
tena yajñasya yajñatvamatomūlaṃ ca lakṣyate || 2 ||
[Analyze grammar]

dānānāmapi sarveṣāṃ gavāṃ dānaṃ praśasyate |
gāvaḥ śreṣṭhāḥ pavitrāśca pāvanaṃ hyetaduttamam || 3 ||
[Analyze grammar]

puṣṭyarthametāḥ seveta śāntyarthamapi caiva ha |
payo dadhi ghṛtaṃ yāsāṃ sarvapāpapramocanam || 4 ||
[Analyze grammar]

gāvastejaḥ paraṃ proktamiha loke paratra ca |
na gobhyaḥ paramaṃ kiṃcitpavitraṃ puruṣarṣabha || 5 ||
[Analyze grammar]

atrāpyudāharantīmamitihāsaṃ purātanam |
pitāmahasya saṃvādamindrasya ca yudhiṣṭhira || 6 ||
[Analyze grammar]

parābhūteṣu daityeṣu śakre tribhuvaneśvare |
prajāḥ samuditāḥ sarvāḥ satyadharmaparāyaṇāḥ || 7 ||
[Analyze grammar]

atharṣayaḥ sagandharvāḥ kiṃnaroragarākṣasāḥ |
devāsurasuparṇāśca prajānāṃ patayastathā |
paryupāsanta kauravya kadācidvai pitāmaham || 8 ||
[Analyze grammar]

nāradaḥ parvataścaiva viśvāvasuhahāhuhū |
divyatāneṣu gāyantaḥ paryupāsanta taṃ prabhum || 9 ||
[Analyze grammar]

tatra divyāni puṣpāṇi prāvahatpavanastathā |
ājahrurṛtavaścāpi sugandhīni pṛthakpṛthak || 10 ||
[Analyze grammar]

tasmindevasamāvāye sarvabhūtasamāgame |
divyavāditrasaṃghuṣṭe divyastrīcāraṇāvṛte |
indraḥ papraccha deveśamabhivādya praṇamya ca || 11 ||
[Analyze grammar]

devānāṃ bhagavankasmāllokeśānāṃ pitāmaha |
upariṣṭādgavāṃ loka etadicchāmi veditum || 12 ||
[Analyze grammar]

kiṃ tapo brahmacaryaṃ vā gobhiḥ kṛtamiheśvara |
devānāmupariṣṭādyadvasantyarajasaḥ sukham || 13 ||
[Analyze grammar]

tataḥ provāca taṃ brahmā śakraṃ balanisūdanam |
avajñātāstvayā nityaṃ gāvo balanisūdana || 14 ||
[Analyze grammar]

tena tvamāsāṃ māhātmyaṃ na vettha śṛṇu tatprabho |
gavāṃ prabhāvaṃ paramaṃ māhātmyaṃ ca surarṣabha || 15 ||
[Analyze grammar]

yajñāṅgaṃ kathitā gāvo yajña eva ca vāsava |
etābhiścāpyṛte yajño na pravartetkathaṃcana || 16 ||
[Analyze grammar]

dhārayanti prajāścaiva payasā haviṣā tathā |
etāsāṃ tanayāścāpi kṛṣiyogamupāsate || 17 ||
[Analyze grammar]

janayanti ca dhānyāni bījāni vividhāni ca |
tato yajñāḥ pravartante havyaṃ kavyaṃ ca sarvaśaḥ || 18 ||
[Analyze grammar]

payo dadhi ghṛtaṃ caiva puṇyāścaitāḥ surādhipa |
vahanti vividhānbhārānkṣuttṛṣṇāparipīḍitāḥ || 19 ||
[Analyze grammar]

munīṃśca dhārayantīha prajāścaivāpi karmaṇā |
vāsavākūṭavāhinyaḥ karmaṇā sukṛtena ca |
upariṣṭāttato'smākaṃ vasantyetāḥ sadaiva hi || 20 ||
[Analyze grammar]

etatte kāraṇaṃ śakra nivāsakṛtamadya vai |
gavāṃ devopariṣṭāddhi samākhyātaṃ śatakrato || 21 ||
[Analyze grammar]

etā hi varadattāśca varadāścaiva vāsava |
saurabhyaḥ puṇyakarmiṇyaḥ pāvanāḥ śubhalakṣaṇāḥ || 22 ||
[Analyze grammar]

yadarthaṃ gā gatāścaiva saurabhyaḥ surasattama |
tacca me śṛṇu kārtsnyena vadato balasūdana || 23 ||
[Analyze grammar]

purā devayuge tāta daityendreṣu mahātmasu |
trīṃllokānanuśāsatsu viṣṇau garbhatvamāgate || 24 ||
[Analyze grammar]

adityāstapyamānāyāstapo ghoraṃ suduścaram |
putrārthamamaraśreṣṭha pādenaikena nityadā || 25 ||
[Analyze grammar]

tāṃ tu dṛṣṭvā mahādevīṃ tapyamānāṃ mahattapaḥ |
dakṣasya duhitā devī surabhirnāma nāmataḥ || 26 ||
[Analyze grammar]

atapyata tapo ghoraṃ hṛṣṭā dharmaparāyaṇā |
kailāsaśikhare ramye devagandharvasevite || 27 ||
[Analyze grammar]

vyatiṣṭhadekapādena paramaṃ yogamāsthitā |
daśa varṣasahasrāṇi daśa varṣaśatāni ca || 28 ||
[Analyze grammar]

saṃtaptāstapasā tasyā devāḥ sarṣimahoragāḥ |
tatra gatvā mayā sārdhaṃ paryupāsanta tāṃ śubhām || 29 ||
[Analyze grammar]

athāhamabruvaṃ tatra devīṃ tāṃ tapasānvitām |
kimarthaṃ tapyate devi tapo ghoramanindite || 30 ||
[Analyze grammar]

prītaste'haṃ mahābhāge tapasānena śobhane |
varayasva varaṃ devi dātāsmīti puraṃdara || 31 ||
[Analyze grammar]

surabhyuvāca |
vareṇa bhagavanmahyaṃ kṛtaṃ lokapitāmaha |
eṣa eva varo me'dya yatprīto'si mamānagha || 32 ||
[Analyze grammar]

brahmovāca |
tāmevaṃ bruvatīṃ devīṃ surabhīṃ tridaśeśvara |
pratyabruvaṃ yaddevendra tannibodha śacīpate || 33 ||
[Analyze grammar]

alobhakāmyayā devi tapasā ca śubhena te |
prasanno'haṃ varaṃ tasmādamaratvaṃ dadāni te || 34 ||
[Analyze grammar]

trayāṇāmapi lokānāmupariṣṭānnivatsyasi |
matprasādācca vikhyāto golokaḥ sa bhaviṣyati || 35 ||
[Analyze grammar]

mānuṣeṣu ca kurvāṇāḥ prajāḥ karma sutāstava |
nivatsyanti mahābhāge sarvā duhitaraśca te || 36 ||
[Analyze grammar]

manasā cintitā bhogāstvayā vai divyamānuṣāḥ |
yacca svargasukhaṃ devi tatte saṃpatsyate śubhe || 37 ||
[Analyze grammar]

tasyā lokāḥ sahasrākṣa sarvakāmasamanvitāḥ |
na tatra kramate mṛtyurna jarā na ca pāvakaḥ |
na dainyaṃ nāśubhaṃ kiṃcidvidyate tatra vāsava || 38 ||
[Analyze grammar]

tatra divyānyaraṇyāni divyāni bhavanāni ca |
vimānāni ca yuktāni kāmagāni ca vāsava || 39 ||
[Analyze grammar]

vrataiśca vividhaiḥ puṇyaistathā tīrthānusevanāt |
tapasā mahatā caiva sukṛtena ca karmaṇā |
śakyaḥ samāsādayituṃ golokaḥ puṣkarekṣaṇa || 40 ||
[Analyze grammar]

etatte sarvamākhyātaṃ mayā śakrānupṛcchate |
na te paribhavaḥ kāryo gavāmarinisūdana || 41 ||
[Analyze grammar]

bhīṣma uvāca |
etacchrutvā sahasrākṣaḥ pūjayāmāsa nityadā |
gāścakre bahumānaṃ ca tāsu nityaṃ yudhiṣṭhira || 42 ||
[Analyze grammar]

etatte sarvamākhyātaṃ pāvanaṃ ca mahādyute |
pavitraṃ paramaṃ cāpi gavāṃ māhātmyamuttamam |
kīrtitaṃ puruṣavyāghra sarvapāpavināśanam || 43 ||
[Analyze grammar]

ya idaṃ kathayennityaṃ brāhmaṇebhyaḥ samāhitaḥ |
havyakavyeṣu yajñeṣu pitṛkāryeṣu caiva ha |
sārvakāmikamakṣayyaṃ pitṝṃstasyopatiṣṭhati || 44 ||
[Analyze grammar]

goṣu bhaktaśca labhate yadyadicchati mānavaḥ |
striyo'pi bhaktā yā goṣu tāśca kāmānavāpnuyuḥ || 45 ||
[Analyze grammar]

putrārthī labhate putraṃ kanyā patimavāpnuyāt |
dhanārthī labhate vittaṃ dharmārthī dharmamāpnuyāt || 46 ||
[Analyze grammar]

vidyārthī prāpnuyādvidyāṃ sukhārthī prāpnuyātsukham |
na kiṃciddurlabhaṃ caiva gavāṃ bhaktasya bhārata || 47 ||
[Analyze grammar]