Chapter 69

tathaiva krośatastasya bharatasya mahātmanaḥ |
kausalyā śabdamājñāya sumitrāmidamabravīt || 1 ||
[Analyze grammar]

āgataḥ krūrakāryāyāḥ kaikeyyā bharataḥ sutaḥ |
tamahaṃ draṣṭumicchāmi bharataṃ dīrghadarśinam || 2 ||
[Analyze grammar]

evamuktvā sumitrāṃ sā vivarṇā malināmbarā |
pratasthe bharato yatra vepamānā vicetanā || 3 ||
[Analyze grammar]

sa tu rāmānujaścāpi śatrughnasahitastadā |
pratasthe bharato yatra kausalyāyā niveśanam || 4 ||
[Analyze grammar]

tataḥ śatrughnabharatau kausalyāṃ prekṣya duḥkhitau |
paryaṣvajetāṃ duḥkhārtāṃ patitāṃ naṣṭacetanām || 5 ||
[Analyze grammar]

bharataṃ pratyuvācedaṃ kausalyā bhṛśaduḥkhitā |
idaṃ te rājyakāmasya rājyaṃ prāptamakaṇṭakam |
saṃprāptaṃ bata kaikeyyā śīghraṃ krūreṇa karmaṇā || 6 ||
[Analyze grammar]

prasthāpya cīravasanaṃ putraṃ me vanavāsinam |
kaikeyī kaṃ guṇaṃ tatra paśyati krūradarśinī || 7 ||
[Analyze grammar]

kṣipraṃ māmapi kaikeyī prasthāpayitumarhati |
hiraṇyanābho yatrāste suto me sumahāyaśāḥ || 8 ||
[Analyze grammar]

atha vā svayamevāhaṃ sumitrānucarā sukham |
agnihotraṃ puraskṛtya prasthāsye yatra rāghavaḥ || 9 ||
[Analyze grammar]

kāmaṃ vā svayamevādya tatra māṃ netumarhasi |
yatrāsau puruṣavyāghrastapyate me tapaḥ sutaḥ || 10 ||
[Analyze grammar]

idaṃ hi tava vistīrṇaṃ dhanadhānyasamācitam |
hastyaśvarathasaṃpūrṇaṃ rājyaṃ niryātitaṃ tayā || 11 ||
[Analyze grammar]

evaṃ vilapamānāṃ tāṃ bharataḥ prāñjalistadā |
kausalyāṃ pratyuvācedaṃ śokairbahubhirāvṛtām || 12 ||
[Analyze grammar]

ārye kasmādajānantaṃ garhase māmakilbiṣam |
vipulāṃ ca mama prītiṃ sthirāṃ jānāsi rāghave || 13 ||
[Analyze grammar]

kṛtā śāstrānugā buddhirmā bhūttasya kadā cana |
satyasaṃdhaḥ satāṃ śreṣṭho yasyāryo'numate gataḥ || 14 ||
[Analyze grammar]

praiṣyaṃ pāpīyasāṃ yātu sūryaṃ ca prati mehatu |
hantu pādena gāṃ suptāṃ yasyāryo'numate gataḥ || 15 ||
[Analyze grammar]

kārayitvā mahat karma bhartā bhṛtyamanarthakam |
adharmo yo'sya so'syāstu yasyāryo'numate gataḥ || 16 ||
[Analyze grammar]

paripālayamānasya rājño bhūtāni putravat |
tatastu druhyatāṃ pāpaṃ yasyāryo'numate gataḥ || 17 ||
[Analyze grammar]

baliṣaḍbhāgamuddhṛtya nṛpasyārakṣataḥ prajāḥ |
adharmo yo'sya so'syāstu yasyāryo'numate gataḥ || 18 ||
[Analyze grammar]

saṃśrutya ca tapasvibhyaḥ satre vai yajñadakṣiṇām |
tāṃ vipralapatāṃ pāpaṃ yasyāryo'numate gataḥ || 19 ||
[Analyze grammar]

hastyaśvarathasaṃbādhe yuddhe śastrasamākule |
mā sma kārṣīt satāṃ dharmaṃ yasyāryo'numate gataḥ || 20 ||
[Analyze grammar]

upadiṣṭaṃ susūkṣmārthaṃ śāstraṃ yatnena dhīmatā |
sa nāśayatu duṣṭātmā yasyāryo'numate gataḥ || 21 ||
[Analyze grammar]

pāyasaṃ kṛsaraṃ chāgaṃ vṛthā so'śnātu nirghṛṇaḥ |
gurūṃścāpyavajānātu yasyāryo'numate gataḥ || 22 ||
[Analyze grammar]

putrairdāraiśca bhṛtyaiśca svagṛhe parivāritaḥ |
sa eko mṛṣṭamaśnātu yasyāryo'numate gataḥ || 23 ||
[Analyze grammar]

rājastrībālavṛddhānāṃ vadhe yat pāpamucyate |
bhṛtyatyāge ca yat pāpaṃ tat pāpaṃ pratipadyatām || 24 ||
[Analyze grammar]

ubhe saṃdhye śayānasya yat pāpaṃ parikalpyate |
tacca pāpaṃ bhavettasya yasyāryo'numate gataḥ || 25 ||
[Analyze grammar]

yadagnidāyake pāpaṃ yat pāpaṃ gurutalpage |
mitradrohe ca yat pāpaṃ tat pāpaṃ pratipadyatām || 26 ||
[Analyze grammar]

devatānāṃ pitṝṇāṃ ca mātā pitrostathaiva ca |
mā sma kārṣīt sa śuśrūṣāṃ yasyāryo'numate gataḥ || 27 ||
[Analyze grammar]

satāṃ lokāt satāṃ kīrtyāḥ sajjuṣṭāt karmaṇastathā |
bhraśyatu kṣipramadyaiva yasyāryo'numate gataḥ || 28 ||
[Analyze grammar]

vihīnāṃ patiputrābhyāṃ kausalyāṃ pārthivātmajaḥ |
evamāśvasayanneva duḥkhārto nipapāta ha || 29 ||
[Analyze grammar]

tathā tu śapathaiḥ kaṣṭaiḥ śapamānamacetanam |
bharataṃ śokasaṃtaptaṃ kausalyā vākyamabravīt || 30 ||
[Analyze grammar]

mama duḥkhamidaṃ putra bhūyaḥ samupajāyate |
śapathaiḥ śapamāno hi prāṇānuparuṇatsi me || 31 ||
[Analyze grammar]

diṣṭyā na calito dharmādātmā te sahalakṣmaṇaḥ |
vatsa satyapratijño me satāṃ lokānavāpsyasi || 32 ||
[Analyze grammar]

evaṃ vilapamānasya duḥkhārtasya mahātmanaḥ |
mohācca śokasaṃrodhādbabhūva lulitaṃ manaḥ || 33 ||
[Analyze grammar]

lālapyamānasya vicetanasya pranaṣṭabuddheḥ patitasya bhūmau |
muhurmuhurniḥśvasataśca dīrghaṃ sā tasya śokena jagāma rātriḥ || 34 ||
[Analyze grammar]