Yoga-sutra with Bhoja Vritti [sanskrit]
9,596 words
The Sanskrit edition of the Rājamārtaṇḍa or Bhojavṛtti by Bhojarāja.—This represents the commentary on the yoga aphorisms of Patañjali by King Bhoja who ruled in the 11th century. The material was typed by Suryansu Ray from a traditional old manuscript belonging to the family Guru.
Sūtra 2.10
tadevaṃ vyutthānasya kleśātmakatvādekāgratā'bhyāsakāmena prathamaṃ kleśāḥ parihartavyāḥ | na cājñātānāṃ teṣāṃ parihāraḥ kartuṃ śakya iti tajjñānāya teṣāmuddeśaṃ lakṣaṇaṃ kṣetraṃ vibhāgaṃ cābhidhāya sthūlasūkṣmabhedabhinnānāṃ teṣāṃ prahāṇopāyavibhāgamāha —
te pratiprasavaheyāḥ sūkṣmāḥ || sādhana 10 ||
vṛttiḥ — te sukṣmāḥ kleśāḥ ye vāsanārūpeṇaiva sthitāḥ svavṛttirūpaṃ pariṇāmaṃ nārabhante | te pratiprasavena pratilomapariṇāmena heyāstyaktavyāḥ | svakāraṇe'smitāyāṃ kṛtārthaṃ savāsanaṃ cittaṃ yadā praviṣṭaṃ bhavati tadā kutasteṣāṃ nirmūlānāṃ sambhavaḥ || 10 ||