Chapter 22

atha dvāviṃśaḥ paṭalaḥ ||
atha vakṣyāmi saṃkṣepād balikarma yathākramam |
trisandhyamucitaṃ nityamutsavādau viśeṣataḥ || 1 ||
[Analyze grammar]

ārādhya vidhinā devaṃ gandhapuṣpādibhiḥ kramāt |
saṃskṛtaṃ saṃskṛte vahnau devāyānnaṃ nivedayet || 2 ||
[Analyze grammar]

taccheṣeṇaiva karmārcāpīṭhaṃ pātre prakalpayet |
vinā mantreṇa lokāgnau balyarthamapi pācayet || 3 ||
[Analyze grammar]

sthālyāṃ tu taṇḍulāñ śuddhān nirūptān mūlavidyayā |
prokṣya tridhā parikṣālya prajvālyāgniṃ ca tejasā || 4 ||
[Analyze grammar]

paced vyajanavātena havirna skandyate yathā |
abhighāryāvatāryātha vinyaset pātraghaṭṭitam || 5 ||
[Analyze grammar]

pātre'nyasminnupastīrya kṣiptaṃ pratyabhighārya ca |
sājyaṃ nivedayed bhāgaṃ devāyānyaṃ ca homayet || 6 ||
[Analyze grammar]

gomayenopalipyaiśe pātraṃ darbheṣu sādayet |
haimaṃ vā rājataṃ tāmraṃ ratnimātraṃ tu maṇḍalam || 7 ||
[Analyze grammar]

aṣṭākṣareṇa samprokṣya samyak prottānitaṃ jalaiḥ |
abhighārya haviśśeṣaṃ hṛdā tasmin vinikṣipet || 8 ||
[Analyze grammar]

pīṭhaṃ prakalpayet tena karmārcā yatra neṣyate |
anyadā masṛṇīkṛtya dadhyājyakleditaṃ śubham || 9 ||
[Analyze grammar]

śivakaṃ kārayet tena caturaṅgulavistaram |
dvādaśāṣṭāṅgulotsedhaṃ ṣaḍaṅgulamathāpi vā || 10 ||
[Analyze grammar]

vinyasya kāñcanaṃ mūrdhni śaktitamāvāhya pūjayet |
parameṣṭhyātmikīṃ madhye puruṣādisamāvṛtām || 11 ||
[Analyze grammar]

tasmin saṃsthāpayedarcāṃ sarveṇāvāhya pañcabhiḥ |
mūlenāvāhya vā hemni varṇamūrtivṛtaṃ harim || 12 ||
[Analyze grammar]

gandhapuṣpaistamabhyarcya dhyātvā savanabheditam |
tatpātraṃ sthāpayenmūrdhni dīkṣitasya dvijanmanaḥ || 13 ||
[Analyze grammar]

uṣṇīṣādiyuto maunī gṛhitvā vyāhṛtiṃ japet |
devasya purataḥ sthitvā praṇamya tu bahirvrajet || 14 ||
[Analyze grammar]

śaṅkhadundubhinirghoṣairjayaśabdaiśca puṣkalaiḥ |
aṣṭamaṅgalasaṃyuktaṃ vitānādyupaśobhitam || 15 ||
[Analyze grammar]

devanāgāpsaroyakṣamunigandharvakinnarāḥ |
sarve cānugamiṣyanto dhyeyāḥ svaguṇasaṃvṛtāḥ || 16 ||
[Analyze grammar]

gandhaṃ puṣpaṃ jalaṃ dhūpaṃ dīpaṃ chatraṃ ca cāmaram |
maṅgalāni havirdhaṇṭāṃ gṛhṇīyustatra dīkṣitāḥ || 17 ||
[Analyze grammar]

nirgamya śamitairghauṣairbrāhmaṇānāmanujñayā |
maṅgalāni gururbrūyād dvijāścānye tathāstviti || 18 ||
[Analyze grammar]

jagannirmāṇasaṃhārasthityanugrahahetavaḥ |
devānāmīśvarā devā maṅgalaṃ pradiśantu naḥ || 19 ||
[Analyze grammar]

viṣṇurbrahmā ca rudraśca pracaṇḍaścaṇḍa eva ca |
garutmān ṛṣabhaścaite maṅgalaṃ pradiśantu naḥ || 20 ||
[Analyze grammar]

indraścāgniryamaścaiva nirṛtirvaruṇastathā |
vāyurvaiśravaṇeśānau maṅgalaṃ pradiśantu naḥ || 21 ||
[Analyze grammar]

varāhanarasiṃhau ca rāmaśrīdharavāmanāḥ |
hayāsyavāsudevau ca maṅgalaṃ pradiśantu naḥ || 22 ||
[Analyze grammar]

pūruśca nirṛtiścaiva siṃho nārāyaṇācyutau |
aniruddho hariḥ kṛṣṇo maṅgalaṃ pradiśantu naḥ || 23 ||
[Analyze grammar]

kumudaḥ kumudākṣaśca puṇḍarīko'tha vāmanaḥ |
śaṅkukarṇaḥ sarvanetraḥ sumukhaḥ supratiṣṭhitaḥ || 24 ||
[Analyze grammar]

devadauvārikāścaite maṅgalaṃ pradiśantu naḥ |
aṣṭottarasahasraṃ tu viṣṇupāriṣadāśca ye || 25 ||
[Analyze grammar]

anupāriṣadāścānye maṅgalaṃ pradiśantu naḥ |
bhūrlokabhuvarlokādyāḥ sapta lokāḥ prakīrtitāḥ || 26 ||
[Analyze grammar]

sāgarāśca tathā sarve maṅgalaṃ pradiśantu naḥ |
tathā pātālalokāśca rudralokāḥ sukhoṣitāḥ || 27 ||
[Analyze grammar]

dikṣu sarvāsu tiṣṭhanto maṅgalaṃ pradiśantu naḥ |
vedāścāpyuvedāśca setihāsāḥ kathā api || 28 ||
[Analyze grammar]

ṣaḍaṅgāni ca śāstrāṇi maṅgalaṃ pradiśantu naḥ |
gaṅgā ca yamunā caiva tathā godā sarasvatī || 29 ||
[Analyze grammar]

narmadā caiva kāverī maṅgalaṃ pradiśantu naḥ |
sūryādayo grahāścātha meṣādyā rāśayastathā || 30 ||
[Analyze grammar]

māsāścāpi saviṣṇvādyā maṅgalaṃ pradiśantu naḥ |
sarve vidyeśvarāścāpi ye divyā ye ca mānavāḥ || 31 ||
[Analyze grammar]

divyantarikṣabhūmisthā maṅgalaṃ pradiśantu naḥ |
dharā dhruvaśca somaśca āpaścaivānalo'nilaḥ || 32 ||
[Analyze grammar]

pratyūṣaśca prabhāsaśca maṅgalaṃ pradiśantu naḥ |
yajñāśca pañcayajñāśca pākayajñāstathaiva ca || 33 ||
[Analyze grammar]

sarvayajñamahāyajñā maṅgalaṃ pradiśantu naḥ |
kumāryaśca kumārāśca gaṇeśāśca vināyakāḥ || 34 ||
[Analyze grammar]

sarpāśca kinnarāścāpi maṅgalaṃ pradiśantu naḥ |
mṛgavyādhaśca śarvaśca nirṛtiścāja ekapāt || 35 ||
[Analyze grammar]

ahirbudhniḥ pinākī ca bhavano'theśvarastathā |
sthāṇurbhavaśca pāpārirmaṅgalaṃ pradiśantu naḥ || 36 ||
[Analyze grammar]

dhātā'ryamā ca mitraśca varuṇoṃ'śo bhagastathā |
indro vivasvān pūṣā ca parjanyatvaṣṭṭaviṣṇavaḥ || 37 ||
[Analyze grammar]

ete vai dvādaśādityā maṅgalaṃ pradiśantu naḥ |
yavakrītaśca krītaśca arvāvasuvibhāvasū || 38 ||
[Analyze grammar]

kakṣīvān nāradaḥ kaṇvo maṅgalaṃ pradiśantu naḥ |
unmuciḥ pramuciścaiva ātreyo'gastya eva ca || 39 ||
[Analyze grammar]

dṛḍhāyuścedhmavāhaśca maṅgalaṃ pradiśantu naḥ |
dṛṣadguhyamahadguhyaparivrājāstathaiva ca || 40 ||
[Analyze grammar]

ekadvitrisamākhyātā maṅgalaṃ pradiśantu naḥ |
kaśyapo'trirvasiṣṭhaśca bhāradvājo'ṅgirāstathā || 41 ||
[Analyze grammar]

kauśiko bhagavāṃścaite maṅgalaṃ pradiśantu naḥ |
āvaho vivahaścaiva udvahaḥ suvahastathā || 42 ||
[Analyze grammar]

parīvaho vivahaścaite maṅgalaṃ pradiśantu naḥ |
śvetaketuśca vyāsaśca vālmīkiḥ suyaśāstathā || 43 ||
[Analyze grammar]

aurvaśeyaśca śaktiśca tathā caiva parāśaraḥ |
saptaite divyamunayo maṅgalaṃ pradiśantu naḥ || 44 ||
[Analyze grammar]

evaṃ maṅgalavādāt tāḥ siddhiṃ yacchanti devatāḥ |
sarvakarma samārambhe kartavyaṃ ca sumaṅgalam || 45 ||
[Analyze grammar]

maṇḍapadvāramāsādya śaṅkhatūryādinisvanaiḥ |
dvāḥsthādibhyo baliṃ dadyād gandhapuṣpādisaṃyutam || 46 ||
[Analyze grammar]

ebhirmantrairupasthāya svamantrairabhipūjya tān |
tatra tatra baliṃ dadyād devadṛṣṭyā'valokitam || 47 ||
[Analyze grammar]

namaste dvārapālāya caṇḍāyāmitatejase |
narasiṃhatanūjāya cakreṇāṅkitamaulaye || 48 ||
[Analyze grammar]

namaste dvārapālāya pracaṇḍāyāmitaujase |
narasiṃhatanūjāya śaṅkhenāṅkitamaulaye || 49 ||
[Analyze grammar]

vāhanāya mahāviṣṇostārkṣyāyāmitatejase |
garuḍāya namaste'stu sarvasarpendramṛtyave || 50 ||
[Analyze grammar]

daityadarpavināśāya sahasrākṣāya dhīmate |
kuliśavyagrahastāya namaste'stu śatakrato || 51 ||
[Analyze grammar]

mukhaṃ yaḥ sarvadevānāṃ yena havyaṃ ca nīyate |
yena pravartate sarvaṃ namastasmai havirbhuje || 52 ||
[Analyze grammar]

yena saṃhriyate sarvaṃ yena dharmaśca rakṣyate |
yasmād bibheti loko'yaṃ pretanātha namo'stute || 53 ||
[Analyze grammar]

rākṣasā yātudhānāśca piśācāścāśrayanti yam |
tasmai nirṛtirūpāya rakṣasāṃ pataye namaḥ || 54 ||
[Analyze grammar]

yena saṃrakṣyate sarvaṃ yasmin sarvaṃ pratiṣṭhitam |
amoghapāśahastāya tasmaipāṃpataye namaḥ || 55 ||
[Analyze grammar]

pūryante ca hriyante ca yena prāṇādayaḥ kramāt |
bhūtānāṃ pataye nityaṃ namastasmai marutpate || 56 ||
[Analyze grammar]

yatprasādājjagat kṛtsraṃ dhanena paripūryate |
yakṣaguhyakanāthāya dhananātha namo'stu te || 57 ||
[Analyze grammar]

yena kālāgninā loko yugānteṣvavagṛhyate |
tasmai te brahmaṇaḥ putra virupākṣa namo'stu te || 58 ||
[Analyze grammar]

vīrabhadra namaste'stu namo vighnesvarāya ca |
brāhmyādibhyaśca saptabhyo mātṛbhyo vai namo namaḥ || 59 ||
[Analyze grammar]

śrīdharāya namaste'stu namaste'svamukhāya ca |
vāgīśvaryādimātṛbhyaḥ sarvābhyo vai namo namaḥ || 60 ||
[Analyze grammar]

viṣvaksena namaste'stu devanirmālyadhāriṇe |
śaṅkhacakragadāpāṇe mahāpāriṣadeśvara || 61 ||
[Analyze grammar]

ye samastaṃ jagad vyāpya tiṣṭhati balikāṅkṣiṇaḥ |
viṣṇupāriṣadāḥ sarve gṛhṇantu balimuttamam || 62 ||
[Analyze grammar]

ityāghoṣya bahirdikṣu gaṇairaṣṭavidhaiḥ saha |
kumudādibaliṃ dattvā balipīṭhe baliṃ haret || 63 ||
[Analyze grammar]

ye bhūtā iti dikṣūrdhvaṃ bhūtanāthāya madhyataḥ |
muṣṭinā muṣṭinā sarvān prīṇayed viṣṇupārṣadān || 64 ||
[Analyze grammar]

gṛhṇantu balimetaṃ tu bāhyasthā vihagānanāḥ |
ye krūro ye'lpasatvāśca bhūtapretaniśācarāḥ || 65 ||
[Analyze grammar]

vetālāścaiva mātaṅgā hīnāhīnāśca ye gaṇāḥ |
sarveṣāmeva teṣāṃ ca harāmi balimuttamam || 66 ||
[Analyze grammar]

sarvebhyaścaiva bhūtebhyaḥ sagaṇebhyo namo namaḥ |
triḥ pradakṣiṇamāvṛttya balinā toṣayed gaṇān || 67 ||
[Analyze grammar]

savane savane caiva nṛttagītādisaṃyutam |
gandhapuṣpādi dattvā'nte baliśeṣaṃ jalāplutam || 68 ||
[Analyze grammar]

nirharedoṃ namo viṣṇupārṣadebhya iti bruvan |
ācamya prayato viṣṇuṃ smarannetya samāhitaḥ || 69 ||
[Analyze grammar]

sarveṇāropya tāmarcāṃ punarmūle niyojayet |
viṣvaksenāya tat sarvaṃ samālyaṃ dāpayeddhaviḥ || 70 ||
[Analyze grammar]

piṇḍe tu balipātre vā patite dūṣite'pi vā |
tatra prakṣālya tat snātvā kṛtvā nyāsaṃ yathākramam || 71 ||
[Analyze grammar]

pariśrityāśu tāṃ bhūmiṃ gomayenopalepayet |
pāyasaṃ śrapayitvā'tra ghṛtamiśraṃ suśobhanam || 72 ||
[Analyze grammar]

likhitvā strastikaṃ tatra cūrṇaiḥ śāliniśāmayaiḥ |
vrīhibhiḥ sthaṇḍilaṃ kṛtvā tasminnāstīrya cāmbaram || 73 ||
[Analyze grammar]

taṇḍulaiśca kuśaiḥ puṣpaiḥ prokṣyāstreṇa samāhitaḥ |
mūlena vinyaset pātraṃ pravaṇena spṛśet tataḥ || 74 ||
[Analyze grammar]

punaścāstreṇa samprokṣya dakṣiṇe śāntimarcayet |
ullekhanādikaṃ kṛtvā saṃskṛtyāgniṃ yathāvidhi || 75 ||
[Analyze grammar]

hutvā'nnaṃ mūlamantreṇa praṇavenājyameva ca |
aṣṭottaraśataṃ vā'pi saṃhasraṃ vā yathākramam || 76 ||
[Analyze grammar]

haviśśeṣaṃ tataḥ paścād balipātre tu nikṣipet |
tat kṛtvā pūrvavat prokṣya mūlenāvāhanaṃ bhavet || 77 ||
[Analyze grammar]

pādmamardhyaṃ tato dattvā gandhapuṣpairathārcayet |
namaskṛtya tataḥ stutvā stotrairevaṃ nivedayet || 78 ||
[Analyze grammar]

bhagavan balipātasya prāyaścittavidhirmayā |
kṛto'yaṃ tvatprasādena sampūrṇaḥ śāntido'stu naḥ || 79 ||
[Analyze grammar]

puṇyāhaṃ vācayitvā ca brāhmaṇaiḥ svasti vācayet |
namaskṛtya tataḥ stutvā sottarīyaḥ samāhitaḥ || 80 ||
[Analyze grammar]

uddhṛtya vyāhṛtīrjaptvā mūrdhni tāreṇa vinyaset |
śaṅkhatūryādisaṃyuktaṃ śanairgatvā pradakṣiṇam || 81 ||
[Analyze grammar]

antaḥ praveśayet paścādaiśānyāṃ sthāpayed budhaḥ |
udvāsyānnaṃ bahistyaktvā viṣvaksenāya kalpayet || 82 ||
[Analyze grammar]

pātraṃ prakṣālya toyena vidhinā'camya ca svayam |
prāsāde vinyaset pātraṃ tataḥ kuryācca śāntikam || 83 ||
[Analyze grammar]

rāśicakravidhānena keśavādīn yathākramam |
cakrābje pūjayed vidvānagnikāryasamanvitam || 84 ||
[Analyze grammar]

balipātadigīśaṃ ca tanmāsādhipameva ca |
tithyṛkṣavārarāśīnāṃ devatāścāpi tarpayet || 85 ||
[Analyze grammar]