![Akshayamatinirdesha [sanskrit] - book cover](/images/book-cover-default.png)
Akshayamatinirdesha [sanskrit]
18,273 words
The Sanskrit edition of the Akshayamatinirdesha: an ancient Mahayana Sutra devoted to the Bodhisattva Akshayamati, recognized as one of the sixteen bodhisattvas of the Bhadrakalpa (fortunate aeon). The text expounds the practices and ethics of the Bodhisatva way of life. Original titles: Akṣayamatinirdeśa (अक्षयमतिनिर्देश), Akṣayamatinirdeśasūtra (अक्षयमतिनिर्देशसूत्र), Akṣayamati-nirdeśa-sūtra (अक्षयमति-निर्देश-सूत्र).
19th aksaya, Ṛddhividhijñānābhijñā
[English text for this chapter is available]
tatra katamā bodhisattvānām ṛddhividhijñānābhijñā?
yā chandasā vīryeṇa cittena mīmāṃsayā pragṛhītānāṃ dharmāṇāṃ pratipattiḥ karmaṇyatādhipateyatā | ata eteṣāṃ caturṇām ṛddhipādānāṃ suparibhāvitatvāt pratyakṣam anabhisaṃskārā ṛddhīḥ prāpnoti, so'nekavidhāny ṛddhiprātihāryāṇi pratyanubhavati.
tāni tadṛddhiprātihāryāṇi sattvāvekṣayā vistareṇa sattvān paripācayanti. yena tadṛddhiprātihāryeṇa sattvā vineyās tad tad ṛddhiprātihāryaṃ sattvebhya upadarśayati, rūpe vā bale vādhiṣṭhāne vā. sa yena yena rūpavarṇābhāsena sattvā vinītās taṃ tam rūpavarṇābhāsam eva sattvebhya upadarśayati, buddharūpavarṇābhāsena vā, bodhisattvrūpavarṇābhāsena vā, pratyekabuddharūpavarṇābhāsena vā, śrāvakarūpavarṇābhāsena vā, śakrarūpavarṇābhāsena vā, lokapālarūpavarṇābhāsena vā, cakravartirūpavarṇābhāsena vā, evaṃ viṣṇuskandamaheśvarabrahmaprajāpatirūpavarṇābhāsena vā, yad atadrūpavarṇābhāsena vāntaśo yena yena tiryagyonirūpavarṇābhāsena sattvā vinītās taṃ tam eva rūpavarṇābhāsaṃ sattvebhyo darśayati, sattvebhyo yathādhimuktyā dharmaṃ deśayati.
sa yena yena balena tīvragarvitakrodhamānadarpitamattabalāḥ sattvā vineyās tat tad balam eva darśayati, atha vā śakrabalam atha vā brahmabalam atha vā lokapālabalam atha vā cakravartibalam atha vā mahānagnabalam atha vā caturthabhāganārāyaṇabalam atha vārdhanārāyaṇabalam atha vā nārāyaṇabalam. meruḥ parvatarājo'ṣṭhāṣaṣṭiyojanaśatasahsrasamucchrayo'pi caturaśītiyojanasahasravistāro'pi yena bodhisattvabalānvitena bodhisattvena tryaṅgulibhir utkṣiptaḥ, tad yathaikam āmalakīphalam anyaṃ lokadhātum ākṣiptam api tasya bodhisattvasya balam anupahatam. imaṃ trisāhasramahāsāhasralokadhātum evaṃ viśālam evaṃ vipulam abdhātuprabhṛti yāvad upary avīciparyantaṃ karatalasyopari pratiṣṭhāpya kalpaṃ vā kalpāvaśeṣaṃ vā tiṣṭhan sarveryāpathān api darśayati. evaṃbalo bodhisattvas tīvragarvitakrodhamānadarpitamattebhyaḥ sattvebhyo garvitakrodhamānadarpitamattabalavineyārthaṃ dharmaṃ deśayati.
sa tair ṛddhipādair adhiṣṭhānajñānaṃ prāpnoti, tair bodhisattvasyādhiṣṭhānajñānair yad yad adhitiṣṭhet tat tad eva bhavet. sa yadi mahāsamudro goṣpadamātro bhavatv iti goṣpadam adhitiṣṭhed goṣpadamātraḥ tiṣṭhet, goṣpadam api mahāsamudro bhavatv ity adhitiṣṭhen mahāsamudra eva tiṣṭhet.
yadi kalpoddāho'pskandho bhavatv ity adhitiṣṭhet so'pskandha eva tiṣṭhet | apskandho'py agniskandho bhavatv ity adhitiṣṭet so'gniskandha eva tiṣṭhet | agniskandho'pi vāyuskandho bhavatv ity adhitiṣṭhet sa vāyuskandha eva tiṣṭhet | vāyuskandho'py agniskandho bhavatv ity adhitiṣṭhet so'gniskandha eva tiṣṭhet | agniskandho'pi pṛthivīskandho bhavatv ity adhitiṣṭhet sa pṛthivīskandha eva tiṣṭhet | pṛthivīskandho'py agniskandho bhavatv ity adhitiṣṭhet so'gniskandha eva tiṣṭhet | evaṃ yān yān dharmān mṛdūn vā madhyamān vādhimātrān vādhiṣṭhānenādhitiṣṭhet te ta eva bhaveyuḥ.
adas tasyādhiṣṭhānaṃ tu bhagavanto buddhān sthāpayitvā na kena cic chakyaṃ kṣobhayituṃ kampayitum antardhāpayituṃ śakreṇa vā brahmaṇā vā māreṇa vā mārakāyikair devair vā na kenacit punar loke sahadharmeṇa | yaḥ sattvanikāye śakyas tad bodhisattvādhiṣṭhānaṃ kṣobhayituṃ kampayitum antardhāpayituṃ na sa kaś cit sattvaḥ. sa tena bodhisattvādhiṣṭhānajñānabalotpādena vividhābhilāpahṛṣṭatuṣṭaparamebhyaḥ sattvebhyo yathāśabdapraveśena dharmaṃ deśayati.
te tasya rddhipādā abhyudgatāḥ, svādhīnāḥ, sarvamārakleśaviṣayasamatikrāntāḥ, buddhaviṣayapraveśāḥ, sarvasattveṣv avyābādhāśayāḥ, sarvakuśalamūlasaṃbhāropacayāḥ, māreṇa mārakāyikaiś ca devair asaṃhāryāḥ.
iyam ucyate, bhadanta śāradvatīputra, bodhisattvānām akṣayā rddhividhijñānābhijñā.
imā ucyante, bhadanta śāradvatīputra, bodhisattvānām akṣayāḥ pañcābhijñāḥ.