Chapter 21 - Nāvika-avadāna

athāśoko mahinātha upaguptaṃ yatiṃ guruṃ |
kṛtāṃjalipuṭo natvā punarevamabhāṣata || 1 || {1}
[Analyze grammar]

bhadaṃta śrotumichāmi punaranyatsubhāṣitaṃ |
tad yathā guruṇākhyātaṃ tathādeṣṭuṃ ca me 'rhati || 2 || {2}
[Analyze grammar]

saṃprārthite rājñā śrutvā so 'rhan sudhīryatiḥ |
upagupto nareṃdraṃ taṃ samālokyaiyamabravīt || 3 || {3}
[Analyze grammar]

sādhu śṛṇu mahārāja yathā me guruṇoditaṃ |
tathāhaṃ te pravakṣyāmi śrutvānumodanāṃ kuru || 4 || {4}
[Analyze grammar]

puraikasamaye buddho bhagavān sa munīśvaraḥ |
sarvajñaḥ sugataḥ śastā dharmarājo vināyakaḥ || 5 || {5}
[Analyze grammar]

sasaṃgho hāsayantatra magadhe cārikāṃ caran |
sarvatra bhadratāṃ kṛtvā gaṃgātīramupāśrayan || 6 || {6}
[Analyze grammar]

tatra sa bhagavān sarvai bhikṣusaṃghaiḥ puraskṛtaḥ |
sabhāmadhyāsanāsīno dharmamādeṣṭumaichata || 7 || {7}
[Analyze grammar]

tatsaddharmāmṛtaṃ pātuṃ sarvalokāstadāgatāḥ |
brahmaśakrādayo devā lokapālā gaṇādayaḥ || 8 || {8}
[Analyze grammar]

daityeṃdro garuḍā nāgā yakṣagaṃdharvakiṃnarāḥ |
siddhā vidyādharāścāpi rākṣasāśca maharddhikāḥ || 9 || {9}
[Analyze grammar]

ṛṣayo brāhmaṇāścāpi yogino yatayo 'pi ca |
rājānaḥ kṣatriyā bhūpā rājaputrāśca tīrthikaḥ || 10 || {10}
[Analyze grammar]

vaiśyāścā maṃtriṇo 'mātyāḥ śreṣṭhinaḥ paurikāḥ prajāḥ |
gṛhasthāḥ sādhavo bhadrāḥ sārthavāhamahājanāḥ || 11 || {11}
[Analyze grammar]

vaṇijāḥ śilpinaścāpi grāmyā jānapadā api |
tathānye 'pi samāyātāḥ saddharmaśravaṇārthinaḥ || 12 || {12}
[Analyze grammar]

tatra te samupāyātā dṛṣṭvā taṃ śrīghanaṃ mudā |
natvā pradakṣiṇīkṛtya samānarcuryathākramaṃ || 13 || {13}
[Analyze grammar]

tataḥ sarve 'pi te lokāḥ parivṛtya samaṃtataḥ |
samāhitāḥ samudvīkṣya dharmaṃ śrotuṃ samāśrayan || 14 || {14}
[Analyze grammar]

tadā sa bhagavāndṛṣṭvā sarvānstān samupasthitān |
bodhicaryāṃ samārabhya saddharmaṃ samupādiśat || 15 || {15}
[Analyze grammar]

tatsaddharmāmṛtaṃ pītvā sarve lokāḥ pramoditāḥ |
dharmāviśeṣamājñāya triratnaṃ prābhajan sadā || 16 || {16}
[Analyze grammar]

tataḥ sa bhagavāndṛṣṭvā sarvāl lokāñchubhāśritān |
tathānyatra śubhaṃ kartuṃ gaṃgātīramupācarat || 17 || {17}
[Analyze grammar]

sasaṃgho bhagāvaṃstatra gaṃgātīra upāsṛtaḥ |
navikān samupāhūya samālokyaivamabravīt || 18 || {18}
[Analyze grammar]

nāvikā gantumichāmi gaṃgāpāramito 'dhunā |
tanmāmimāṃ nadīṃ gaṃgāṃ samuttārayata drutaṃ || 19 || {19}
[Analyze grammar]

iti tatprārthitaṃ śrutvā sarve te nāvikā api || 20 || {20}
[Analyze grammar]

sasāṃghikaṃ munīndraṃ tananādṛtyaivamabruvan |
tarapaṇyaṃ vināsmābhiḥ kaści diśā na tāritaḥ || 21 || {21}
[Analyze grammar]

yadīchati bhavānstarttuṃ tarapaṇyaṃ prayachatu |
iti tairbhāṣitaṃ śrutvā bhagavān sa munīśvaraḥ || 22 || {22}
[Analyze grammar]

tān sarvānnāvikāndṛṣṭvā punarevamabhāṣata |
ahamapi bhavaṃto 'tra nāviko 'smi ti manyatāṃ || 23 || {23}
[Analyze grammar]

mayā hi tārito naṃdo mahārāganadīkṛtaḥ purā |
dveṣābdhipatito duṣṭo 'ṅgulimālo 'pi tāritaḥ || 24 || {24}
[Analyze grammar]

mānavo mānakūpārapatitastārito mayā |
mohodadhinimagnaścoruvilvīkāśyapastathā || 25 || {25}
[Analyze grammar]

evamanye 'pi lokāśca kleśābdhe tāritā mayā |
kasya cidapi satvasya tarapaṇyaṃ na kiṃ cana || 26 || {26}
[Analyze grammar]

gṛhyate yācyate nāpi mayā kvāpi kadā cana |
tathā yūyamapīhāsmān sarvānbhikṣūnnimāṃdakī || 27 || {27}
[Analyze grammar]

agāḍhāṃ sahasā tārya pāre nayatumarhatha |
evaṃ tena munīndreṇa prārthite 'pi na ke cana || 28 || {28}
[Analyze grammar]

nāvikāste munīndraṃ taṃ tārayituṃ samīchire |
atra kaścitsudhīḥ sādhurnāvikastaṃ munīśvaraṃ || 29 || {29}
[Analyze grammar]

mahābhijñaṃ parijñāya natvovāca kṛtāṃjaliḥ |
bhagavannātha sarvajña bhavantaṃ sarvasāṃghikān || 30 || {30}
[Analyze grammar]

apyahaṃ tārayiṣyāmi tatprasīdatu me sadā |
iti tenoditaṃ śrutvā bhagavān sa munīśvaraḥ || 31 || {31}
[Analyze grammar]

sarvānstān sāṃghikānbhikṣūn samālokyaivamādiśat |
bhikṣavo nāvamāruhya yūyaṃ sarve samāhitāḥ || 32 || {32}
[Analyze grammar]

imāṃ gaṃgāṃ samuttīrya tiṣṭhata tīramāśritāḥ |
ityādiṣṭe munīndreṇa sarve te bhikṣusaṃghikāḥ || 33 || {33}
[Analyze grammar]

sahasā nāvamāruhya saṃniṣeduḥ samāhitāḥ |
tadā sa nāviko dṛṣṭvā sarvānnaukāsamāśritān || 34 || {34}
[Analyze grammar]

tāṃ nāvaṃ sahasā gaṃgāmadhye saṃprāpayan kramāt |
tadā sa bhagavānnṛddhyā vihāyasā svayaṃ caran || 35 || {35}
[Analyze grammar]

tadagrataḥ samuttīrya tīrabhūmau samāśrayan |
taddṛṣṭvā nāvikā sarve te salokāḥ savismayāḥ |
paścāttāpāgnisaṃtaptāḥ paśyanta eva tasthire || 36 || {36}
[Analyze grammar]

so 'pi ca nāvīko dṛṣṭvā taṃ munīndraṃ vihāyasā |
sahasā tīramāsadya sthitaṃ paśyannyaṣīdat || 37 || {37}
[Analyze grammar]

tataḥ sā niścarā naukā stambhitaiva jalāśritā |
taddṛṣṭvā nāvikaḥ so 'tivismayākulato 'bhavat || 38 || {38}
[Analyze grammar]

tatastaiḥ śrīghanaṃ tīrasamāsīnaṃ sa nāvikaḥ |
dṛṣṭvā tatsmṛtimādhāya praṇanāma kṛtāṃjaliḥ || 39 || {39}
[Analyze grammar]

tataḥ sāsaṃcarā naukā vāyusaṃpreritā drutaṃ |
sahasā tīramāsādya tasthau tatra suniścarā || 40 || {40}
[Analyze grammar]

tataste bhikṣavaḥ sarve samuttīrya vahitrataḥ |
sahasā tīramāgatya saṃbuddhāntikamāyayuḥ || 41 || {41}
[Analyze grammar]

tatra sa bhagavāndṛṣṭvā sarvāṃstān samupāgatān |
saddharmaṃ samupādeṣṭuṃ tasthau sabhāsanāśritaḥ || 42 || {42}
[Analyze grammar]

tataḥ sa nāvikaścāpi dṛṣṭvā taṃ śrīghanaṃ muniṃ |
bhikṣusaṃghasabhāsīnaṃ praṇatuṃ samupācaran || 43 || {43}
[Analyze grammar]

tatra sa sāñjalirnatvā sarvāntan sāṃghikān kramāt |
pādāmbujau munīndrasya praṇanāma pramoditaḥ || 44 || {44}
[Analyze grammar]

tatra te nāvikāścāpi sarve te vismayānvitāḥ |
taddharmadeśanāṃ śrotuṃ muditāḥ samupācaran || 45 || {45}
[Analyze grammar]

tatra taṃ śrīghanaṃ dṛṣṭvā sasaṃghaṃ saṃpramoditāḥ |
natvā pradakṣiṇīkṛtya samupatasthurādarāt || 46 || {46}
[Analyze grammar]

tataḥ sa bhagavāndṛṣṭvā sarvānstān samupasthitān |
āryasatyasamārabhya saddharmaṃ samupādiśat || 47 || {47}
[Analyze grammar]

tat addharmāmṛtaṃ pītvā nāvikaḥ saṃpramoditaḥ |
vijñāya dharmavaiśeṣyaṃ saddharmābhirato bhavet || 48 || {48}
[Analyze grammar]

tataḥ satkāyabhūmīndhraṃ viṃśatiśikharodgataṃ |
nirbhidya jñānavajreṇa dharmadṛṣṭi samāptavān || 49 || {49}
[Analyze grammar]

tataḥ sa śrotaāpattiphalaprāptaḥ prasannadhīḥ |
taṃ munīndraṃ samālokya trirudānamudānayat || 50 || {50}
[Analyze grammar]

bhagavanyatmayā prāptaṃ dharmacakṣuḥ sunirmalaṃ |
śāntaṃ padamāryakāntaṃ tīrṇaścāpi bhavārṇavaḥ || 51 || {51}
[Analyze grammar]

satkāyadṛṣṭiśailāśca laṃghitāḥ sāṃprataṃ mayā |
pihito pāpamārgo me svargamārgaḥ prakāśitaḥ || 52 || {52}
[Analyze grammar]

mokṣamārgo 'pi saṃprāpto bhavatāṃ kṛpayā 'dhunā |
tathā bhavān sadā nityaṃ māṃ paritrātumarhati || 53 || {53}
[Analyze grammar]

evaṃ hi na kṛtaṃ mātrā nāpi pitrā kṛtaṃ mama |
na suhṛdiṣṭamitraiśca vāṃdhavaiḥ svajanairapi || 54 || {54}
[Analyze grammar]

śramaṇairbrāhmaṇaiścāpi gurubhiśca na vā nṛpaiḥ |
tathānyaiśca mahāvijñairna kṛtamāryadeśanāṃ || 55 || {55}
[Analyze grammar]

bhavataiva kṛtaṃ nātha satyamārgopadeśanāṃ |
tadāryasatyasaṃprāpta āryamārgaṃ labhāmyahaṃ || 56 || {56}
[Analyze grammar]

adya me saphalaṃ janma buddhaputro 'smi sāṃprataṃ |
ityuktvā sa munīndraṃ taṃ praṇatvā prābhyanaṃdata || 57 || {57}
[Analyze grammar]

tataḥ sa nāvikastatra triratnaṃ śaraṇaṃ gataḥ |
satkṛtya samupāśritya prābhajan sarvadā mudā || 58 || {58}
[Analyze grammar]

tatsamīkṣya paraścāpi nāviko 'tyanutāpitaḥ |
tatra tasya munīndrasya satkāraṃ kartumaichata || 59 || {59}
[Analyze grammar]

tataḥ sa nāvikastatra samutthāyānumoditaḥ |
bhagavaṃtaṃ praṇatvaiva saṃprabodhayatkṛtāṃjaliḥ || 60 || {60}
[Analyze grammar]

bhagavanyanmayā lobhapraluptadharmacetasā |
tarapaṇyaṃ vinā gaṃgāṃ tārito na bhavānapi || 61 || {61}
[Analyze grammar]

tanmahānaparādho me bhavatyatrāhi jāyate |
tatkṣamatāṃ jagannātha kṣamāratnākaro bhavān || 62 || {62}
[Analyze grammar]

yaccātra bhavatāṃ pūjāṃ kartumichāmi sāṃprataṃ |
tānmamānugrahaṃ kṛtvā pratigrahītumarhati || 63 || {63}
[Analyze grammar]

iti saṃprārthitaṃ tena śrutvā sa bhagavānmuniḥ |
tatheti pratimoditvā tūṣṇībhūtvādhyuvāsa tat || 64 || {64}
[Analyze grammar]

tathādhivāśitaṃ śāstrā nāvikaḥ saṃpramoditaḥ |
sa pūjābhojyasāmāgrīm sahasā samasādhaya || 65 || {65}
[Analyze grammar]

tataḥ sa bhagavaṃtaṃ taṃ sasāṃghikaṃ yathākramaṃ |
abhyarcya surasaiḥ śuddhairbhojanaiḥ samatoṣayat || 66 || {66}
[Analyze grammar]

tataste sāṃghikāḥ sarve saṃbuddhapramukhā api |
tadbhojyaṃ surasaṃ bhuktvā samātṛptiṃ samāyayuḥ || 67 || {67}
[Analyze grammar]

tataḥ sa nāviko dṛṣṭvā tṛptaṃ muniṃ sasāṃghikaṃ |
apanīyāśu pātrāṇi taddhastādi vyaśodhayat || 68 || {68}
[Analyze grammar]

tataḥ pūgādi tāṃbūlamahauṣadharasāyanaṃ |
datvā sa nāvikastatra sāṃjaliḥ prārthayatkṣamāṃ || 69 || {69}
[Analyze grammar]

tataḥ sa sāṃjalirnatvā sasaṃghaṃ taṃ munīśvaraṃ |
bodhicittaṃ samālamvya tatpuraḥ samupāśrayat || 70 || {70}
[Analyze grammar]

tataḥ sa bhagavāṃstasya nāvikasya manogataṃ |
bodhyabhilāṣamālokya tadā smitaṃ vyamuṃcata || 71 || {71}
[Analyze grammar]

tatastasya munīṃdrasya nānāvarṇā marīcayaḥ |
mukhapadmādviniryātāḥ praserurbhuvanatraye || 72 || {72}
[Analyze grammar]

yā adhastādgatāstatra narakeṣu samaṃtataḥ |
tāḥ saumyā raśmayaḥ sarvāḥ prasṛtya samahāsayan || 73 || {73}
[Analyze grammar]

tatra tābhiḥ parispṛṣṭāḥ sarve te narakāśritāḥ |
mahatsaukhyaṃ samāsādya vismitā evamabruvan || 74 || {74}
[Analyze grammar]

aho citraṃ mahatsaukhyamadhunā jāyate kathaṃ |
kutaśceyaṃ prabhā jātā kasya ceha samāgatāḥ || 75 || {75}
[Analyze grammar]

yatprabhābhiḥ parispṛṣṭā vayaṃ saukhyasamanvitāḥ |
sarve duḥkhābhinirmuktāstadidaṃ mahadadbhutaṃ || 76 || {76}
[Analyze grammar]

kiṃ nu cyutā ito 'ho svidanyatropagatā vayaṃ |
yanno duḥkhāni śāṃyaṃte jāyaṃte sasukhānyapi || 77 || {77}
[Analyze grammar]

iti ciṃtāsamākrāntahṛdayāste savismayāḥ |
ṣarve 'pyekatra saṃmīlya bhāṣaṃta upatasthire || 78 || {78}
[Analyze grammar]

evaṃ sarve 'pi te satvāḥ sarvatra narakeṣvapi |
nirduḥkhā sukhasaṃpannā upatasthuḥ savismayāḥ || 79 || {79}
[Analyze grammar]

tadā teṣāṃ prabodhārthaṃ nirmāya bhagavānmuniṃ |
pratyekaṃ narākeṣvevaṃ sarvatrāpi vyasarjayat || 80 || {80}
[Analyze grammar]

taṃ buddhaṃ nirmitaṃ dṛṣṭvā sārve te narakāśritāḥ |
bhūyo 'tivismayākrāṃtahṛdayāścaivaṃ abruvan || 81 || {81}
[Analyze grammar]

na hyevetaccyutāssarve nāpyānyatra gatā vayaṃ |
ihaiva narake sthāne sthitāḥ sarve vayaṃ khalu || 82 || {82}
[Analyze grammar]

yadihāyaṃ samāyātaḥ puruṣo pūrvadarśanaḥ |
nūnaṃ asya prabhākāntiriyamatrābhiprasṛtā || 83 || {83}
[Analyze grammar]

tadasmākaṃ hi duḥkhāni praśāntāṃ samaṃtataḥ |
mahatsaukhyāni jayante nūnamasyānūbhāvataḥ || 84 || {84}
[Analyze grammar]

ayaṃ hi sugato buddhaḥ sarvasatvānukaṃpakaḥ |
sarvānno duḥkhitāndṛṣṭvā samuddhartumihāgataḥ || 85 || {85}
[Analyze grammar]

tadasya śaraṇaṃ gatvā vayaṃ sarve samādarāt |
satkṛtya śraddhayā natvā yathāśakti bhajemahi || 86 || {86}
[Analyze grammar]

iti saṃbhāṣya te sarve nārakīyāstathā mudā |
sahasā taṃ purogatvā praṇatvaivaṃ vabhāṣire || 87 || {87}
[Analyze grammar]

namaste bhagavannātha śaraṇaṃ te vrajāmahe |
evamasmān sadā dṛṣṭvā kṛpayā trātumarhasi || 88 || {88}
[Analyze grammar]

iti saṃprārthanāṃ kṛtvā sarve te pratimoditāḥ |
tasyaiva śaraṇaṃ kṛtvā prabhejire samāhitāḥ || 89 || {89}
[Analyze grammar]

etatpuṇyaparītāste sarve vimuktapāpakāḥ |
narakebhyaḥ samutthāya sahasā sadgatiṃ yayuḥ || 90 || {90}
[Analyze grammar]

evaṃ tā rasmayaḥ sarvā narakebhyaḥ samaṃtataḥ |
sarvān satvān saṃuddhṛtya pratyāyayurmuneḥ puraḥ || 91 || {91}
[Analyze grammar]

yāścāpyurddhagatābhāsaprasṛtāḥ tāḥ samaṃtataḥ |
avabhāsya diśaḥ sarvān samahārājikālayāḥ || 92 || {92}
[Analyze grammar]

sarvāndevālayānyāvadakaniṣṭhaṃ bhavālayaṃ |
avabhāsyamarān sarvān gāthābhiḥ samacodayat || 93 || {93}
[Analyze grammar]

anityaṃ khalu saṃsāre sarvaṃ śūnyamanātmakaṃ |
iti matvātra saṃsāre carata sarvadā śubhe || 94 || {94}
[Analyze grammar]

niṣkrāmatārabhadhvaṃ tad yujyadhvaṃ buddhaśāsane |
dhunīta mṛtyusainyāni naḍāgāramiva dvipaḥ || 95 || {95}
[Analyze grammar]

yo hyasmin saugate dharme cariṣyati samāhitaḥ |
sa hitvā janma saṃsāre duḥkhasyāntaṃ kariṣyati || 96 || {96}
[Analyze grammar]

iti tacchabdamākarṇya sarve devāḥ prabodhitāḥ |
triratnaśaraṇaṃ kṛtvā prabhejire samāhitāḥ || 97 || {97}
[Analyze grammar]

evaṃ tā rasmayaḥ sarvāḥ sarvāndevān samaṃtataḥ |
codayitvā tatastatra pratyāyayurmuneḥ puraḥ || 98 || {98}
[Analyze grammar]

tatra tā rasmayaḥ sarvā ekībhūtā supiṇḍitāḥ |
muneḥ pradakṣiṇīkṛtya bhrumadhye 'ntarhito 'bhavat || 99 || {99}
[Analyze grammar]

taddṛṣṭvā te sāṃghikāḥ sarve lokāścānye 'pi vismitāḥ |
śāstā kimādiśeddhārmamiti dhyātvā niṣedire || 100 || {100}
[Analyze grammar]

tadānaṃdaḥ samutthāya śāstāraṃ taṃ munīśvaraṃ |
kṛtāṃjalipuṭo natvā paprachaivaṃ puraḥ sthitaḥ || 101 || {1}
[Analyze grammar]

bhagavannātha sarvajña bhavadvaktrātsudhākarāt |
nānā varṇāḥ prabhāḥ kāṃtā viniḥsṛtya prasāritāḥ || 102 || {2}
[Analyze grammar]

sarvāṃstraidhātukānnavabhāsya samaṃtataḥ |
punaḥ pratyāgātāḥ sarvā ekībhūtā supiṃḍitā || 103 || {3}
[Analyze grammar]

tava pradakṣiṇīkṛtya bhrumadhye pravisaṃti tāḥ |
nāhetupratyaye buddhā darśayanti smitaṃ kvacit || 104 || {4}
[Analyze grammar]

tadbhavān hetunā kena smitaṃ muṃcasi sāṃprataṃ |
yaddṛṣṭvā sāṃghikaḥ sarve ime lokāśca vismitāḥ || 105 || {5}
[Analyze grammar]

śāstā kimādiśeddharmamiti saṃdigdhamānasāḥ |
kutūhalasamākrāṃtahṛdayāḥ sadguṇārthinaḥ || 106 || {6}
[Analyze grammar]

tvatsaddharmāmṛtaṃ pātumichanti tṛṣitā iva |
yadarthe 'tra bhavān smitaṃ darśayati sarasmikaṃ || 107 || {7}
[Analyze grammar]

tadarthaṃ samupādiśya sarvāl lokānprabodhaya |
ityānaṃdavaca śrutvā bhagavān sa munīśvaraḥ |
tamānaṃdaṃ sabhāṃ cāpi samālokyaivamādiśat || 108 || {8}
[Analyze grammar]

evametattathānaṃda nāhetupratyayaṃ kvacit |
saṃbuddhāḥ sugatāḥ sarve pravikurvanti saṃsmitaṃ || 109 || {9}
[Analyze grammar]

yadarthe 'hamihānaṃda smitaṃ muṃcāmi sāṃprataṃ |
tadarthaṃ samupākhyāmi śṛṇuta yūyamādarāt || 110 || {10}
[Analyze grammar]

yadanena satānaṃda nāvikena prasādinā |
sasaṃgho 'haṃ samabhyarcya vaṃdito bodhicetāsā || 111 || {11}
[Analyze grammar]

anena kuśalenāyaṃ nāviko 'pi bhaviṣyati |
saṃsārottaraṇo nāma pratyekabuddha ātmavit || 112 || {12}
[Analyze grammar]

evaṃ matvā mahatpuṇyaṃ triratnaṃ satkṛtodbhavaṃ |
satkṛtya śraddhayā nityaṃ triratnaṃ bhajatādarāt || 113 || {13}
[Analyze grammar]

triratneṣu kṛtaṃ puṇyaṃ na kṣiṇoti kadā cana |
vratapuṇyavipākena saṃbuddhapadamāpnuyāt || 114 || {14}
[Analyze grammar]

ityādiṣṭaṃ munīndreṇa śrutvānaṃdaḥ sasāṃghikaḥ |
tathetyabhyanumoditvā triratnaṃ sarvadābhajet || 115 || {15}
[Analyze grammar]

evaṃ śāstrā munīndreṇa vyākṛtamātmanastadā |
śrutvā sa nāviko buddhaḥ prābhyanaṃdatprasāditaḥ || 116 || {16}
[Analyze grammar]

tadārabhya sadā nityaṃ nāvikaḥ saṃpramoditaḥ |
triratnaśaraṇaṃ kṛtvā satkṛtya śraddhayābhajat || 117 || {17}
[Analyze grammar]

sarve lokāśca taddṛṣṭvā saddharmaguṇavāṃchinaḥ |
satkṛtya śraddhayā nityaṃ triratnaṃ prābhajanmudā || 118 || {18}
[Analyze grammar]

tataśca sa jagacchāstā bhagavān saha sāṃghikaiḥ |
tathānyatra śubhaṃ kartuṃ pratasthe sāṃprabhāsayan || 119 || {19}
[Analyze grammar]

iti me guruṇādiṣṭaṃ mayā pracakṣyate tava |
tathātra tvaṃ mahārāja triratnaṃ sarvadā bhaja || 120 || {20}
[Analyze grammar]

prajāścāpi tathā dharme bodhayitvā prasādayan |
bodhimārge pratisthāpya pālayasva samāhitaḥ || 121 || {21}
[Analyze grammar]

tathā te maṃgalaṃ nityaṃ sarvatrāpi bhaveddhruvaṃ |
kramādbodhiṃ samāsādya saṃbuddhapadamāpnuyāḥ || 122 || {22}
[Analyze grammar]

iti tenārhatādiṣṭaṃ śrutvāśokaḥ sa bhūpatiḥ |
tathetyabhyanumoditvā prābhyanaṃdatsapārṣadaḥ || 123 || {23}
[Analyze grammar]

yacchāstrākhyātaṃ tathedaṃ yativarakathitaṃ nāvikasyāvadānaṃ |
śṛṇvanti śrāvayanti pramuditamanasaḥ śraddhayā ye prasannāḥ |
te sarve śuddhabhāvā jinaguṇarūcano bodhicaryā carante |
bhuktvā saukhyāni nityaṃ munivaranilaye saṃprayānti pramodaṃ || 124 || {24}
[Analyze grammar]