Chapter 47

sa taṃ vṛkṣaṃ samāsādya saṃdhyāmanvāsya paścimām |
rāmo ramayatāṃ śreṣṭha iti hovāca lakṣmaṇam || 1 ||
[Analyze grammar]

adyeyaṃ prathamā rātriryātā janapadādbahiḥ |
yā sumantreṇa rahitā tāṃ notkaṇṭhitumarhasi || 2 ||
[Analyze grammar]

jāgartavyamatandribhyāmadya prabhṛti rātriṣu |
yogakṣemo hi sītāyā vartate lakṣmaṇāvayoḥ || 3 ||
[Analyze grammar]

rātriṃ kathaṃ cidevemāṃ saumitre vartayāmahe |
upāvartāmahe bhūmāvāstīrya svayamārjitaiḥ || 4 ||
[Analyze grammar]

sa tu saṃviśya medinyāṃ mahārhaśayanocitaḥ |
imāḥ saumitraye rāmo vyājahāra kathāḥ śubhāḥ || 5 ||
[Analyze grammar]

dhruvamadya mahārājo duḥkhaṃ svapiti lakṣmaṇa |
kṛtakāmā tu kaikeyī tuṣṭā bhavitumarhati || 6 ||
[Analyze grammar]

sā hi devī mahārājaṃ kaikeyī rājyakāraṇāt |
api na cyāvayet prāṇāndṛṣṭvā bharatamāgatam || 7 ||
[Analyze grammar]

anāthaścaiva vṛddhaśca mayā caiva vinākṛtaḥ |
kiṃ kariṣyati kāmātmā kaikeyyā vaśamāgataḥ || 8 ||
[Analyze grammar]

idaṃ vyasanamālokya rājñaśca mativibhramam |
kāma evārdhadharmābhyāṃ garīyāniti me matiḥ || 9 ||
[Analyze grammar]

ko hyavidvānapi pumānpramadāyāḥ kṛte tyajet |
chandānuvartinaṃ putraṃ tāto māmiva lakṣmaṇa || 10 ||
[Analyze grammar]

sukhī bata sabhāryaśca bharataḥ kekayīsutaḥ |
muditān kosalāneko yo bhokṣyatyadhirājavat || 11 ||
[Analyze grammar]

sa hi sarvasya rājyasya mukhamekaṃ bhaviṣyati |
tāte ca vayasātīte mayi cāraṇyamāśrite || 12 ||
[Analyze grammar]

arthadharmau parityajya yaḥ kāmamanuvartate |
evamāpadyate kṣipraṃ rājā daśaratho yathā || 13 ||
[Analyze grammar]

manye daśarathāntāya mama pravrājanāya ca |
kaikeyī saumya saṃprāptā rājyāya bharatasya ca || 14 ||
[Analyze grammar]

apīdānīṃ na kaikeyī saubhāgyamadamohitā |
kausalyāṃ ca sumitrāṃ ca saṃprabādheta matkṛte || 15 ||
[Analyze grammar]

mā sma matkāraṇāddevī sumitrā duḥkhamāvaset |
ayodhyāmita eva tvaṃ kāle praviśa lakṣmaṇa || 16 ||
[Analyze grammar]

ahameko gamiṣyāmi sītayā saha daṇḍakān |
anāthāyā hi nāthastvaṃ kausalyāyā bhaviṣyasi || 17 ||
[Analyze grammar]

kṣudrakarmā hi kaikeyī dveṣādanyāyyamācaret |
paridadyā hi dharmajñe bharate mama mātaram || 18 ||
[Analyze grammar]

nūnaṃ jātyantare kasmiṃ striyaḥ putrairviyojitāḥ |
jananyā mama saumitre tadapyetadupasthitam || 19 ||
[Analyze grammar]

mayā hi cirapuṣṭena duḥkhasaṃvardhitena ca |
viprāyujyata kausalyā phalakāle dhigastu mām || 20 ||
[Analyze grammar]

mā sma sīmantinī kā cijjanayet putramīdṛśam |
saumitre yo'hamambāyā dadmi śokamanantakam || 21 ||
[Analyze grammar]

manye prītiviśiṣṭā sā matto lakṣmaṇasārikā |
yasyāstacchrūyate vākyaṃ śuka pādamarerdaśa || 22 ||
[Analyze grammar]

śocantyāścālpabhāgyāyā na kiṃ cidupakurvatā |
purtreṇa kimaputrāyā mayā kāryamariṃdama || 23 ||
[Analyze grammar]

alpabhāgyā hi me mātā kausalyā rahitā mayā |
śete paramaduḥkhārtā patitā śokasāgare || 24 ||
[Analyze grammar]

eko hyahamayodhyāṃ ca pṛthivīṃ cāpi lakṣmaṇa |
tareyamiṣubhiḥ kruddho nanu vīryamakāraṇam || 25 ||
[Analyze grammar]

adharmabhaya bhītaśca paralokasya cānagha |
tena lakṣmaṇa nādyāhamātmānamabhiṣecaye || 26 ||
[Analyze grammar]

etadanyacca karuṇaṃ vilapya vijane bahu |
aśrupūrṇamukho rāmo niśi tūṣṇīmupāviśat || 27 ||
[Analyze grammar]

vilapyoparataṃ rāmaṃ gatārciṣamivānalam |
samudramiva nirvegamāśvāsayata lakṣmaṇaḥ || 28 ||
[Analyze grammar]

dhruvamadya purī rāma ayodhyā yudhināṃ vara |
niṣprabhā tvayi niṣkrānte gatacandreva śarvarī || 29 ||
[Analyze grammar]

naitadaupayikaṃ rāma yadidaṃ paritapyase |
viṣādayasi sītāṃ ca māṃ caiva puruṣarṣabha || 30 ||
[Analyze grammar]

na ca sītā tvayā hīnā na cāhamapi rāghava |
muhūrtamapi jīvāvo jalānmatsyāvivoddhṛtau || 31 ||
[Analyze grammar]

na hi tātaṃ na śatrughnaṃ na sumitrāṃ paraṃtapa |
draṣṭumiccheyamadyāhaṃ svargaṃ vāpi tvayā vinā || 32 ||
[Analyze grammar]

sa lakṣmaṇasyottama puṣkalaṃ vaco niśamya caivaṃ vanavāsamādarāt |
samāḥ samastā vidadhe paraṃtapaḥ prapadya dharmaṃ sucirāya rāghavaḥ || 33 ||
[Analyze grammar]