Chapter 68

tāṃ tathā garhayitvā tu mātaraṃ bharatastadā |
roṣeṇa mahatāviṣṭaḥ punarevābravīdvacaḥ || 1 ||
[Analyze grammar]

rājyādbhraṃśasva kaikeyi nṛśaṃse duṣṭacāriṇi |
parityaktā ca dharmeṇa mā mṛtaṃ rudatī bhava || 2 ||
[Analyze grammar]

kiṃ nu te'dūṣayad rājā rāmo vā bhṛśadhārmikaḥ |
yayormṛtyurvivāsaśca tvatkṛte tulyamāgatau || 3 ||
[Analyze grammar]

bhrūṇahatyāmasi prāptā kulasyāsya vināśanāt |
kaikeyi narakaṃ gaccha mā ca bhartuḥ salokatām || 4 ||
[Analyze grammar]

yattvayā hīdṛśaṃ pāpaṃ kṛtaṃ ghoreṇa karmaṇā |
sarvalokapriyaṃ hitvā mamāpyāpāditaṃ bhayam || 5 ||
[Analyze grammar]

tvatkṛte me pitā vṛtto rāmaścāraṇyamāśritaḥ |
ayaśo jīvaloke ca tvayāhaṃ pratipāditaḥ || 6 ||
[Analyze grammar]

mātṛrūpe mamāmitre nṛśaṃse rājyakāmuke |
na te'hamabhibhāṣyo'smi durvṛtte patighātini || 7 ||
[Analyze grammar]

kausalyā ca sumitrā ca yāścānyā mama mātaraḥ |
duḥkhena mahatāviṣṭāstvāṃ prāpya kuladūṣiṇīm || 8 ||
[Analyze grammar]

na tvamaśvapateḥ kanyā dharmarājasya dhīmataḥ |
rākṣasī tatra jātāsi kulapradhvaṃsinī pituḥ || 9 ||
[Analyze grammar]

yattvayā dhārmiko rāmo nityaṃ satyaparāyaṇaḥ |
vanaṃ prasthāpito duḥkhāt pitā ca tridivaṃ gataḥ || 10 ||
[Analyze grammar]

yat pradhānāsi tat pāpaṃ mayi pitrā vinākṛte |
bhrātṛbhyāṃ ca parityakte sarvalokasya cāpriye || 11 ||
[Analyze grammar]

kausalyāṃ dharmasaṃyuktāṃ viyuktāṃ pāpaniścaye |
kṛtvā kaṃ prāpsyase tvadya lokaṃ nirayagāminī || 12 ||
[Analyze grammar]

kiṃ nāvabudhyase krūre niyataṃ bandhusaṃśrayam |
jyeṣṭhaṃ pitṛsamaṃ rāmaṃ kausalyāyātmasaṃbhavam || 13 ||
[Analyze grammar]

aṅgapratyaṅgajaḥ putro hṛdayāccāpi jāyate |
tasmāt priyataro mātuḥ priyatvānna tu bāndhavaḥ || 14 ||
[Analyze grammar]

anyadā kila dharmajñā surabhiḥ surasaṃmatā |
vahamānau dadarśorvyāṃ putrau vigatacetasau || 15 ||
[Analyze grammar]

tāvardhadivase śrāntau dṛṣṭvā putrau mahītale |
ruroda putra śokena bāṣpaparyākulekṣaṇā || 16 ||
[Analyze grammar]

adhastādvrajatastasyāḥ surarājño mahātmanaḥ |
bindavaḥ patitā gātre sūkṣmāḥ surabhigandhinaḥ || 17 ||
[Analyze grammar]

tāṃ dṛṣṭvā śokasaṃtaptāṃ vajrapāṇiryaśasvinīm |
indraḥ prāñjalirudvignaḥ surarājo'bravīdvacaḥ || 18 ||
[Analyze grammar]

bhayaṃ kaccinna cāsmāsu kutaścidvidyate mahat |
kuto nimittaḥ śokaste brūhi sarvahitaiṣiṇi || 19 ||
[Analyze grammar]

evamuktā tu surabhiḥ surarājena dhīmatā |
patyuvāca tato dhīrā vākyaṃ vākyaviśāradā || 20 ||
[Analyze grammar]

śāntaṃ pātaṃ na vaḥ kiṃ cit kutaścidamarādhipa |
ahaṃ tu magnau śocāmi svaputrau viṣame sthitau || 21 ||
[Analyze grammar]

etau dṛṣṭvā kṛṣau dīnau sūryaraśmipratāpinau |
vadhyamānau balīvardau karṣakeṇa surādhipa || 22 ||
[Analyze grammar]

mama kāyāt prasūtau hi duḥkhitau bhāra pīḍitau |
yau dṛṣṭvā paritapye'haṃ nāsti putrasamaḥ priyaḥ || 23 ||
[Analyze grammar]

yasyāḥ putra sahasrāṇi sāpi śocati kāmadhuk |
kiṃ punaryā vinā rāmaṃ kausalyā vartayiṣyati || 24 ||
[Analyze grammar]

ekaputrā ca sādhvī ca vivatseyaṃ tvayā kṛtā |
tasmāttvaṃ satataṃ duḥkhaṃ pretya ceha ca lapsyase || 25 ||
[Analyze grammar]

ahaṃ hyapacitiṃ bhrātuḥ pituśca sakalāmimām |
vardhanaṃ yaśasaścāpi kariṣyāmi na saṃśayaḥ || 26 ||
[Analyze grammar]

ānāyayitvā tanayaṃ kausalyāyā mahādyutim |
svayameva pravekṣyāmi vanaṃ muniniṣevitam || 27 ||
[Analyze grammar]

iti nāga ivāraṇye tomarāṅkuśacoditaḥ |
papāta bhuvi saṃkruddho niḥśvasanniva pannagaḥ || 28 ||
[Analyze grammar]

saṃraktanetraḥ śithilāmbarastadā vidhūtasarvābharaṇaḥ paraṃtapaḥ |
babhūva bhūmau patito nṛpātmajaḥ śacīpateḥ keturivotsavakṣaye || 29 ||
[Analyze grammar]