Chapter 14

[English text for this chapter is available]

skanda uvāca |
brahmā prajeśvarāḥ śambhurmanavaśca maharṣayaḥ |
ādityavasurudrāśca siddhagandharvacāraṇāḥ || 1 ||
[Analyze grammar]

sādhyāśca marutaścaiva viśvedevā digīśvarāḥ |
dasrau vahniścandramāśca svayaṃ dharmaḥ prajāpatiḥ || 2 ||
[Analyze grammar]

suparṇaḥ kinnarāścaiva ye cānye gaṇadevatāḥ |
śepādyā vaiṣṇavā nāgā devapatnyaśca sarvaśaḥ || 3 ||
[Analyze grammar]

sāvitrī pārvatī caiva pṛthivī ca sarasvatī |
śacī gaurī śivā saṃjñā ṛddhiḥ svāhā ca rohiṇī |
dhūmorṇā cāditirddharmapatnyo mūrtidayādayaḥ || 4 ||
[Analyze grammar]

arundhatī śāṇḍilī ca lopāmudrā tathaiva ca |
anasūyādayaḥ sādhvya ṛpipatnyaśca sarvaśaḥ || 5 ||
[Analyze grammar]

gaṅgā sarasvatī revā yamunā tapatī tathā |
candrabhāgā vipāśā ca śatadrurdevikā tathā || 6 ||
[Analyze grammar]

godāvarī ca sarayūḥ kāverī kauśikī tathā |
kṛṣṇā veṇī bhīmarathā tāmraparṇī mahānadī || 7 ||
[Analyze grammar]

kṛtamālā vitastā ca nirvindhyā surasā tathā |
carmaṇvatī payoṣṇī ca viśvādyā nadya āyayuḥ || 8 ||
[Analyze grammar]

rambhā ghṛtācī viśvācī menakā ca tilottamā |
urvaśīpramukhāstatra sarvāpsarasa āyayuḥ || 9 ||
[Analyze grammar]

vaikuṇṭhavāsinaḥ sarve tathā golokavāsinaḥ |
pārṣadapravarā viṣṇostatrājagmuḥ praharṣitāḥ || 10 ||
[Analyze grammar]

aṇimādyāḥ siddhayo'ṣṭau śaṃkhapadmādayo nava |
nidhayo mūrtimantaśca samājagmuḥ śriyontike || 11 ||
[Analyze grammar]

pūrṇaḥ śāradacandropi tadānīṃ prītaye śriyāḥ |
naiśaṃ tamo'haratsarvaṃ babhūvurnirmalā diśaḥ || 12 ||
[Analyze grammar]

tato'bhiṣekamārebhe tasyā brahmājñayā vṛṣā |
maṇḍapaṃ racayāmāsa sadyastvaṣṭātiśobhanam || 13 ||
[Analyze grammar]

ratnastambhasahasrāṇāmāyatābhiśca paṃktibhiḥ |
citrairanekairullocaiḥ śobhitaṃ kadalīdrumaiḥ || 14 ||
[Analyze grammar]

sugandhipuṣpanamrābhirdivyakalpadrumālibhiḥ |
juṣṭaṃ nānāvidhairaṅgairdarśanīyaṃ manoharam || 15 ||
[Analyze grammar]

koṭiśo ratnadīpānāṃ paṃktibhiḥ śuddharociṣām |
bhrājamānaṃ toraṇaiśca muktāhāraiśca lambibhiḥ || 16 ||
[Analyze grammar]

ratnasiṃhāsane tatra gītavādyapurassaram |
upāveśya śriyaṃ cakrurabhiṣekaṃ maharṣayaḥ || 17 ||
[Analyze grammar]

airāvataḥ puṇḍarīko vāmanaḥ kumudoñjanaḥ |
puṣpadantaḥ sārvabhaumaḥ supratīkaśca diggajāḥ || 18 ||
[Analyze grammar]

kurvanto bṛṃhitānyete hemakumbhoddhṛtaiḥ śubhaiḥ |
catuḥsindhusamānītairabhyaṣiñcanta vāribhiḥ || 19 ||
[Analyze grammar]

mūrtimatyo mahānadyastatrājahurjalāni ca |
maṃtrānuccārayaṃti sma mūrtā vedāḥ saharṣibhiḥ || 20 ||
[Analyze grammar]

jaguḥ sukaṇṭhā gaṃdharvā nanṛtuścāpsarogaṇāḥ |
vādyāni vādayāmāsuranye devagaṇāstadā || 21 ||
[Analyze grammar]

mahānabhūttadānaṃdastrilokyāṃ sarvadehinām |
śrīsūktādi dvijāḥ peṭhurjagurgītāni ca striyaḥ || 22 ||
[Analyze grammar]

kāṃsyatālamṛdaṅgāṃśca paṇavānakagomukhān |
vādayāmāsurambhodā divi duṃdubhayo'nadan || 23 ||
[Analyze grammar]

āsītkusumavṛṣṭiśca sākaṃ jayaravaistadā |
āsaṃstatparicaryāyāṃ dharmapatnyaśca siddhayaḥ || 24 ||
[Analyze grammar]

susnātāyai tatastasyai kauśeye pītavāsasī |
dadāvanarghye jaladhī ratnabhūṣāśca bhūriśaḥ || 25 ||
[Analyze grammar]

upaveśocitaṃ tasyā iṃdra āsanamāharat |
viśvakarmā kaṅkaṇāni dadau sadratnamudrikāḥ || 26 ||
[Analyze grammar]

sudhākarastu tadbhrātā nāsābhūṣaṇamuttamam |
dadau tasyai keśabhūṣā sadratnanicitā tathā || 27 ||
[Analyze grammar]

padmajanmā dadau padmaṃ muktāhāraṃ sarasvatī |
nāgāśca śeṣapramukhāstasyai ratneṃdrakuṇḍale || 28 ||
[Analyze grammar]

añjanaṃ kuṅkumaṃ cādāddurgā sobhāgyalakṣaṇam |
lalāṭikāṃ ca sāvitrī śacī tāmbūlapātrikām || 29 ||
[Analyze grammar]

vasaṃtaḥ kausumānhārānkaṇṭhasūtraṃ ca śaṃkaraḥ |
vaijayaṃtīṃ srajaṃ pāśī kubero ratnadarpaṇam || 30 ||
[Analyze grammar]

anarghyāṃ kaṃcukīṃ vahniryamo'dādvyajanaṃ śubham |
dadustasyai cāparepi bhūṣāstatsamayocitāḥ || 31 ||
[Analyze grammar]

tataḥ svalaṃkṛtāṃ kanyāṃ kasmai dadyāmimāmiti |
siṃdhuḥ papraccha brahmāṇaṃ tadovāca sa sarvavit || 32 ||
[Analyze grammar]

kanyā taveyamambhodhe mātā mama śivasya ca |
devānāmatha sarveṣāṃ lokānāmasti niścitam || 33 ||
[Analyze grammar]

nārāyaṇaṃ vāsudevaṃ paraṃ brahmākhileśvaram |
puruṣottamamevaikaṃ vināsyā nāparaḥ patiḥ || 34 ||
[Analyze grammar]

ataḥ sākṣādbhagavate trailokyasukhahetave |
āgatāyopaviṣṭāya dehyasmai vidhināmbudhe || 35 ||
[Analyze grammar]

kuruṣva janmasāphalyaṃ pāvayitvā nijaṃ kulam |
samuddhara bhavāmbhodherdattvemāṃ paramātmane || 36 ||
[Analyze grammar]

ekastvaṃ saptabhī rūpaiḥ saptadvīpa vibhāgataḥ |
viśruto'tha vidhāyaitanmahatīṃ kīrttimāpsyasi || 37 ||
[Analyze grammar]

ityukto brahmaṇā hṛṣṭaḥ samudraḥ pulakāñcitaḥ |
manyamāno nijaṃ dhanyamaditsadviṣṇave sutām || 38 ||
[Analyze grammar]

tataḥ sahaiva vidhinā sa saṃprārthya tamīśvaram |
vāgdānādi vidhāyaiva cakre vaivāhikaṃ vidhim || 39 ||
[Analyze grammar]

dhanvaṃtariścandramāśca vāsavādyāśca devatāḥ |
āsansamudrasya pakṣe tatra vaivāhikotsave || 40 ||
[Analyze grammar]

vastrābharaṇayānādi dāne bhojanakarmaṇi |
sanmānane ca janyānāṃ mukhyā āsaṃsta eva hi || 41 ||
[Analyze grammar]

lakṣmyāśca māṃgalyavidhau mukhyāstatra tu yoṣitaḥ |
āsangaṃgādayo nadyaḥ śacyādyāśca surāṃganāḥ || 42 ||
[Analyze grammar]

menādyā nagapatnyaśca siddhayaścāṇimādayaḥ |
candrapatnī tathā kāntiḥ sarvāścāpsaraso mune || 43 ||
[Analyze grammar]

nārāyaṇasyātha vibhorlīlāṃ vaivāhikīṃ vidhiḥ |
śobhayanpitarau cakre mūrtidharmau vicārya ca || 44 ||
[Analyze grammar]

dharmo'sau jagadādhāra pūjyaścākhiladehinām |
pitā'sya bhavituṃ yogyo hyasmiṃśca prītimānbhṛśam || 45 ||
[Analyze grammar]

iyaṃ ca mūrttiḥ prakhyātā sarvasadguṇajanmabhūḥ |
dākṣāyaṇī dharmapatnī mātā bhavitumarhati || 46 ||
[Analyze grammar]

tato dharmasyāpi pakṣe mukhyāḥ kāryeṣvime'bhavan |
nandīśvaragaṇeśābhyāṃ sahitaḥ śaṃkaro mune || 47 ||
[Analyze grammar]

maharṣayo marīcyādyāḥ prajeśā nārado muniḥ |
vainateyaśca nandādyāḥ śrīdāmādyāśca pārṣadāḥ || 48 ||
[Analyze grammar]

durgā ca vedasūrvāṇī strīṣu mukhyā babhūvire |
ṛṣipatnyo'nasūyādyā dharmapatnyaśca sarvaśaḥ || 49 ||
[Analyze grammar]

saha vedādibhirbrahmā tvāsīdubhayapakṣayoḥ |
brāhmaṇā vaidikā ye ca vivāhavidhikovidāḥ || 50 ||
[Analyze grammar]

athābdhiḥ sarvasaṃbhārāñchriyā eva prasādataḥ |
sadyaḥ saṃpādayāmāsa janayandevavismayam || 51 ||
[Analyze grammar]

yadyatsaṃkalpayāmāsa hṛdi tattadupāhṛtam |
sadyaḥ svāṃtika evaikṣattatobhūdatiharṣitaḥ || 52 ||
[Analyze grammar]

madhye tu maṇḍapasyāsāvagnisthāpanavedikām |
kārayāmāsa vidhivadbrāhmaṇairvedavedibhiḥ || 53 ||
[Analyze grammar]

alaṃcakāra tāṃ vediṃ gandhapuṣpākṣatādibhiḥ |
nānāvidhaiḥ śubhai raṅgaiḥ sāṅkuraiḥ karakaistathā || 54 ||
[Analyze grammar]

tato mahāmaṅgalavādyaghoṣaiḥ samantrakaṃ saṃsnapito munīndraiḥ |
anarghyavāsāṃsi ca ratnabhūṣā dadhāra viṣṇurmukuṭaṃ ca divyam || 55 ||
[Analyze grammar]

vāditranidhvānanināditāśaṃ nṛtyatsurastrīkalagītaśobhanam |
taṃ maṇḍapaṃ so'tha suraiḥ stuvadbhiḥ sahetya haime niṣasāda pīṭhe || 56 ||
[Analyze grammar]

prakṣālayāmāsa tadaṅghripaṅkajaṃ svapreṣṭhapatnyā jaladhiḥ sagaṃgayā |
bhṛṅgārasiktottamavāridhārayā tadambu śīrṣṇā ca dadhāra sānvayaḥ || 57 ||
[Analyze grammar]

tataḥ paṭhanmaṃgalamuccakaiḥ śriyaṃ prādāpayaccāmbudhinā'cyutāya |
prajvālya vahniṃ vidhinā vidhātā sākaṃ bṛhadbhirmunibhirjuhāva || 58 ||
[Analyze grammar]

pradāya tasmai tanayāṃ manojñāṃ tatpādapadmaikanibaddhadṛṣṭim |
vāsāṃsi ratnābharaṇāni cādādbhūyāṃsi bhūmne sa samaṃ duhitrā || 59 ||
[Analyze grammar]

hutasya tasyā'tha hutāśanasya pradakṣiṇāṃ cāpi saha śriyaiva |
cakāra cetāṃsi nijekṣakāṇāṃ strīṇāṃ ca puṃsāṃ ca haranhariḥ saḥ || 60 ||
[Analyze grammar]

ekāsane tau saha sanniviṣṭau brahmāṇḍamātāpitarau manojñau |
saṃpūjayāmāsuranarghyavastravibhūṣaṇairdevagaṇāḥ sayoṣāḥ || 61 ||
[Analyze grammar]

tadā ca gītāni sumaṃgalāni śriyaśca viṣṇorguṇavarṇanāni |
durgādayaścā'tha pulomajādyā devyo jaguḥ sasmitacāruvaktrāḥ || 62 ||
[Analyze grammar]

dvidhā vibhaktāni surāṃganānāṃ vṛndānyupāviśya ca sammukhāni |
taddampatiprekṣaṇakautukāni tathā jaguḥ premabhareṇa tāni || 63 ||
[Analyze grammar]

yathā tadākarṇya surāḥ samastā maharṣayaścā'khilayoṣitopi |
svāṃtastamaikṣaṃta saha śriyeśaṃ sphuraṃtamāsannanu citravacca || 64 ||
[Analyze grammar]

praṇamya bhaktyā ca varākṣatādi samarpya tābhyāṃ vibudhā mudaiva |
pṛthakpṛthaktuṣṭuvurūrjitābhirvāgbhiśca tau prāñjalayo vinītāḥ || 65 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye lakṣmīnārāyaṇavivāhotsavanirūpaṇaṃ nāma caturdaśo'dhyāyaḥ || 14 ||
[Analyze grammar]