Chapter 48

[English text for this chapter is available]

vyāsa uvāca |
śṛṇu sūta mahābhāga yathā skaṃdena bhāṣitaḥ |
mahāmahotsavaḥ śaṃbhoḥ pṛcchate kuṃbhasaṃbhave || 1 ||
[Analyze grammar]

skaṃda uvāca |
niśāmaya mahāprājña śaṃbhu prāveśikīṃ kathām |
trailokyānaṃdajananīṃ mahāpātakataṃkinīm || 2 ||
[Analyze grammar]

maṃdarādāgataḥ śaṃbhuścaitre damanaparvaṇi |
prāpyāpyānaṃdagahanamitaścetaścacāra ha || 3 ||
[Analyze grammar]

mokṣalakṣmīvilāsetha prāsāde siddhimāgate |
devo virajasaḥ pīṭhādaṃtargehaṃ viveśa ha || 4 ||
[Analyze grammar]

ūrjaśuklapratipadi budharādhāsamāyuji |
caṃdre saptamarāśisthe śeṣeṣūccagraheṣu ca || 5 ||
[Analyze grammar]

vādyamāneṣu vādyeṣu prasannāsu haritsu ca |
brāhmaṇānāṃ śrutirava nyakkṛtānyaravāṃtare || 6 ||
[Analyze grammar]

pratiśabdita bhūrloka bhuvarlokāṃtarādhvani |
sarvaṃ pramuditaṃ cāsīcchaṃbhoḥ prāveśikotsave || 7 ||
[Analyze grammar]

jagurgaṃdharvanikarā nanṛtuścāpsarogaṇāḥ || 28 ||
[Analyze grammar]

cāraṇāstu stutiṃ kuryurjarhṛṣurdevatāgaṇāḥ || 8 ||
[Analyze grammar]

vavurgaṃdhavahā vātā vavṛṣuḥ kusumairghanāḥ |
sarve maṃgalanepathyāḥ sarve maṃgalabhāṣiṇaḥ || 9 ||
[Analyze grammar]

sthāvarā jaṃgamāḥ sarve jātā ānaṃdamedurāḥ |
surāsureṣu sarveṣu gaṃdharveṣūrageṣu ca || 10 ||
[Analyze grammar]

vidyādhareṣu sādhyeṣu kinnareṣu nareṣu ca |
strīpuṃjāteṣu sarveṣu rejuścatvāra eva ca || 11 ||
[Analyze grammar]

niṣpratyūhaṃ ca nitarāṃ puruṣārthāḥ padepade |
dhūpadhūmabharairvyoma yadraktaṃ tu tadā mune || 12 ||
[Analyze grammar]

nādyāpi nīlimānaṃtaṃ parityajati karhicit |
nīrājanāya ye dīpāstadā sarve prabodhitāḥ || 13 ||
[Analyze grammar]

teṣāṃ jyotīṃṣi khedyāpi rājaṃte tārakācchalāt |
pratisaudhaṃ patākāśca nānākārā vicitritāḥ || 14 ||
[Analyze grammar]

ramyadhvajaprabhādhautā rejuḥ prati śivālayam |
kvacidgāyaṃti gītajñāḥ kvacinnṛtyaṃti nartakāḥ || 15 ||
[Analyze grammar]

caturvidhāni vādyāni vādyaṃte ca kvacitkvacit |
pratyadhvaṃ caṃdanarasacchaṭā picchilabhūmayaḥ || 16 ||
[Analyze grammar]

harita śveta māṃjiṣṭha nīla pīta bahuprabhāḥ |
pratyaṃgaṇaṃ śubhākārā raṃgamālāścakāśire || 17 ||
[Analyze grammar]

ratnakuṭṭimabhūbhāgā gopurāgreṣu rejire |
sudhojjvalā harmyamālāḥ saudhanāmaprapedire || 18 ||
[Analyze grammar]

acetanānyapi tadā cetanānīva saṃbabhuḥ |
yāni kānīha kīrtyaṃte maṃgalāni ghaṭodbhava || 19 ||
[Analyze grammar]

teṣāmeva hi sarveṣāṃ tattu janmadivābhavat |
āgatya devadevotha muktimaṃḍapamāviśat || 20 ||
[Analyze grammar]

athābhiṣiktaścaturānanena maharṣivṛṃdaiḥ saha devadevaḥ |
śubhāsanasthaḥ sahito bhavānyā kumāravṛṃdaiḥ parito vṛtaśca || 21 ||
[Analyze grammar]

ratnairasaṃkhyairbahubhirdukūlairmālyairvicitrairlasadiṣṭagaṃdhaiḥ |
apūpujandevagaṇā maheśaṃ tadā mudāte ca mahoragreṃdrāḥ || 22 ||
[Analyze grammar]

ratnākaraiścāpi girīṃdravyairyathā svamanyairapi puṇyadhībhiḥ |
saṃpūjitaḥ kuṃbhaja tatra śaṃbhurnīrājito mātṛgaṇairatheśaḥ || 23 ||
[Analyze grammar]

saṃtoṣya sarvānprathamaṃ munīṃdrānsvaisvairhṛdisthaiśca cirābhilāṣaiḥ |
brahmāṇamābhāṣya śivotha viṣṇuṃ jagāda sarvāmaravṛṃdavaṃdyaḥ || 24 ||
[Analyze grammar]

ito niṣīdeti samānapūrvaṃ tvaṃ me samastaprabhutaikahetuḥ |
dūrepi tiṣṭhannikaṭastvameva tvatto na kaścinmama kāryakartā || 25 ||
[Analyze grammar]

tvayā divodāsa nareṃdravaryaḥ sadūpadeśaiśca tathopadiṣṭaḥ |
yathā sa siddhiṃ paramāmavāpa samīhitaṃ me nikhilaṃ ca siddham || 26 ||
[Analyze grammar]

viṣṇo varaṃ brūhi ya īpsitaste nādeyamatrāsti kimapyaho te |
idaṃ mayā'naṃdavanaṃ yadāptaṃ hetustu tatratvamasau gaṇeśaḥ || 27 ||
[Analyze grammar]

na me priyaṃ kiṃcana viṣṭapatraye tathā yatheyaṃ parasaukhyabhūmiḥ |
vārāṇasī brahmarasāyanasya khanirjaniryatra na dīrghaśāyinām || 28 ||
[Analyze grammar]

śrutveti vākyaṃ jagadīśituśca provāca viṣṇurvaradaṃ maheśam |
yadi prasannosi pinākapāṇe tadā padāddūramahaṃ na te syām || 29 ||
[Analyze grammar]

śrutveti vākyaṃ madhusūdanasya jagāda tuṣṭo nitarāṃ purāriḥ |
sadā murāre mama sannidhau tvaṃ tiṣṭhasva nirvāṇaramāśrayetra || 30 ||
[Analyze grammar]

ādāvanārādhya bhavaṃtamatra yo māṃ bhajiṣyatyapi bhaktiyuktaḥ |
samīhitaṃ tasya na setsyati dhruvaṃ parātparānmeṃbuja cakrapāṇe || 31 ||
[Analyze grammar]

sarvatra saukhyaṃ mama muktimaṃḍape saṃtiṣṭhamānasya bhavedihācyuta |
na tattu kailāsagirau sunirmale na bhaktacetasyapi niścalaśriyi || 32 ||
[Analyze grammar]

nimeṣamātraṃ sthiracittavṛttayastiṣṭhaṃti ye dakṣiṇamaṃḍapetra me |
ananyabhāvā api gāḍhamānasā na te punargarbhadaśāmupāsate || 33 ||
[Analyze grammar]

saṃsnāya ye cakrasarasyagādhe samastatīrthaika śirovibhūṣaṇe |
kṣaṇaṃ viśaṃtīha nirīhamānasā nirenasaste mama pārṣadā hi || 34 ||
[Analyze grammar]

smaraṃti ye māmapavargamaṃḍape kiṃcidyathāśakti dadatyapi svam |
śṛṇvaṃti puṇyāśca kathāḥ kṣaṇaṃ sthirāste koṭigodānaphalaṃ bhajaṃti || 35 ||
[Analyze grammar]

upeṃdrataptāni tapāṃsi taiściraṃ snātā hi te cākhilatīrthasārthakaiḥ |
snātveha ye vai maṇikarṇikā hrade samāsate muktijanāśrayekṣaṇam || 36 ||
[Analyze grammar]

tīrthāni saṃtīha padepade hare tulā kva teṣāṃ maṇikarṇikāyāḥ |
katīhano saṃti śubhāśca maṃḍapāḥ paraṃparomuktiramāśrayoyam || 37 ||
[Analyze grammar]

kaivalyamaṃḍapasyāsya bhaviṣye dvāpare hare |
loke khyātirbhavitrīyameṣa kukkuṭamaṃḍapaḥ || 38 ||
[Analyze grammar]

hariruvāca |
bhālanetrasamākhyāhi kathaṃ nirvāṇamaṃḍapaḥ |
tathā khyātimasau gaṃtā yathā devena bhāṣitam || 39 ||
[Analyze grammar]

devadeva uvāca |
mahānaṃdo dvijo nāma bhaviṣyotra caturbhuja |
agravedīsamācārastyaktatīrthapratigrahaḥ || 40 ||
[Analyze grammar]

adāṃbhiko'krūramanāḥ sadaivātithivallabhaḥ |
atha yauvanamāsādya pitaryuparate sa hi || 41 ||
[Analyze grammar]

viṣameṣu śaraistīvraiḥ kāritastvapade padam |
jahāra kasyacidbhāryā maitrīṃ kṛtvā tu tena vai || 42 ||
[Analyze grammar]

tayā ca prerito'peyaṃ papau cāpi vimohitaḥ |
abhakṣyabhakṣaṇarucirabhūnmadanamohitaḥ || 43 ||
[Analyze grammar]

vaiṣṇavāndhanino dṛṣṭvā kṣaṇaṃ vaiṣṇavaveṣabhṛt |
śaivānniṃdati mūḍhātmā narakatrāṇakāraṇam || 44 ||
[Analyze grammar]

śivabhaktānsamālokya kiṃcicca pariditsukān |
garhayedvaiṣṇavānsarvāñśaivaliṃgopajīvakaḥ || 45 ||
[Analyze grammar]

iti pākhaṃḍadharmajñaḥ saṃdhyāsnānaparāṅmukhaḥ |
viśālatilakaḥ sragvī śuddhadhautāṃbarojvalaḥ || 46 || || 27 ||
[Analyze grammar]

śikhī copagrahakaraḥ sarvebhyo'satpratigrahī |
tasyāpatyadvayaṃ jātamunmattapathavartinaḥ || 47 ||
[Analyze grammar]

evaṃ tasya pravṛttasya kaścitparvatadeśataḥ |
samāgamiṣyati dhanī tīrthayātrārthasiddhaye || 48 ||
[Analyze grammar]

snātvā sa cakrasarasi kathayiṣyati ceti vai |
ahamasti dhanoditsurjātyā cāṃḍālasattamaḥ || 49 ||
[Analyze grammar]

asti kaścitpratigrāhī yasmai dadyāmahaṃ dhanam |
iti tasya vacaḥ śrutvā kaiściccāṃgulisaṃjñayā || 50 ||
[Analyze grammar]

uddiṣṭa upaviṣṭosau yo japeddhyānamudrayā |
eṣa pratigrahaṃ tvatto grahīṣyati na cetaraḥ || 51 ||
[Analyze grammar]

iti teṣāṃ vacaḥ śrutvā sa gatvā tatsamīpataḥ |
daṃḍavatpraṇipatyātha taṃ babhāṣe tadāṃtyajaḥ || 52 ||
[Analyze grammar]

māmuddhara mahāvipra tīrthaṃ me saphalīkuru |
kiṃcidvastvasti me tattvaṃ gṛhāṇānugrahaṃ kuru || 53 ||
[Analyze grammar]

athākṣamālikāṃ karṇe kṛtvā dhyānaṃ visṛjya ca |
kiyaddhanaṃ tavāstīha papraccha karasaṃjñayā || 54 ||
[Analyze grammar]

tasya saṃjñāṃ sa vai buddhvā provācāti prahṛṣṭavat |
saṃtṛptiryāvatā te syāttāvaddāsyāmi nānyathā || 55 ||
[Analyze grammar]

iti tadvacanaṃ śrutvā tyaktvā maunamuvāca ha |
sānaṃdaḥ sa mahānaṃdo niḥspṛhosmi pratigrahe || 56 ||
[Analyze grammar]

paraṃ te'nugrahārthaṃ tu kariṣyāmi pratigraham |
kiṃca me vacanaṃ tvaṃ cetkariṣyasyuttamottama || 57 ||
[Analyze grammar]

yāvadastyakhilaṃ vittaṃ tanmadhye nyasya kasyacit |
na stokamapi dātavyaṃ tadā'dāsyāmi nānyathā || 58 ||
[Analyze grammar]

cāṃḍāla uvāca |
yāvadasti mayānītaṃ viśveśaprītaye vasu |
tāvattubhyaṃ pradāsyāmi viśveśastvaṃ yato mama || 59 ||
[Analyze grammar]

ye vasaṃtīha viśveśa rājadhānyāṃ dvijottama |
kṣudrākṣudrā jaṃtumātrā viśveśāṃ śāsta eva hi || 60 ||
[Analyze grammar]

paroddharaṇaśīlā ye ye parecchāprapūrakāḥ |
paropakṛtiśīlā ye viśveśāṃ śāsta eva hi || 61 ||
[Analyze grammar]

iti tadvacanaṃ śrutvā prahṛṣṭeṃdriyamānasaḥ |
uvāca pārvatīyaṃ taṃ so'grajanmāṃtyajaṃ tadā || 62 ||
[Analyze grammar]

āyāhi darbhānādehi kurūtsargaṃ tvarānvitaḥ |
tatheti sa cakārāśu pārvatīyo mahāmanāḥ || 33 ||
[Analyze grammar]

viśveśaḥ prīyatāṃ ceti procya yāto yathāgataḥ |
sa ca dvijo dvijairanyairdhikkṛtopi vasanniha || 64 ||
[Analyze grammar]

bahirnirgatamātrastu bahubhiḥ paribhūyate |
cāṃḍālabrāhmaṇaścaiṣa cāṃḍālātta dhanastvasau || 65 ||
[Analyze grammar]

asāveva hi cāṃḍālaḥ sarvalokabahiṣkṛtaḥ |
itthaṃ tamanudhāvaṃti thūtkurvaṃtaḥ parito hare || 66 ||
[Analyze grammar]

sa ca tadbhayato gehātkākabhītadivāṃdhavat |
na niḥsaretkvacidapi lajjākṛti natāsyakaḥ || 67 ||
[Analyze grammar]

sa ekadā saṃpradhārya gṛhiṇyā lokadūṣitaḥ |
jagāma kīkaṭāndeśāṃstyaktvā vārāṇasīṃ purīm || 68 ||
[Analyze grammar]

madhye mārgaṃ sa gacchanvai lakṣitastu sakāṃcanaḥ |
api kārpaṭikāṃtasthaḥ sa ruddho mārgarodhibhiḥ || 69 ||
[Analyze grammar]

nītvā te tamaraṇyānīṃ taskarāḥ saparicchadam |
ulluṃṭhya dhanamādāya samālocya parasparam || 70 ||
[Analyze grammar]

procurbhūridhanaṃ caitajjīryatyasminna jīvati |
asau dhanī prayatnena vadhyaḥ saparicārakaḥ || 71 ||
[Analyze grammar]

saṃpradhāryeti teprāhuḥ smartavyaṃ smara pāṃthika |
tvāṃ vayaṃ ghātayiṣyāmo niścitaṃ saparicchadam || 72 ||
[Analyze grammar]

niśamyeti manasyeva kathayāmāsa sa dvijaḥ |
aho pratigṛhītaṃ me yadarthaṃ vasu bhūriśaḥ || 73 ||
[Analyze grammar]

kuṭuṃbamapi tannaṣṭaṃ naṣṭaścāpi pratigrahaḥ |
jīvitaṃ cāpi me naṣṭaṃ naṣṭā kāśīpurīsthitiḥ || 74 ||
[Analyze grammar]

yugapatsarvamevāśu naṣṭaṃ durbuddhiceṣṭayā |
na kāśyāṃ maraṇaṃ prāptaṃ tasmādduṣṭapratigrahāt || 75 ||
[Analyze grammar]

prāṃte kuṭuṃbasmaraṇāttathākāśīsmṛterapi |
corairhatopi sa tadā kīkaṭe kukkuṭo'bhavat || 76 ||
[Analyze grammar]

sā kukkuṭī sutau tau tu tāmracūḍatvamāpatuḥ |
prāṃte kāśīsmaraṇato jātā jātismṛtiḥ parā || 77 ||
[Analyze grammar]

itthaṃ bahutithekāle gate kārpaṭikottamāḥ |
tasminnevādhvani prāptāścatvāro yatra kukkuṭāḥ || 78 ||
[Analyze grammar]

vārāṇasyāḥ kathāṃ proccaiḥ kurvaṃto'nyonyameva hi |
kāśīkathāṃ samākarṇya tadā te caraṇāyudhāḥ || 79 ||
[Analyze grammar]

jātismṛtiprabhāveṇa tatsaṃgena tu nirgatāḥ |
taiśca kārpaṭikaśreṣṭheḥ pathi dṛṣṭvā kṛpālubhiḥ || 80 ||
[Analyze grammar]

taṃdulādiparikṣepaiḥ prāpitāḥ kṣetramuttamam |
te tu kṣetraṃ samāsādya catvāraścaraṇāyudhāḥ || 81 ||
[Analyze grammar]

cariṣyaṃto'tra parito muktimaṃḍapamuttamam |
jitāhārānsaniyamānkāmakrodhaparāṅmukhān || 82 ||
[Analyze grammar]

prahāsānmatkathālāpāṃllābhamohavivarjitān |
svardhunīsnānasaṃklinna sunirmalaśiroruhān || 93 ||
[Analyze grammar]

mannāmoccāraṇaparānmatkathārpitasuśrutīn |
maddattacittasadvṛttīndṛṣṭvā kṣetranivāsinaḥ || 84 ||
[Analyze grammar]

mānayāmāsuratha tānkukkuṭānsādhuvartmanaḥ |
prāktanāṃ vāsanāyogātsaṃpradhārya parasparam |
krameṇāhāramākuṃcya prāṇāṃstyakṣyaṃti cātra vai || 85 ||
[Analyze grammar]

paśyatāṃ sarvalokānāṃ viṣṇo te madanugrahāt |
vimānamadhiruhyāśu kailāsaṃ prāpya matpadam || 86 ||
[Analyze grammar]

nirviśya suciraṃ kālaṃ divyānbhogānanuttamān |
tato'tra jñānino bhūtvā muktiṃ prāpsyaṃti śāśvatīm || 87 ||
[Analyze grammar]

tato lokāstadadārabhya kathayiṣyaṃti sarvataḥ |
muktimaṃḍapanāmaitadeṣa kukkuṭamaṃḍapaḥ || 88 ||
[Analyze grammar]

caritramapi vai teṣāṃ ye smariṣyaṃti mānavāḥ |
muktimaṃḍapamāsādya śreyaḥ prāpsyaṃti tepi hi || 89 ||
[Analyze grammar]

iti yāvatkathāṃ śaṃbhurbhaviṣyāmagrato hareḥ |
akarottumulo nādo ghaṃṭānāṃ tāvadudgataḥ || 90 ||
[Analyze grammar]

athanaṃdinamāhūya devadeva umādhavaḥ |
provāca naṃdinvijñāyāgatya brūhi kuto ravaḥ || 91 ||
[Analyze grammar]

atha naṃdī samāgatya provāca vṛṣabhadhvajam |
namaskṛtya prahṛṣṭāsyaḥ prabaddhakarasaṃpuṭaḥ || 92 ||
[Analyze grammar]

naṃdyuvāca |
devadeva trinayana kimapūrvaṃ bravīmi te |
mokṣalakṣmīvilāso'tra kaiścitkaiścitsamarcyate || 93 ||
[Analyze grammar]

atha smitvābravīcchaṃbhuḥ siddhaṃ nastu samīhitam |
utthāya devadeveśaḥ saha devyā sumaṃgalaḥ || 94 ||
[Analyze grammar]

brahmaṇā hariṇā sārdhaṃ tato'gādraṃgamaṃḍapam |
skaṃda uvāca |
śrutvādhyāyamimaṃ puṇyaṃ paramānaṃdakāraṇam |
naraḥ parāṃ mudaṃ prāpya kailāsaṃ prāpsyati dhruvam || 95 ||
[Analyze grammar]

iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍa uttarārdhe muktimaṃḍapagamanaṃ nāmāṣṭanavatitamo'dhyāyaḥ || 98 ||
[Analyze grammar]