Chapter 2

dvitīyaḥ paṭalaḥ |
athārcanaṃ pravakṣyāmi yathāvadanupūrvaśaḥ |
śaucaṃ kṛtvā tataḥ snānaṃ kartavyaṃ tu mṛdambhasā || 1 ||
[Analyze grammar]

śucisthānānmṛdaṃ pūrvaṃ gṛhītvāstreṇa śodhitām |
prakṣālya jalatīraṃ tu sthāpayettāṃ varānane || 2 ||
[Analyze grammar]

bhāgadvayaṃ tato'streṇa kartavyaṃ tu kṛśodari |
bhāgārdhena kaṭiṃ corū jaṅghe pādau tathaiva ca || 3 ||
[Analyze grammar]

kṣālayeta yathānyāyaṃ trirantaritayogataḥ |
avaśiṣṭaṃ tu bhāgārdhaṃ gṛhītvāstrābhimantritam || 4 ||
[Analyze grammar]

saptavārānvarārohe arkadīptaṃ tu kārayet |
śiraḥprabhṛti pādāntamāguṣṭhya snānamācaret || 5 ||
[Analyze grammar]

uttīryodakamadhyāttu upaspṛśya yathākramam |
saṃdhyāyā vandanaṃ kuryācchāstradṛṣṭena karmaṇā || 6 ||
[Analyze grammar]

malasnānaṃ bhavedevaṃ vidhisnānaṃ pracakṣmahe |
bhāgārdhaṃ yatsthitaṃ pūrvaṃ tato bhāgatrayaṃ kuru || 7 ||
[Analyze grammar]

vāmahastasya pūrve ca dakṣiṇe cottare kramāt |
pūrvabhāgaṃ tato'streṇa saptavārāṃstu mantrayet || 8 ||
[Analyze grammar]

dakṣiṇasthaṃ tathā vaktrairabhimantrya varānane |
uttaraṃ cābhimantryaivaṃ devenāṅgayutena ca || 9 ||
[Analyze grammar]

pūrvabhāgaṃ gṛhītvā tu daśadikṣu vinikṣipet |
uttareṇa tu bhāgena jalaṃ caivābhimantrayet || 10 ||
[Analyze grammar]

bāhumātrapramāṇena bhairaveśamanusmaran |
ātmānaṃ guṇṭhayitvā tu dakṣabhāgena suvrate || 11 ||
[Analyze grammar]

snāyādrājopacāreṇa sugandhāmalakādibhiḥ |
prāṇāyāmābhiṣekau tu kartavyau bhairaveṇa ca || 12 ||
[Analyze grammar]

uttīryodakamadhyāttu tadvāsaḥ parivartayet |
upaspṛśya kṛtanyāso mūlamantramanusmaran || 13 ||
[Analyze grammar]

tīrthaṃ saṃgṛhya deveśi ātmano'gre nidhāpayet |
tatrastho vandayetsaṃdhyāṃ mārjanādiranukramāt || 14 ||
[Analyze grammar]

aghamarṣaḥ prakartavya upasthānaṃ divākare |
japaṃ kṛtvā nivedyaivaṃ praṇamya ca varānane || 15 ||
[Analyze grammar]

mantrāṇāṃ tarpaṇaṃ kṛtvā devānāmṛṣibhiḥ saha |
sarveṣāṃ bhūtasaṃghānāṃ tatastīrthaṃ tu saṃharet || 16 ||
[Analyze grammar]

mūlamantramanusmṛtya bhasmasnānamataḥ param |
malasnānaṃ prakartavyaṃ bhāvitenāntarātmanā || 17 ||
[Analyze grammar]

parivṛttya tato vāsaḥ saṃdhyāṃ prāgiva vandayet |
vidhisnānaṃ tataḥ kuryādbhairaveśamanusmaran || 18 ||
[Analyze grammar]

śiro vaktraṃ ca hṛdguhyaṃ pādāntaṃ ca vibhāgaśaḥ |
bhairaveṇāṅgayuktena samuddhūlyaṃ yathākramam || 19 ||
[Analyze grammar]

abhiṣekaṃ prakurvīta paraṃ tattvamanusmaran |
saṃdhyāyā vandanaṃ kuryād yathāpūrvaṃ varānane || 20 ||
[Analyze grammar]

tato yāgagṛhaṃ gatvā hastau pādau ca kṣālayet |
śikhāṃ baddhvā śikhāṃ smṛtvā upaspṛśya vidhānataḥ || 21 ||
[Analyze grammar]

sakalīkṛtadehastu puṣpamādāya suvrate |
diṅmātṛbhyo namaskṛtya dvāraṃ saṃprokṣya yatnataḥ || 22 ||
[Analyze grammar]

śivāmbhasāstramantreṇa vighnaproccāṭanaṃ bhavet |
dvāraśākhordhvato devaṃ gaṇeśaṃ ca śriyaṃ tathā || 23 ||
[Analyze grammar]

saṃpūjya gandhapuṣpādyairdhūpādibhiranukramāt |
arghyapādyopahāraiśca tato dvārasya cottare || 24 ||
[Analyze grammar]

nandigaṅge samabhyarcya mahākālaṃ ca dakṣiṇe |
kālindīṃ caiva saṃpūjya yathānukramayogataḥ || 25 ||
[Analyze grammar]

bhairavāstraṃ samuccārya puṣpaṃ saṃgṛhya bhāvitaḥ |
saptābhimantritaṃ kṛtvā jvaladagniśikhākulam || 26 ||
[Analyze grammar]

nārācāstraprayogeṇa praviśedgṛhamadhyataḥ |
nivāritaṃ tena sarvaṃ vighnajālamanantakam || 27 ||
[Analyze grammar]

tato rakṣārthamantraṃ ca daśadikṣu vinikṣipet |
madhye sampūjya brahmāṇaṃ gandhaiḥ puṣpairanukramāt || 28 ||
[Analyze grammar]

dakṣiṇāyāṃ tato mūrtau praṇavāsanasaṃsthitaḥ |
upaviśyāsanaṃ baddhvā svabhyastaṃ vai puraḥsthitam || 29 ||
[Analyze grammar]

gandhadigdhau karau kṛtvā astreṇa pariśodhayet |
kavacenāvaguṇṭhyaitau plāvayedamṛtena tu || 30 ||
[Analyze grammar]

parāṃ śaktiṃ tu saṃkṣobhya tato'nantaṃ prakalpayet |
mūrtiṃ nyasyānuvaktrāṇi svacchandaṃ parikalpayet || 31 ||
[Analyze grammar]

aṅguṣṭhādikaniṣṭhāntaṃ vinyasedaṅgapañcakam |
bhairavānapi saṃkalpya paraṃ tattvamanusmaret || 32 ||
[Analyze grammar]

prāṇāyāmatrayaṃ kāryaṃ dehasaṃśuddhikāraṇam |
aśuddhaḥ svamarudrecyaḥ śuddhenāpūrayettanum || 33 ||
[Analyze grammar]

kumbhakaṃ recakaṃ kṛtvā vyomnyātmānaṃ nidhāpayet |
khadyotakanibhaṃ sūkṣmaṃ karaṇaistu vivarjitam || 34 ||
[Analyze grammar]

kāryeṇaiva vihīnaṃ ca māyāpradhvastagocaram |
śivīkāryastathātmaiva yathā bhavati tacchṛṇu || 35 ||
[Analyze grammar]

paraṃ bhāvaṃ tu saṃgṛhya tataḥ śoṣyā tanuḥ priye |
saṃhāreṇa yabhinnena rudrabījayutena ca || 36 ||
[Analyze grammar]

tenaiva dahanaṃ kāryamūrdhvādho'gniyutena ca |
adho viṣṇusamāyukto vāyuvarṇaḥ sabindukaḥ || 37 ||
[Analyze grammar]

utpūyanakaro hyeṣa plāvane vāruṇaḥ smṛtaḥ |
bindumastakasaṃbhinnaḥ śaktinyāsastato bhavet || 38 ||
[Analyze grammar]

ānayettaṃ yathānītaṃ plāvayedamṛtena tu |
malapradhvastacaitanyaṃ kalāvidyāsamāśritam || 39 ||
[Analyze grammar]

rāgeṇa rañjitātmāna kālena kalitaṃ tathā |
niyatyā yamitaṃ bhūyaḥ puṃbhāvenopabṛṃhitam || 40 ||
[Analyze grammar]

pradhānāśayasaṃpannaṃ guṇatrayasamanvitam |
buddhitattvasamāsīnamahaṅkārasamāvṛtam || 41 ||
[Analyze grammar]

manasā buddhikarmākṣaistanmātraiḥ sthūlabhūtakaiḥ |
praṇavena tu sarvaṃ taccharīrotpattikāraṇam || 42 ||
[Analyze grammar]

nyasetkrameṇa deveśi triṃśadekaṃ ca saṃkhyayā |
ṣaṭtattvī tvātmasaṃbaddhā jñātavyātra varānane || 43 ||
[Analyze grammar]

pradhānāvaniparyantaṃ śarīraṃ ca vinirmitam |
caturviṃśatitattvāni caitanyarahitāni tu || 44 ||
[Analyze grammar]

draṣṭavyāni varārohe puruṣādhiṣṭhitāni tu |
sacetanāni sarvāṇi jñātavyāni sadaiva hi || 45 ||
[Analyze grammar]

pañcaviṃśakametacca prākṛtaṃ samudāhṛtam |
tato mūrtiṃ nyaseddevi mūlamantrasulakṣitam || 46 ||
[Analyze grammar]

sakalaṃ bhairavaṃ nyasya dvātriṃśārṇaṃ sulocane |
mukhāni kalpayetpaścānmūrdhādicaraṇāvadhi || 47 ||
[Analyze grammar]

vaktrāṇi kalpayetpaścādūrdhvaṃ pūrvaṃ ca dakṣiṇam |
uttaraṃ paścimaṃ caiva yathāvatpravibhāgaśaḥ || 48 ||
[Analyze grammar]

kalābhedaṃ yathāpūrvaṃ śodhyādhvānaṃ prakalpayet |
navatattvaṃ tritattvaṃ ca vidyāṅgā locanatrayam || 49 ||
[Analyze grammar]

vargātītena kṣurikāmūrdhvādho'gnipradīpitām |
ṣoḍaśāntarhatā sā tu rakṣi'kā vighnanāśikā || 50 ||
[Analyze grammar]

navakaṃ kalpayetpūrvaṃ mūrdhni vaktre ca kaṇṭhake |
hṛdaye nābhideśe ca guhya ūrvośca jānutaḥ || 51 ||
[Analyze grammar]

pādāntaṃ caiva vinyasya svadhyānaguṇasaṃyutam |
kriyājñāne tathecchā ca dakṣe vāme ca madhyataḥ || 52 ||
[Analyze grammar]

vidyārājaḥ smṛto hyeṣa bhairavo mantranāyakaḥ |
niṣkalaṃ tu tathāvāhya aṅgānyevaṃ yathākramam || 53 ||
[Analyze grammar]

gandhairdhūpaistathā puṣpairvividhairbhakṣyabhojanaiḥ |
pūjayeddevadeveśaṃ manasaiva prakalpitaiḥ || 54 ||
[Analyze grammar]

ātmānaṃ bhairavaṃ dhyātvā tato hṛdyāgamācaret |
nābhau kandaṃ samāropya nālaṃ tu dvādaśāṅgulam || 55 ||
[Analyze grammar]

hṛdantaṃ kalpayedyāvattatra padmaṃ vicintayet |
aṣṭapatraṃ mahādīptaṃ kesarālaṃ sakarṇikam || 56 ||
[Analyze grammar]

kandaṃ śaktimayaṃ tatra nāle vai kaṇṭakāstu ye |
bhuvanāni ca tānyeva rudrāṇāṃ varavarṇini || 57 ||
[Analyze grammar]

māyātmako bhavedgranthiraśuddhādhvavyavasthitaḥ |
vidyāpadmaṃ mahādīptaṃ karṇikābījarājitam || 58 ||
[Analyze grammar]

puṣkarāṇi ca deveśi tatra vidyeśvarāḥ smṛtāḥ |
evaṃ dhyātvā mahāpadmaṃ sarvadevamayaṃ śubham || 59 ||
[Analyze grammar]

śaktinyāso bhavetpūrvaṃ kandaṃ tu tadanantaram |
aṅkuraṃ nālavinyāsamanantaṃ parikalpayet || 60 ||
[Analyze grammar]

tejomayaṃ mahāśubhraṃ sphuratkiraṇabhāsvaram |
dharmaṃ jñānaṃ ca vairāgyamaiśvaryaṃ ca kramānnyaset || 61 ||
[Analyze grammar]

sitaraktapītakṛṣṇā āgneyyādīśadiggatāḥ |
pādakāḥ siṃharūpāste trinetrā bhīmavikramāḥ || 62 ||
[Analyze grammar]

śivaśaktimayā mantrā nyastavyā vīravindate |
adharmājñānāvairāgyamanaiśvaryaṃ ca prāgdiśaḥ || 63 ||
[Analyze grammar]

uttarāntaṃ niveśyaṃ tu gātrakāḥ sitavarṇakāḥ |
saṃdhānakīlakāścaiva atasīpuṣpasaṃnibhāḥ || 64 ||
[Analyze grammar]

vedā yugāśca te caiva jñātavyāḥ kramaśaḥ priye |
adhaśchādanamūrdhvaṃ ca raktaṃ śuklaṃ vicintayet || 65 ||
[Analyze grammar]

madhye tamo vijānīyādguṇāstvete vyavasthitāḥ |
sitaṃ padmaṃ vijānīyātkesarāṇi vicintayet || 66 ||
[Analyze grammar]

sitaraktaprapītāni mūlamadhyāgradeśataḥ |
karṇikā hemasaṃkāśā bījāni haritāni tu || 67 ||
[Analyze grammar]

vāmāṃ pūrvadale nyasya jyeṣṭhāṃ vahnidalāśritām |
raudrīṃ dakṣiṇapatre tu kālīṃ nairṛtagocare || 68 ||
[Analyze grammar]

kalavikaraṇīṃ devīṃ vinyasyedvāruṇe dale |
balavikaraṇīṃ devīṃ vāyavyadalamāśritām || 69 ||
[Analyze grammar]

balapramathanīṃ devīmuttare viniyojayet |
sarvabhūtadamanīṃ ca aiśānyāṃ viniyojayet || 70 ||
[Analyze grammar]

madhye manonmanīṃ devīṃ karṇikāyāṃ niveśayet |
śakracāpanibhaṃ devi dhyātavyaṃ śaktimaṇḍalam || 71 ||
[Analyze grammar]

madhye sūryasahasrābhāṃ cintayettu manonmanīm |
sūryādhvamaṇḍalaṃ patre somaṃ saṃyojya kesare || 72 ||
[Analyze grammar]

vahnimaṇḍalakaṃ devi karṇikāyāṃ niveśayet |
brahmā viṣṇurharaścaiva maṇḍaleṣvadhipāḥ smṛtāḥ || 73 ||
[Analyze grammar]

brahmā caturmukho raktaścaturbāhuvibhūṣitaḥ |
kṛṣṇājinottarīyaśca rājīvāsanasaṃsthitaḥ || 74 ||
[Analyze grammar]

kamaṇḍaludharo devi daṇḍahastastathaiva ca |
akṣamālādharo devaḥ padmahastaḥ sulocanaḥ || 75 ||
[Analyze grammar]

dhyātvā patreṣu taṃ nyasyetsarvakilviṣanāśanam |
atasīpuṣpasaṃkāśaṃ śaṅkhacakragadādharam || 76 ||
[Analyze grammar]

pītāmbaradharaṃ devaṃ vanamālāvibhūṣitam |
sphuranmukuṭamāṇikyaṃ kiṅkiṇījālamaṇḍitam || 77 ||
[Analyze grammar]

divyakuṇḍaladhartāraṃ garuḍāsanasaṃsthitam |
dhyātvā viṣṇuṃ mahātmānaṃ kesareṣu niveśayet || 78 ||
[Analyze grammar]

śaṅkhakundendudhavalaṃ śūlahastaṃ trilocanam |
daśabāhuṃ viśālākṣaṃ nāgayajñopavītinam || 79 ||
[Analyze grammar]

siṃhacarmaparīdhānaṃ śaśāṅkakṛtabhūṣaṇam |
nīlakaṇṭhaṃ vṛṣārūḍhaṃ rudraṃ dhyātvā varānane || 80 ||
[Analyze grammar]

niveśayetkarṇikāyāṃ mahāpātakanāśanam |
mahāpretaṃ nyasetpaścātprahasantaṃ sacetanam || 81 ||
[Analyze grammar]

raktavarṇaṃ sutejaskaṃ netratrayavibhūṣitam |
praṇavena nyasetsarvamāsanaṃ bhairavasya tu || 82 ||
[Analyze grammar]

gandhaiḥ puṣpaiḥ samabhyarcya tato mūrtiṃ prakalpayet |
kadambakusumākārāṃ tuṣārakiraṇatviṣam || 83 ||
[Analyze grammar]

mūrtyūrdhve bhairavaṃ devaṃ sakalaṃ parikalpayet |
dvātriṃśadvarṇakacitaṃ sphurattaḍidivojjvalam || 84 ||
[Analyze grammar]

vaktrāṇi kalpayeddevi svadhyānena maheśvari |
mūrdhādicaraṇaṃ yāvatpraṇavādinamontataḥ || 85 ||
[Analyze grammar]

aṣṭātriṃśatkalābhedaṃ śodhyādhvānaṃ prakalpayet |
navatattvaṃ tritattvaṃ ca navakaṃ bhairavābhidham || 86 ||
[Analyze grammar]

vidyāṅgā locanaṃ caiva kṣurikāṃ ca prakalpayet |
śaktitrayaṃ tato nyasyeddakṣadigvāmagocare || 87 ||
[Analyze grammar]

madhyapradeśe deveśi tato rūpamanusmaret |
tripañcanayanaṃ devaṃ jaṭāmukuṭamaṇḍitam || 88 ||
[Analyze grammar]

candrakoṭipratīkāśāṃ candrārdhakṛtaśekharam |
pañcavaktraṃ viśālākṣaṃ sarpagonāsamaṇḍitam || 89 ||
[Analyze grammar]

vṛścikairagnivarṇābhairhāreṇa tu virājitam |
kapālamālābharaṇaṃ khaḍgakheṭakadhāriṇam || 90 ||
[Analyze grammar]

pāśāṅkuśadharaṃ devaṃ śarahastaṃ pinākinam |
varadābhayahastaṃ ca muṇḍakhaṭvāṅgadhāriṇam || 91 ||
[Analyze grammar]

vīṇāḍamaruhastaṃ ca ghaṇṭāhastaṃ triśūlinam |
vajradaṇḍakṛtāṭopaṃ paraśvāyudhahastakam || 92 ||
[Analyze grammar]

mudgareṇa vicitreṇa vartulena virājitam |
siṃhacarmaparīdhānaṃ gajacarmottarīyakam || 93 ||
[Analyze grammar]

aṣṭādaśabhujaṃ devaṃ nīlakaṇṭhaṃ sutejasam |
ūrdhvavaktraṃ maheśāni sphaṭikābhaṃ vicintayet || 94 ||
[Analyze grammar]

āpītaṃ pūrvavaktraṃ tu nīlotpaladalaprabham |
dakṣiṇaṃ tu vijānīyādvāmaṃ caiva vicintayet || 95 ||
[Analyze grammar]

dāḍimīkusumaprakhyaṃ kuṅkumodakasaṃnibham |
candrārbudapratīkāśaṃ paścimaṃ tu vicintayet || 96 ||
[Analyze grammar]

svacchandabhairavaṃ devaṃ sarvakāmaphalapradam |
dhyāyate yastu yuktātmā kṣipraṃ sidhyati mānavaḥ || 97 ||
[Analyze grammar]

tataḥ paramabījena paraṃ paramakāraṇam |
suśāntaṃ niṣkalaṃ devaṃ sarvavyāpinirañjanam || 98 ||
[Analyze grammar]

āvāhayetsuhṛṣṭātmā tava devi vadāmyaham |
hṛtkaṇṭhatālubhrūmadhyanādāntāntasamāśritam || 99 ||
[Analyze grammar]

niṣkampaṃ kāraṇātītamāvāhya parameśvaram |
saṃsthāpya vidhivaddevamaṅgaṣaṭkaṃ tato nyaset || 100 ||
[Analyze grammar]

pādyamācamanaṃ cārghaṃ svāgataṃ tadanantaram |
saṃnidhānaṃ ca deveśi niṣṭhurayā nirodhayet || 101 ||
[Analyze grammar]

gandhaiḥ puṣpaistathā dhūpairdhūpayitvā tamarcayet |
mudrāṃ pradarśayetpaścāttridhā traikālyakarmaṇi || 102 ||
[Analyze grammar]

tataḥ snānādikaṃ karma kṛtvā caiva varānane |
paridhāpya suvastrāṇi netrapaṭṭodbhavāni ca || 103 ||
[Analyze grammar]

vilipyāgurukarpūrairmukuṭādyairvibhūṣayet |
puṣpairnānāvidhaiḥ śubhrairarcayedbhūṣayetpunaḥ || 104 ||
[Analyze grammar]

arghaṃ dattvā maheśāni punarmudrāṃ pradarśayet |
praṇamya bhairavaṃ devaṃ svacchandaṃ viśvanāyakam || 105 ||
[Analyze grammar]

tato hyābharaṇaṃ bāhye viniveśyaṃ varānane |
aiśānyāṃ pūrvato yāmyāṃ uttarāpyāvasānakam || 106 ||
[Analyze grammar]

vinyasetpañca vaktrāṇi pañcavaktrayutāni ca |
bāhubhirdaśabhiścaiva śaśāṅkamukuṭaiḥ saha || 107 ||
[Analyze grammar]

dhyātavyāni svarūpāṇi varābhayakarāṇi tu |
agnīśarakṣovāyavyacaturdikṣu ca taṃ nyaset || 108 ||
[Analyze grammar]

hṛcchiraśca śikhā varma astraṃ ca pravibhāgaśaḥ |
hṛdayaṃ raktavarṇābhaṃ śiro gorocanaprabham || 109 ||
[Analyze grammar]

taḍidvalayasaṃkāśāṃ śikhāṃ devīṃ vicintayet |
ādhūmraṃ kavacaṃ vidyātkapiśaṃ cāstrameva ca || 110 ||
[Analyze grammar]

jyotīrūpapratīkāśaṃ netraṃ madhye ca saṃsthitam |
pañcavaktrāḥ smṛtāḥ sarve daśabāhvindubhūṣitāḥ || 111 ||
[Analyze grammar]

nānābharaṇasaṃyuktā nānāsraggandhalepanāḥ |
nānāvastraparīdhānā mukuṭairujjvalaiḥ śubhaiḥ || 112 ||
[Analyze grammar]

ratnamālāvanaddhāśca hārakeyūrabhūṣitāḥ |
dviraṣṭavarṣakākārāḥ surūpāḥ sthirayauvanāḥ || 113 ||
[Analyze grammar]

bhairavādyāḥ smṛtā mantrāḥ pīṭheśāḥ pīṭhamardakāḥ |
yā sā pūrvaṃ mayā khyātā aghorī śaktiruttamā || 114 ||
[Analyze grammar]

bhairavaṃ pūjayitvā tu tasyotsaṅge tu tāṃ nyaset |
yādṛśaṃ bhairavaṃ rūpaṃ bhairavyāstādṛgeva hi || 115 ||
[Analyze grammar]

īṣatkarālavadanāṃ gambhīravipulasvanām |
prasannāsyāṃ sadā dhyāyedbhairavīṃ vismitekṣaṇām || 116 ||
[Analyze grammar]

dvitīyāvaraṇe devi vinyasedbhairavāṣṭakam |
kapālīśaṃ tu pūrvāyāmāgneyyāṃ śikhivāhanam || 117 ||
[Analyze grammar]

dakṣiṇe krodharājaṃ tu vikarālaṃ tu nairṛte |
manmathaṃ paścime bhāge meghanādeśvaraṃ tathā || 118 ||
[Analyze grammar]

vāyavye devi vinyasya somarājaṃ tathottare |
vidyārājaṃ tathaiśānyāṃ vinyasettu subhāvitaḥ || 119 ||
[Analyze grammar]

pañcavaktrāstrinetrāśca daśabāhvinduśekharāḥ |
kapālamālābharaṇāḥ sphuranmāṇikyamaṇḍitāḥ || 120 ||
[Analyze grammar]

pūrvaṃ pītaṃ smṛtaṃ devi raktamāgreyagocare |
dakṣiṇe nīlameghābhaṃ nairṛtyāṃ jvalanaprabham || 121 ||
[Analyze grammar]

śyāmaṃ cāparadigbhāge dhūmraṃ vāyavyagocare |
candrabimbaprabhaṃ saumye īśāne sphaṭikaprabham || 122 ||
[Analyze grammar]

tṛtīye caiva lokeśān sāstrānsaṃparikalpayet |
nāmāni teṣāṃ vakṣyāmi yathāvadanupūrvaśaḥ || 123 ||
[Analyze grammar]

indrāgniyamanirṛtivaruṇāśca samīraṇaḥ |
somarājaḥ kuberaśca īśānaḥ parameśvaraḥ || 124 ||
[Analyze grammar]

bhairavāṣṭakarūpeṇa dhyātavyāstu varānane |
vajraṃ śaktistathā daṇḍaḥ khaḍgaḥ pāśastathaiva ca || 125 ||
[Analyze grammar]

dhvajo gadā triśūlaṃ ca lokapālayudhāni vai |
vajraṃ cānekavarṇāḍhyaṃ śaktiṃ hemasamaprabhām || 126 ||
[Analyze grammar]

daṇḍaṃ bhinnāñjanābhaṃ ca khaḍgaṃ nīlotpalaprabham |
kiṃśukābhaṃ tathā pāśaṃ dhvajaṃ śuklaṃ vicintayet || 127 ||
[Analyze grammar]

gadāṃ tu vidrumābhāṃ vai śūlaṃ vidyutsamaprabham |
saṃpūjyāvaraṇaṃ sarvaṃ saṃdhānaṃ mantranāyake || 128 ||
[Analyze grammar]

astrāṇi lokapālāśca bhairavāṣṭakameva ca |
pañca brahmānyathāṅgāni etānyāvaraṇāni tu || 129 ||
[Analyze grammar]

krameṇoccārayetsarvaṃ yāvattadgarbhamaiśvaram |
mūlamantreṇa kartavyaṃ nāḍīsaṃdhānameva ca || 130 ||
[Analyze grammar]

parāntaṃ yāvadābhāvya naivedyāni nivedayet |
ghārikā vaṭakāṃścaiva śaṣkulīrmodakāṃstathā || 131 ||
[Analyze grammar]

khaṇḍalaḍḍuśarāvāṇi bhakṣyāṇi vividhāni ca |
śālyodanaṃ mudgasūpamājyāktaṃ saṃprakalpayet || 132 ||
[Analyze grammar]

kauśalyāṃ maṇḍakāpūpāṃstathā kṣaudraśirāṃsi ca |
ghṛtāktāṃścillakāṃścaiva lavaṇānparikalpayet || 133 ||
[Analyze grammar]

avadaṃśānyanekāni kaṭūni madhurāṇi ca |
rasālāṃ ca dadhi kṣīramāsavaṃ vividhaṃ tathā || 134 ||
[Analyze grammar]

matsyamāṃsānyanekāni lehyapeyāni yāni ca |
agramāpūrayecchaṃbhorvittaśāṭhyavivarjitaḥ || 135 ||
[Analyze grammar]

paścādarghaḥ pradātavyaḥ surayā susugandhayā |
mudrāṃ pradarśayetpaścāttridhā traikālyakarmaṇi || 136 ||
[Analyze grammar]

praṇipātaṃ tataḥ kṛtvā japaṃ paścātsamācaret |
akṣamālāṃ tu saṃgṛhya gandhaiḥ puṣpaiḥ samarcitām || 137 ||
[Analyze grammar]

vāṅnirudvaḥ sucittātmā rājīvāsanasaṃsthitaḥ |
mūlamantraṃ samuccārya nāde līnaṃ vicintayet || 138 ||
[Analyze grammar]

unmīlyākṣāṇi saṃcintya tatastu japamārabhet |
akṣarākṣarasantānaṃ na drutaṃ na vilambitam || 139 ||
[Analyze grammar]

japaḥ prāṇasamaḥ kāryaḥ dinastho muktikāṅkṣibhiḥ |
saṃhāraḥ sa tu vijñeyaḥ śivadhāmaphalapradaḥ || 140 ||
[Analyze grammar]

vyomni prāpto yadā nādaḥ punareva nivartate |
śarvarī sā tu vijñeyā hṛdabjaṃ yāvadāgataḥ || 141 ||
[Analyze grammar]

sṛṣṭireṣā samākhyātā sarvasiddhiphalodayā |
ātmano bhairavaṃ rūpaṃ sadā bhāvyaṃ varānane || 142 ||
[Analyze grammar]

tasya vighnā vinaśyanti japaśca saphalo bhavet |
japtvā nivedayeddevi bhairavāya varānane || 143 ||
[Analyze grammar]

pūrakeṇa prayogeṇa tristhaṃ ca tritayānvitam |
trisiddhisiddhidaṃ devi sarahasyamudāhṛtam || 144 ||
[Analyze grammar]

śāntike mānaso japya upāṃśuḥ pauṣṭike smṛtaḥ |
saśabdaścābhicāre'sau prāgudagdakṣiṇāmukhaḥ || 145 ||
[Analyze grammar]

ātmā na śṛṇute yaṃ tu mānaso'sau prakīrtitaḥ |
ātmanā śrūyate yastu tamupāṃśuṃ vijānate || 146 ||
[Analyze grammar]

pare śṛṇvanti yaṃ devi saśabdaḥ sa udāhṛtaḥ |
aṣṭottaraśatenaiva akṣamālā samerukā || 147 ||
[Analyze grammar]

rudrākṣaśaṅkhapadmākṣaputrajīvakamauktikaiḥ |
sphāṭikī maṇiratnotthā sauvarṇī vaidrumī tathā || 148 ||
[Analyze grammar]

daśākṣamālā deveśi gṛhasthānāṃ prakīrtitāḥ |
sūtraṃ dhyātvā parāṃ śaktimadhvabhāgāṃstato maṇīn || 149 ||
[Analyze grammar]

vyaktisthānaṃ śivasyādhvā tatastaddharmiṇīṃ smaret |
saptaviṃśatibhiḥ kuryāddviguṇairvā caturguṇaiḥ || 150 ||
[Analyze grammar]

samaistu saṃhatairekaṃ śivatattvātmakaṃ mukhe |
na taṃ vilaṅghayedvidvān sṛṣṭisaṃhārakāraṇam || 151 ||
[Analyze grammar]

vīrasthānaratānāṃ hi vīrāṇāṃ varavarṇini |
mahāśaṅkhākṣasūtraṃ tu sarvakāmaphalapradam || 152 ||
[Analyze grammar]

gṛhasthena na kartavyamudvegajananaṃ param |
tasmāttu sphāṭikī mālā japtavyā sādhakottamaiḥ || 153 ||
[Analyze grammar]

sādhayedvividhānkāmānadhamānmadhyamottamān |
evaṃ hṛdambujāvastho yaṣṭavyo bhairavo vibhuḥ || 154 ||
[Analyze grammar]

sabāhyābhyantaraṃ kṛtvā paścādyajanamārabhet |
tatrārghapātramādau vai sauvarṇaṃ rājataṃ tathā || 155 ||
[Analyze grammar]

śāṅkhaṃ śāmbūkaṃ śauktaṃ vā tāmraṃ mṛṇmayameva vā |
padmapatrapalāśotthaṃ gṛhītvā kṣālya vāriṇā || 156 ||
[Analyze grammar]

astrajaptena deveśi pralipyāgurucandanaiḥ |
mṛṣṭadhūpena saṃdhūpya vāriṇāpūrayettataḥ || 157 ||
[Analyze grammar]

vastrapūtena śuddhena tāḍayedastramuccaran |
varmāvaguṇṭhitaṃ kṛtvā yāgaṃ tatraiva vinyaset || 158 ||
[Analyze grammar]

pūrvoktena vidhānena prokṣyastena samāsataḥ |
yāgārtho dravyasaṃghātaḥ tato yajanamārabhet || 159 ||
[Analyze grammar]

śaktiṃ nyasya tataścādau vyomākārāṃ sujājvalām |
sakalavyāpikāṃ sūkṣmāṃ śivādhārāṃ tu sarvagām || 160 ||
[Analyze grammar]

oṃkāradīpitāṃ devīṃ namaskārāvasānikām |
anantaṃ caiva vinyasya dharmaṃ jñānaṃ tathaiva ca || 161 ||
[Analyze grammar]

vairāgyaṃ ca tathaiśvaryamāgneyyādikrameṇa tu |
adharmaṃ ca tathājñānamavairāgyamanaiśvaram || 162 ||
[Analyze grammar]

saṃdhānakīlakāṃścaiva adhaśchādanamūrdhvagam |
padmaṃ sakesaraṃ devi karṇikāṃ puṣkarāṇi ca || 163 ||
[Analyze grammar]

maṇḍalatritayaṃ devāñchaktīścāpi śivāntakam |
mūrtiṃ brahmakalājālaṃ navatattvaṃ tritattvakam || 164 ||
[Analyze grammar]

bhairavāṣṭakavidyāṅgalocanaṃ kṣurikāṃ tathā |
śaktitrayaṃ paraṃ devamaṅgaṣaṭkasamanvitam || 165 ||
[Analyze grammar]

vinyasya bhāvayeddevi satataṃ vidhipūrvakam |
nirvartya tu yathānyāyaṃ prahṛṣṭenāntarātmanā || 166 ||
[Analyze grammar]

svāgataṃ cārdhyapādyaṃ ca sannidhānaṃ tathaiva ca |
rodhaṃ niṣṭhurayā kuryānmūlamantramanusmaran || 167 ||
[Analyze grammar]

pūjā suvipulā kāryā gandhadhūpasragādibhiḥ |
mudrāṃ pradarśayetpaścāttridhā traikālyakarmaṇi || 168 ||
[Analyze grammar]

tata āvaraṇaṃ bāhye viniveśyaṃ varānane |
īśapūrvayāmyasaumyavaruṇāntaṃ prakalpayet || 169 ||
[Analyze grammar]

vaktrāṇāṃ pañcakaṃ devi svadhyānaguṇasaṃyutam |
āgneyaiśānarakṣaḥsu sāmīraindradiśorapi || 170 ||
[Analyze grammar]

uttarāntaṃ niveśyaṃ tu aṅgānāṃ pañcakaṃ tathā |
netraṃ tu karṇikāyāṃ vai pūrvasyāṃ diśi saṃsthitam || 171 ||
[Analyze grammar]

svamantreṇa tu sarveṣāmardhyaṃ pādyaṃ samāhitaḥ |
mantrasaṃkarapuṣpāṇi na kuryātsādhakaḥ sadā || 172 ||
[Analyze grammar]

na bāhuṃ pṛṣṭhato vāpi mantrāṇāṃ parikalpayet |
paripāṭyā tu dātavyaṃ na mantrāṃllaṅghayetkvacit || 173 ||
[Analyze grammar]

svamudrāmantrasaṃyuktānyugapatparikalpayet |
ardhyaṃ pādyaṃ ca dhūpaṃ ca nityaṃ tāvatsamācaret || 174 ||
[Analyze grammar]

sarveṣāmeva mantrāṇāṃ vidhireṣa prakīrtitaḥ |
bhairavāṣṭakalokeśān sāstrānsaṃparikalpayet || 175 ||
[Analyze grammar]

bāhye śmaśānavinyāsaṃ praṇavādinamontagam |
pūrvādīśānaparyantaṃ kalpayeta vidhānataḥ || 176 ||
[Analyze grammar]

āmardakaṃ ca pūrvaṃ vai śmaśānādhipatiṃ vibhum |
śmaśānaiḥ sakabandhaiśca saśūlodbandhabhīṣaṇaiḥ || 177 ||
[Analyze grammar]

citibhiḥ prajvalantībhiḥ śivārāvaiḥ subhīṣaṇaiḥ |
agnikaṃ dakṣiṇe bhāge kālākhyaṃ paścime tathā || 178 ||
[Analyze grammar]

ekapādaṃ tathā saumye āgneyyāṃ tripurāntakam |
nairṛtyāmagnijihvaṃ tu vāyavyāṃ tu karālinam || 179 ||
[Analyze grammar]

aiśānyāṃ bhīmavaktraṃ tu śmaśāneśāḥ prakīrtitāḥ |
tarpayenmatsyamāṃsādyairāsavairvividhaistathā || 180 ||
[Analyze grammar]

gandhaṃ puṣpaṃ tathā dhūpaṃ sarveṣāṃ tu pradāpayet |
praṇipātaṃ tataḥ kṛtvā japtvā mantraṃ subhāvitaḥ || 181 ||
[Analyze grammar]

recakena prayogena nivedya vidhipūrvakam |
huḍḍuṅkāranamaskārān kṛtvā caiva tato vrajet || 182 ||
[Analyze grammar]

agnikuṇḍasamīpaṃ tu arghahastaḥ subhāvitaḥ |
kuṇḍaṃ tu lakṣaṇopetaṃ prokṣayedastravāriṇā || 183 ||
[Analyze grammar]

kavacenāvaguṇṭhyaitadastradarbheṇa collikhet |
uddhṛtya prokṣayetpaścādastramantreṇa bhāmini || 184 ||
[Analyze grammar]

pūraṇaṃ tena kartavyaṃ samīkaraṇameva ca |
secanaṃ kuṭṭanaṃ caiva lepanaṃ tena kārayet || 185 ||
[Analyze grammar]

prokṣaṇaṃ śoṣaṇaṃ caiva tathāstreṇaiva kārayet |
pūjanaṃ gandhapuṣpādyaiḥ asinā cābhimantraṇam || 186 ||
[Analyze grammar]

vajrīkaraṇamastreṇa rekhāḥ pūrvāparāstrayaḥ |
yāmyasaumyamukhī caikā vajrametatprakīrtitam || 187 ||
[Analyze grammar]

vajrīkaraṇamastreṇa rekhāstisrastu pūrvagāḥ |
yāmyasaumyamukhā tvekā vajrametatprakīrtitam || 187 ||
[Analyze grammar]

asinaivāgnikuṇḍaṃ taddarbhaiḥ pūrvāgrasaṃstaraiḥ |
sabāhyābhyantaraṃ chādyaṃ gṛhahetvarthamīśvari || 188 ||
[Analyze grammar]

kuṇḍasya dakṣiṇe bhāge śuṣkagomayamāsanam |
darbheṇa viṣṭaraṃ puṣpaṃ praṇavena prakalpayet || 189 ||
[Analyze grammar]

svanāmapadasaṃyuktaṃ svadhyānena namontagam |
āmantraṇapadenaiva brahmāṇaṃ sthāpya pūjayet || 190 ||
[Analyze grammar]

puṣpādibhiḥ sudhūpādyairdhruveṇa tu yathākramam |
catuṣpathaṃ kuṇḍamadhye darbhābhyāṃ praṇavena tu || 191 ||
[Analyze grammar]

pūrvasaubhyāgrabhāgābhyāṃ viṣṭaraṃ tasya copari |
puṣpaṃ tasyopariṣṭāttu hṛdayenaiva pūjayet || 192 ||
[Analyze grammar]

vāgīśīṃ ca samāhūya praṇavādinamontagām |
nīlotpaladalaśyāmāmṛtumaccārulocanām || 193 ||
[Analyze grammar]

sarvalakṣaṇasaṃpūrṇāṃ sarvāvayavabhūṣitām |
dhyātvā caivaṃvidhāṃ devīṃ sthāpayetkuṇḍamadhyataḥ || 194 ||
[Analyze grammar]

ṛtukāla ivottānāṃ śirasaiśānasaṃsthitām |
pūjayedgaṃdhapuṣpādyairbhavamantramanusmaran || 195 ||
[Analyze grammar]

tato mudrāṃ darśayeta saṃnidhānāya mantravit |
tato'gnipātramādāya śivāmbho'streṇa prokṣayet || 196 ||
[Analyze grammar]

kavacenāvaguṇṭhyāpi praṇavenaiva pūjayet |
araṇyādisamudbhūtaṃ lokāgnyantaṃ vidhānataḥ || 197 ||
[Analyze grammar]

agniṃ tu śukravaddhyātvā caitanyaṃ praṇavena tu |
ṣaḍaṅgenaiva saṃpūjya amṛtatvaṃ dhruveṇa tu || 198 ||
[Analyze grammar]

ātmānaṃ bhairavaṃ dhyātvā agniṃ dhyātvā tu bījavat |
dhruveṇa kuṇḍabāhye tu tridhābhrāmyāvatārayet || 199 ||
[Analyze grammar]

yonau tu bījavatkṣiptvā bhairaveṇa śivāmbhasā |
astramuccārya saṃprokṣya yoniṃ pracchādayedbudhaḥ || 200 ||
[Analyze grammar]

darbheṇa dhruvamantreṇa akṣavāṭaṃ tato nyaset |
astreṇaiva caturdikṣu darbhaireva prakalpayet || 201 ||
[Analyze grammar]

saptavārāstramantreṇa darbheṇaiva tu kaṅkaṇam |
dakṣahaste tu badhnīyādastramantramanusmaran || 202 ||
[Analyze grammar]

rakṣārthamagnigarbhasya garbhādhānamato bhavet |
rakṣārthamastragarbhasya iti aparāsyatrirāhutyā pūjanaṃ hṛdayena tu || 203 ||
[Analyze grammar]

yaduktaṃ śrīmatsvatantre |
saptavārāstrajaptena darbeṇaivāstrakaṅkaṇam |
badhnīyāddakṣiṇe haste mantramastramanusmaran || 203 ||
[Analyze grammar]

hṛdā trirāhutiṃ dattvā garbhādhānaṃ kṛtaṃ bhavet |
hṛdā vai jalabinduṃ tu darbhāgreṇātra pātayet || 204 ||
[Analyze grammar]

gandhapuṣpādibhiḥ pūjāṃ śikhayā kārayettataḥ |
trirāhutiṃ cottareṇa śikhayā ca trirāhutim || 205 ||
[Analyze grammar]

puṃsaḥ kalpanamevaṃ hi na strī garbhe tu janyate |
sīmantaṃ dakṣiṇāsyena darbhāgreṇa prakalpayet || 206 ||
[Analyze grammar]

grīvāmaṃsau kaṭiṃ caiva bāhū jaṅghe prakalpayet |
pratyaṅgāni ca saṃkalpya sīmantonnayanaṃ bhavet || 207 ||
[Analyze grammar]

gandhapuṣpādibhiḥ pūjā śirasā cāhutitrayāt |
pūrvamadhyāparānvahnau trīnbhāgānparikalpayet || 208 ||
[Analyze grammar]

mukhahṛtpādadeśāṃstu homāttacca tritattvakam |
śirāṃsi pañcāhutyaiva ūrdhvāsyena tribhistribhiḥ || 209 ||
[Analyze grammar]

yathoktaṃ śrīmatsvatantre |
pūrvamadhyāpare vahnestrīnbhāgānsamprakalpayet |
mukhahṛtpādadeśe tu tritattvāhutibhiḥ kramāt || 209 ||
[Analyze grammar]

pañcavaktraṃ tu saṃkalpya madhyaprāgyāmyasaumyakam |
aparaṃ cāpyāhutibhiḥ pūrvāsyena trisaṃkhyayā || 210 ||
[Analyze grammar]

vaktrāṇāṃ niṣkṛtiṃ tadvadāhutīnāṃ trisaṃkhyayā |
netraṃ netreṇa saṃkalpya mukheṣvevaṃ trayaṃ trayam || 211 ||
[Analyze grammar]

āhutitritayenaiva tilaiḥ sarvaṃ tu kārayet |
tataḥ kalāsamūhaṃ ca pañca cātha catuṣṭayam || 212 ||
[Analyze grammar]

aṣṭāṅgāni tathā trīṇi daśa cāṣṭāvanukramāt |
śeṣāsyaiḥ saṃprakalpyaivaṃ kalāmūrtistato bhavet || 213 ||
[Analyze grammar]

aṅgāni vinyasetpaścāt hṛdādyāni yathākramam |
trirāhutiṃ dakṣiṇena śirasā cāhutitrayam || 214 ||
[Analyze grammar]

sīmantonnayanaṃ hyevaṃ jātakarma tvathocyate |
astreṇa vījayedagnimastreṇaiva tu pūjayet || 215 ||
[Analyze grammar]

trirāhutiṃ tu pūrveṇa astreṇaivāhutitrayam |
evaṃ mantradvayenaiva jātakarma kṛtaṃ bhavet || 216 ||
[Analyze grammar]

yaduktaṃ tatraiva |
astreṇa vījayedvahnimastreṇaiva tu pūjayet |
trirāhutiprayogeṇa jātakarma kṛtaṃ bhavet || 216 ||
[Analyze grammar]

astreṇa prokṣayetkuṇḍaṃ sadyaḥ sūtakaśuddhaye |
vaktrāṇyuddhāṭayetpaścādvaktreṇaivāhutitrayāt |
vaktrāṇi śodhyānyasinā āhutitrayayogataḥ || 217 ||
[Analyze grammar]

vaktrābhighāro vaktraistu vaktre vaktre trayaṃ trayam |
prokṣayetkuṇḍapārśvāni sāstreṇaiva śivāmbhasā || 218 ||
[Analyze grammar]

darbhānāstīrya pūrvāgrāndakṣiṇottarasaṃsthitān |
saumyāgrānpūrvavāruṇyoḥ paridhīnviṣṭarāṃstathā || 219 ||
[Analyze grammar]

astramantreṇa te sarve brahmāṇaṃ pūrvaviṣṭare |
rudra ca dakṣiṇe sthāpya viṣṇuṃ paścimaviṣṭare || 220 ||
[Analyze grammar]

sadāśivaṃ cottare'tha svanāmapadacihnitam |
ādau dhruvaṃ smareddevi namaścānte prakalpayet || 221 ||
[Analyze grammar]

gandhapuṣpādibhiḥ pūjyāḥ svarūpaṃ teṣvanusmaret |
mekhalopari lokeśānpūjayetpraṇavena tu || 222 ||
[Analyze grammar]

rakṣārthaṃ jātabālasya brahmādyāḥ pūjitāstu ye |
tataḥ kaṅkaṇakaṃ muktvā dakṣahastavyavasthitam || 223 ||
[Analyze grammar]

puṣpaṃ saṃgṛhya devena śivāgnernāma kalpayet |
kavacenopacāraṃ tu gandhapuṣpādidhūpakaiḥ || 224 ||
[Analyze grammar]

ūrdhvāsyenāhutīstisraḥ kavacena trayaṃ punaḥ |
śivanāmāṅkitaṃ vahniṃ janayitvā surāṃstataḥ || 225 ||
[Analyze grammar]

visarjayettu svasthānaṃ sāvitrīṃ praṇavena tu |
puṣpādibhiḥ samabhyarcya homaireva tribhistribhiḥ || 226 ||
[Analyze grammar]

dhāmnaivedhmāstu hotavyā hastamātrapramāṇataḥ |
caturviṃśatisaṃkhyātāḥ śivāgnestarpaṇāya tu || 227 ||
[Analyze grammar]

srukstruvau saṃpratāpyāgnau śivāmbho'streṇa prokṣayet |
kavacenāvaguṇṭhyaitau śivāgnau bhrāmayettridhā || 228 ||
[Analyze grammar]

astreṇa mārjayedadbhirdarbhāgreṇātha saṃspṛśet |
punaragnau paribhrāmya prokṣayettau śivāmbhasā || 229 ||
[Analyze grammar]

darbhamadhyena saṃspṛśya bhūyo'gnau bhrāmya tāpayet |
śivāmbhasā mārjayitvā darbhamūlena saṃspṛśet || 230 ||
[Analyze grammar]

sruksruvābhyāṃ tato mūlaṃ sthāpayettāvadhomukhau |
darbhāṇāṃ pṛṣṭhataḥ pūjyau dakṣiṇe'gneḥ sadā budhaiḥ || 231 ||
[Analyze grammar]

ājyasaṃskaraṇaṃ kuryādājyādhiśrayaṇādikam |
ājyaṃ saṃprokṣya cāstreṇa kavacenāvaguṇṭhayet || 232 ||
[Analyze grammar]

śivāgnau tāpyamastreṇa udvāsyaṃ kavacena tu |
kuṇḍasya parito devi tridhā bhrāmya tu sthāpayet || 233 ||
[Analyze grammar]

yonisaṃsthaṃ cājyapātraṃ udplavaṃ saṃplavaṃ tataḥ |
darbhāgradvayamādāya prādeśaṃ madhyagranthitam || 234 ||
[Analyze grammar]

pavaitrametadvihitamutplavaṃ tena saṃplavam |
aṅguṣṭhānāmikābhyāṃ tu gṛhītvaitatpavitrakam || 235 ||
[Analyze grammar]

parāṅmukhaṃ tu trīnvārān saṃmukhaṃ trīṃstathaiva ca |
astreṇaiva tu mantreṇa avadyotaḥ śivāgninā || 236 ||
[Analyze grammar]

darbholmukaṃ tu saṃgṛhya ājyapātraṃ nirīkṣayet |
nīrājanaṃ tataḥ kuryātparyagnikaraṇaṃ tataḥ || 237 ||
[Analyze grammar]

dhāmnāstramantramuccārya tamagnāvulmukaṃ kṣipet |
dhāmnaiva vidhinā mantrī prokṣayedastravāriṇā || 238 ||
[Analyze grammar]

abhimantrya ṣaḍaṅgena amṛtatvaṃ śivena tu |
sakṛduccārayogena pūjayedbhairaveṇa tu || 239 ||
[Analyze grammar]

vaktrasaṃdhānakaṃ vaktrairāhutitritayena tu |
aparāsyena tadvaktrasaṃdhānaṃ tu samācaret || 240 ||
[Analyze grammar]

evaṃ saumyasya vaktrasya saṃdhānaṃ tu kṛtaṃ bhavet |
trirāhutiprayogeṇa dakṣiṇasyāpyayaṃ vidhiḥ || 241 ||
[Analyze grammar]

pūrvavaktre'pyathaivaṃ syādūrdhvavaktraṃ śivānvitam |
trirāhutiprayogeṇa vaktrasaṃdhiḥ prakīrtitaḥ || 242 ||
[Analyze grammar]

mukhyamūrdhvaṃ smṛtaṃ vaktraṃ guṇatvamitareṣu tu |
muktikāmasya dīkṣāyāmūrdhvavaktrasya mukhyatā || 243 ||
[Analyze grammar]

pādalepāñjanādyā vai siddhīstu vividhāśca yāḥ |
sadāśivāntagāḥ sarvāḥ pūrvavaktre tu homayet || 244 ||
[Analyze grammar]

māraṇoccāṭanādau tu vidveṣe stambhane tathā |
dakṣiṇe caiva vaktre tu homātsiddhiḥ parā bhavet || 245 ||
[Analyze grammar]

śāntikaṃ pauṣṭikaṃ caiva saubhāgyākarṣaṇāni ca |
saubhāgyārohasiddhiṃ tu uttare homayetsadā || 246 ||
[Analyze grammar]

paścime nityakarmāṇi viniyogaḥ prakīrtitaḥ |
ājyabhāgo hi hotavya ūrdhvavaktre tu paścime || 247 ||
[Analyze grammar]

ājyapātrasya madhye tu darbho vai bhairaveṇa tu |
nyasitavyo varārohe tato vai vartmakalpanā || 248 ||
[Analyze grammar]

uccārya bhairavaṃ pātre saṃpātaṃ pātya vartmanā |
nāḍītrayeṇa yugapatpātre bhāgatrayaṃ nyaset || 249 ||
[Analyze grammar]

suṣumnāṃ madhyamārgasthāṃ dakṣe piṅgāṃ prakalpayet |
iḍābhāge tu yattejo vāme saumyaṃ prakalpayet || 250 ||
[Analyze grammar]

evaṃ tribhāgaṃ saṃkalpya sruvamāpūrya homayet |
bhairaveṇaiva mantreṇāgnaye svāhāntameva ca || 251 ||
[Analyze grammar]

agnibhāgāttu saṃgṛhya sruveṇājyāhutiṃ kṣipet |
somabhāgastu somāya svāhetyante samuccaran || 252 ||
[Analyze grammar]

dhāmādipraṇavādyaṃ ca sruveṇājyāhutiṃ kṣipet |
agnīṣometi saṃjñe dve svāhānte dhāma cāditaḥ || 253 ||
[Analyze grammar]

praṇavādyājyamadhyāttu sruvamāpūrya homayet |
śuklapakṣe vidhirhyeṣa kṛṣṇapakṣe'nyathā bhavet || 254 ||
[Analyze grammar]

somabhāge bhavetsūryo hyagnisaṃjñā tu pūrvavat |
agneḥ sūryasya madhyādvai āhutiṃ pratipādayet || 255 ||
[Analyze grammar]

yataḥ sūryasya madhye vai amāvasyāṃ viśecchaśī |
prāśanārthamato homo vaktrāṇāṃ bhairaveṇa tu || 256 ||
[Analyze grammar]

cūḍādyā ye tu saṃskārā agnerbālāntasaṃsthitāḥ |
prāpaṇārthāya sarveṣāṃ pūrṇāmekāṃ pradāpayet || 257 ||
[Analyze grammar]

bhairavaṃ tu samuccārya śivāgniḥ sarvasiddhidaḥ |
agniṃ tu proddharetpaścātpātre saṃsthāpya rakṣayet || 258 ||
[Analyze grammar]

kuṇḍasya cottare bhāge viṣṭarasya ca bāhyataḥ |
praṇītaṃ kalpayettatra camasaṃ vāripūritam || 259 ||
[Analyze grammar]

puṣpākṣatatilairyuktaṃ pavitraṃ tatra vinyaset |
praṇavādi samāvāhya viṣṇunāma tato namaḥ || 260 ||
[Analyze grammar]

āmantraṇapadenaiva viṣṇuṃ saṃsthāpya pūjayet |
svāgatāsanapādyārghaiḥ tato vijñāpayettu tam || 261 ||
[Analyze grammar]

paśvarthaṃ yajña ārabdha ātmārthaṃ vātha sādhakaiḥ |
bhagavaṃstvatprasādena yāge niśchidratāstu naḥ || 262 ||
[Analyze grammar]

tato'gnau yajanaṃ kṛtvā bhairavaṃ tu prapūjayet |
sthaṇḍiloktavidhānena anantādīnprakalpayet || 263 ||
[Analyze grammar]

dhyātvā vaktrāṇi pañcādau yena yatkarma vāñchitam |
tanmukhyavaktraṃ saṃkalpya mukhaṃ kuṇḍapramāṇataḥ || 264 ||
[Analyze grammar]

bhāvayennava jihvāsatu vaktrevaktre pratiṣṭhitāḥ |
prāgādyaṣṭau madhya ekā kāmyārthe diggatāstu yāḥ || 265 ||
[Analyze grammar]

rājyārthā dāhajananī mṛtyudā śatrukārikā |
vaśīkartryuccāṭanī syādarthadā muktidāyikā || 266 ||
[Analyze grammar]

sarvasiddhipradā madhye tasmānmadhye tu homayet |
pūṇā tu bhairaveṇaiva jihvānāṃ kalpanāya ca || 267 ||
[Analyze grammar]

punaḥ pūrṇāhutiṃ caiva bhairaveṇa pradāpayet |
jvālāgraṃ tu hṛdāgṛhya vahnicaitanyakalpitam || 268 ||
[Analyze grammar]

ātmahṛtsthaṃ tu saṃkalpya yogapīṭhaṃ tu kalpayet |
madhyajihvānusāreṇa agninābhau tu kandakam || 269 ||
[Analyze grammar]

nālaṃ hṛdavadhi dhyātvā padmaṃ tatra vicintayet |
patrāṣṭakasamopetaṃ sitavarṇaṃ sutejasam || 270 ||
[Analyze grammar]

anantaṃ kalpayettatra dharmādicaraṇāntikam |
oṃkāreṇa śivāntaṃ ca agnimūrtiṃ prakalpayet || 271 ||
[Analyze grammar]

śikhā hṛdi sthitā yā tu dhruveṇotkīlayetpunaḥ |
recakeṇa kṣipedvahnau sā mūrtirbhairavātmikā || 272 ||
[Analyze grammar]

mūrtibhūtaṃ prakalpyaivamaṣṭātriṃśatkalāyutam |
śodhyādhvānaṃ tu vinyasyeddīkṣākāle varānane || 273 ||
[Analyze grammar]

bhairavaṃ pūjayitvā tu śāstradṛṣṭena karmaṇā |
vaktrasaṃdhiśca vaktrabhyāṃ śivavaktrāgnivaktrayoḥ || 274 ||
[Analyze grammar]

saṃdhāya caivaṃ jihvābhyāṃ nāḍīsaṃdhirato bhavet |
mūlamantraṃ samuccārya agnināsāvinirgatam || 275 ||
[Analyze grammar]

sthaṇḍilasthaśivālīnamekārthaṃ caiva saṃdhayet |
śuddhājyenāhutiśatamaṣṭotkṛṣṭaṃ varānane || 276 ||
[Analyze grammar]

bhairavasya tu hotavyaṃ vaktrāṅgānāṃ daśāṃśakam |
bhairavāṣṭakalokeśāndaśamāṃśena homayet || 277 ||
[Analyze grammar]

mūlamantraṃ samuccārya pūrṇāmekāṃ prapātayet |
bhairavāpyāyanārthāya tathā pūrṇāṃ prapātayet || 278 ||
[Analyze grammar]

punarnyūnātiriktārthaṃ niśchidrakaraṇāya ca |
paścāddhomaḥ prakartavyo yathecchaṃ tu varānane || 279 ||
[Analyze grammar]

sarvakāmaprado homastilaiḥ śasto ghṛtānvitaiḥ |
dhānyairdhanārthasiddhyarthaṃ ghṛtaguggulahomataḥ || 280 ||
[Analyze grammar]

jāyate vipulā siddhiradhamā madhyamottamā |
śvetāravindairājyāktaiḥ bilvaiśca śriyamāpnuyāt || 281 ||
[Analyze grammar]

kśīrāktatilahomena śāntikarma varānane |
sitaraktapītakṛṣṇaiḥ śamanākṛṣṭipauṣṭikam || 282 ||
[Analyze grammar]

māraṇaṃ ca varārohe krameṇa parikalpayet |
kundapuṣpaiḥ sutārthāya aśokaiḥ priyasaṃgamaḥ || 283 ||
[Analyze grammar]

jātikuṭmalakaiḥ kanyā gāndharvī bakulodbhavaiḥ |
nāgaistu nāgakanyā vai siddhārthaiḥ siddhakanyakā || 284 ||
[Analyze grammar]

caṇyakaiścāpyapsaraso narendraḥ phalguṣeṇa tu |
ghṛtāktena varārohe samantrī sapurohitaḥ || 285 ||
[Analyze grammar]

rājñī putrasamopetā vaśaṃ yāti varānane |
yakṣiṇī vaśamāyāti puṣpaiścaiva kadambajaiḥ || 286 ||
[Analyze grammar]

vidyādharī kuyyakaiśca sādhayennātra saṃśayaḥ |
mṛgīṃ baddhvā tilairhomaḥ padmabilvairadhiṣṭhitam || 287 ||
[Analyze grammar]

bhakṣyairgrāsapramāṇaistu dhanyaiḥ prasṛtisaṃmitaiḥ |
evaṃ homānusāreṇa sādhako vidhisaṃsthitaḥ || 288 ||
[Analyze grammar]

pūjāhomarato nityaṃ yānyānkāmānsamīhate |
tāṃstānsa sādhayatyeva bhairavasya vaco yathā |
iti śrīsvacchandatantre dvitīyaḥ paṭalaḥ || 289 ||
[Analyze grammar]