Chapter 193

[English text for this chapter is available]

adhyāya || 193 ||
[Analyze grammar]

śrīmārkaṇḍeya uvāca |
ityukte'psarasaḥ sarvāḥ praṇipatya punaḥ punaḥ |
ūcurnārāyaṇaṃ devaṃ taddarśanasamīhayā || 1 ||
[Analyze grammar]

vasantakāmāpsarasa ūcuḥ |
bhagavanbhavatā yo'yamupadeśo hitārthinā |
proktaḥ sa sarvo vijñāto māhātmyaṃ viditaṃ ca te || 2 ||
[Analyze grammar]

yattvetadbhavatā proktaṃ prasannenāntarātmanā |
darśiteyaṃ viśālākṣī darśayiṣyāmi vo jagat || 3 ||
[Analyze grammar]

tatrārthe sarvabhāvena prapannānāṃ jagatpate |
darśayātmānamakhilaṃ darśiteyaṃ yathorvaśī || 4 ||
[Analyze grammar]

yadi devāparādhe'pi nāsmāsu kupitaṃ tava |
namaste jagatāmīśa darśayātmānamātmanā || 5 ||
[Analyze grammar]

nārāyaṇa uvāca |
paśyatehākhilāṃllokānmama dehe surāṅganāḥ |
madhuṃ madanamātmānaṃ yaccānyaddraṣṭumicchatha || 6 ||
[Analyze grammar]

śrīmārkaṇḍeya uvāca |
ityuktvā bhagavāndevastadā nārāyaṇo nṛpa |
uccairjahāsa svanavattatrābhūdakhilaṃ jagat || 7 ||
[Analyze grammar]

brahmā prajāpatiḥ śakraḥ saha rudraiḥ pinākadhṛk |
ādityā vasavaḥ sādhyā viśvedevā maharṣayaḥ || 8 ||
[Analyze grammar]

nāsatyadasrāvanilaḥ sarvaśaśca tathāgnayaḥ |
yakṣagandharvasiddhāśca piśācoragakinnarāḥ || 9 ||
[Analyze grammar]

samastāpsaraso vidyāḥ sāṅgā vedāstaduktayaḥ |
manuṣyāḥ paśavaḥ kīṭāḥ pakṣiṇaḥ pādapāstathā || 10 ||
[Analyze grammar]

sarīsṛpāścātha sūkṣmā yaccānyajjīvasaṃjñitam |
samudrāḥ sakalāḥ śailāḥ saritaḥ kānanāni ca || 11 ||
[Analyze grammar]

dvīpānyaśeṣāṇi tathā tathā sarvasarāṃsi ca |
nagaragrāmapūrṇā ca medinī medinīpate |
devāṅganābhirdevasya dehe dṛṣṭaṃ mahātmanaḥ || 12 ||
[Analyze grammar]

nakṣatragrahatārābhiḥ susampūrṇaṃ nabhastalam |
dadṛśustāḥ sucārvaṅgyastasyāntarviśvaṃ rūpiṇaḥ || 13 ||
[Analyze grammar]

ūrdhvaṃ na tiryaṅnādhastādyadāntastasya dṛśyate |
tamanantamanādiṃ ca tatastāstuṣṭuvuḥ prabhum || 14 ||
[Analyze grammar]

madanena samaṃ sarvā madhunā ca varāṅganāḥ |
sasādhvasā bhaktiparāḥ paraṃ vismayamāgatāḥ || 15 ||
[Analyze grammar]

vasantakāmāpsarasa ūcuḥ |
paśyāma nādiṃ tava deva nāntaṃ na madhyamavyākṛtarūpapāram |
parāyaṇaṃ tvāṃ jagatāmanantaṃ natāḥ sma nārāyaṇamātmabhūtam || 16 ||
[Analyze grammar]

mahīnabhovāyujalāgnayastvaṃ śabdādirūpastu parāparātman |
tvatto bhavatyacyute sarvametadbhedādirūpo'si vibho tvamātman || 17 ||
[Analyze grammar]

draṣṭāsi rūpasya parasya vettā śrotā ca śabdasya hare tvamekaḥ |
sraṣṭā bhavān sarvagato'khilasya ghrātā ca gandhasya pṛthakśarīrī || 18 ||
[Analyze grammar]

sureṣu sarveṣu na so'sti kaścinmanuṣyalokeṣu na so'sti kaścit |
paśvādivargeṣu na so'sti kaścidyo nāṃśabhūtastava devadeva || 19 ||
[Analyze grammar]

brahmāmbudhīndupramukhāni saumya śakrādirūpāṇi tavottamāni |
samudrarūpaṃ tava dhairyavatsu tejaḥ svarūpeṣu ravistathāgniḥ || 20 ||
[Analyze grammar]

kṣamādhaneṣu kṣitirūpamagryaṃ śīghro balavatsu vāyuḥ |
manuṣyarūpaṃ tava rājaveṣo mūḍheṣu sarveśvara pādapo'si || 21 ||
[Analyze grammar]

sarvānayeṣvacyuta dānavastvaṃ sanatsajātaśca vivekavatsu |
rasasvarūpeṇa jalasthito'si gandhasvarūpaṃ bhavato dharitryām || 22 ||
[Analyze grammar]

dṛśyasvarūpaśca hutāśanastvaṃ sparśasvarūpaṃ bhavataḥ samīre |
śabdādikaṃ te nabhasi svarūpaṃ mantavyarūpo manasi prabho tvam || 23 ||
[Analyze grammar]

bodhasvarūpaśca matau tvamekaḥ sarvatra sarveśvara sarvabhūta |
paśyāmi te nābhisarojamadhye brahmāṇamīśaṃ ca haraṃ bhṛkuṭyām || 24 ||
[Analyze grammar]

tavāśvinau karṇagatau samastāstavāsthitā bāhuṣu lokapālāḥ |
ghrāṇo'nilo netragatau ravīndu jihvā ca te nātha sarasvatīyam || 25 ||
[Analyze grammar]

pādau dharitrī jaṭharaṃ samastāṃllokān hṛṣīkeśa vilokayāmaḥ |
jaṅghe vayaṃ pādatalāṅgulīṣu piśācayakṣoragasiddhasaṅghāḥ || 26 ||
[Analyze grammar]

puṃstve prajānāṃ patiroṣṭhayugme pratiṣṭhitāste kratavaḥ samastāḥ |
sarve vayaṃ te daśaneṣu deva daṃṣṭrāsu devā hyabhavaṃśca dantāḥ || 27 ||
[Analyze grammar]

romāṇyaśeṣāstava devasaṅghā vidyādharā nātha tavāṅghrirekhāḥ |
sāṅgāḥ samastāstava deva vedāḥ samāsthitāḥ sandhiṣu bāhubhūtāḥ || 28 ||
[Analyze grammar]

varāhabhūtaṃ dharaṇīdharaste nṛsiṃharūpaṃ ca sadā karālam |
paśyāma te vājiśirastathoccaistrivikrame yacca tadāprameyam || 29 ||
[Analyze grammar]

amī samudrāstava deva dehe maurvālayaḥ śailadharāstathāmī |
imāśca gaṅgāpramukhāḥ sravantyo dvīpāṇyaśeṣāṇi vanādideśāḥ || 30 ||
[Analyze grammar]

stuvanti ceme munayastaveśa dehe sthitāstvanmahimānamagryam |
tvāmīśitāraṃ jagatāmanantaṃ yajanti yajñaiḥ kila yajñino'mī || 31 ||
[Analyze grammar]

tvattohi saumyaṃ jagatīha kiṃcittvatto na raudraṃ ca samastamūrte |
tvatto na śītaṃ ca na keśavoṣṇaṃ sarvasvarūpātiśayī tvameva || 32 ||
[Analyze grammar]

prasīda sarveśvara sarvabhūta sanātanātmaparameśvareśa |
tvanmāyayā mohitamānasābhiryatte'parāddhaṃ tadidaṃ kṣamasva || 33 ||
[Analyze grammar]

kiṃ vāparāddhaṃ tava devadeva yanmāyayā no hṛdayaṃ tavāpi |
māyābhiśaṅkipraṇatārtihantarmano hi no vihvalatāmupaiti || 34 ||
[Analyze grammar]

na te'parāddhaṃ yadi te'parāddhamasmābhirunmārgavivartinībhiḥ |
tatkṣamyatāṃ sṛṣṭikṛtastavaiva devāparādhaḥ sṛjato vivekam || 35 ||
[Analyze grammar]

namo namaste govinda nārāyaṇa janārdana |
tvannāmasmaraṇātpāpamaśeṣaṃ naḥ praṇaśyatu || 36 ||
[Analyze grammar]

namo'nanta namastubhyaṃ viśvātmanviśvabhāvana |
tvannāmasmaraṇātpāpamaśeṣaṃ naḥ praṇaśyatu || 37 ||
[Analyze grammar]

vareṇya yajñapuruṣa prajāpālana vāmana |
tvannāmasmaraṇātpāpamaśeṣaṃ naḥ praṇaśyatu || 38 ||
[Analyze grammar]

namo'stu te'bjanābhāya prajāpatikṛte hara |
tvannāmasmaraṇātpāpamaśeṣaṃ naḥ praṇaśyatu || 39 ||
[Analyze grammar]

saṃsārārṇavapotāya namastubhyamadhokṣaja |
tvannāmasmaraṇātpāpamaśeṣaṃ naḥ praṇaśyatu || 40 ||
[Analyze grammar]

namaḥ parasmai śrīśāya vāsudevāya vedhase |
svecchayā guṇayuktāya sargasthityantakāriṇe || 41 ||
[Analyze grammar]

upasaṃhara viśvātmanrūpametatsanātanam |
vardhamānaṃ na no draṣṭuṃ samarthaṃ cakṣurīśvara || 42 ||
[Analyze grammar]

pralayāgnisahasrasya samā dīptistavācyuta |
pramāṇena diśo bhūmirgaganaṃ ca samāvṛtam || 43 ||
[Analyze grammar]

na vidmaḥ kutra vartāmo bhavānnāthopalakṣyate |
sarvaṃ jagadiaikasthaṃ piṇḍitaṃ lakṣayāmahe || 44 ||
[Analyze grammar]

kiṃ varṇayāmo rūpaṃ te kiṃ pramāṇamidaṃ hare |
māhātmyaṃ kiṃ nu te deva yajjihvāyā na gocare || 45 ||
[Analyze grammar]

vaktāro vāyutenāpi buddhīnāmayutāyutaiḥ |
guṇanirvarṇanaṃ nātha kartuṃ tava na śakyate || 46 ||
[Analyze grammar]

tadetaddarśitaṃ rūpaṃ prasādaḥ paramaḥ kṛtaḥ |
chandato jagatāmīśa tadetadupasaṃhara || 47 ||
[Analyze grammar]

mārkaṇḍeya uvāca |
ityevaṃ saṃstutastābhirapsarobhirjanārdanaḥ |
divyajñānopapannānāṃ tāsāṃ pratyakṣamīśvaraḥ || 48 ||
[Analyze grammar]

viveśa sarvabhūtāni svairaṃśairbhūtabhāvanaḥ |
taṃ dṛṣṭvā sarvabhūteṣu līyamānamadhokṣajam || 49 ||
[Analyze grammar]

vismayaṃ paramaṃ cakruḥ samastā devayoṣitaḥ |
sa ca sarveśvaraḥ śailānpādapānsāgarānbhuvam || 50 ||
[Analyze grammar]

jalamagniṃ tathā vāyumākāśaṃ ca viveśa ha |
kāle dikṣvatha sarvātma hyātmanaścānyathāpi ca || 51 ||
[Analyze grammar]

ātmarūpasthitaṃ svena mahimnā bhāvayañjagat |
devadānavarakṣāṃsi yakṣīvidyādharoragāḥ || 52 ||
[Analyze grammar]

manuṣyapaśukīṭādimṛgapaśvantarikṣagāḥ |
ye'ntarikṣe tathā bhūmau divi ye ca jalāśrayāḥ || 53 ||
[Analyze grammar]

tānviveśa sa viśvātmā punastadrūpamāsthitaḥ |
nareṇa sārdhaṃ yattābhirdṛṣṭapūrvamarindama || 54 ||
[Analyze grammar]

tāḥ paraṃ vismayaṃ jagmuḥ sarvāstridaśayoṣitaḥ |
praṇemuḥ sādhvasātpāṇḍuvadanā nṛpasattama || 55 ||
[Analyze grammar]

nārāyaṇo'pi bhagavānāha tāstridaśāṅganāḥ || 56 ||
[Analyze grammar]

nārāyaṇa uvāca |
nīyatāmurvaśī bhadrā yatrāsau tridaśeśvaraḥ |
bhavatīnāṃ hitārthāya sarvabhūteṣvasāviti || 57 ||
[Analyze grammar]

jñānamutpāditaṃ bhūyo layaṃ bhūteṣu kurvatā |
tadgacchadhvaṃ samasto'yaṃ bhūtagrāmo madaṃśakaḥ || 58 ||
[Analyze grammar]

ahamadyātmabhūtasya vāsudevasya yoginaḥ |
asmātparataraṃ nāsti yo'nantaḥ paripathyate || 59 ||
[Analyze grammar]

tamajaṃ sarvabhūteśaṃ jānīta paramaṃ padam |
ahaṃ bhavatyo devāśca manuṣyāḥ paśavaśca ye |
etatsarvamanantasya vāsudevasya vai kṛtam || 60 ||
[Analyze grammar]

evaṃ jñātvā samaṃ sarvaṃ sadevāsuramānuṣam |
sapaśvādiguṇaṃ caiva draṣṭavyaṃ tridaśāṅganāḥ || 61 ||
[Analyze grammar]

mārkaṇḍeya uvāca |
ityuktāstena devena samastāstāḥ surastriyaḥ |
praṇamya tau samadanāḥ savasantāśca pārthiva || 62 ||
[Analyze grammar]

ādāya corvaśīṃ bhūyo devarājamupāgatāḥ |
ācakhyuśca yathāvṛttaṃ devarājāya tattathā || 63 ||
[Analyze grammar]

mārkaṇḍeya uvāca |
tathā tvamapi rājendra sarvabhūteṣu keśavam |
cintayansamatāṃ gaccha samataiva hi muktaye || 64 ||
[Analyze grammar]

rājannevaṃ viśeṣeṇa bhūteṣu parameśvaram |
vāsudeva kathaṃ doṣāṃllobhādīnna prahāsyasi || 65 ||
[Analyze grammar]

sarvabhūtāni govindādyadā nānyāni bhūpate |
tadā vairādayo bhāvāḥ kriyatāṃ na tu putraka || 66 ||
[Analyze grammar]

iti paśya jagatsarvaṃ vāsudevātmakaṃ nṛpa |
etadeva hi kṛṣṇena rūpamāviṣkṛtaṃ nṛpa || 67 ||
[Analyze grammar]

parameśvareti yadrūpaṃ tadetatkathitaṃ tava |
janmādibhāvarahitaṃ tadviṣṇoḥ paramaṃ padam || 68 ||
[Analyze grammar]

saṃkṣepeṇātha bhūpāla śrūyatāṃ yadvadāmi te |
yanmataṃ puruṣaḥ kṛtvā paraṃ nirvāṇamṛcchati || 69 ||
[Analyze grammar]

sarvo viṣṇusamāso hi bhāvābhāvau ca tanmayau |
sadasatsarvamīśo'sau mahādevaḥ paraṃ padam || 70 ||
[Analyze grammar]

bhavajaladhigatānāṃ dvandvavātāhatānāṃ sutaduhitṛkalatratrāṇabhārārditānām |
viṣamaviṣayatoye majjatāmaplavānāṃ bhavati śaraṇameko viṣṇupoto narāṇām || 71 ||
[Analyze grammar]