Chapter 22 - Gandhamādana-avadāna

athāśoko mahīpālaḥ kṛtāṃjalipuṭo mudā |
upaguptaṃ guruṃ natvā prārthayaccaivamādarāt || 1 || {1}
[Analyze grammar]

bhadaṃta śrotumichāmi punaranyatsubhāṣitaṃ |
tadyathā guruṇādiṣṭaṃ tathādeṣṭuṃ ca me 'rhati || 2 || {2}
[Analyze grammar]

iti saṃprārthite rājñā śrutvā so 'rhan sudhīryatiḥ |
tamaśokam mahīpālaṃ samālokyaivamādiśat || 3 || {3}
[Analyze grammar]

sādhu śṛṇu mahārāja yathā me gurubhāṣitaṃ |
tathāhaṃ saṃpravakṣyāmi tava puṇyavivṛddhaye || 4 || {4}
[Analyze grammar]

puraikasmindine tatra rājagṛhe sasāṃghikaḥ |
bhagavān sa jagannāthaḥ piṇḍārthaṃ samupāviśat || 5 || {5}
[Analyze grammar]

tadā rājagṛhe tatra gṛhapateḥ suto mahān |
tasyaikā dāsikā bhadrā satyadharmānucāriṇī || 6 || {6}
[Analyze grammar]

sā svāmyaṅgānulepārthaṃ lohitacaṃdanaṃ tadā |
surabhigaṇasaṃyuktaṃ pipeṣa prastare mudā || 7 || {7}
[Analyze grammar]

tasminneva kṣaṇe tatra sa saṃbuddhaḥ sasāṃghikaḥ |
bhāsayaṃ maṃgalaṃ kṛtvā tadgṛhaṃ nikaṣācarat || 8 || {8}
[Analyze grammar]

tathāyātaṃ munīndraṃ taṃ śrutvā sā dārikā mudā |
sahasā nirgatā gehāttatra draṣṭumupācaran || 9 || {9}
[Analyze grammar]

tatra sā samupāgatya prādrākṣīttaṃ munīśvaraṃ |
dvātriṃśallakṣaṇāśītivyaṃjanaparibhūṣitaṃ || 10 || {10}
[Analyze grammar]

śatasūryādhikābhāsaṃ śatacaṃdrāmṛtaprabhaṃ |
vyāmaprabhāsamujvālaṃ ratnāṃgamiva jaṃgamaṃ || 11 || {11}
[Analyze grammar]

dṛṣṭvā sā dāsikā tatra muditā vismayānvitā |
suciraṃ taṃ samālokya tasthau niścalamānasī || 12 || {12}
[Analyze grammar]

tatra sā suciraṃ dṛṣṭvā dāsikābhipramoditā |
satkāraṃ karttumichantī śāsturevaṃ vyaciṃtayat || 13 || {13}
[Analyze grammar]

aho bhāgyaṃ munīndro 'yaṃ dṛśyate yanmayādhunā |
tadasya kiṃ bhajiṣyāmi daridrā preṣikā hyahaṃ || 14 || {14}
[Analyze grammar]

kutra vā drakṣyate bhūyo munīndro 'yaṃ jagadguruḥ |
dhigme janmāpi yenātra kiṃ citpuṇyaṃ na sādhyate || 15 || {15}
[Analyze grammar]

kiṃ mamānena dehena yenedṛśaṃ munīśvaraṃ |
prāpya kiṃ citpradatvāpi puṇyaṃ prāptuṃ na śakyate || 16 || {16}
[Analyze grammar]

anena jīvitenāpi kiṃ mamātra prayojanaṃ |
yena duḥkhāni bhuktvaiva kiṃ citpuṇyaṃ na sādhyate || 17 || {17}
[Analyze grammar]

puṇyaṃ vinātra saṃsāre saukhyaṃ prāptuṃ kathaṃ kuha |
tatpuṇyaṃ prāpyate kena vinā dānavrataḥ kvacit || 18 || {18}
[Analyze grammar]

kiṃ cātra dāsyate dānaṃ kiṃ ciddravyaṃ na me gṛhe |
vrataṃ vā kiṃ kariṣyāmi parādhīnā hi dāsikā || 19 || {19}
[Analyze grammar]

tadatra kiṃ sukhaṃ lapsye kiṃ ciddānaṃ vrataṃ vinā |
sarvathāhaṃ vinaṣṭā syāṃ ko māṃ rakṣedbhavāntare || 20 || {20}
[Analyze grammar]

puṇyena sadgatiṃ yāyāṃ pāpena durgatiṃ sadā |
iti hetoḥ prakarttavyaṃ dānaṃ kiṃ cidapi vrataṃ || 21 || {21}
[Analyze grammar]

tarhyetadvidyate haste lohitacaṃdanaṃ mama |
etenāpi munīndrasya bhajeyaṃ caraṇāmbujau || 22 || {22}
[Analyze grammar]

iti dhyātvā viniścitya darikā sā prasāditā |
sahasā svagṛhaṃ gatvā taccaṃdanaṃ samāgrahīt || 23 || {23}
[Analyze grammar]

taccaṃdanaṃ samādāya dāsikā sā vyacintayat |
yadidaṃ svāmino dravyaṃ tadanujñāṃ vinā kathaṃ || 24 || {24}
[Analyze grammar]

yadi svāmi vijānāti tadā me kupito ruṣā |
nirbhatsya tāḍayitvā māṃ gṛhānniṣkāsayedapl || 25 || {25}
[Analyze grammar]

tadātra kiṃ cariṣyāmi dāsikāham nirāśrayā |
avaśyaṃ bhāvino bhāvā bhavanti mahatāmapi || 26 || {26}
[Analyze grammar]

yadi me kupitaḥ svāmī paratra kiṃ kariṣyati |
prasanno yadi vā svāmī kalyāṇaṃ syādihāpi me || 27 || {27}
[Analyze grammar]

kupito va prasanno vā bhavatvatraiva me prabhuḥ |
svāmī bharttānuśāstaiva paratra kiṃ kariṣyati || 28 || {28}
[Analyze grammar]

buddhastu jagatāṃ svāmī bharttā nātho 'nukaṃpakaḥ |
prabhu dharmānuśāstā me paratrehāpyavetsadā || 29 || {29}
[Analyze grammar]

tadatra kiṃ mamānena svāmināpi kariṣyate |
tadetaccaṃdanenāpi bhajeyaṃ taṃ munīśvaraṃ || 30 || {30}
[Analyze grammar]

iti dhyātvā viniścitya dāsikā sā pramoditā |
lohitacaṃdanenobhau pāṇau pralipya setvayā || 31 || {31}
[Analyze grammar]

gṛhādvahirvinirgatvā bhagavate 'nta upāgatā |
pādayorubhayostena caṃdanena lilepa sā || 32 || {32}
[Analyze grammar]

tataḥ sā dārikā nārī kṛtāṃjalipuṭo mudā |
pādau tasya munernatvā purataḥ samupāśrayat || 33 || {33}
[Analyze grammar]

tatra sa bhagavāndṛṣṭvā tasyā bhaktirataṃ manaḥ |
taccaṃdanasaurabhyaistatpuraṃ samapūrayat || 34 || {34}
[Analyze grammar]

tatastadgaṃdhamāghrāya sarve paurāḥ savismayāḥ |
kasyedaṃ gaṃdhamāyātamiti proktvā pracerire || 35 || {35}
[Analyze grammar]

tatastadvṛttimājñāya sarve lokāḥ pramoditāḥ |
taddraṣṭuṃ sahasā tatra bhagavato 'ntikamupāyayuḥ || 36 || {36}
[Analyze grammar]

tatra sarve 'pi te lokā dṛṣṭvā taṃ śrīghanaṃ muniṃ |
natvā pradakṣiṇīkṛtvā samupatasthurādarāt || 37 || {37}
[Analyze grammar]

tadā sa bhagavāndṛṣṭvā sarvānstān samupasthitān |
āryasatyaṃ samārabhya dideśa dharmamuttamaṃ || 38 || {38}
[Analyze grammar]

taddhārmadeśanāṃ śrutvā sarve lokāḥ prabodhitaḥ |
triratnaśaraṇaṃ kṛtvā sadā bhajitumīchire || 39 || {39}
[Analyze grammar]

tatsaddharmāmṛtaṃ pītvā dāsikā sā prabodhitā |
sāṃjalistaṃ muniṃ natvā praṇidhānaṃ vyadhāttathā || 40 || {40}
[Analyze grammar]

etatpuṇyavipākena saṃsāre 'tra punarbhave |
pratyekāṃ bodhimāsādya nirvāṇapadamāpnuyāṃ || 41 || {41}
[Analyze grammar]

evaṃ buddhapadaṃ prāptyai praṇidhānaṃ kṛtaṃ tayā |
dṛṣṭvā sa bhagavāṃstatra smitaṃ prādurvyadhāttadā || 42 || {42}
[Analyze grammar]

tatastasya munervaktrānnānāvarṇāḥ surasmayaḥ |
vinirgatā diśaḥ sarvā bhāsayantaḥ praserire || 43 || {43}
[Analyze grammar]

yā adhastādgatābhāsāḥ sarvatra narakeṣvapi |
avabhāsya śubhaṃ kṛtvā sarvatra saṃprasaṃsire || 44 || {44}
[Analyze grammar]

tatra satvānparispṛśya kṛtvā sarvān sukhānvitān |
saṃbuddhadarśanaṃ datvā saṃpreṣayan surālāyaṃ || 45 || {45}
[Analyze grammar]

yāścāpyurddhaṃ gatābhāsatāḥ sarvāṃśca surālayan |
avabhāsyāmarān sarvān samudghuṣyābhyacodayan || 46 || {46}
[Analyze grammar]

anityaṃ khalu saṃsāraṃ sarvaṃ śūnyaṃ nirātmakaṃ |
iti matvātra karttavyaṃ saṃbuddhabhajanaṃ sadā || 47 || {47}
[Analyze grammar]

niṣkrāmata rabhadhvaṃ tatsaddharmaṃ buddhaśāsane |
māracaryāṃ parityajya carata bhadracārikāṃ || 48 || {48}
[Analyze grammar]

yo 'pramattaścaratyatra saṃbuddhaśāsane vrataṃ |
sa vihāya punarjātiṃ duḥkhasyāṃtaṃ kariṣyati || 49 || {49}
[Analyze grammar]

iti matvātra saṃsāre pariśuddhatrimaṇḍalāḥ |
triratnaṃ śaraṇaṃ kṛtvā bhajadhvaṃ śraddhayā sadā || 50 || {50}
[Analyze grammar]

etadghoṣaṃ samākarṇya sarve devāḥ pramoditāḥ |
triratnasmaraṇaṃ kṛtvā prācaran sarvadā śubhe || 51 || {51}
[Analyze grammar]

tataste raśmayaḥ sarve bhāsayantaḥ samaṃtataḥ |
pratyāgatā munīndrasya purataḥ samupāśrayan || 52 || {52}
[Analyze grammar]

tatra te raśmayaḥ sarve 'pyekībhūtāḥ supiṇḍitāḥ |
śāstuḥ pradakṣiṇīkṛtya bhruvo 'ntare tirodadhau || 53 || {53}
[Analyze grammar]

taddṛṣṭvā te sabhāsīnāḥ sarve lokāḥ savismayāḥ |
śāstā kimādiśeddharmamiti dhyātvā samāśrayan || 54 || {54}
[Analyze grammar]

tatrānaṃdaḥ samālokya sarvāṃl lokān savismayān |
sāṃjalistaṃ jagannāthaṃ praṇatvaivaṃ samabravīt || 55 || {55}
[Analyze grammar]

bhagavan hetunā kena smitaṃ muṃcati sāṃprataṃ |
nāhetupratyayaṃ buddhāḥ smitaṃ muṃcaṃti sarvadā || 56 || {56}
[Analyze grammar]

yadbhavataḥ smite vaktrānnānāvarṇāḥ suraśmayaḥ |
nirgatāḥ sarvalokeṣu prasṛtā avabhāsyata || 57 || {57}
[Analyze grammar]

ime sarvatra bhadrāṇi kṛtvā satvāṃśca bhadritān |
pratyāgatā bhavadurṇāmadhye cāntardadhanti hi || 58 || {58}
[Analyze grammar]

etadadbhutamālokya sarve lokā ime 'dhunā |
śāstā kimādiśeddharmamiti dhyātvā samāsthitāḥ || 59 || {59}
[Analyze grammar]

bhavaddharmāmṛtaṃ pātuṃ sarve saddharmavāṃchinaḥ |
bhavantameva saṃvīkṣya saṃtiṣṭhante samāhitāḥ || 60 || {60}
[Analyze grammar]

bhagavaṃstad yadarthe tvaṃ smitaṃ muṃcasi sāṃprataṃ |
tadarthaṃ samupādiśya sarvāl lokānprabodhaya || 61 || {61}
[Analyze grammar]

iti saṃprārthite tena bhagavān sa munīścaraḥ |
tamānaṃdaṃ sabhāṃ cāpi samālokyaivamādiśat || 62 || {62}
[Analyze grammar]

evametanmahānaṃda sarve 'pi sugatā jināḥ |
nāhetupratyayaṃ kvāpi smitaṃ muṃcaṃti sarvadā || 63 || {63}
[Analyze grammar]

yadarthe 'hamihānaṃda smitaṃ muṃcāmi sāṃprataṃ |
tadarthaṃ saṃpravakṣyāmi sarve śṛṇvaṃtu sādaraṃ || 64 || {64}
[Analyze grammar]

paśyānaṃdānayā nāryā dārikayā mama padoḥ |
lohitacaṃdanenaivaṃ pralipya satkṛtiḥ kṛtā || 65 || {65}
[Analyze grammar]

etatpuṇyavipākena dārikeyaṃ bhaviṣyati |
pratyekasugato gandhamādano nāma sarvavit || 66 || {66}
[Analyze grammar]

yatheyaṃ mayi saṃbuddhacittaṃ prasādya moditā |
praṇidhānaṃ karotyevaṃ pratyekabodhimāpsyati || 67 || {67}
[Analyze grammar]

evaṃ matvā mahatpuṇyaṃ saṃbuddhabhajanodbhavaṃ |
satkṛtya śraddhayā nityaṃ triratnaṃ bhajamādarāt || 68 || {68}
[Analyze grammar]

triratnabhajanodbhūtaṃ puṇyamahattaraṃ bahu |
yathechābodhisaṃbhārapūraṇaṃ nirvṛtiṃ pradaṃ || 69 || {69}
[Analyze grammar]

ityādiṣṭaṃ munīndreṇa śrutvā sarve 'numoditāḥ |
triratnabhajanaṃ kartuṃ prābhyanandan sadāpi te || 70 || {70}
[Analyze grammar]

tadā sā dāsikāpyevaṃ śāstrā vyākṛtamātmanaḥ |
śrutvābhinaṃditā bhūyo nanāma taṃ munīśvaraṃ || 71 || {71}
[Analyze grammar]

tataḥ sā svāminā dattaṃ dravyamādāya satvarā |
tadarhabhojanaiḥ pūrṇaṃ pātraṃ kṛtvā mudācarat || 72 || {72}
[Analyze grammar]

tatra sā muditā tasmai munīndrāya pradāpayat |
sāṃjaliḥ praṇatiṃ kṛtvā svagehaṃ samupācarat || 73 || {73}
[Analyze grammar]

tataḥ sa bhagavānpṛṣṭe piṇḍapātraṃ tayārcitaṃ |
sasaṃghaṃ svāśrame gatvā vyaharaddharmamādiśat || 74 || {74}
[Analyze grammar]

tatra sā dāsikā bhadrā triratnaṃ śaraṇaṃ gatā |
satkṛtya śraddhayā nityaṃ prābhajan sarvadā mudā || 75 || {75}
[Analyze grammar]

evaṃ me guruṇākhyātaṃ śrutaṃ mayātra kathyate |
tathā tvamapi rājeṃdra triratnaṃ sarvadā bhaja || 76 || {76}
[Analyze grammar]

tathā rājaṃ prajāścāpi bodhayitvā prayatnataḥ |
bodhimārge pratiṣṭhāpya pālayasva samāhitaḥ || 77 || {77}
[Analyze grammar]

tathā taṃ maṃgalaṃ nityaṃ sarvatrāpi bhaveddhruvaṃ |
kramādbodhiṃ samāsādya saṃbuddhapadamāpnuyāḥ || 78 || {78}
[Analyze grammar]

iti tenārhatādiṣṭaṃ śrutvāśokaḥ sa bhūmipaḥ |
tathetyabhyanumoditvā prābhyanandatsapārṣadaḥ || 79 || {79}
[Analyze grammar]