Chapter 46

prabhātāyāṃ tu śarvaryāṃ pṛthu vṛkṣā mahāyaśāḥ |
uvāca rāmaḥ saumitriṃ lakṣmaṇaṃ śubhalakṣaṇam || 1 ||
[Analyze grammar]

bhāskarodayakālo'yaṃ gatā bhagavatī niśā |
asau sukṛṣṇo vihagaḥ kokilastāta kūjati || 2 ||
[Analyze grammar]

barhiṇānāṃ ca nirghoṣaḥ śrūyate nadatāṃ vane |
tarāma jāhnavīṃ saumya śīghragāṃ sāgaraṃgamām || 3 ||
[Analyze grammar]

vijñāya rāmasya vacaḥ saumitrirmitranandanaḥ |
guhamāmantrya sūtaṃ ca so'tiṣṭhadbhrāturagrataḥ || 4 ||
[Analyze grammar]

tataḥ kalāpān saṃnahya khaḍgau baddhvā ca dhanvinau |
jagmaturyena tau gaṅgāṃ sītayā saha rāghavau || 5 ||
[Analyze grammar]

rāmameva tu dharmajñamupagamya vinītavat |
kimahaṃ karavāṇīti sūtaḥ prāñjalirabravīt || 6 ||
[Analyze grammar]

nivartasvetyuvācainametāvaddhi kṛtaṃ mama |
yānaṃ vihāya padbhyāṃ tu gamiṣyāmo mahāvanam || 7 ||
[Analyze grammar]

ātmānaṃ tvabhyanujñātamavekṣyārtaḥ sa sārathiḥ |
sumantraḥ puruṣavyāghramaikṣvākamidamabravīt || 8 ||
[Analyze grammar]

nātikrāntamidaṃ loke puruṣeṇeha kena cit |
tava sabhrātṛbhāryasya vāsaḥ prākṛtavadvane || 9 ||
[Analyze grammar]

na manye brahmacarye'sti svadhīte vā phalodayaḥ |
mārdavārjavayorvāpi tvāṃ cedvyasanamāgatam || 10 ||
[Analyze grammar]

saha rāghava vaidehyā bhrātrā caiva vane vasan |
tvaṃ gatiṃ prāpsyase vīra trīṃl lokāṃstu jayanniva || 11 ||
[Analyze grammar]

vayaṃ khalu hatā rāma ye tayāpyupavañcitāḥ |
kaikeyyā vaśameṣyāmaḥ pāpāyā duḥkhabhāginaḥ || 12 ||
[Analyze grammar]

iti bruvannātma samaṃ sumantraḥ sārathistadā |
dṛṣṭvā dura gataṃ rāmaṃ duḥkhārto rurude ciram || 13 ||
[Analyze grammar]

tatastu vigate bāṣpe sūtaṃ spṛṣṭodakaṃ śucim |
rāmastu madhuraṃ vākyaṃ punaḥ punaruvāca tam || 14 ||
[Analyze grammar]

ikṣvākūṇāṃ tvayā tulyaṃ suhṛdaṃ nopalakṣaye |
yathā daśaratho rājā māṃ na śocettathā kuru || 15 ||
[Analyze grammar]

śokopahata cetāśca vṛddhaśca jagatīpatiḥ |
kāma bhārāvasannaśca tasmādetadbravīmi te || 16 ||
[Analyze grammar]

yad yadājñāpayet kiṃ cit sa mahātmā mahīpatiḥ |
kaikeyyāḥ priyakāmārthaṃ kāryaṃ tadavikāṅkṣayā || 17 ||
[Analyze grammar]

etadarthaṃ hi rājyāni praśāsati nareśvarāḥ |
yadeṣāṃ sarvakṛtyeṣu mano na pratihanyate || 18 ||
[Analyze grammar]

tad yathā sa mahārājo nālīkamadhigacchati |
na ca tāmyati duḥkhena sumantra kuru tattathā || 19 ||
[Analyze grammar]

adṛṣṭaduḥkhaṃ rājānaṃ vṛddhamāryaṃ jitendriyam |
brūyāstvamabhivādyaiva mama hetoridaṃ vacaḥ || 20 ||
[Analyze grammar]

naivāhamanuśocāmi lakṣmaṇo na ca maithilī |
ayodhyāyāścyutāśceti vane vatsyāmaheti vā || 21 ||
[Analyze grammar]

caturdaśasu varṣeṣu nivṛtteṣu punaḥ punaḥ |
lakṣmaṇaṃ māṃ ca sītāṃ ca drakṣyasi kṣipramāgatān || 22 ||
[Analyze grammar]

evamuktvā tu rājānaṃ mātaraṃ ca sumantra me |
anyāśca devīḥ sahitāḥ kaikeyīṃ ca punaḥ punaḥ || 23 ||
[Analyze grammar]

ārogyaṃ brūhi kausalyāmatha pādābhivandanam |
sītāyā mama cāryasya vacanāl lakṣmaṇasya ca || 24 ||
[Analyze grammar]

brūyāśca hi mahārājaṃ bharataṃ kṣipramānaya |
āgataścāpi bharataḥ sthāpyo nṛpamate pade || 25 ||
[Analyze grammar]

bharataṃ ca pariṣvajya yauvarājye'bhiṣicya ca |
asmatsaṃtāpajaṃ duḥkhaṃ na tvāmabhibhaviṣyati || 26 ||
[Analyze grammar]

bharataścāpi vaktavyo yathā rājani vartase |
tathā mātṛṣu vartethāḥ sarvāsvevāviśeṣataḥ || 27 ||
[Analyze grammar]

yathā ca tava kaikeyī sumitrā cāviśeṣataḥ |
tathaiva devī kausalyā mama mātā viśeṣataḥ || 28 ||
[Analyze grammar]

nivartyamāno rāmeṇa sumantraḥ śokakarśitaḥ |
tat sarvaṃ vacanaṃ śrutvā snehāt kākutsthamabravīt || 29 ||
[Analyze grammar]

yadahaṃ nopacāreṇa brūyāṃ snehādaviklavaḥ |
bhaktimāniti tattāvadvākyaṃ tvaṃ kṣantumarhasi || 30 ||
[Analyze grammar]

kathaṃ hi tvadvihīno'haṃ pratiyāsyāmi tāṃ purīm |
tava tāta viyogena putraśokākulāmiva || 31 ||
[Analyze grammar]

sarāmamapi tāvanme rathaṃ dṛṣṭvā tadā janaḥ |
vinā rāmaṃ rathaṃ dṛṣṭvā vidīryetāpi sā purī || 32 ||
[Analyze grammar]

dainyaṃ hi nagarī gaccheddṛṣṭvā śūnyamimaṃ ratham |
sūtāvaśeṣaṃ svaṃ sainyaṃ hatavīramivāhave || 33 ||
[Analyze grammar]

dūre'pi nivasantaṃ tvāṃ mānasenāgrataḥ sthitam |
cintayantyo'dya nūnaṃ tvāṃ nirāhārāḥ kṛtāḥ prajāḥ || 34 ||
[Analyze grammar]

ārtanādo hi yaḥ paurairmuktastadvipravāsane |
rathasthaṃ māṃ niśāmyaiva kuryuḥ śataguṇaṃ tataḥ || 35 ||
[Analyze grammar]

ahaṃ kiṃ cāpi vakṣyāmi devīṃ tava suto mayā |
nīto'sau mātulakulaṃ saṃtāpaṃ mā kṛthā iti || 36 ||
[Analyze grammar]

asatyamapi naivāhaṃ brūyāṃ vacanamīdṛśam |
kathamapriyamevāhaṃ brūyāṃ satyamidaṃ vacaḥ || 37 ||
[Analyze grammar]

mama tāvanniyogasthāstvadbandhujanavāhinaḥ |
kathaṃ rathaṃ tvayā hīnaṃ pravakṣyanti hayottamāḥ || 38 ||
[Analyze grammar]

yadi me yācamānasya tyāgameva kariṣyasi |
saratho'gniṃ pravekṣyāmi tyakta mātra iha tvayā || 39 ||
[Analyze grammar]

bhaviṣyanti vane yāni tapovighnakarāṇi te |
rathena pratibādhiṣye tāni sattvāni rāghava || 40 ||
[Analyze grammar]

tat kṛtena mayā prāptaṃ ratha caryā kṛtaṃ sukham |
āśaṃse tvatkṛtenāhaṃ vanavāsakṛtaṃ sukham || 41 ||
[Analyze grammar]

prasīdecchāmi te'raṇye bhavituṃ pratyanantaraḥ |
prītyābhihitamicchāmi bhava me patyanantaraḥ || 42 ||
[Analyze grammar]

tava śuśrūṣaṇaṃ mūrdhnā kariṣyāmi vane vasan |
ayodhyāṃ devalokaṃ vā sarvathā prajahāmyaham || 43 ||
[Analyze grammar]

na hi śakyā praveṣṭuṃ sā mayāyodhyā tvayā vinā |
rājadhānī mahendrasya yathā duṣkṛtakarmaṇā || 44 ||
[Analyze grammar]

ime cāpi hayā vīra yadi te vanavāsinaḥ |
paricaryāṃ kariṣyanti prāpsyanti paramāṃ gatim || 45 ||
[Analyze grammar]

vanavāse kṣayaṃ prāpte mamaiṣa hi manorathaḥ |
yadanena rathenaiva tvāṃ vaheyaṃ purīṃ punaḥ || 46 ||
[Analyze grammar]

caturdaśa hi varṣāṇi sahitasya tvayā vane |
kṣaṇabhūtāni yāsyanti śataśastu tato'nyathā || 47 ||
[Analyze grammar]

bhṛtyavatsala tiṣṭhantaṃ bhartṛputragate pathi |
bhaktaṃ bhṛtyaṃ sthitaṃ sthityāṃ tvaṃ na māṃ hātumarhasi || 48 ||
[Analyze grammar]

evaṃ bahuvidhaṃ dīnaṃ yācamānaṃ punaḥ punaḥ |
rāmo bhṛtyānukampī tu sumantramidamabravīt || 49 ||
[Analyze grammar]

jānāmi paramāṃ bhaktiṃ mayi te bhartṛvatsala |
śṛṇu cāpi yadarthaṃ tvāṃ preṣayāmi purīmitaḥ || 50 ||
[Analyze grammar]

nagarīṃ tvāṃ gataṃ dṛṣṭvā jananī me yavīyasī |
kaikeyī pratyayaṃ gacchediti rāmo vanaṃ gataḥ || 51 ||
[Analyze grammar]

parituṣṭā hi sā devi vanavāsaṃ gate mayi |
rājānaṃ nātiśaṅketa mithyāvādīti dhārmikam || 52 ||
[Analyze grammar]

eṣa me prathamaḥ kalpo yadambā me yavīyasī |
bharatārakṣitaṃ sphītaṃ putrarājyamavāpnuyāt || 53 ||
[Analyze grammar]

mama priyārthaṃ rājñaśca sarathastvaṃ purīṃ vraja |
saṃdiṣṭaścāsi yānarthāṃstāṃstānbrūyāstathātathā || 54 ||
[Analyze grammar]

ityuktvā vacanaṃ sūtaṃ sāntvayitvā punaḥ punaḥ |
guhaṃ vacanamaklībaṃ rāmo hetumadabravīt |
jaṭāḥ kṛtvā gamiṣyāmi nyagrodhakṣīramānaya || 55 ||
[Analyze grammar]

tat kṣīraṃ rājaputrāya guhaḥ kṣipramupāharat |
lakṣmaṇasyātmanaścaiva rāmastenākarojjaṭāḥ || 56 ||
[Analyze grammar]

tau tadā cīravasanau jaṭāmaṇḍaladhāriṇau |
aśobhetāmṛṣisamau bhrātarau rāmalakṣmaṇau || 57 ||
[Analyze grammar]

tato vaikhānasaṃ mārgamāsthitaḥ sahalakṣmaṇaḥ |
vratamādiṣṭavān rāmaḥ sahāyaṃ guhamabravīt || 58 ||
[Analyze grammar]

apramatto bale kośe durge janapade tathā |
bhavethā guha rājyaṃ hi durārakṣatamaṃ matam || 59 ||
[Analyze grammar]

tatastaṃ samanujñāya guhamikṣvākunandanaḥ |
jagāma tūrṇamavyagraḥ sabhāryaḥ sahalakṣmaṇaḥ || 60 ||
[Analyze grammar]

sa tu dṛṣṭvā nadītīre nāvamikṣvākunandanaḥ |
titīrṣuḥ śīghragāṃ gaṅgāmidaṃ lakṣmaṇamabravīt || 61 ||
[Analyze grammar]

āroha tvaṃ nara vyāghra sthitāṃ nāvamimāṃ śanaiḥ |
sītāṃ cāropayānvakṣaṃ parigṛhya manasvinīm || 62 ||
[Analyze grammar]

sa bhrātuḥ śāsanaṃ śrutvā sarvamapratikūlayan |
āropya maithilīṃ pūrvamārurohātmavāṃstataḥ || 63 ||
[Analyze grammar]

athāruroha tejasvī svayaṃ lakṣmaṇapūrvajaḥ |
tato niṣādādhipatirguho jñātīnacodayat || 64 ||
[Analyze grammar]

anujñāya sumantraṃ ca sabalaṃ caiva taṃ guham |
āsthāya nāvaṃ rāmastu codayāmāsa nāvikān || 65 ||
[Analyze grammar]

tatastaiścoditā sā nauḥ karṇadhārasamāhitā |
śubhasphyavegābhihatā śīghraṃ salilamatyagāt || 66 ||
[Analyze grammar]

madhyaṃ tu samanuprāpya bhāgīrathyāstvaninditā |
vaidehī prāñjalirbhūtvā tāṃ nadīmidamabravīt || 67 ||
[Analyze grammar]

putro daśarathasyāyaṃ mahārājasya dhīmataḥ |
nideśaṃ pālayatvenaṃ gaṅge tvadabhirakṣitaḥ || 68 ||
[Analyze grammar]

caturdaśa hi varṣāṇi samagrāṇyuṣya kānane |
bhrātrā saha mayā caiva punaḥ pratyāgamiṣyati || 69 ||
[Analyze grammar]

tatastvāṃ devi subhage kṣemeṇa punarāgatā |
yakṣye pramuditā gaṅge sarvakāmasamṛddhaye || 70 ||
[Analyze grammar]

tvaṃ hi tripathagā devi brahma lokaṃ samīkṣase |
bhāryā codadhirājasya loke'smin saṃpradṛśyase || 71 ||
[Analyze grammar]

sā tvāṃ devi namasyāmi praśaṃsāmi ca śobhane |
prāpta rājye naravyāghra śivena punarāgate || 72 ||
[Analyze grammar]

gavāṃ śatasahasrāṇi vastrāṇyannaṃ ca peśalam |
brāhmaṇebhyaḥ pradāsyāmi tava priyacikīrṣayā || 73 ||
[Analyze grammar]

tathā saṃbhāṣamāṇā sā sītā gaṅgāmaninditā |
dakṣiṇā dakṣiṇaṃ tīraṃ kṣipramevābhyupāgamat || 74 ||
[Analyze grammar]

tīraṃ tu samanuprāpya nāvaṃ hitvā nararṣabhaḥ |
prātiṣṭhata saha bhrātrā vaidehyā ca paraṃtapaḥ || 75 ||
[Analyze grammar]

athābravīnmahābāhuḥ sumitrānandavardhanam |
agrato gaccha saumitre sītā tvāmanugacchatu || 76 ||
[Analyze grammar]

pṛṣṭhato'haṃ gamiṣyāmi tvāṃ ca sītāṃ ca pālayan |
adya duḥkhaṃ tu vaidehī vanavāsasya vetsyati || 77 ||
[Analyze grammar]

gataṃ tu gaṅgāparapāramāśu rāmaṃ sumantraḥ pratataṃ nirīkṣya |
adhvaprakarṣādvinivṛttadṛṣṭirmumoca bāṣpaṃ vyathitastapasvī || 78 ||
[Analyze grammar]

tau tatra hatvā caturo mahāmṛgān varāhamṛśyaṃ pṛṣataṃ mahārurum |
ādāya medhyaṃ tvaritaṃ bubhukṣitau vāsāya kāle yayaturvanaspatim || 79 ||
[Analyze grammar]