Chapter 92

utathya uvāca |
kālavarṣī ca parjanyo dharmacārī ca pārthivaḥ |
saṃpadyadaiṣā bhavati sā bibharti sukhaṃ prajāḥ || 1 ||
[Analyze grammar]

yo na jānāti nirhantuṃ vastrāṇāṃ rajako malam |
raktāni vā śodhayituṃ yathā nāsti tathaiva saḥ || 2 ||
[Analyze grammar]

evameva dvijendrāṇāṃ kṣatriyāṇāṃ viśāmapi |
śūdrāścaturṇāṃ varṇānāṃ nānākarmasvavasthitāḥ || 3 ||
[Analyze grammar]

karma śūdre kṛṣirvaiśye daṇḍanītiśca rājani |
brahmacaryaṃ tapo mantrāḥ satyaṃ cāpi dvijātiṣu || 4 ||
[Analyze grammar]

teṣāṃ yaḥ kṣatriyo veda vastrāṇāmiva śodhanam |
śīladoṣānvinirhantuṃ sa pitā sa prajāpatiḥ || 5 ||
[Analyze grammar]

kṛtaṃ tretā dvāparaśca kaliśca bharatarṣabha |
rājavṛttāni sarvāṇi rājaiva yugamucyate || 6 ||
[Analyze grammar]

cāturvarṇyaṃ tathā vedāścāturāśramyameva ca |
sarvaṃ pramuhyate hyetadyadā rājā pramādyati || 7 ||
[Analyze grammar]

rājaiva kartā bhūtānāṃ rājaiva ca vināśakaḥ |
dharmātmā yaḥ sa kartā syādadharmātmā vināśakaḥ || 8 ||
[Analyze grammar]

rājño bhāryāśca putrāśca bāndhavāḥ suhṛdastathā |
sametya sarve śocanti yadā rājā pramādyati || 9 ||
[Analyze grammar]

hastino'śvāśca gāvaścāpyuṣṭrāśvataragardabhāḥ |
adharmavṛtte nṛpatau sarve sīdanti pārthiva || 10 ||
[Analyze grammar]

durbalārthaṃ balaṃ sṛṣṭaṃ dhātrā māndhātarucyate |
abalaṃ tanmahadbhūtaṃ yasminsarvaṃ pratiṣṭhitam || 11 ||
[Analyze grammar]

yacca bhūtaṃ sa bhajate bhūtā ye ca tadanvayāḥ |
adharmasthe hi nṛpatau sarve sīdanti pārthiva || 12 ||
[Analyze grammar]

durbalasya hi yaccakṣurmunerāśīviṣasya ca |
aviṣahyatamaṃ manye mā sma durbalamāsadaḥ || 13 ||
[Analyze grammar]

durbalāṃstāta budhyethā nityamevāvimānitān |
mā tvāṃ durbalacakṣūṃṣi pradaheyuḥ sabāndhavam || 14 ||
[Analyze grammar]

na hi durbaladagdhasya kule kiṃcitprarohati |
āmūlaṃ nirdahatyeva mā sma durbalamāsadaḥ || 15 ||
[Analyze grammar]

abalaṃ vai balācchreyo yaccātibalavadbalam |
balasyābaladagdhasya na kiṃcidavaśiṣyate || 16 ||
[Analyze grammar]

vimānito hatotkruṣṭastrātāraṃ cenna vindati |
amānuṣakṛtastatra daṇḍo hanti narādhipam || 17 ||
[Analyze grammar]

mā sma tāta bale stheyā bādhiṣṭhā māpi durbalam |
mā tvā durbalacakṣūṃṣi dhakṣyantyagnirivāśrayam || 18 ||
[Analyze grammar]

yāni mithyābhiśastānāṃ patantyaśrūṇi rodatām |
tāni putrānpaśūnghnanti teṣāṃ mithyābhiśāsatām || 19 ||
[Analyze grammar]

yadi nātmani putreṣu na cetpautreṣu naptṛṣu |
na hi pāpaṃ kṛtaṃ karma sadyaḥ phalati gauriva || 20 ||
[Analyze grammar]

yatrābalo vadhyamānastrātāraṃ nādhigacchati |
mahāndaivakṛtastatra daṇḍaḥ patati dāruṇaḥ || 21 ||
[Analyze grammar]

yuktā yadā jānapadā bhikṣante brāhmaṇā iva |
abhīkṣṇaṃ bhikṣudoṣeṇa rājānaṃ ghnanti tādṛśāḥ || 22 ||
[Analyze grammar]

rājño yadā janapade bahavo rājapūruṣāḥ |
anayenopavartante tadrājñaḥ kilbiṣaṃ mahat || 23 ||
[Analyze grammar]

yadā yuktā nayantyarthānkāmādarthavaśena vā |
kṛpaṇaṃ yācamānānāṃ tadrājño vaiśasaṃ mahat || 24 ||
[Analyze grammar]

mahāvṛkṣo jāyate vardhate ca taṃ caiva bhūtāni samāśrayanti |
yadā vṛkṣaśchidyate dahyate vā tadāśrayā aniketā bhavanti || 25 ||
[Analyze grammar]

yadā rāṣṭre dharmamagryaṃ caranti saṃskāraṃ vā rājaguṇaṃ bruvāṇāḥ |
tairevādharmaścarito dharmamohāttūrṇaṃ jahyātsukṛtaṃ duṣkṛtaṃ ca || 26 ||
[Analyze grammar]

yatra pāpā jñāyamānāścaranti satāṃ kalirvindati tatra rājñaḥ |
yadā rājā śāsti narānnaśiṣyānna tadrājyaṃ vardhate bhūmipāla || 27 ||
[Analyze grammar]

yaścāmātyaṃ mānayitvā yathārhaṃ mantre ca yuddhe ca nṛpo niyuñjyāt |
pravardhate tasya rāṣṭraṃ nṛpasya bhuṅkte mahīṃ cāpyakhilāṃ cirāya || 28 ||
[Analyze grammar]

atrāpi sukṛtaṃ karma vācaṃ caiva subhāṣitām |
samīkṣya pūjayanrājā dharmaṃ prāpnotyanuttamam || 29 ||
[Analyze grammar]

saṃvibhajya yadā bhuṅkte na cānyānavamanyate |
nihanti balinaṃ dṛptaṃ sa rājño dharma ucyate || 30 ||
[Analyze grammar]

trāyate hi yadā sarvaṃ vācā kāyena karmaṇā |
putrasyāpi na mṛṣyecca sa rājño dharma ucyate || 31 ||
[Analyze grammar]

yadā śāraṇikānrājā putravatparirakṣati |
bhinatti na ca maryādāṃ sa rājño dharma ucyate || 32 ||
[Analyze grammar]

yadāptadakṣiṇairyajñairyajate śraddhayānvitaḥ |
kāmadveṣāvanādṛtya sa rājño dharma ucyate || 33 ||
[Analyze grammar]

kṛpaṇānāthavṛddhānāṃ yadāśru vyapamārṣṭi vai |
harṣaṃ saṃjanayannṝṇāṃ sa rājño dharma ucyate || 34 ||
[Analyze grammar]

vivardhayati mitrāṇi tathārīṃścāpakarṣati |
saṃpūjayati sādhūṃśca sa rājño dharma ucyate || 35 ||
[Analyze grammar]

satyaṃ pālayati prāptyā nityaṃ bhūmiṃ prayacchati |
pūjayatyatithīnbhṛtyānsa rājño dharma ucyate || 36 ||
[Analyze grammar]

nigrahānugrahau cobhau yatra syātāṃ pratiṣṭhitau |
asmiṃlloke pare caiva rājā tatprāpnute phalam || 37 ||
[Analyze grammar]

yamo rājā dhārmikāṇāṃ māndhātaḥ parameśvaraḥ |
saṃyacchanbhavati prāṇānnasaṃyacchaṃstu pāpakaḥ || 38 ||
[Analyze grammar]

ṛtvikpurohitācāryānsatkṛtyānavamanya ca |
yadā samyakpragṛhṇāti sa rājño dharma ucyate || 39 ||
[Analyze grammar]

yamo yacchati bhūtāni sarvāṇyevāviśeṣataḥ |
tasya rājñānukartavyaṃ yantavyā vidhivatprajāḥ || 40 ||
[Analyze grammar]

sahasrākṣeṇa rājā hi sarva evopamīyate |
sa paśyati hi yaṃ dharmaṃ sa dharmaḥ puruṣarṣabha || 41 ||
[Analyze grammar]

apramādena śikṣethāḥ kṣamāṃ buddhiṃ dhṛtiṃ matim |
bhūtānāṃ sattvajijñāsāṃ sādhvasādhu ca sarvadā || 42 ||
[Analyze grammar]

saṃgrahaḥ sarvabhūtānāṃ dānaṃ ca madhurā ca vāk |
paurajānapadāścaiva goptavyāḥ svā yathā prajāḥ || 43 ||
[Analyze grammar]

na jātvadakṣo nṛpatiḥ prajāḥ śaknoti rakṣitum |
bhāro hi sumahāṃstāta rājyaṃ nāma suduṣkaram || 44 ||
[Analyze grammar]

taddaṇḍavinnṛpaḥ prājñaḥ śūraḥ śaknoti rakṣitum |
na hi śakyamadaṇḍena klībenābuddhināpi vā || 45 ||
[Analyze grammar]

abhirūpaiḥ kule jātairdakṣairbhaktairbahuśrutaiḥ |
sarvā buddhīḥ parīkṣethāstāpasāśramiṇāmapi || 46 ||
[Analyze grammar]

tatastvaṃ sarvabhūtānāṃ dharmaṃ vetsyasi vai param |
svadeśe paradeśe vā na te dharmo vinaśyati || 47 ||
[Analyze grammar]

dharmaścārthaśca kāmaśca dharma evottaro bhavet |
asmiṃlloke pare caiva dharmavitsukhamedhate || 48 ||
[Analyze grammar]

tyajanti dārānprāṇāṃśca manuṣyāḥ pratipūjitāḥ |
saṃgrahaścaiva bhūtānāṃ dānaṃ ca madhurā ca vāk || 49 ||
[Analyze grammar]

apramādaśca śaucaṃ ca tāta bhūtikaraṃ mahat |
etebhyaścaiva māndhātaḥ satataṃ mā pramādithāḥ || 50 ||
[Analyze grammar]

apramatto bhavedrājā chidradarśī parātmanoḥ |
nāsya chidraṃ paraḥ paśyecchidreṣu paramanviyāt || 51 ||
[Analyze grammar]

etadvṛttaṃ vāsavasya yamasya varuṇasya ca |
rājarṣīṇāṃ ca sarveṣāṃ tattvamapyanupālaya || 52 ||
[Analyze grammar]

tatkuruṣva mahārāja vṛttaṃ rājarṣisevitam |
ātiṣṭha divyaṃ panthānamahnāya bharatarṣabha || 53 ||
[Analyze grammar]

dharmavṛttaṃ hi rājānaṃ pretya ceha ca bhārata |
devarṣipitṛgandharvāḥ kīrtayantyamitaujasaḥ || 54 ||
[Analyze grammar]

bhīṣma uvāca |
sa evamukto māndhātā tenotathyena bhārata |
kṛtavānaviśaṅkastadekaḥ prāpa ca medinīm || 55 ||
[Analyze grammar]

bhavānapi tathā samyaṅmāndhāteva mahīpatiḥ |
dharmaṃ kṛtvā mahīṃ rakṣansvarge sthānamavāpsyasi || 56 ||
[Analyze grammar]