Chapter 83

yudhiṣṭhira uvāca |
uktaṃ pitāmahenedaṃ gavāṃ dānamanuttamam |
viśeṣeṇa narendrāṇāmiti dharmamavekṣatām || 1 ||
[Analyze grammar]

rājyaṃ hi satataṃ duḥkhamāśramāśca sudurvidāḥ |
parivāreṇa vai duḥkhaṃ durdharaṃ cākṛtātmabhiḥ |
bhūyiṣṭhaṃ ca narendrāṇāṃ vidyate na śubhā gatiḥ || 2 ||
[Analyze grammar]

pūyante te'tra niyataṃ prayacchanto vasuṃdharām |
pūrvaṃ ca kathitā dharmāstvayā me kurunandana || 3 ||
[Analyze grammar]

evameva gavāmuktaṃ pradānaṃ te nṛgeṇa ha |
ṛṣiṇā nāciketena pūrvameva nidarśitam || 4 ||
[Analyze grammar]

vedopaniṣade caiva sarvakarmasu dakṣiṇā |
sarvakratuṣu coddiṣṭaṃ bhūmirgāvo'tha kāñcanam || 5 ||
[Analyze grammar]

tatra śrutistu paramā suvarṇaṃ dakṣiṇeti vai |
etadicchāmyahaṃ śrotuṃ pitāmaha yathātatham || 6 ||
[Analyze grammar]

kiṃ suvarṇaṃ kathaṃ jātaṃ kasminkāle kimātmakam |
kiṃ dānaṃ kiṃ phalaṃ caiva kasmācca paramucyate || 7 ||
[Analyze grammar]

kasmāddānaṃ suvarṇasya pūjayanti manīṣiṇaḥ |
kasmācca dakṣiṇārthaṃ tadyajñakarmasu śasyate || 8 ||
[Analyze grammar]

kasmācca pāvanaṃ śreṣṭhaṃ bhūmergobhyaśca kāñcanam |
paramaṃ dakṣiṇārthe ca tadbravīhi pitāmaha || 9 ||
[Analyze grammar]

bhīṣma uvāca |
śṛṇu rājannavahito bahukāraṇavistaram |
jātarūpasamutpattimanubhūtaṃ ca yanmayā || 10 ||
[Analyze grammar]

pitā mama mahātejāḥ śaṃtanurnidhanaṃ gataḥ |
tasya ditsurahaṃ śrāddhaṃ gaṅgādvāramupāgamam || 11 ||
[Analyze grammar]

tatrāgamya pituḥ putra śrāddhakarma samārabham |
mātā me jāhnavī caiva sāhāyyamakarottadā || 12 ||
[Analyze grammar]

tato'gratastapaḥsiddhānupaveśya bahūnṛṣīn |
toyapradānātprabhṛti kāryāṇyahamathārabham || 13 ||
[Analyze grammar]

tatsamāpya yathoddiṣṭaṃ pūrvakarma samāhitaḥ |
dātuṃ nirvapaṇaṃ samyagyathāvadahamārabham || 14 ||
[Analyze grammar]

tatastaṃ darbhavinyāsaṃ bhittvā surucirāṅgadaḥ |
pralambābharaṇo bāhurudatiṣṭhadviśāṃ pate || 15 ||
[Analyze grammar]

tamutthitamahaṃ dṛṣṭvā paraṃ vismayamāgamam |
pratigrahītā sākṣānme piteti bharatarṣabha || 16 ||
[Analyze grammar]

tato me punarevāsītsaṃjñā saṃcintya śāstrataḥ |
nāyaṃ vedeṣu vihito vidhirhasta iti prabho |
piṇḍo deyo nareṇeha tato matirabhūnmama || 17 ||
[Analyze grammar]

sākṣānneha manuṣyasya pitaro'ntarhitāḥ kvacit |
gṛhṇanti vihitaṃ tvevaṃ piṇḍo deyaḥ kuśeṣviti || 18 ||
[Analyze grammar]

tato'haṃ tadanādṛtya piturhastanidarśanam |
śāstrapramāṇātsūkṣmaṃ tu vidhiṃ pārthiva saṃsmaran || 19 ||
[Analyze grammar]

tato darbheṣu tatsarvamadadaṃ bharatarṣabha |
śāstramārgānusāreṇa tadviddhi manujarṣabha || 20 ||
[Analyze grammar]

tataḥ so'ntarhito bāhuḥ piturmama narādhipa |
tato māṃ darśayāmāsuḥ svapnānte pitarastadā || 21 ||
[Analyze grammar]

prīyamāṇāstu māmūcuḥ prītāḥ sma bharatarṣabha |
vijñānena tavānena yanna muhyasi dharmataḥ || 22 ||
[Analyze grammar]

tvayā hi kurvatā śāstraṃ pramāṇamiha pārthiva |
ātmā dharmaḥ śrutaṃ vedāḥ pitaraśca maharṣibhiḥ || 23 ||
[Analyze grammar]

sākṣātpitāmaho brahmā guravo'tha prajāpatiḥ |
pramāṇamupanītā vai sthitiśca na vicālitā || 24 ||
[Analyze grammar]

tadidaṃ samyagārabdhaṃ tvayādya bharatarṣabha |
kiṃ tu bhūmergavāṃ cārthe suvarṇaṃ dīyatāmiti || 25 ||
[Analyze grammar]

evaṃ vayaṃ ca dharmaśca sarve cāsmatpitāmahāḥ |
pāvitā vai bhaviṣyanti pāvanaṃ paramaṃ hi tat || 26 ||
[Analyze grammar]

daśa pūrvāndaśa parāṃstathā saṃtārayanti te |
suvarṇaṃ ye prayacchanti evaṃ me pitaro'bruvan || 27 ||
[Analyze grammar]

tato'haṃ vismito rājanpratibuddho viśāṃ pate |
suvarṇadāne'karavaṃ matiṃ bharatasattama || 28 ||
[Analyze grammar]

itihāsamimaṃ cāpi śṛṇu rājanpurātanam |
jāmadagnyaṃ prati vibho dhanyamāyuṣyameva ca || 29 ||
[Analyze grammar]

jāmadagnyena rāmeṇa tīvraroṣānvitena vai |
triḥsaptakṛtvaḥ pṛthivī kṛtā niḥkṣatriyā purā || 30 ||
[Analyze grammar]

tato jitvā mahīṃ kṛtsnāṃ rāmo rājīvalocanaḥ |
ājahāra kratuṃ vīro brahmakṣatreṇa pūjitam || 31 ||
[Analyze grammar]

vājimedhaṃ mahārāja sarvakāmasamanvitam |
pāvanaṃ sarvabhūtānāṃ tejodyutivivardhanam || 32 ||
[Analyze grammar]

vipāpmāpi sa tejasvī tena kratuphalena vai |
naivātmano'tha laghutāṃ jāmadagnyo'bhyagacchata || 33 ||
[Analyze grammar]

sa tu kratuvareṇeṣṭvā mahātmā dakṣiṇāvatā |
papracchāgamasaṃpannānṛṣīndevāṃśca bhārgavaḥ || 34 ||
[Analyze grammar]

pāvanaṃ yatparaṃ nṝṇāmugre karmaṇi vartatām |
taducyatāṃ mahābhāgā iti jātaghṛṇo'bravīt || 35 ||
[Analyze grammar]

vasiṣṭha uvāca |
devatāste prayacchanti suvarṇaṃ ye dadatyuta |
agnirhi devatāḥ sarvāḥ suvarṇaṃ ca tadātmakam || 36 ||
[Analyze grammar]

tasmātsuvarṇaṃ dadatā dattāḥ sarvāśca devatāḥ |
bhavanti puruṣavyāghra na hyataḥ paramaṃ viduḥ || 37 ||
[Analyze grammar]

bhūya eva ca māhātmyaṃ suvarṇasya nibodha me |
gadato mama viprarṣe sarvaśastrabhṛtāṃ vara || 38 ||
[Analyze grammar]

mayā śrutamidaṃ pūrvaṃ purāṇe bhṛgunandana |
prajāpateḥ kathayato manoḥ svāyaṃbhuvasya vai || 39 ||
[Analyze grammar]

śūlapāṇerbhagavato rudrasya ca mahātmanaḥ |
girau himavati śreṣṭhe tadā bhṛgukulodvaha || 40 ||
[Analyze grammar]

devyā vivāhe nirvṛtte rudrāṇyā bhṛgunandana |
samāgame bhagavato devyā saha mahātmanaḥ |
tataḥ sarve samudvignā bhagavantamupāgaman || 41 ||
[Analyze grammar]

te mahādevamāsīnaṃ devīṃ ca varadāmumām |
prasādya śirasā sarve rudramūcurbhṛgūdvaha || 42 ||
[Analyze grammar]

ayaṃ samāgamo deva devyā saha tavānagha |
tapasvinastapasvinyā tejasvinyātitejasaḥ |
amoghatejāstvaṃ deva devī ceyamumā tathā || 43 ||
[Analyze grammar]

apatyaṃ yuvayordeva balavadbhavitā prabho |
tannūnaṃ triṣu lokeṣu na kiṃciccheṣayiṣyati || 44 ||
[Analyze grammar]

tadebhyaḥ praṇatebhyastvaṃ devebhyaḥ pṛthulocana |
varaṃ prayaccha lokeśa trailokyahitakāmyayā |
apatyārthaṃ nigṛhṇīṣva tejo jvalitamuttamam || 45 ||
[Analyze grammar]

iti teṣāṃ kathayatāṃ bhagavāngovṛṣadhvajaḥ |
evamastviti devāṃstānviprarṣe pratyabhāṣata || 46 ||
[Analyze grammar]

ityuktvā cordhvamanayattadreto vṛṣavāhanaḥ |
ūrdhvaretāḥ samabhavattataḥprabhṛti cāpi saḥ || 47 ||
[Analyze grammar]

rudrāṇī tu tataḥ kruddhā prajocchede tathā kṛte |
devānathābravīttatra strībhāvātparuṣaṃ vacaḥ || 48 ||
[Analyze grammar]

yasmādapatyakāmo vai bhartā me vinivartitaḥ |
tasmātsarve surā yūyamanapatyā bhaviṣyatha || 49 ||
[Analyze grammar]

prajocchedo mama kṛto yasmādyuṣmābhiradya vai |
tasmātprajā vaḥ khagamāḥ sarveṣāṃ na bhaviṣyati || 50 ||
[Analyze grammar]

pāvakastu na tatrāsīcchāpakāle bhṛgūdvaha |
devā devyāstathā śāpādanapatyāstadābhavan || 51 ||
[Analyze grammar]

rudrastu tejo'pratimaṃ dhārayāmāsa tattadā |
praskannaṃ tu tatastasmātkiṃcittatrāpatadbhuvi || 52 ||
[Analyze grammar]

tatpapāta tadā cāgnau vavṛdhe cādbhutopamam |
tejastejasi saṃpṛktamekayonitvamāgatam || 53 ||
[Analyze grammar]

etasminneva kāle tu devāḥ śakrapurogamāḥ |
asurastārako nāma tena saṃtāpitā bhṛśam || 54 ||
[Analyze grammar]

ādityā vasavo rudrā maruto'thāśvināvapi |
sādhyāśca sarve saṃtrastā daiteyasya parākramāt || 55 ||
[Analyze grammar]

sthānāni devatānāṃ hi vimānāni purāṇi ca |
ṛṣīṇāmāśramāścaiva babhūvurasurairhṛtāḥ || 56 ||
[Analyze grammar]

te dīnamanasaḥ sarve devāśca ṛṣayaśca ha |
prajagmuḥ śaraṇaṃ devaṃ brahmāṇamajaraṃ prabhum || 57 ||
[Analyze grammar]