Chapter 44

[English text for this chapter is available]

| menakovāca |
nūnaṃ hi kāmadharme tvaṃ na pravīṇo mahādyute |
tena māmīdṛśairvākyairnivārayasi rāgiṇīm || 1 ||
[Analyze grammar]

sūta uvāca |
evamuktastato bhūyo viśvāmitro'bravīdidam |
kopena mahatā yukto niḥspṛhastatparigrahe || 2 ||
[Analyze grammar]

viśvāmitra uvāca |
tvaṃ jīva gaccha vā mṛtyuṃ nāhaṃ kartāsmi te vacaḥ |
vratanāśāttu yatpāpamadhikaṃ strīvadhādbhavet || 3 ||
[Analyze grammar]

prāyaścittaṃ budhairuktaṃ vratināṃ strīvadhe kṛte |
na saṃgāttu punastāsāṃ tasmāttvaṃ gantumarhasi || 4 ||
[Analyze grammar]

na kevalaṃ vratopetāḥ strīsaṃgātpāpamāpnuyuḥ |
vratabāhyā api narāḥ saktāḥ strīṣu pataṃtyadhaḥ || 5 ||
[Analyze grammar]

saṃsārabhramaṇaṃ nārī prathamepi samāgame |
vahnipradakṣiṇā vyājanyāyenaiva pradarśayet || 6 ||
[Analyze grammar]

tasmātstrībhiḥ samaṃ prājñaḥ saṃbhāṣāmapi varjayet |
āstāṃ tāvatsamāsaṃgaṃ ya icchecchreya ātmanaḥ || 7 ||
[Analyze grammar]

aṃgāra sadṛśā nārī ghṛtakuṃbhasamaḥ pumān |
asparśāddṛḍhatāmeti tatsaṃparkādvilīyate || 8 ||
[Analyze grammar]

striyo mūlamanarthānāṃ sarveṣāṃ prāṇināṃ bhuvi |
tasmāttyājyā sudūreṇa tāḥ svargasya nirodhakāḥ || 9 ||
[Analyze grammar]

kulīnā vittavatyaśca nāthavatyo'pi yoṣitaḥ |
ekasminnaṃtare rāgaṃ kurvaṃtyetāḥ sucañcalāḥ || 10 ||
[Analyze grammar]

na strībhyaḥ kiṃcidanyaddhi pāpāya vidyate bhuvi |
yāsāṃ saṃgasamāsādya saṃsāre bhramate janaḥ || |
nīco'pi kurute sevāṃ yastāsāṃ vijaneṣvatha |
virūpaṃ vāpi nīcaṃ vā taṃ sevante hi tāḥ striyaḥ || 12 ||
[Analyze grammar]

anarthatvānmanuṣyāṇāṃ bhayātparijanasya ca |
maryādāyāmamaryādāḥ striyastiṣṭhanti bhartṛṣu || 13 ||
[Analyze grammar]

sūta uvāca |
evaṃ saṃbhartsitā tena menakā kopasaṃyutā |
śaśāpa taṃ muniśreṣṭhaṃ sphuramāṇoṣṭhasaṃpuṭā || 14 ||
[Analyze grammar]

yasmāttvayā parityaktā sakāmāhaṃ sudurmate |
tyajatā kāmajaṃ dharmaṃ tasmācchāpaṃ gṛhāṇa me || 15 ||
[Analyze grammar]

adyaiva bhava duburddhe valīpalitasaṃyutaḥ |
jarājarjjaritāṃgaśca tucchadṛṣṭirviraṃgitaḥ || 16 ||
[Analyze grammar]

sūta uvāca |
uktamātre tu vacane tatkṣaṇānmunisattamaḥ |
babhūva tādṛśaḥ sadyastayā yādṛkprakīrtitaḥ || 17 ||
[Analyze grammar]

tataḥ kopaparītātmā so'pi tāṃ śaptumudyataḥ |
kamaṇḍalorjalaṃ gṛhya saṃtāpādraktalocanaḥ || 18 ||
[Analyze grammar]

nirdoṣo'pi tvayā yasmācchapto'haṃ gaṇikādhame |
tasmādbhava tvamapyāśu jarājarjaritāṃgikā || 19 ||
[Analyze grammar]

sāpi tadvacanātsadyastādṛgrūpā vyajāyata |
yādṛśo'sau muniśreṣṭho valīpalitagātrabhṛt || 20 ||
[Analyze grammar]

atha tādṛksvarūpeṇa snātā tatra jalā śaye |
bhūyo'pi tādṛśī jātā yādṛśī saṃsthitā purā || 21 ||
[Analyze grammar]

taddṛṣṭvā paramāścaryamatīva tvarayānvitaḥ |
so'pi tatrākarotsnānaṃ saṃjātaśca yathā purā || 22 ||
[Analyze grammar]

tatastau tīrthamāhātmyādrūpaudāryaguṇānvitau |
mitha āmaṃtrya saṃhṛṣṭau gatau deśaṃ yathepsitam || 23 ||
[Analyze grammar]

evaṃ tīrthasya māhātmyaṃ vijñāya bhagavānṛṣiḥ |
liṃgaṃ saṃsthāpayāmāsa devadevasya śūlinaḥ || 24 ||
[Analyze grammar]

tapaścakāra sumahattasmiṃstīrthavare tadā |
kuśastambena kṛtavāṃstatsaro vipulaṃ vibhuḥ || 25 ||
[Analyze grammar]

tatra snātvā naro yastu pūjayelliṃgamuttamam |
viśvāmitreśvaraṃ khyātaṃ sa gacchecchivamaṃdiram || 26 ||
[Analyze grammar]

adyāpi dṛśyate tatra gaṃgodakasamaṃ jalam |
sarvapāpaharaṃ puṇyaṃ sarvakāmapradāyakam || 27 ||
[Analyze grammar]

yastatra kurute snānaṃ śraddhāpūtena cetasā |
sa devalokamāsādya pitṛbhiḥ saha modate || 28 ||
[Analyze grammar]

tataḥprabhṛti tattīrthaṃ khyātiṃ prāptaṃ mahītale |
pātāle svargaloke ca rūpaudāryapradaṃ nṛṇām || 29 ||
[Analyze grammar]

etadvaḥ sarvamākhyātaṃ yatpṛṣṭo'smi dvijottamāḥ |
viśvāmitreśa māhātmyaṃ sarvapātakanāśanam || 30 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṃḍe śrīhāṭakevarakṣetramāhātmye viśvāmitrakuṇḍotpatti viśvāmitreśvaramāhātmyavarṇanaṃnāma catuścatvāriṃśattamo'dhyāyaḥ || 44 ||
[Analyze grammar]