![Akshayamatinirdesha [sanskrit] - book cover](/images/book-cover-default.png)
Akshayamatinirdesha [sanskrit]
18,273 words
The Sanskrit edition of the Akshayamatinirdesha: an ancient Mahayana Sutra devoted to the Bodhisattva Akshayamati, recognized as one of the sixteen bodhisattvas of the Bhadrakalpa (fortunate aeon). The text expounds the practices and ethics of the Bodhisatva way of life. Original titles: Akṣayamatinirdeśa (अक्षयमतिनिर्देश), Akṣayamatinirdeśasūtra (अक्षयमतिनिर्देशसूत्र), Akṣayamati-nirdeśa-sūtra (अक्षयमति-निर्देश-सूत्र).
VIII. Paripākabala (20th-23rd aksaya, Saṃgrahavastu)
[English text for this chapter is available]
punar aparaṃ, bhadanta śāradvatīputra, bodhisattvānāṃ catvāri saṃgrahavastūny apy akṣayāṇi katamāni catvāri? tad yathā dānam, priyavāditā, arthacaryā, samānārthatā ca.
tatra dānaṃ yad āmiṣadānaṃ dharmadānaṃ ca | tatra priyavāditā yā yācanakebhyo dharmaśravaṇikebhyaś ca mṛduvākyapriyavāditā | tatrārthacaryā yā saṃcintya svaparārthaparipūriḥ | tatra samānārthatā yo yasmin yāna ātmano guṇasaṃjnā tasminn eva yāne dharmāmiṣagrāhakān pratiṣṭhāpayati.
punar aparaṃ dānaṃ yad yācanakānāṃ cittārādhanādānaṃ | tatra priyavāditā yā yācanakānām akuṃsanatā | tatrārthacaryā yā yācanakānām arthaparipūriḥ | tatra samānārthatā yas tasminn eva yāne'vatārayati.
punar aparaṃ dānaṃ ya āśayatas tyāgaḥ | priyavāditā yaḥ prayogāparicchedaḥ | arthacaryā yādhyāśayena dattvākaukṛtyatā | samānārthatā yā mahāyānapariṇāmanā.
punar aparaṃ dānaṃ yo maitryanugamanena cittena parityāgaḥ | priyavāditā yaḥ prītiprāmodyabhūtasya cittasyāparityāgaḥ | arthacaryā yo mahākaruṇāpariśuddhacittotpādena sarvasattvānāṃ kiṃkaraṇīyeṣūdyogaḥ | samānārthatā yopekṣāsamanvāgatenānatānunnatena cittena sarvajñajñānapariṇāmanā.
punar aparaṃ dānaṃ yo yathādharmam iṣṭānāṃ paribhogānāṃ parityāgaḥ | priyavāditā yā yebhyo dānaṃ dattvā teṣām dharme pratiṣṭhāpanā | arthacaryā yā svārthaparārthaparipūriḥ | samānārthatā yaḥ sarvasattvārthāya sarvajñatāyāṃ cittotpādaḥ.
punar aparaṃ dānaṃ yo'ntarbāhyavastūnāṃ parityāgaḥ | priyavāditā yaḥ sarvadharmaguṇajñāne'nācāryamuṣṭiḥ | arthacaryā yā svārthaṃ tyaktvā parārthakriyā | samānārthatā yā bhogān piṇḍīkṛtān hastaprāptān api parebhyo dattvādaurmanasyatā.
tatra katamad dharmadānam? yathāśrutadharmāṇām deśanā | priyavāditā yā nirāmiṣeṇa cittena dharmasya saṃprakāśanā | arthacaryā yā paropadeśe svādhyāyāvatāre'parikhedatā | samānārthatā yaḥ sarvajñatācittāviyuktatayā dharmalābhaḥ pareṣāṃ cāvatāraṇatā.
punar aparaṃ dharmadānaṃ yā dharmaśravaṇikānām āgatāgatānām aparikhinnātandritadharmadeśanā | priyavāditā yā yāvad dīrgham api gatvā saddharmaprakāśanā | arthacaryā yā ye pudgalā dharmārthikāḥ, pātradhārā, niścīvarapiṇḍapātaśayanāsanaglānapratyayabhaiṣajyapariṣkārāḥ, pare'pi, tebhyo yena yena vaikalyaṃ tat sarvaṃ dattvādhyāśayagatacittasaṃtānena dharmadeśanā | samānārthatā yā dharmadānaṃ dattvānuttarāyāṃ samyaksaṃbodhāv avatāraṇatā pariṇāmanā.
punar aparaṃ dharmadānaṃ yaḥ sarvadānānāṃ paraṃ viditvā dharmadānaparityāgaḥ | priyavāditā yā hitavastutayā dharmadeśanā | arthacaryā yārthapratisaraṇā dharmadeśanā na vyañjanapratisaraṇā | samānārthatā yā sarvabuddhadharmaparipūraye dharmadeśanā.
punar aparaṃ dharmadānaṃ yā dānapāramitā | priyavāditā yā śīlapāramitā kṣāntipāramitā | arthacaryā yā vīryapāramitā | samānārthatā yā dhyānapāramitā prajñāpāramitā.
punar aparaṃ dharmadānaṃ prathamacittotpādikānāṃ bodhisattvānām | priyavāditā caryāpratipannānāṃ bodhisattvānām | arthacaryāvaivartikānāṃ bodhisattvānām | samānārthataikajātipratibaddhānāṃ bodhisattvānām.
punar aparaṃ dharmadānaṃ bodher mūlabījāśrayaḥ | priyavāditā bodheḥ pariniṣpannāṅkurapattrāḥ | arthacaryā bodheḥ parisphuritapuṣpam | samānārthatā bodher abhinirvṛttaphalam.
imāny ucyante, bhadanta śāradvatīputra, bodhisattvānām akṣayāṇi saṃgrahavastūni.