Chapter 65

saṃjaya uvāca |
tau śaṅkhabherīninade samṛddhe samīyatuḥ śvetahayau narāgryau |
vaikartanaḥ sūtaputro'rjunaśca durmantrite tava putrasya rājan || 1 ||
[Analyze grammar]

yathā gajau haimavatau prabhinnau pragṛhya dantāviva vāśitārthe |
tathā samājagmaturugravegau dhanaṃjayaścādhirathiśca vīrau || 2 ||
[Analyze grammar]

balāhakeneva yathā balāhako yadṛcchayā vā giriṇā giriryathā |
tathā dhanurjyātalaneminisvanau samīyatustāviṣuvarṣavarṣiṇau || 3 ||
[Analyze grammar]

pravṛddhaśṛṅgadrumavīrudoṣadhī pravṛddhanānāvidhaparvataukasau |
yathācalau vā galitau mahābalau tathā mahāstrairitaretaraṃ ghnataḥ || 4 ||
[Analyze grammar]

sa saṃnipātastu tayormahānabhūtsureśavairocanayoryathā purā |
śarairvibhugnāṅganiyantṛvāhanaḥ suduḥsaho'nyaiḥ paṭuśoṇitodakaḥ || 5 ||
[Analyze grammar]

prabhūtapadmotpalamatsyakacchapau mahāhradau pakṣigaṇānunāditau |
susaṃnikṛṣṭāvaniloddhatau yathā tathā rathau tau dhvajinau samīyatuḥ || 6 ||
[Analyze grammar]

ubhau mahendrasya samānavikramāvubhau mahendrapratimau mahārathau |
mahendravajrapratimaiśca sāyakairmahendravṛtrāviva saṃprajahratuḥ || 7 ||
[Analyze grammar]

sanāgapattyaśvarathe ubhe bale vicitravarṇābharaṇāmbarasraje |
cakampatuśconnamataḥ sma vismayādviyadgatāścārjunakarṇasaṃyuge || 8 ||
[Analyze grammar]

bhujāḥ savajrāṅgulayaḥ samucchritāḥ sasiṃhanādā hṛṣitairdidṛkṣubhiḥ |
yadārjunaṃ mattamiva dvipo dvipaṃ samabhyayādādhirathirjighāṃsayā || 9 ||
[Analyze grammar]

abhyakrośansomakāstatra pārthaṃ tvarasva yāhyarjuna vidhya karṇam |
chindhyasya mūrdhānamalaṃ cireṇa śraddhāṃ ca rājyāddhṛtarāṣṭrasūnoḥ || 10 ||
[Analyze grammar]

tathāsmākaṃ bahavastatra yodhāḥ karṇaṃ tadā yāhi yāhītyavocan |
jahyarjunaṃ karṇa tataḥ sacīrāḥ punarvanaṃ yāntu cirāya pārthāḥ || 11 ||
[Analyze grammar]

tataḥ karṇaḥ prathamaṃ tatra pārthaṃ maheṣubhirdaśabhiḥ paryavidhyat |
tamarjunaḥ pratyavidhyacchitāgraiḥ kakṣāntare daśabhiratīva kruddhaḥ || 12 ||
[Analyze grammar]

parasparaṃ tau viśikhaiḥ sutīkṣṇaistatakṣatuḥ sūtaputro'rjunaśca |
parasparasyāntarepsū vimarde subhīmamabhyāyayatuḥ prahṛṣṭau || 13 ||
[Analyze grammar]

amṛṣyamāṇaśca mahāvimarde tatrākrudhyadbhīmaseno mahātmā |
athābravītpāṇinā pāṇimāghnansaṃdaṣṭauṣṭho nṛtyati vādayanniva |
kathaṃ nu tvāṃ sūtaputraḥ kirīṭinmaheṣubhirdaśabhiravidhyadagre || 14 ||
[Analyze grammar]

yayā dhṛtyā sarvabhūtānyajaiṣīrgrāsaṃ dadadvahnaye khāṇḍave tvam |
tayā dhṛtyā sūtaputraṃ jahi tvamahaṃ vainaṃ gadayā pothayiṣye || 15 ||
[Analyze grammar]

athābravīdvāsudevo'pi pārthaṃ dṛṣṭvā ratheṣūnpratihanyamānān |
amīmṛdatsarvathā te'dya karṇo hyastrairastrāṇi kimidaṃ kirīṭin || 16 ||
[Analyze grammar]

sa vīra kiṃ muhyasi nāvadhīyase nadantyete kuravaḥ saṃprahṛṣṭāḥ |
karṇaṃ puraskṛtya vidurhi sarve tvadastramastrairvinipātyamānam || 17 ||
[Analyze grammar]

yayā dhṛtyā nihataṃ tāmasāstraṃ yuge yuge rākṣasāścāpi ghorāḥ |
dambhodbhavāścāsurāścāhaveṣu tayā dhṛtyā tvaṃ jahi sūtaputram || 18 ||
[Analyze grammar]

anena vāsya kṣuraneminādya saṃchinddhi mūrdhānamareḥ prasahya |
mayā nisṛṣṭena sudarśanena vajreṇa śakro namucerivāreḥ || 19 ||
[Analyze grammar]

kirātarūpī bhagavānyayā ca tvayā mahatyā paritoṣito'bhūt |
tāṃ tvaṃ dhṛtiṃ vīra punargṛhītvā sahānubandhaṃ jahi sūtaputram || 20 ||
[Analyze grammar]

tato mahīṃ sāgaramekhalāṃ tvaṃ sapattanāṃ grāmavatīṃ samṛddhām |
prayaccha rājñe nihatārisaṃghāṃ yaśaśca pārthātulamāpnuhi tvam || 21 ||
[Analyze grammar]

saṃcodito bhīmajanārdanābhyāṃ smṛtvā tadātmānamavekṣya sattvam |
mahātmanaścāgamane viditvā prayojanaṃ keśavamityuvāca || 22 ||
[Analyze grammar]

prāduṣkaromyeṣa mahāstramugraṃ śivāya lokasya vadhāya sauteḥ |
tanme'nujānātu bhavānsurāśca brahmā bhavo brahmavidaśca sarve || 23 ||
[Analyze grammar]

ityūcivānbrāhmamasahyamastraṃ prāduścakre manasā saṃvidheyam |
tato diśaśca pradiśaśca sarvāḥ samāvṛṇotsāyakairbhūritejāḥ |
sasarja bāṇānbharatarṣabho'pi śataṃśatānekavadāśuvegān || 24 ||
[Analyze grammar]

vaikartanenāpi tathājimadhye sahasraśo bāṇagaṇā visṛṣṭāḥ |
te ghoṣiṇaḥ pāṇḍavamabhyupeyuḥ parjanyamuktā iva vāridhārāḥ || 25 ||
[Analyze grammar]

sa bhīmasenaṃ ca janārdanaṃ ca kirīṭinaṃ cāpyamanuṣyakarmā |
tribhistribhirbhīmabalo nihatya nanāda ghoraṃ mahatā svareṇa || 26 ||
[Analyze grammar]

sa karṇabāṇābhihataḥ kirīṭī bhīmaṃ tathā prekṣya janārdanaṃ ca |
amṛṣyamāṇaḥ punareva pārthaḥ śarāndaśāṣṭau ca samudbabarha || 27 ||
[Analyze grammar]

suṣeṇamekena śareṇa viddhvā śalyaṃ caturbhistribhireva karṇam |
tataḥ sumuktairdaśabhirjaghāna sabhāpatiṃ kāñcanavarmanaddham || 28 ||
[Analyze grammar]

sa rājaputro viśirā vibāhurvivājisūto vidhanurviketuḥ |
tato rathāgrādapatatprabhagnaḥ paraśvadhaiḥ śāla ivābhikṛttaḥ || 29 ||
[Analyze grammar]

punaśca karṇaṃ tribhiraṣṭabhiśca dvābhyāṃ caturbhirdaśabhiśca viddhvā |
catuḥśatāndviradānsāyudhīyānhatvā rathānaṣṭaśataṃ jaghāna |
sahasramaśvāṃśca punaśca sādīnaṣṭau sahasrāṇi ca pattivīrān || 30 ||
[Analyze grammar]

dṛṣṭvājimukhyāvatha yudhyamānau didṛkṣavaḥ śūravarāvarighnau |
karṇaṃ ca pārthaṃ ca niyamya vāhānkhasthā mahīsthāśca janāvatasthuḥ || 31 ||
[Analyze grammar]

tato dhanurjyā sahasātikṛṣṭā sughoṣamācchidyata pāṇḍavasya |
tasminkṣaṇe sūtaputrastu pārthaṃ samācinotkṣudrakāṇāṃ śatena || 32 ||
[Analyze grammar]

nirmuktasarpapratimaiśca tīkṣṇaistailapradhautaiḥ khagapatravājaiḥ |
ṣaṣṭyā nārācairvāsudevaṃ bibheda tadantaraṃ somakāḥ prādravanta || 33 ||
[Analyze grammar]

tato dhanurjyāmavadhamya śīghraṃ śarānastānādhirathervidhamya |
susaṃrabdhaḥ karṇaśarakṣatāṅgo raṇe pārthaḥ somakānpratyagṛhṇāt |
na pakṣiṇaḥ saṃpatantyantarikṣe kṣepīyasāstreṇa kṛte'ndhakāre || 34 ||
[Analyze grammar]

śalyaṃ ca pārtho daśabhiḥ pṛṣatkairbhṛśaṃ tanutre prahasannavidhyat |
tataḥ karṇaṃ dvādaśabhiḥ sumuktairviddhvā punaḥ saptabhirabhyavidhyat || 35 ||
[Analyze grammar]

sa pārthabāṇāsanaveganunnairdṛḍhāhataḥ patribhirugravegaiḥ |
vibhinnagātraḥ kṣatajokṣitāṅgaḥ karṇo babhau rudra ivātateṣuḥ || 36 ||
[Analyze grammar]

tatastribhiśca tridaśādhipopamaṃ śarairbibhedādhirathirdhanaṃjayam |
śarāṃstu pañca jvalitānivoragānpravīrayāmāsa jighāṃsuracyute || 37 ||
[Analyze grammar]

te varma bhittvā puruṣottamasya suvarṇacitraṃ nyapatansumuktāḥ |
vegena gāmāviviśuḥ suvegāḥ snātvā ca karṇābhimukhāḥ pratīyuḥ || 38 ||
[Analyze grammar]

tānpañcabhallaistvaritaiḥ sumuktaistridhā tridhaikaikamathoccakarta |
dhanaṃjayaste nyapatanpṛthivyāṃ mahāhayastakṣakaputrapakṣāḥ || 39 ||
[Analyze grammar]

tataḥ prajajvāla kirīṭamālī krodhena kakṣaṃ pradahannivāgniḥ |
sa karṇamākarṇavikṛṣṭasṛṣṭaiḥ śaraiḥ śarīrāntakarairjvaladbhiḥ |
marmasvavidhyatsa cacāla duḥkhāddhairyāttu tasthāvatimātradhairyaḥ || 40 ||
[Analyze grammar]

tataḥ śaraughaiḥ pradiśo diśaśca raviprabhā karṇarathaśca rājan |
adṛśya āsītkupite dhanaṃjaye tuṣāranīhāravṛtaṃ yathā nabhaḥ || 41 ||
[Analyze grammar]

sa cakrarakṣānatha pādarakṣānpuraḥsarānpṛṣṭhagopāṃśca sarvān |
duryodhanenānumatānarighnānsamuccitānsurathānsārabhūtān || 42 ||
[Analyze grammar]

dvisāhasrānsamare savyasācī kurupravīrānṛṣabhaḥ kurūṇām |
kṣaṇena sarvānsarathāśvasūtānnināya rājankṣayamekavīraḥ || 43 ||
[Analyze grammar]

athāpalāyanta vihāya karṇaṃ tavātmajāḥ kuravaścāvaśiṣṭāḥ |
hatānavākīrya śarakṣatāṃśca lālapyamānāṃstanayānpitṝṃśca || 44 ||
[Analyze grammar]

sa sarvataḥ prekṣya diśo viśūnyā bhayāvadīrṇaiḥ kurubhirvihīnaḥ |
na vivyathe bhārata tatra karṇaḥ pratīpamevārjunamabhyadhāvat || 45 ||
[Analyze grammar]