Chapter 18 - Dhanika-avadāna

athāśoko mahīpālaḥ kṛtāṃjalipuṭo mudā |
upaguptaṃ guruṃ natvā punarevaṃ samabravīt || 1 || {1}
[Analyze grammar]

bhadanta śrotumicchāmi punaranyatsubhāṣitaṃ |
tadyathā guruṇādiṣṭaṃ tathādeṣṭuṃ ca me 'rhati || 2 || {2}
[Analyze grammar]

iti saṃprārthitaṃ rājñā śrutvā so 'rhan sudhīryatiḥ |
upagupto narendraṃ taṃ samālokyaivamabravīt || 3 || {3}
[Analyze grammar]

śṛṇu rājan samādhāya yathā me guruṇoditaṃ |
tathāhaṃ saṃpravakṣyāmi tava puṇyapravṛddhaye || 4 || {4}
[Analyze grammar]

puraikasamaye sa śrīśākyasiṃho munīśvaraḥ |
sarvajñaḥ sugataḥ śāstā dharmarājo vināyakaḥ || 5 || {5}
[Analyze grammar]

bhikṣubhiḥ śrāvakaiḥ sārddhaṃ bhikṣuṇībhiśca cailakaiḥ |
upāsakai mahāśrāddhairupāsikāgaṇairapi || 6 || {6}
[Analyze grammar]

bodhisatvagaṇaiścāpi mahāsatvaiḥ śubhārthibhiḥ |
sarvasatvahitārthāya bodhicaryāṃ prakāśibhiḥ || 7 || {7}
[Analyze grammar]

vṛjiṣu puri vaiśālyāṃ markaṭākhyahradāntike |
kūṭāgāraguhāvāse vijahāra prabhāsayan || 8 || {8}
[Analyze grammar]

tatsaddharmāmṛtaṃ pātuṃ tatra sarve samāgatāḥ |
brahmaśakrādidevendrā lokapālā digāsthitāḥ || 9 || {9}
[Analyze grammar]

grahāḥ siddhagaṇāḥ sādhyā yakṣagaṃdharvakinnarāḥ |
garuḍā nāgarājāśca vidyādharāśca dānavāḥ || 10 || {10}
[Analyze grammar]

rākṣasāḥ sagaṇāścaiva ṛṣayo brahmacāriṇaḥ |
brahmaṇāḥ kṣatriyā bhūpā rājāno 'pi narādhipāḥ || 11 || {11}
[Analyze grammar]

tathā rājakumārāśca vaiśyā maṃtrijanā api |
gṛhasthāḥ śreṣṭhinaḥ paurāḥ sārthavāhā mahājanāḥ || 12 || {12}
[Analyze grammar]

vaṇijaḥ śilpinaścāpi tathānye 'pi śubhārthinaḥ |
grāmyā jānapadāścāpi tathā kārpaṭikā api || 13 || {13}
[Analyze grammar]

evamanye 'pi lokāśca saddharmāmṛtavāṃchinaḥ |
sarve te samupāyātāstatrādrākṣustamīśvaraṃ || 14 || {14}
[Analyze grammar]

sabhāmadhyāsanāsīnaṃ sarvasaṃghapuraskṛtaṃ |
śrīghanaṃ taṃ samālokya sarve te samupāśritāḥ || 15 || {15}
[Analyze grammar]

natvā pradakṣiṇīkṛtya samabhyarcya yathākramaṃ |
punaḥ sāñjalayo natvā parivṛtya samaṃtataḥ |
tatsaddharmāmṛtaṃ pātumupatasthuḥ samāhitāḥ || 16 || {16}
[Analyze grammar]

tadā sa bhagavāndṛṣṭvā tān sarvān samupasthitān |
ādimadhyāntakalyāṇīṃ bodhicaryāṃ samādiśat || 17 || {17}
[Analyze grammar]

tadāryadharmamākarṇya sarve lokāḥ pramoditāḥ |
tadā te dharmavaiśeṣyaṃ matvā pratinanaṃdire || 18 || {18}
[Analyze grammar]

tadā tatra mahāpūryāṃ vaiśālyāṃ pauriko mahān |
gṛhastho dhaniko nāma śrīmān sarvaguṇī sudhīḥ || 19 || {19}
[Analyze grammar]

śrāddho bhadrāśayo dātā śuddhaśīlo vicakṣaṇaḥ |
sarvasatvahitādhānādāsītsatpuruṣottamaḥ || 20 || {20}
[Analyze grammar]

patnī dharmasakhī tasya śīlavatyabhidhābhavat |
tanayaśca vaṃdānyākhyaḥ satyavatyabhidhā snuṣā || 21 || {21}
[Analyze grammar]

tadā tatra dvijā sarve bhaktimanto jagadguroḥ |
pūjānimaṃtraṇe cakruḥ samayaṃ saṃmatāstathā || 22 || {22}
[Analyze grammar]

bhavanto yanmunīndro 'yamatrāsmākaṃ hitechayā |
saddharmaṃ samupādeṣṭuṃ sasaṃghaḥ samupāgataḥ || 23 || {23}
[Analyze grammar]

tadasmābhirmunīndro 'yaṃ pūjanīyaṃ samādarāt |
ato nimaṃtraṇīyo 'tra sarvaiḥ saṃbhūya nānyathā || 24 || {24}
[Analyze grammar]

ekaścetkurute dravyamadādasya nimaṃtraṇaṃ |
sarvairnirvāsanīyo 'sau yato 'nyadharmavighnakṛt || 25 || {25}
[Analyze grammar]

tadā sa dhaniko 'jñātvā samayaṃ taistathā kṛtaṃ |
svayameva munīndraṃ taṃ pūjayituṃ samichata || 26 || {26}
[Analyze grammar]

tataḥ sa dhanikaḥ śrīmāndivyasaṃpatsamṛddhimān |
svayaṃ nimaṃtraṇaṃ karttuṃ sasaṃghasya muneryayau || 27 || {27}
[Analyze grammar]

tatra sa samupāsṛtya natvā taṃ śrīghanaṃ mudā |
sasaṃghaṃ tatpuraḥ sthitvā prārthayadeva sāṃjaliḥ || 28 || {28}
[Analyze grammar]

bhagavannātha sarvajña bhagavaṃtaṃ sasāṃghikaṃ |
pūjayituṃ samichāmi paśyanme 'nugrahaṃ kuru || 29 || {29}
[Analyze grammar]

iti saṃprārthitaṃ tena bhagavān sa munīśvaraḥ |
tathā hīti pratiśrutvā tūṣṇībhūtvādhyuvāsa tat || 30 || {30}
[Analyze grammar]

tadā te brāhmaṇāḥ sarve saṃbhūya samupāgatāḥ |
bhagavataścaraṇau natvā cakrurbhojyanimaṃtraṇaṃ || 31 || {31}
[Analyze grammar]

tacchrutvā bhagavānprāha tāndṛṣṭvā bhaktimānasān |
pūrvameva sasaṃghāhamanenodya nimaṃtritaḥ || 32 || {32}
[Analyze grammar]

etadākarṇya sarve te brāhmaṇā bheditāśayāḥ |
paraṃ pratīkṣyamānāśca śanaiḥ svasvagṛhaṃ yayuḥ || 33 || {33}
[Analyze grammar]

tataḥ sa dhaniko matvā munīndreṇādhyuvāsitaṃ |
muditastaṃ muniṃ natvā sahasā svagṛhaṃ yayau || 34 || {34}
[Analyze grammar]

tatra sa svagṛhe gatvā vāṃdhaveṣṭajanaissaha |
tadarhabhojyasāmagrīṃ sahasā samasādhyayat || 35 || {35}
[Analyze grammar]

tato bhojyasthalaṃ tatra śodhayitvā samantataḥ |
ratnadhvajairvitānaiśca sa patākairamaṇḍayat || 36 || {36}
[Analyze grammar]

tato yathākramaṃ tatra divyaratnamayāni ca |
svāsanāni samāstīrya sugaṃdhīḥ samadhūpayat || 37 || {37}
[Analyze grammar]

tataḥ sa prātarutthāya snātvā śuddhāmvarāvṛtaḥ |
pūjāpādyārghasāmagrīṃ pratiṣṭhāpya pramoditaḥ || 38 || {38}
[Analyze grammar]

savāṃdhaveṣṭajanastatra kūṭāgāre samācarat |
sāñjalistaṃ muniṃ natvā prārthayadevamādarāt || 39 || {39}
[Analyze grammar]

bhagavannātha sarvajña samayo varttate 'dhunā |
tatsasaṃgho mamāvāse vijayituṃ samarhasi || 40 || {40}
[Analyze grammar]

iti saṃprārthite tena bhagavān sa sasāṃghikaḥ |
khikkhirīpātramādāya pratasthe cīvarāvṛtaḥ || 41 || {41}
[Analyze grammar]

tatra sa bhagavānmārge kṛtvā bhadraṃ samantataḥ |
prabhāsayan krameṇaivaṃ vaiśālyāṃ samupaviśat || 42 || {42}
[Analyze grammar]

tathāyātaṃ munīndraṃ taṃ śrīghanaṃ sāṃghikānvitaṃ |
dṛṣṭvā vaiśālikāḥ lokāḥ sarve 'pi samapūjayan || 43 || {43}
[Analyze grammar]

evamabhyarcyamāno 'bhivaṃdyamāno 'bhinaṃditaḥ |
bhāsayanbhadratāṃ kṛtvā saṃghaiḥ saha samācarat || 44 || {44}
[Analyze grammar]

tatra tasya gṛhe gatvā sasaṃghaḥ sa munīśvaraḥ |
taddattaṃ pādyamādāya svāsane samupāśrayat || 45 || {45}
[Analyze grammar]

tataste sāṃghikāścāpi sarve tatra yathākramaṃ |
taddattaṃ pādyamādāya svasvāsane samāśrayan || 46 || {46}
[Analyze grammar]

tataḥ sa dhaniko dṛṣṭvā sasaṃghaṃ taṃ munīśvaraṃ |
svasvāsane samāsīnaṃ pūjāṅgaiḥ samapūjayat || 47 || {47}
[Analyze grammar]

tato divyopacāraistaṃ bhagavantaṃ sasāṃghikaṃ |
supraṇītai rasopetairbhojanaiḥ samatoṣayat || 48 || {48}
[Analyze grammar]

tadbhojyaṃ surasaṃ bhuktvā bhagavān sa sasāṃghikaḥ |
amṛtairiva saṃtuṣṭastṛptiṃ yayau pramoditaḥ || 49 || {49}
[Analyze grammar]

asaṃghaiḥ taṃ muniṃ tṛptaṃ dṛṣṭvā sa dhaniko mudā |
tato 'panīya pātrāṇi taddhastādīnyaśodhayat || 50 || {50}
[Analyze grammar]

tataḥ śuddhauṣadhīpūgatāmvūlādi rasāyanaṃ |
buddhapramukhasaṃghebhyo muditaḥ sa svayaṃ dadau || 51 || {51}
[Analyze grammar]

tataḥ sa harṣito natvā taṃ munīndraṃ sasāṃghikaṃ |
purataḥ sāñjaliḥ sthitvā prārthayadevamādarāt || 52 || {52}
[Analyze grammar]

bhagavannātha sarvajña bhavatāṃ śaraṇaṃ gataḥ |
bhaktyaiva bhajanaṃ kurve tatkṣamasvāparādhatāṃ || 53 || {53}
[Analyze grammar]

sadaivaṃ kṛpayā dṛṣṭya paśyanbhavān sasāṃghikaḥ |
mamānugrahamādhāya trātumarhati sarvathā || 54 || {54}
[Analyze grammar]

tataḥ sa bhagavāñchāstā sasāṃghiko 'numoditaḥ |
dhanikaṃ taṃ samālokya naṃdayannevamādiśat || 55 || {55}
[Analyze grammar]

gṛhapate sadā nityamārogyamastu vo dhruvaṃ |
bodhipraṇidhisiddhiśca bhūyādbhadraṃ ca sarvadā || 56 || {56}
[Analyze grammar]

tatastasya priyā bhāryā śīlavatyanumoditā |
sāñjaliḥ praṇatiṃ kṛtvā prārthayattaṃ munīśvaraṃ || 57 || {57}
[Analyze grammar]

bhagavannātha sarvajña śvaścātra bhavatāmahaṃ |
pūjāṃ kartuṃ samicche tadanugrahītumarhati || 58 || {58}
[Analyze grammar]

tayeti prārthite dṛṣṭvā bhagavān sa tadāśayaṃ |
śraddhānvitaṃ pratijñāya tuṣṇībhūtvādhyuvāsa tat || 59 || {59}
[Analyze grammar]

tataḥ sa bhagavāñchāstā samutthāya sasāṃghikaḥ |
bhāsayaṃ bhadratāṃ kṛtvā svāśrame ca samāśrayat || 60 || {60}
[Analyze grammar]

tataḥ paradine prātaḥ snātvā śuddhāṃvarāvṛtā |
sādhitvā sarvasāmagrīṃ sā dūtaṃ preṣayanmunau || 61 || {61}
[Analyze grammar]

sa dūtaḥ sahasā gatvā vihare taṃ munīśvaraṃ |
sasaṃghaṃ sāṃjalirnatvā punarevaṃ nyavedayat || 62 || {62}
[Analyze grammar]

bhagavannātha sarvajña samayo varttate 'dhunā |
tatsasaṃgho bhavāṃstatra sahasāgantumarhati || 63 || {63}
[Analyze grammar]

tataḥ sa bhagavānnevaṃ bhadraṃ kṛtvā sasāṃghikaḥ |
dhanikasya gṛhe gatvā pādyaṃ gṛhyāsane 'viśat || 64 || {64}
[Analyze grammar]

tatrāsane samāsīnaṃ sasaṃghaṃ taṃ munīśvaraṃ |
dṛṣṭvā śīlavatī sātha yathāvidhi samarcayat || 65 || {65}
[Analyze grammar]

tataśca sā muditā sarvaṃ saṃghaṃ buddhādikaṃ tathā |
divyopacārasaṃyuktairbhojanaiḥ samatoṣayat || 66 || {66}
[Analyze grammar]

tataḥ saṃtarppitaṃ dṛṣṭvā śodhayitvā karādikaṃ |
datvā tāmvurapūgādiṃ natvā sā samupāśrayat || 67 || {67}
[Analyze grammar]

tataḥ sa bhagavāntasmai datvāśiṣaṃ sasāṃghikaḥ |
samutthāya tataścaivaṃ svavihāre samāśrayat || 68 || {68}
[Analyze grammar]

tathā sarve tadānyo 'pi dhanikasyātmajaḥ sudhīḥ |
tatparedyu vihāraṃ taṃ gatvā natvā nyamaṃtrayat || 69 || {69}
[Analyze grammar]

bhagavānnapi tasyaivaṃ dṛṣṭvā śraddhānvitaṃ manaḥ |
tatheti pratimoditvā tūṣṇībhūtvādhyuvāsa ca || 70 || {70}
[Analyze grammar]

tataḥ sastaṃ muniṃ natvā svagṛhaṃ sahasāgataḥ |
bāṃdhavaiḥ sarvasāmagrīṃ muditaḥ samasādhayat || 71 || {71}
[Analyze grammar]

tataḥ prātaḥ samutthāya snātvā śuddhāmvārāvṛtaḥ |
vihāre samupāsṛtya natvaivaṃ munimabravīt || 72 || {72}
[Analyze grammar]

bhagavannātha sarvajña samayo varttate 'dhunā |
tatsaṃgho bhavān gehe mamāgantuṃ samarhati || 73 || {73}
[Analyze grammar]

tataḥ sasaṃgha utthāya bhagavān sa tathācarat |
tadgṛhe pādyamādāya tatrāsane samāśrayat || 74 || {74}
[Analyze grammar]

tataḥ sa mudito buddhapramukbaṃ sarvasāṃghikaṃ |
samabhyarcya tathā divyabhojanaiḥ samatoṣayat || 75 || {75}
[Analyze grammar]

tato 'panīya pātrāṇi śodhayitvā karādikaṃ |
datvā pūgādikaṃ natvā purataḥ samupāśrayat || 76 || {76}
[Analyze grammar]

punaḥ sa sāṃjalirnatvā prakṛtvā ca kṣamārthanāṃ |
sasaṃghaṃ taṃ munīndraṃ tam saṃdṛṣṭvaivaṃ samupāśrayat || 77 || {77}
[Analyze grammar]

tadā tasya snuṣā cāpi satyavatī pramoditā |
bhagavaṃtaṃ sasaṃghaṃ taṃ praṇatvaivaṃ nyamaṃtrayat || 78 || {78}
[Analyze grammar]

bhagavānnapi tasyāśca dṛṣṭva śraddhānvitaṃ manaḥ |
tatheti pratimoditvā tuṣṇībhūtvā radhāṃ vyadhāt || 79 || {79}
[Analyze grammar]

tataḥ sa bhagavāṃstasmai datvāśiṣaṃ sasāṃghikaḥ |
tathā kṛtvā śubhaṃ loke gatvāśrame samāśrayat || 80 || {80}
[Analyze grammar]

tataḥ sāpi tathā prātaḥ snātvā śuddhāmvarāvṛtā |
dūtenāpi munīndraṃ taṃ sasaṃghaṃ samacodayat || 81 || {81}
[Analyze grammar]

tathā sa bhagavāṃścāpi sasāṃghikaḥ samutthitaḥ |
pracaranbhadratāṃ kṛtvā tasyā gehe samāviśat || 82 || {82}
[Analyze grammar]

tatra pādyārghamādāya bhagavān sa sasāṃghikaḥ |
śubhāsane samāsīnastasthau tatra prabhāsayan || 83 || {83}
[Analyze grammar]

tathāsthitaṃ munīndraṃ taṃ dṛṣṭvā saṃpramoditā |
yathāvidhi samabhyarcya tathā bhojyairatoṣayat || 84 || {84}
[Analyze grammar]

tātastaṃ sugataṃ tṛptaṃ sasāṃghikaṃ samīkṣya sā |
tatrāpanīya pātrāṇi hastādīṃ paryaśodhayat || 85 || {85}
[Analyze grammar]

tataḥ pūgādikaṃ datvā prārthayitvā kṣamāṃ tathā |
sasaṃghaṃ taṃ muniṃ natvā sā sāñjalirupāśrayat || 86 || {86}
[Analyze grammar]

tathā sa bhagavāṃstasyai datvāśīṣaṃ sasāṃghikaḥ |
tato vihāyasā gatvā svāśrame ca samāśrayat || 87 || {87}
[Analyze grammar]

tathā sa dhaniko bhaktyā bhagavantaṃ sasāṃghikaṃ |
divyādbhutarddhisaṃbhāraiḥ punarevaṃ nyamaṃtrayat || 88 || {89!}
[Analyze grammar]

tatputreṇa tṛtīye 'hni caturthe snuṣayā tathā |
sasaṃgho bhagavānnevaṃ divyabhogairnimaṃtritaḥ || 89 || {90}
[Analyze grammar]

tacchrutvā taddvijāḥ sarve vaiśālikāḥ prajā api |
alabdhāvasarāḥ śāstuḥ pūjāyāṃ praticukruśuḥ || 90 || {91}
[Analyze grammar]

tataste saṃmataṃ kṛtvā sarve viprāḥ sapaurikāḥ |
dhanikāya puraṃ kruddhāścakrurnikāsanodyamaṃ || 91 || {92}
[Analyze grammar]

evaṃ tatsamataṃ jñātvā bhagavān sa munīśvaraḥ |
dhanikaṃ taṃ samāhūya pura evamupādiśat || 92 || {93}
[Analyze grammar]

sādho gṛhapate sarve ime vaiśālikā dvijāḥ |
kruddhāste saṃghabhojye 'tra hyalabdhāvasarā mama || 93 || {94}
[Analyze grammar]

tadatra tvaṃ kṣamāṃ kṛtvā dvijān sarvānprabodhaya |
kṛtvātra vinayaṃ dharme prasādayitumarhasi || 94 || {95}
[Analyze grammar]

ityādiṣṭaṃ munīndreṇa śrutvā sa dhanikastathā |
ityāśrutya dvijān sarvān samupetyaivamabravīt || 95 || {96}
[Analyze grammar]

bhavanto na mayā jñātaṃ bhavatāṃ kopakāraṇaṃ |
tadatra me samākhyāta yadarthe kupyate 'dhunā || 96 || {97}
[Analyze grammar]

iti tenoditaṃ śrutvā sarve te brāhmaṇā |
kopāgniparidagdhāsyā dhanikaṃ taṃ ninindire || 97 || {98}
[Analyze grammar]

tatraiko brāhmaṇaḥ sādhurdayāluḥ sukṛtārthavit |
dhanikaṃ taṃ samāmaṃtrya bodhayituṃ samabravīt || 98 || {99}
[Analyze grammar]

sādho gṛhapate 'smābhiryathātra samataṃ kṛtaṃ |
tathā tatte pravakṣyāmi śrutvā tatpratibudhyatāṃ || 99 || {100}
[Analyze grammar]

bhavanto yanmunīndro 'yamatrāsmākaṃ hitechayā |
saddharmaṃ samupādeṣṭuṃ sasāṃghikaḥ samāgataḥ || 100 || {1}
[Analyze grammar]

tadasmābhirmunīndro 'yaṃ pūjanīyaḥ samādaraiḥ |
ato nimaṃtraṇīyo 'tra sarvaiḥ saṃbhūya nānyathā || 101 || {2}
[Analyze grammar]

ekaścetkurute vittamadādasya nimaṃtraṇaṃ |
sarvairnirvāsanīyo 'sau yato 'nyadharmavighnakṛt || 102 || {3}
[Analyze grammar]

ityasmābhiḥ kṛtaṃ sādho samayaṃ sarvasaṃmataṃ |
tadvilaṃghya tvayaikena śāstuḥ pūjā kṛtā sadā || 103 || {4}
[Analyze grammar]

etaddheto ime sārve brāhmaṇā ruṣitāstathā |
niṣkāsayitumichanti tvāmanyadharmavādhakaṃ || 104 || {5}
[Analyze grammar]

kiṃ cāpi bhagavānatra sarvadā sthāsyate na hi |
tatsarve bhagavatpūjāṃ kartuṃ vāṃchanti sāṃprataṃ || 105 || {6}
[Analyze grammar]

yaccāyaṃ bhagavāñchāstā dharmarājo munīśvaraḥ |
sarvasatvahitārthāya samutpanna ihā 'dhunā || 106 || {7}
[Analyze grammar]

tathātra sarvasatvānaṃ hitaṃ kartumupācaran |
saddharmaṃ samupādiśya caratyayaṃ samaṃtataḥ || 107 || {8}
[Analyze grammar]

tathātrāpi hitaṃ kartumasmākaṃ samupāgataḥ |
saddharmaṃ samupādiśya vijayate sasāṃghikaḥ || 108 || {9}
[Analyze grammar]

tadatra sarvalokānāṃ triratnabhajanotsavaṃ |
dātumarhasi sarveṣāmapi puṇyapravṛddhaye || 109 || {10}
[Analyze grammar]

eka eva tvaṃ evaṃ tu mā kṛthā bhajanaṃ sadā |
sarvaiḥ saṃbhūya te sāstuḥ karttavyaṃ bhajanaṃ sadā || 110 || {11}
[Analyze grammar]

iti tenoditam śrutvā dhanikaḥ sa vivodhitaḥ |
brāhmaṇaṃ taṃ samālokya praṇatvaivamabhāṣata || 111 || {12}
[Analyze grammar]

mayā na jñāyate hyevaṃ bhavadbhiḥ samayaṃ kṛtaṃ |
tadatra me 'parādhatvaṃ kṣantumarhanti sarvathā || 112 || {13}
[Analyze grammar]

yadi vo vidyate śraddhā triratnabhajane sadā |
kurudhvaṃ sarvadāpyatra saṃbuddhabhajanaṃ khalu || 113 || {14}
[Analyze grammar]

yadā na vidyate pūjā saṃbuddhe 'smin sasāṃghike |
tadaivāhaṃ kariṣyāmi saṃbuddhabhajanaṃ khalu || 114 || {15}
[Analyze grammar]

iti tena samākhyātaṃ śrutvā sarve 'pi te dvijāḥ |
satyamiti parijñāya vabhūvustatprasāditāḥ || 115 || {16}
[Analyze grammar]

tataste brāhmaṇāḥ sarve saṃbhūya saha paurikaiḥ |
bhagavataḥ sasaṃghasya nimaṃtritumupāsaran || 116 || {17}
[Analyze grammar]

tatra te brāhmaṇāḥ sarve sametya saha paurikaiḥ |
sāñjalayo munīndraṃ taṃ natvaivaṃ prārthayanmudā || 117 || {18}
[Analyze grammar]

bhagavannātha sarvajña trimāsyaṃ bhavatāṃ sadā |
satkāraṃ kartumichāma tvadanujñāṃ dadātu naḥ || 118 || {19}
[Analyze grammar]

iti taiḥ prārthite sarvairdṛṣṭvā sa bhagavānmuniḥ |
teṣāmāśayaśuddhatvaṃ tūṣṇībhūtvādhyuvāsa tat || 119 || {20}
[Analyze grammar]

tataste brāhmaṇāḥ sarve bhagavatādhivāsitaṃ |
matvā sapaurikā natvā taṃ muṇiṃ svapure 'caran || 120 || {21}
[Analyze grammar]

tatra te paurikā viprāḥ śodhayitvā samamṭataḥ |
bhojyakṣatre dhvajairuccairvitānaiḥ paryaśobhayan || 121 || {22}
[Analyze grammar]

tatrāsanāni prajñapya sarvasāmagrasādhanaṃ |
kṛtvā sarve 'pi te lokā mahotsāhaṃ pracakrire || 122 || {23}
[Analyze grammar]

tataste brāhmaṇāḥ prātaḥ snātvā śuddhāmvarāvṛtāḥ |
tatrāśrame sametyaivaṃ natvā taṃ prārthayanmuniṃ || 123 || {24}
[Analyze grammar]

bhagavannātha sarvajña samayo varttate 'dhunā |
tatsasaṃgho bhavāṃstatra pure āgantumarhati || 124 || {25}
[Analyze grammar]

tataḥ sa bhagavānbuddhaḥ sasaṃghaścīvarāvṛtaḥ |
khikkhiripātramādāya saṃpratasthe prabhāsayan || 125 || {26}
[Analyze grammar]

tatra mārgeṣu sarvatra bhagavān sa sasāṃghikaḥ |
bhāsayaṃ bhadratāṃ kṛtvā pracaraṃstatpure 'viśat || 126 || {27}
[Analyze grammar]

tatra sa bhagavān kṣetre suśodhite sasāṃghikaḥ |
taddattaṃ pādyamādāya svāsane samupāśrayat || 127 || {28}
[Analyze grammar]

saṃbuddhapramukhaṃ sarvaṃ saṃghaṃ te samatoṣayat |
tatastaṃ sugataṃ tṛptaṃ saṃghaṃ cāpi vilokyate || 128 || {29}
[Analyze grammar]

tatpātrāṇyupanītvā taddhastādīkaṃ vyaśodhayat |
tataḥ sa pūgatāmbūramahauṣadhyarasāya naṃ || 129 || {30}
[Analyze grammar]

datvā kṣamārthanaṃ kṛtvā taṃ sasaṃghaṃ praṇemire |
tataste brāhmaṇāḥ sarve paurāścāpi pramoditāḥ |
tatsaddharmāmṛtaṃ pātimupātasthuḥ samāhitāḥ || 130 || {31}
[Analyze grammar]

tatra sa bhagavāndṛṣṭvā sarvāṃstān samupasthitān |
āryasatyaṃ samārabhya saddharmaṃ samupādiśat || 131 || {32}
[Analyze grammar]

tato bhadrāśiṣaṃ datvā bhagavān saha saṃghikaiḥ |
bhāsayaṃ bhadratāṃ kurvan gatvā svāśramamāśrayat || 132 || {33}
[Analyze grammar]

evaṃ vaiśālikā lokāste traimāsyaṃ niraṃtaraṃ |
yathārhabhojanaiḥ śāstuḥ sasaṃghasya prabhejire || 133 || {34}
[Analyze grammar]

tato 'nte dhanikaścāpi patnī putraḥ snuṣāpi ca |
saṃbuddhapramukhaṃ saṃghaṃ divyabhogyaiḥ samārcayat || 134 || {35}
[Analyze grammar]

bhagavānnapi tathā tebhyo datvā śubhāśiṣaṃ tataḥ |
samutthāya sasaṃghaśca gatvāśrame samāśrayat || 135 || {36}
[Analyze grammar]

tataḥ sa dhanikaḥ patnīputrasnuṣāsamanvitaḥ |
dṛṣṭasatyaḥ sadā ratnatrayasevārato 'bhavat || 136 || {37}
[Analyze grammar]

etatpuṇyānubhāvena bhūyo 'tiśrīsamṛddhimān |
sarvalokahitaṃ kṛtvā pracacāra śubhe sadā || 137 || {38}
[Analyze grammar]

taddṛṣṭvā vismitāḥ sarve bhikṣavaḥ samupāśritāḥ |
bhagavantaṃ praṇatvaivaṃ paprachustatpurākṛtaṃ || 138 || {39}
[Analyze grammar]

bhagavan kiṃ purānena dhanikena vṛṣaṃ kṛtaṃ |
kutra kathaṃ kadaitannaḥ sarvamākhyātumarhati || 139 || {40}
[Analyze grammar]

iti tairbhikṣubhiḥ pṛṣṭe bhagavān sa munīśvaraḥ |
sarvānstāṃ saṃghikāndṛṣṭvā tadaivaṃ samupādiśat || 140 || {41}
[Analyze grammar]

śṛṇuta bhikṣavaḥ sarve yadanena vṛṣaṃ kṛtaṃ |
tatpatnyā ca putreṇa snuṣayā ca taducyate || 141 || {42}
[Analyze grammar]

varāṇasyāmabhūtpūrvaṃ mālikaḥ kamalābhidhaḥ |
durbhikṣakṣapite kāle parāṃ durgatimāgataḥ || 142 || {43}
[Analyze grammar]

patnī patnavikā nāma putraḥ kuvaliyābhidhaḥ |
pāṭalokhyā snuṣā ceti vabhūvustasya saṃmatāḥ || 143 || {44}
[Analyze grammar]

tadaikasmindine tasya gṛhāntike prapuṣpite |
udyāne sāyamāgatya pratyekabuddha āśrayet || 144 || {45}
[Analyze grammar]

te sarve ekavastrā hi paryāyena nṛpālaye |
datvā puṣpāṇi prāyātāḥ svabhavane niṣīdire || 145 || {46}
[Analyze grammar]

tadā sa ca gṛhasthāste tatrodāne jvalatprabhāṃ |
dṛṣṭvā kiṃ mahojvālamudyāne iti vismitāḥ || 146 || {47}
[Analyze grammar]

sahasā te samutthāya tatrodyāne nirīkṣituṃ |
sarvagatāḥ samīkṣantaḥ dadṛśustaṃ prabhāsayaṃ || 147 || {48}
[Analyze grammar]

tatra te samupāśritya dṛṣṭvā taṃ dhyānasaṃsthitaṃ |
sāñjalayaḥ praṇatvaiva muditā svagṛhaṃ yayuḥ || 148 || {49}
[Analyze grammar]

tatra te svagṛhāsīnāḥ prātastatpūjanotsukāḥ |
nirddhanāstadvyathāṃ prāpu lūnapakṣāḥ khagā iva || 149 || {50}
[Analyze grammar]

tadā sa mālikastasmai pūjāṃ kartuṃ samutsukaḥ |
taddravyaṃ svagṛhe samyaganviṣya samalokayat || 150 || {51}
[Analyze grammar]

tatra gṛhe sa sarvatra samanviṣya samaṃtataḥ |
kañci mātramapi dravyamalabdhaivaṃ vyaciṃtayat || 151 || {52}
[Analyze grammar]

aho mayā purā pāpaṃ prakṛtaṃ kiṃ yato 'dhunā |
akiṃcanyo daridro 'smi kimatra jīvitena me || 152 || {53}
[Analyze grammar]

yato na vidyate dravyaṃ kiṃ cidapi gṛhe mama |
tatkena kariṣyāmi pūjāmasya mahātmanaḥ || 153 || {54}
[Analyze grammar]

atrāyaṃ svayamāgatya mamodyāne samāśritaḥ |
pratyekabuddha ātmajo dhyātvā tiṣṭhati bhāsayan || 154 || {55}
[Analyze grammar]

tadasya sugatasyātra karttavyā satkṛtirmayā |
kadāyaṃ puri ramyatra samāgachetsvayaṃ punaḥ || 155 || {56}
[Analyze grammar]

tatprātaḥ śūnyapātreṇa gachedito mamātmavit |
tanmamātra bhave śūnyamiva janmāpi nisphalaṃ || 156 || {57}
[Analyze grammar]

yato mānyo 'bhipūjyo yaṃ pūjyate na kathaṃ cana |
tatra kiṃ jāyate bhadraṃ puṇyaṃ vāsya kathaṃ kutaḥ || 157 || {58}
[Analyze grammar]

puṇyaṃ vinātra saṃsāre kiṃ sāraṃ janma nisphalaṃ |
bhuktvāpi kiṃ sukhānyatra suciraṃ jīvite nanu || 158 || {59}
[Analyze grammar]

puṇyārthe jīvitaṃ janma tadatra yadi naśyati |
kimeva jīvitenāpi janmanā pāpasādhinā || 159 || {60}
[Analyze grammar]

tanmṛtyurme varaṃ hyatra na mithyācirajīvitaṃ |
avaśyameva saṃsāre sarvatra maraṇaṃ dhruvaṃ || 160 || {61}
[Analyze grammar]

kimevaṃ dehapuṣṭena bhuktvā duḥkhāṃ sarvadā |
tatkenāpi pradānena pūjayeyamimaṃ jinaṃ || 161 || {62}
[Analyze grammar]

puṇyena sadgatiṃ yāyāṃ pāpena durgatiṃ sadā |
tatpāpaṃ parityaktuṃ puṇyaṃ prāptu yateya hi || 162 || {63}
[Analyze grammar]

yadyatra pūjyate nāyaṃ drakṣyate ca kadā kuha |
buddhapūjāṃ vinā bhadre puṇyaṃ ca lapsyate kutaḥ || 163 || {64}
[Analyze grammar]

yāvanna prāpyate puṇyaṃ tāvaddurgaticāraṇaṃ |
tasmātpuṇyaṃ prayatnena karttavyaṃ sukhatāptaye || 164 || {65}
[Analyze grammar]

tadatra śraddhayā kiṃcinmātreṇāpi svavastunā |
satkṛtyainaṃ mahābhijñaṃ bhajeyaṃ samupasthitaḥ || 165 || {66}
[Analyze grammar]

iti dhyātvā viniścitya mālikaḥ saṃpramoditaḥ |
bhāryāṃ putraṃ snuṣāṃ cāpi samāmaṃtryaivamabravīt || 166 || {67}
[Analyze grammar]

aye priye snuṣe putra yūyaṃ śṛṇuta madvacaḥ |
yadatra kartumichāmi tatra yūyaṃ prasādataḥ || 167 || {68}
[Analyze grammar]

yadatrāyaṃ mahābhijñaḥ svayameva samāgataḥ |
asmākaṃ gṛhe dravyaṃ kiñcitmātraṃ na vidyate || 168 || {69}
[Analyze grammar]

tatkenātra kariṣyāmaḥ pūjāmasya mahātmanaḥ || 169 || {69!}
[Analyze grammar]

yadi na pūjyate 'smābhiḥ sugato 'yaṃ muniryatiḥ |
tadā puṇyaṃ vayaṃ kutra lapsyāmahe kadā kathaṃ || 170 || {70}
[Analyze grammar]

puṇyaṃ vinātra saṃsāre nisphalaṃ janma jīvitaṃ |
tadvayaṃ puṇyato prāptuṃ yatema sarvathā vayaṃ || 171 || {71}
[Analyze grammar]

puṇyena sadgatiṃ prāpya pāpena durgatiṃ sadā |
tatsadgatisukhaprāptyai puṇyaṃ kurvīmahi dhruvaṃ || 172 || {72}
[Analyze grammar]

caturṇāṃ vidyate 'smākamekaṃ sarvasvamamvaraṃ |
anenāpyenamāchādya prabhajamahi sāṃprataṃ || 173 || {73}
[Analyze grammar]

nādyarājakule nagnā gachāmaḥ kiṃ bhaviṣyati |
etatme vacanaṃ śrutvābhyanumoditumarhatha || 174 || {74}
[Analyze grammar]

iti tenoditaṃ śrutvā patnī putraḥ snuṣāpi te |
sarve 'pyabhyanumoditvā tathā kurviti procire || 175 || {76!}
[Analyze grammar]

ityetatsamayaṃ kṛtvā sarve te śraddhayānvitāḥ |
gatvā tenaikavastreṇa taṃ prāchādya samārcayan || 176 || {77}
[Analyze grammar]

tataste muditāḥ sarve kṛtāñjalipuṭā muneḥ |
tasya pādau praṇatvaivaṃ praṇidhānaṃ pracakrire || 177 || {78}
[Analyze grammar]

anena vastradānena vayaṃ sarve śubhāśayāḥ |
bhaveyaṃ sadgatiṃ yātā divyasaṃpattihāninaḥ || 178 || {79}
[Analyze grammar]

śāstāraṃ sugataṃ buddhaṃ samārādhya sadā bhave |
triratnabhajanaṃ kṛtvā bhavema bodhicāriṇaḥ || 179 || {80}
[Analyze grammar]

iti tairmuditaiḥ sarvaiḥ praṇidhānaṃ kṛtaṃ tathā |
viditvā sa mahāvijñastathāstviti samādiśat || 180 || {81}
[Analyze grammar]

tatastesāṃ manoharṣaṃ kṛtvā sa sugato muniḥ |
tata uḍḍīya pakṣīva bhāsayan svāśrame yayau || 181 || {82}
[Analyze grammar]

taddṛṣṭvā te nanditāḥ sarve buddhadharmānuśaṃsinaḥ |
triratnasmaraṇaṃ kṛtvā pracerire sukhaṃ sadā || 182 || {83}
[Analyze grammar]

tatpuṇyapraṇidhānena dhaniko 'yaṃ sa mālikaḥ |
jāto divyaprabhāvarddhiḥ patnīputrasnuṣānvitaḥ || 183 || {84}
[Analyze grammar]

manaḥśuddhividhānena dānenātiglaghīyasā |
bhavantyalaghvyāḥ saṃkalpaiḥ saṃpadaḥ satvaśālināṃ || 184 || {85}
[Analyze grammar]

buddhakṣetreṣu yatkarma sukṛtaṃ duḥkṛtaṃ tathā |
mahattaratvamāsādya phalatyeva sadā bhave || 185 || {86}
[Analyze grammar]

iti matvātra saṃsāre karttavyaṃ sukṛtaṃ sadā |
bauddhe satkṛtapuṇyena labhanti bodhisaṃpadaḥ || 186 || {87}
[Analyze grammar]

iti śāstrā samādiṣṭaṃ śrutvā sarve 'pi sāṃghikāḥ |
menire cittavaimalyamūlaṃ dānaphalaśriyaṃ || 187 || {88}
[Analyze grammar]

tacchrutvā brāhmaṇāste 'pi tatpuṇyavismitā mudā |
bhagavaṃtaṃ sadā smṛtvā prabhejire 'numoditāḥ || 188 || {89}
[Analyze grammar]

tathā te brāhmaṇāścāpi sarve 'pi paurikāstathā |
tatpuṇyapariśuddhāṃśā vabhuvuḥ kuśalodyatāḥ || 189 || {90}
[Analyze grammar]

helārpitaṃ ratnadhanaṃ tṛṇāgraṃ śraddhāvatīrṇaṃ tṛṇamapyanarghaṃ |
anekaśobhānubhavaṃ hi cittaṃ cittaṃ nimittaṃ śubhasaṃbhavānāṃ || 190 || {91}
[Analyze grammar]

iti me guruṇādiṣṭaṃ śrutaṃ mayā tathocyate |
śrutvāpyevaṃ mahārāja karttavyaṃ sukṛtaṃ sadā || 191 || {92}
[Analyze grammar]

prajāścāpi mahārāja bodhayitvā prayatnataḥ |
kramādbodhiṃ samāsādya saṃbuddhapadamāpnuyāḥ || 192 || {94}
[Analyze grammar]

iti tenārhatākhyātaṃ śrutvāśokaḥ sa bhūpatiḥ |
tathā hīti pratijñāya prābhyanandatsapārṣadaḥ || 193 || {95}
[Analyze grammar]