Chapter 45

[English text for this chapter is available]

| sūta uvāca |
tatraivāsti dvijaśreṣṭhāḥ supuṇyaṃ puṣkaratrayam |
yatra pūrvaṃ tapastaptamānartādhipabhūbhujā || 1 ||
[Analyze grammar]

yastatra kārtike māsi kṛttikāsthe niśākare |
madhyāhne kurute snānaṃ sa gacchati parāṃ gatim || 2 ||
[Analyze grammar]

ṛṣaya ūcuḥ |
kathaṃ tatra samāyātaṃ supuṇyaṃ puṣkaratrayam |
kasminsthāne ca vijñeyaṃ kaiścihnairvada sūtaja || 3 ||
[Analyze grammar]

sūta uvāca |
ahaṃ vaḥ kīrtayiṣyāmi yaiścihnaiḥ puṣkaratrayam |
prāgdṛṣṭaṃ muninā tatra viśvāmitreṇa dhīmatā || 4 ||
[Analyze grammar]

purā nivasatastasya viśvāmitrasya sanmuneḥ |
saṃprāptā kārtikī puṇyā kṛttikāyogasaṃyutā || 5 ||
[Analyze grammar]

sarvatīrthamayaṃ kṣetraṃ tadvijñāya taponidhiḥ |
tataśca cintayāmāsa svacitte gādhinandanaḥ || 6 ||
[Analyze grammar]

adyeyaṃ kārtikī puṇyā kṛttikāyogasaṃyutā |
yasyāṃ snāne naraiḥ śreyaḥ prāpyate puṣkarodake |
ādyaṃ tu puṣkaraṃ dūre na gantuṃ śakyate'dhunā || 7 ||
[Analyze grammar]

tasmādatra sthitaṃ yacca tasminsnānaṃ karomyaham |
sa evaṃ niścayaṃ kṛtvā śraddhāpūtena cetasā || 8 ||
[Analyze grammar]

tataścānveṣayāmāsa puṣkarāṇi samaṃtataḥ |
bahutvāttatra tīrthānāṃ niścayaṃ nānvapadyata || 9 ||
[Analyze grammar]

dṛṣṭvādṛṣṭvā jalasthānaṃ snānaṃ cakre tataḥ param |
sa tadā śramamāpanno bhramamāṇa itastataḥ || 10 ||
[Analyze grammar]

vṛkṣamūlaṃ samāśritya niviṣṭaśca kṣitau tataḥ |
tuṣṭāvātha śucirbhūtvā śraddhayā ca tripuṣkaram || |
madhyamādyojanaṃ svargaḥ kaniṣṭhādardha yojanam |
jyeṣṭhakuṇḍātpunaḥ khyāto hastaprāyaḥ śubhātmabhiḥ || 12 ||
[Analyze grammar]

pāvayaṃti hi tīrthāni snānadānādasaṃśayam |
puṣkarālokanādeva naraḥ pāpātpramu cyate || 13 ||
[Analyze grammar]

puṣkarāraṇyamāśritya śākamūlaphalairapi |
ekasminbhojite vipre koṭirbhavati bhojitā || 14 ||
[Analyze grammar]

puṣkare duṣkaraṃ snānaṃ puṣkare duṣkaraṃ tapaḥ |
puṣkare duṣkaro vāsaḥ sarvaṃ puṣkaraduṣkaram || 15 ||
[Analyze grammar]

kārtikyāṃ kṛttikāyoge puṣkare snāti yo naraḥ |
sa kṣaṇānmucyate pāpādājanmamaraṇodbhavāt || 16 ||
[Analyze grammar]

jyeṣṭhe prātaśca madhyāhne madhyame snāti yo naraḥ |
kaniṣṭhe'stamite bhānau sakṛtsvargamavāpnuyāt || 17 ||
[Analyze grammar]

tāvattiṣṭhati deheṣu pātakaṃ sarvadehinām |
yāvanna pauṣkaraistoyaiḥ snānaṃ vai kurvate narāḥ || 18 ||
[Analyze grammar]

divākarakaraiḥ spṛṣṭaṃ tamo yadvatpraṇaśyati |
puṣkarodakasaṃsparśācchīghraṃ gacchati pātakam || 19 ||
[Analyze grammar]

brahmahatyādikaṃ pāpaṃ kṛtvāpi puruṣo bhuvi |
kārtikyāṃ puṣkare snātvā nirdoṣatvaṃ prapadyate || 20 ||
[Analyze grammar]

kiṃ dānaiḥ kiṃ vratairhomaiḥ kiṃ yajñairvahuvistaraiḥ |
kārtikyāṃ puṣkare snānaiḥ sarveṣāṃ labhyate phalam || 21 ||
[Analyze grammar]

yadyeṣā bhāratī satyā mayā samyamudīritā |
tanme syāddarśanaṃ śīghraṃ sadyaḥ puṣkarasaṃbhavam || 22 ||
[Analyze grammar]

evaṃ tasya bruvāṇasya viśvāmitrasya dhīmataḥ |
aśarīrā'bhavadvāṇī gaganāddvijasattamāḥ || 23 ||
[Analyze grammar]

viśvāmitra muniśreṣṭha sadā me gagane sthitiḥ |
muktvaikāṃ kārtikīṃ caiva kṛttikāyogasaṃyutām || 24 ||
[Analyze grammar]

tadatra divase vāso mama bhūmitale dhruvam |
asminneva vane puṇye tattvaṃ snānaṃ samācara || 25 ||
[Analyze grammar]

viśvāmitra uvāca |
sarveṣāmeva tīrthānāṃ śrūyate ca samāśrayaḥ |
tatkathaṃ vedmi tīrtheśa tvāmatraiva vyavasthitam || 26 ||
[Analyze grammar]

tadotthitā punarvāṇī tārā gaganagocarā |
viśvāmitraṃ muniśreṣṭhaṃ harṣayaṃtī dvijottamāḥ || 27 ||
[Analyze grammar]

nātidūre vanādasmādatra saṃti jalāśayāḥ |
teṣāmekatame padmaṃ vidyate'dhomukhaṃ sthitam || 28 ||
[Analyze grammar]

ūrdhvavaktraṃ dvitīye ca tiryagvaktraṃ tṛtīyake |
tatrordhvāsyaiḥ sarojaiśca vijñeyaṃ jyeṣṭhapuṣkaram || 29 ||
[Analyze grammar]

pārśvavaktrairdvijaśreṣṭha madhyamaṃ parikīrtitam |
adhovaktraistathā jñeyaṃ kaniṣṭhaṃ puṣkaraṃ kṣitau || 30 ||
[Analyze grammar]

etaiścihnairmuniśreṣṭha jñātvā snānaṃ samācara |
tacchrutvā sa munistūrṇaṃ samutthāya yayau tataḥ || 31 ||
[Analyze grammar]

tādṛśaiḥ kamalaistatra saṃsthitāste jalāśayāḥ |
tāndṛṣṭvā śraddhayopetaḥ kṛtvā snānaṃ yathākramam || 32 ||
[Analyze grammar]

tataśca vidhinā samyakcakārapitṛtarpaṇam || 33 ||
[Analyze grammar]

tataḥ śākaiśca mūlaiśca nīvāraiḥ phalasaṃyutaiḥ |
cakāra vidhinā śrāddhaṃ tatraiva dvijasattamāḥ || 34 ||
[Analyze grammar]

tatra tasyaiva tīrastho vīkṣāṃcakre samāhitaḥ |
kārtikyāṃ kṛttikāyoge cihnadarśanalālasaḥ || 35 ||
[Analyze grammar]

brāhmaṇā ūcuḥ |
kīdṛśaṃ jāyate cihnaṃ kārtikyāṃ jyeṣṭhapuṣkare |
saṃprāpte kṛttikāyoge sarvaṃ tatra vadāśu naḥ || 36 ||
[Analyze grammar]

sūta uvāca |
kārtikyāṃ kṛttikāyoge yadā gacchati caṃdramāḥ |
tadā niṣkrāmati śreṣṭhaṃ kamalaṃ jalamadhyataḥ || 37 ||
[Analyze grammar]

tanmadhyeṃ'guṣṭhamātrastu puruṣo dṛśyate janaiḥ |
susnātaiḥ śraddhayopetaistatastīrthaphalaṃ labhet || 38 ||
[Analyze grammar]

etasmātkāraṇātsnātvā viśvāmitro mahāmuniḥ |
taccihnaṃ vīkṣayāmāsa mahadyatnaṃ samāśritaḥ || 39 ||
[Analyze grammar]

tasyaivaṃ vīkṣamāṇasya viśvāmitrasya dhīmataḥ |
ānartādhipatistatra prāpto rājā bṛhadbalaḥ || 40 ||
[Analyze grammar]

atyaṃtaṃ mṛgayāśrāṃto hatvā mṛgagaṇānbahūn |
ṛkṣāṃścaiva varāhāṃśca sāraṃgānatha saṃbarān || 41 ||
[Analyze grammar]

siṃhānvyāghrānvṛkāṃścaiva hiṃsānāraṇyacāriṇaḥ |
tathānyānapi madhyāhne tena mārgeṇa saṃgataḥ || 42 ||
[Analyze grammar]

athāpaśyaddrumopāṃte viśvāmitraṃ munīśvaram |
upaviṣṭaṃ kṛtasnānaṃ vīkṣamāṇaṃ jalāśayam || 43 ||
[Analyze grammar]

tatastaṃ praṇipatyoccairavatīrya turaṃgamāt |
śramārttaḥ salile tasminpraviveśa nṛpottamaḥ || 44 ||
[Analyze grammar]

etasminnaṃtare toyātkamalaṃ tadvinirgatam |
sahasrapatrasaṃjuṣṭaṃ dvādaśārkasamaprabham || 45 ||
[Analyze grammar]

taddṛṣṭvā sa mahīpālaḥ padmamatyadbhutaṃ mahat |
jagrāha kautukāviṣṭaḥ svayaṃ savyena pāṇinā || 46 ||
[Analyze grammar]

spṛṣṭamātre tatastasminkamale dvijasattamāḥ |
utthitaḥ sumahāñchabdo viśvaṃ yena prapūritam || 47 ||
[Analyze grammar]

taṃ śabdaṃ sa mahīpālaḥ śrutvā mūrchāmupāviśat |
patitaśca jale tasminpadmaṃ cādarśanaṃ gatam || 48 ||
[Analyze grammar]

tataḥ kṛcchreṇa mahatā karṣitaḥ salilādbahiḥ |
sevakairduḥkhaśokārttairhāheti pratijalpakaiḥ || 49 ||
[Analyze grammar]

tatastīraṃ samāsādya kṛcchrātprāpyātha cetanām |
yāvadvīkṣayati svāṃgaṃ tāvatkuṣṭhaṃ samāgatam || 50 ||
[Analyze grammar]

tato viṣādamāpanno dṛṣṭvā tādṛṅnijaṃ vapuḥ |
śīrṇaghrāṇāṃghrihastaṃ ca ghargharasvarasaṃyutam || 51 ||
[Analyze grammar]

atha gatvā muneḥ pārśve viśvāmitrasya bhūmipaḥ |
uvāca vacanaṃ dīnaṃ bāṣpagadgadayā girā || 52 ||
[Analyze grammar]

bhagavanpaśya me jātaṃ yādṛśaṃ vapureva hi |
akasmādeva magnasya salile'tra vigarhitam || 53 ||
[Analyze grammar]

tatkiṃ pānīyadoṣo vā kiṃ vā bhūmermunī śvara |
yenedṛksahasā yātaṃ vikṛtiṃ me śarīrakam || 54 ||
[Analyze grammar]

viśvāmitra uvāca |
sāvitraṃ padmamevaitadyatspṛṣṭaṃ bhūpate tvayā |
ucchiṣṭena ravirmadhye svayaṃ yasya vyavasthitaḥ || 55 ||
[Analyze grammar]

yadā syātkṛttikāyogaḥ kārtike māsi pārthiva |
śaśāṃkasya tadā caitajjāyate pauṣkare jale || 56 ||
[Analyze grammar]

tadidaṃ puṣkaraṃ jyeṣṭhaṃ bhavānyatra śramāturaḥ |
praviṣṭaḥ kārtikī cādya kṛttikāyogasaṃyutā || 57 ||
[Analyze grammar]

etadvīkṣya naro hyatra snānaṃ kuryājjalāśaye |
śraddhayā parayā yuktaḥ sa gacchati parāṃ gatim || 58 ||
[Analyze grammar]

ucchiṣṭena tvayā rājanharaṇāya hi kevalam |
etatsaroruhaṃ spṛṣṭaṃ tenedṛksaṃsthitaṃ phalam || 59 ||
[Analyze grammar]

bṛhadbala uvāca |
kathaṃ me syānmuniśreṣṭha kuṣṭhavyādhiparikṣayaḥ |
tapasā niyamenāpi vratenāpi kṛtena vai || 60 ||
[Analyze grammar]

viśvāmitra uvāca |
ārādhaya sahasrāṃśumasminkṣetre mahīpate |
tataḥ prāpsyasi saṃsiddhiṃ kuṣṭhanāśasamudbhavām || 61 ||
[Analyze grammar]

tacchrutvā sa munervākyaṃ bhūmipālo bṛhadbalaḥ |
tatkṣaṇātsthāpayāmāsa sūryasya pratimāṃ tadā || 62 ||
[Analyze grammar]

arcayāmāsa vidhivatpuṣpadhūpānulepanaiḥ |
śraddhayā parayā yukto ravivāre viśeṣataḥ || 63 ||
[Analyze grammar]

upavāsaparo bhūtvā raktacandanasaṃyutaiḥ |
pūjayanraktapuṣpaiśca śraddhayā parayā yutaḥ || 64 ||
[Analyze grammar]

tataḥ saṃvatsarasyāṃte sa babhūva mahīpatiḥ |
kuṣṭha vyādhi vinirmukto dvādaśārkasamaprabhaḥ || 65 ||
[Analyze grammar]

tataḥ svaṃ rājyamāsādya bhuktvā bhogānanekaśaḥ |
dehāṃte dinanāthasya saṃprāpto maṃdiraṃ tathā || 66 ||
[Analyze grammar]

sūta uvāca |
evaṃ tatra dvijaśreṣṭhā viśvāmitreṇa dhīmatā |
prakaṭaṃ sarvalokasya vihitaṃ puṣkaratrayam || 67 ||
[Analyze grammar]

yastatra kārtike māse kārttikyāṃ kṛttikāsu ca |
prakaroti naraḥ snānaṃ brahmalokaṃ sa gacchati || 68 ||
[Analyze grammar]

tathā yo bhāskaraṃ paśyedbṛhadvalapratiṣṭhitam |
vatsaraṃ ravivāreṇa yāvatkṛtvā kṣaṇaṃ naraḥ |
sa mucyate naro rogairyadi syādrogasaṃyutaḥ || 69 ||
[Analyze grammar]

nīrogo vā naraḥ sadyo labhate manasepsitam |
niṣkāmo mokṣamāpnoti prasādāttīkṣṇadīdhiteḥ || 70 ||
[Analyze grammar]

kārttikyāṃ kṛttikāyoge vṛṣotsargaṃ karoti yaḥ |
puṣkareṣu supuṇyeṣu so'śvamedhaphalaṃ labhet || 71 ||
[Analyze grammar]

eṣṭavyā bahavaḥ putrā yadyekopi gayāṃ vrajet |
yajeta vā'śvamedhena nīlaṃ vā vṛṣamutsṛjet || 72 ||
[Analyze grammar]

ekataḥ sarvatīrthāni sarvadānāni caikataḥ |
ekatastu vṛṣotsargaḥ kārtikyāṃ puṣkareṣu ca || 73 ||
[Analyze grammar]

yaścaitacchuṇuyānnityaṃ paṭhedvā śraddhayānvitaḥ |
saṃprāpya sarvakāmānvai brahmaloke mahīyate || 74 ||
[Analyze grammar]