Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 16.11
cintāmaparimeyāṃ ca pralayāntāmupāśritāḥ |
kāmopabhogaparamā etāvaditi niścitāḥ ||11||
The Subodhinī commentary by Śrīdhara
kiṃ ca cintāmiti | pralayo maraṇamevānto yasyāstāmaparimeyāṃ parimātumaśakyāṃ cintāmāśritāḥ | nityaṃ cintāparā ityarthaḥ | kāmopabhoga eva paramo yeṣāṃ te | etāvaditi kāmopabhoga eva paramaḥ puruṣārtho nānyadastīti kṛtaniścayāḥ | arthasañcayānīhantu ityuttareṇānvayaḥ | tathā ca bārhaspatyaṃ sūtraṃ kāma evaikaḥ puruṣārtha iti | caitanyaviśiṣṭaḥ kāmaḥ puruṣa iti ca ||11||
The Gūḍhārthadīpikā commentary by Madhusūdana
tāneva punarviśinaṣṭi cintāmiti | cintāmātmīyayogakṣemopāyālocanātmikāmaparimeyāmaparimeyaviṣayatv}atparm}atumaśakyāṃ pralayo maraṇamevānto yasyāstāṃ pralayāntāṃ yāvajjīvamanuvartamānāmiti yāvat | na kevalamaśucivratāḥ pravartante kiṃ tvetādṛśīṃ cintāṃ copāśritā iti samuccayārthaścakāraḥ |
sadānantacintāparā api na kadācitpāralaukikacintāyutāḥ kiṃ tu kāmopabhogaparamāḥ kāmyanta iti kāmā dṛṣṭāḥ śabdādayo viṣayāstadupabhoga eva paramaḥ puruṣārtho na dharmādiryeṣāṃ te tathā | pāralaukikamuttamaṃ sukhaṃ kuto na kāmayante tatrāha etāvaddṛṣṭameva sukhaṃ nānyadetaccharīraviyoge bhogyaṃ sukhamasti etatkāyātiriktasya bhokturabhāvāditi niścitā evaṃniścayavantaḥ | tathā ca bārhaspatyaṃ sūtraṃ caitanyaviśiṣṭaḥ kāyaḥ puruṣaḥ, kāma evaikaḥ puruṣārthaḥ iti ca ||11||
The Sārārthavarṣiṇī commentary by Viśvanātha
pralayāntāṃ pralayo maraṇaṃ tatparyantām | etāvaditi indriyāṇi viṣayasukhe majjantu nāma kā cintā ityetāvadeva śāstrārthatātparyamiti niścitaṃ yeṣāṃ te ||1115||
The Gītābhūṣaṇa commentary by Baladeva
aparimeyāmaparā pralayāntāṃ ca maraṇakālāvadhisādhyavastuviṣayāṃ cintāmupāśritaḥ kāmopabhogaḥ samyagviṣayasevaiva paramaḥ pumartho yeṣāṃ te | etāvadeva kāmopabhogamātramevaihikam | na tvato'nyatpāralaukikaṃ sukhamastīti kṛtaniścayāḥ ||11||
__________________________________________________________