Chapter 66

saṃjaya uvāca |
tato'payātāḥ śarapātamātramavasthitāḥ kuravo bhinnasenāḥ |
vidyutprakāśaṃ dadṛśuḥ samantāddhanaṃjayāstraṃ samudīryamāṇam || 1 ||
[Analyze grammar]

tadarjunāstraṃ grasate sma vīrānviyattathākāśamanantaghoṣam |
kruddhena pārthena tadāśu sṛṣṭaṃ vadhāya karṇasya mahāvimarde || 2 ||
[Analyze grammar]

rāmādupāttena mahāmahimnā ātharvaṇenārivināśanena |
tadarjunāstraṃ vyadhamaddahantaṃ pārthaṃ ca bāṇairniśitairnijaghne || 3 ||
[Analyze grammar]

tato vimardaḥ sumahānbabhūva tasyārjunasyādhiratheśca rājan |
anyonyamāsādayatoḥ pṛṣatkairviṣāṇaghātairdvipayorivograiḥ || 4 ||
[Analyze grammar]

tato ripughnaṃ samadhatta karṇaḥ susaṃśitaṃ sarpamukhaṃ jvalantam |
raudraṃ śaraṃ saṃyati supradhautaṃ pārthārthamatyarthacirāya guptam || 5 ||
[Analyze grammar]

sadārcitaṃ candanacūrṇaśāyinaṃ suvarṇanālīśayanaṃ mahāviṣam |
pradīptamairāvatavaṃśasaṃbhavaṃ śiro jihīrṣuryudhi phalgunasya || 6 ||
[Analyze grammar]

tamabravīnmadrarājo mahātmā vaikartanaṃ prekṣya hi saṃhiteṣum |
na karṇa grīvāmiṣureṣa prāpsyate saṃlakṣya saṃdhatsva śaraṃ śiroghnam || 7 ||
[Analyze grammar]

athābravītkrodhasaṃraktanetraḥ karṇaḥ śalyaṃ saṃdhiteṣuḥ prasahya |
na saṃdhatte dviḥ śaraṃ śalya karṇo na mādṛśāḥ śāṭhyayuktā bhavanti || 8 ||
[Analyze grammar]

tathaivamuktvā visasarja taṃ śaraṃ balāhakaṃ varṣaghanābhipūjitam |
hato'si vai phalguna ityavocattatastvarannūrjitamutsasarja || 9 ||
[Analyze grammar]

saṃdhīyamānaṃ bhujagaṃ dṛṣṭvā karṇena mādhavaḥ |
ākramya syandanaṃ padbhyāṃ balena balināṃ varaḥ || 10 ||
[Analyze grammar]

avagāḍhe rathe bhūmau jānubhyāmagamanhayāḥ |
tataḥ śaraḥ so'bhyahanatkirīṭaṃ tasya dhīmataḥ || 11 ||
[Analyze grammar]

athārjunasyottamagātrabhūṣaṇaṃ dharāviyaddyosalileṣu viśrutam |
balāstrasargottamayatnamanyubhiḥ śareṇa mūrdhnaḥ sa jahāra sūtajaḥ || 12 ||
[Analyze grammar]

divākarendujvalanagrahatviṣaṃ suvarṇamuktāmaṇijālabhūṣitam |
puraṃdarārthaṃ tapasā prayatnataḥ svayaṃ kṛtaṃ yadbhuvanasya sūnunā || 13 ||
[Analyze grammar]

mahārharūpaṃ dviṣatāṃ bhayaṃkaraṃ vibhāti cātyarthasukhaṃ sugandhi tat |
nijaghnuṣe devaripūnsureśvaraḥ svayaṃ dadau yatsumanāḥ kirīṭine || 14 ||
[Analyze grammar]

harāmbupākhaṇḍalavittagoptṛbhiḥ pinākapāśāśanisāyakottamaiḥ |
surottamairapyaviṣahyamardituṃ prasahya nāgena jahāra yadvṛṣaḥ || 15 ||
[Analyze grammar]

taduttameṣūnmathitaṃ viṣāgninā pradīptamarciṣmadabhikṣiti priyam |
papāta pārthasya kirīṭamuttamaṃ divākaro'stādiva parvatājjvalan || 16 ||
[Analyze grammar]

tataḥ kirīṭaṃ bahuratnamaṇḍitaṃ jahāra nāgo'rjunamūrdhato balāt |
gireḥ sujātāṅkurapuṣpitadrumaṃ mahendravajraḥ śikharaṃ yathottamam || 17 ||
[Analyze grammar]

mahī viyaddyauḥ salilāni vāyunā yathā vibhinnāni vibhānti bhārata |
tathaiva śabdo bhuvaneṣvabhūttadā janā vyavasyanvyathitāśca caskhaluḥ || 18 ||
[Analyze grammar]

tataḥ samudgrathya sitena vāsasā svamūrdhajānavyathitaḥ sthito'rjunaḥ |
vibhāti saṃpūrṇamarīcibhāsvatā śirogatenodayaparvato yathā || 19 ||
[Analyze grammar]

balāhakaḥ karṇabhujeritastato hutāśanārkapratimadyutirmahān |
mahoragaḥ kṛtavairo'rjunena kirīṭamāsādya samutpapāta || 20 ||
[Analyze grammar]

tamabravīdviddhi kṛtāgasaṃ me kṛṣṇādya māturvadhajātavairam |
tataḥ kṛṣṇaḥ pārthamuvāca saṃkhye mahoragaṃ kṛtavairaṃ jahi tvam || 21 ||
[Analyze grammar]

sa evamukto madhusūdanena gāṇḍīvadhanvā ripuṣūgradhanvā |
uvāca ko nveṣa mamādya nāgaḥ svayaṃ ya āgādgaruḍasya vaktram || 22 ||
[Analyze grammar]

kṛṣṇa uvāca |
yo'sau tvayā khāṇḍave citrabhānuṃ saṃtarpayānena dhanurdhareṇa |
viyadgato bāṇanikṛttadeho hyanekarūpo nihatāsya mātā || 23 ||
[Analyze grammar]

tatastu jiṣṇuḥ parihṛtya śeṣāṃściccheda ṣaḍbhirniśitaiḥ sudhāraiḥ |
nāgaṃ viyattiryagivotpatantaṃ sa chinnagātro nipapāta bhūmau || 24 ||
[Analyze grammar]

tasminmuhūrte daśabhiḥ pṛṣatkaiḥ śilāśitairbarhiṇavājitaiśca |
vivyādha karṇaḥ puruṣapravīraṃ dhanaṃjayaṃ tiryagavekṣamāṇam || 25 ||
[Analyze grammar]

tato'rjuno dvādaśabhirvimuktairākarṇamuktairniśitaiḥ samarpya |
nārācamāśīviṣatulyavegamākarṇapūrṇāyatamutsasarja || 26 ||
[Analyze grammar]

sa citravarmeṣuvaro vidārya prāṇānnirasyanniva sādhu muktaḥ |
karṇasya pītvā rudhiraṃ viveśa vasuṃdharāṃ śoṇitavājadigdhaḥ || 27 ||
[Analyze grammar]

tato vṛṣo bāṇanipātakopito mahorago daṇḍavighaṭṭito yathā |
tathāśukārī vyasṛjaccharottamānmahāviṣaḥ sarpa ivottamaṃ viṣam || 28 ||
[Analyze grammar]

janārdanaṃ dvādaśabhiḥ parābhinannavairnavatyā ca śaraistathārjunam |
śareṇa ghoreṇa punaśca pāṇḍavaṃ vibhidya karṇo'bhyanadajjahāsa ca || 29 ||
[Analyze grammar]

tamasya harṣaṃ mamṛṣe na pāṇḍavo bibheda marmāṇi tato'sya marmavit |
paraṃ śaraiḥ patribhirindravikramastathā yathendro balamojasāhanat || 30 ||
[Analyze grammar]

tataḥ śarāṇāṃ navatīrnavārjunaḥ sasarja karṇe'ntakadaṇḍasaṃnibhāḥ |
śarairbhṛśāyastatanuḥ pravivyathe tathā yathā vajravidārito'calaḥ || 31 ||
[Analyze grammar]

maṇipravekottamavajrahāṭakairalaṃkṛtaṃ cāsya varāṅgabhūṣaṇam |
praviddhamurvyāṃ nipapāta patribhirdhanaṃjayenottamakuṇḍale'pi ca || 32 ||
[Analyze grammar]

mahādhanaṃ śilpivaraiḥ prayatnataḥ kṛtaṃ yadasyottamavarma bhāsvaram |
sudīrghakālena tadasya pāṇḍavaḥ kṣaṇena bāṇairbahudhā vyaśātayat || 33 ||
[Analyze grammar]

sa taṃ vivarmāṇamathottameṣubhiḥ śaraiścaturbhiḥ kupitaḥ parābhinat |
sa vivyathe'tyarthamariprahārito yathāturaḥ pittakaphānilavraṇaiḥ || 34 ||
[Analyze grammar]

mahādhanurmaṇḍalaniḥsṛtaiḥ śitaiḥ kriyāprayatnaprahitairbalena ca |
tatakṣa karṇaṃ bahubhiḥ śarottamairbibheda marmasvapi cārjunastvaran || 35 ||
[Analyze grammar]

dṛḍhāhataḥ patribhirugravegaiḥ pārthena karṇo vividhaiḥ śitāgraiḥ |
babhau girirgairikadhāturaktaḥ kṣaranprapātairiva raktamambhaḥ || 36 ||
[Analyze grammar]

sāśvaṃ tu karṇaṃ sarathaṃ kirīṭī samācinodbhārata vatsadantaiḥ |
pracchādayāmāsa diśaśca bāṇaiḥ sarvaprayatnāttapanīyapuṅkhaiḥ || 37 ||
[Analyze grammar]

sa vatsadantaiḥ pṛthupīnavakṣāḥ samācitaḥ smādhirathirvibhāti |
supuṣpitāśokapalāśaśālmaliryathācalaḥ spandanacandanāyutaḥ || 38 ||
[Analyze grammar]

śaraiḥ śarīre bahudhā samarpitairvibhāti karṇaḥ samare viśāṃ pate |
mahīruhairācitasānukandaro yathā mahendraḥ śubhakarṇikāravān || 39 ||
[Analyze grammar]

sa bāṇasaṃghāndhanuṣā vyavāsṛjanvibhāti karṇaḥ śarajālaraśmivān |
salohito raktagabhastimaṇḍalo divākaro'stābhimukho yathā tathā || 40 ||
[Analyze grammar]

bāhvantarādādhirathervimuktānbāṇānmahāhīniva dīpyamānān |
vyadhvaṃsayannarjunabāhumuktāḥ śarāḥ samāsādya diśaḥ śitāgrāḥ || 41 ||
[Analyze grammar]

tataścakramapatattasya bhūmau sa vihvalaḥ samare sūtaputraḥ |
ghūrṇe rathe brāhmaṇasyābhiśāpādrāmādupātte'pratibhāti cāstre || 42 ||
[Analyze grammar]

amṛṣyamāṇo vyasanāni tāni hastau vidhunvansa vigarhamāṇaḥ |
dharmapradhānānabhipāti dharma ityabruvandharmavidaḥ sadaiva |
mamāpi nimno'dya na pāti bhaktānmanye na nityaṃ paripāti dharmaḥ || 43 ||
[Analyze grammar]

evaṃ bruvanpraskhalitāśvasūto vicālyamāno'rjunaśastrapātaiḥ |
marmābhighātācchalitaḥ kriyāsu punaḥ punardharmamagarhadājau || 44 ||
[Analyze grammar]

tataḥ śarairbhīmatarairavidhyattribhirāhave |
haste karṇastadā pārthamabhyavidhyacca saptabhiḥ || 45 ||
[Analyze grammar]

tato'rjunaḥ saptadaśa tigmatejānajihmagān |
indrāśanisamānghorānasṛjatpāvakopamān || 46 ||
[Analyze grammar]

nirbhidya te bhīmavegā nyapatanpṛthivītale |
kampitātmā tathā karṇaḥ śaktyā ceṣṭāmadarśayat || 47 ||
[Analyze grammar]

balenātha sa saṃstabhya brahmāstraṃ samudairayat |
aindrāstramarjunaścāpi taddṛṣṭvābhinyamantrayat || 48 ||
[Analyze grammar]

gāṇḍīvaṃ jyāṃ ca bāṇāṃśca anumantrya dhanaṃjayaḥ |
asṛjaccharavarṣāṇi varṣāṇīva puraṃdaraḥ || 49 ||
[Analyze grammar]

tatastejomayā bāṇā rathātpārthasya niḥsṛtāḥ |
prādurāsanmahāvīryāḥ karṇasya rathamantikāt || 50 ||
[Analyze grammar]

tānkarṇastvagrato'bhyastānmoghāṃścakre mahārathaḥ |
tato'bravīdvṛṣṇivīrastasminnastre vināśite || 51 ||
[Analyze grammar]

visṛjāstraṃ paraṃ pārtha rādheyo grasate śarān |
brahmāstramarjunaścāpi saṃmantryātha prayojayat || 52 ||
[Analyze grammar]

chādayitvā tato bāṇaiḥ karṇaṃ prabhrāmya cārjunaḥ |
tasya karṇaḥ śaraiḥ kruddhaściccheda jyāṃ sutejanaiḥ || 53 ||
[Analyze grammar]

tato jyāmavadhāyānyāmanumṛjya ca pāṇḍavaḥ |
śarairavākiratkarṇaṃ dīpyamānaiḥ sahasraśaḥ || 54 ||
[Analyze grammar]

tasya jyācchedanaṃ karṇo jyāvadhānaṃ ca saṃyuge |
nānvabudhyata śīghratvāttadadbhutamivābhavat || 55 ||
[Analyze grammar]

astrairastrāṇi rādheyaḥ pratyahansavyasācinaḥ |
cakre cābhyadhikaṃ pārthātsvavīryaṃ pratidarśayan || 56 ||
[Analyze grammar]

tataḥ kṛṣṇo'rjunaṃ dṛṣṭvā karṇāstreṇābhipīḍitam |
abhyasyetyabravītpārthamātiṣṭhāstramanuttamam || 57 ||
[Analyze grammar]

tato'nyamagnisadṛśaṃ śaraṃ sarpaviṣopamam |
aśmasāramayaṃ divyamanumantrya dhanaṃjayaḥ || 58 ||
[Analyze grammar]

raudramastraṃ samādāya kṣeptukāmaḥ kirīṭavān |
tato'grasanmahī cakraṃ rādheyasya mahāmṛdhe || 59 ||
[Analyze grammar]

grastacakrastu rādheyaḥ kopādaśrūṇyavartayat |
so'bravīdarjunaṃ cāpi muhūrtaṃ kṣama pāṇḍava || 60 ||
[Analyze grammar]

madhye cakramavagrastaṃ dṛṣṭvā daivādidaṃ mama |
pārtha kāpuruṣācīrṇamabhisaṃdhiṃ vivarjaya || 61 ||
[Analyze grammar]

prakīrṇakeśe vimukhe brāhmaṇe ca kṛtāñjalau |
śaraṇāgate nyastaśastre tathā vyasanage'rjuna || 62 ||
[Analyze grammar]

abāṇe bhraṣṭakavace bhraṣṭabhagnāyudhe tathā |
na śūrāḥ praharantyājau na rājñe pārthivāstathā |
tvaṃ ca śūro'si kaunteya tasmātkṣama muhūrtakam || 63 ||
[Analyze grammar]

yāvaccakramidaṃ bhūmeruddharāmi dhanaṃjaya |
na māṃ rathastho bhūmiṣṭhamasajjaṃ hantumarhasi |
na vāsudevāttvatto vā pāṇḍaveya bibhemyaham || 64 ||
[Analyze grammar]

tvaṃ hi kṣatriyadāyādo mahākulavivardhanaḥ |
smṛtvā dharmopadeśaṃ tvaṃ muhūrtaṃ kṣama pāṇḍava || 65 ||
[Analyze grammar]