Chapter 13

[English text for this chapter is available]

skanda uvāca |
utprekṣanto jāyamānaṃ maṃthitāro'tha te'khilāḥ |
āyāṃtaṃ dadṛśurddūrādanti dhanvantariṃ śriyaḥ || 1 ||
[Analyze grammar]

sudhābhṛtaṃ hemakumbhaṃ dṛṣṭvā cā'sya kare dhṛtam |
asurāḥ sahasā brahmannutplutya jagṛhuśca tam || 2 ||
[Analyze grammar]

tatrāpi balino ye te gṛhītvā dudruvustataḥ |
tāndurbalā nyaṣedhanta nītivākyairanudrutāḥ || 3 ||
[Analyze grammar]

aho naivamadharmo vaḥ kāryo dharmaparāyaṇaiḥ |
samaśramebhyo devebhyo dattvā peyaṃ na cānyathā || 4 ||
[Analyze grammar]

anādṛtyeti tadvākyaṃ yayurdūraṃ tvarānvitāḥ |
tatrāpi teṣāmanyonyaṃ karākṛṣṭirmahatyabhūt || 5 ||
[Analyze grammar]

ahaṃ pūrvamahaṃ pūrvaṃ na tvaṃ na tvaṃ pibāmyaham |
itthaṃ vivadamānāste nāpustatprāśanakṣaṇam || 6 ||
[Analyze grammar]

atha devā mlānavaktrā dṛṣṭvā daityairhṛtā sudhām |
aśaktāstatpratīkāre śaraṇaṃ prāpuracyutam || 7 ||
[Analyze grammar]

pāhipāhi jagannātha naṣṭaṃ sarvasvameva naḥ |
daityairhṛtā sudhā sarvā kā gatirnno bhaviṣyati || 8 ||
[Analyze grammar]

sudhāpānādṛtepyete hantumasmānalaṃ kṣamāḥ |
pīte'mṛte tu tairadya kiṃ kariṣyāmahe vayam || 9 ||
[Analyze grammar]

skanda uvāca |
niśamya dainyaṃ devānāṃ bhagavānbhaktakāryakṛt |
mā bhaiṣṭeti surānuktvā sudhāmāditsadāsurāt || 10 ||
[Analyze grammar]

strīrūpamadbhutaṃ dhṛtvā sarvalokavimohanam |
daityāntikamupāgatya cakre kandukakhelanam || 11 ||
[Analyze grammar]

te tu tadrūpamālokya mohitāḥ kāmavihvalāḥ |
tyaktvā parasparonmarddaṃ tāmupetyābruvanvacaḥ || 12 ||
[Analyze grammar]

sudhākumbhamimaṃ bhadre gṛhītvā tvaṃ vibhajya naḥ |
sarvānpāyaya suśroṇi vayaṃ kaśyapasūnavaḥ || 13 ||
[Analyze grammar]

ityuktvā taṃ dadustasmai te'nicchantyā api striyai |
sā prāha mama viśrambho na kāryaḥ svairiṇī hyaham || 14 ||
[Analyze grammar]

akāryaṃ vaḥ kṛtaṃ hyetadvibhajiṣye nijecchayā |
ityuktā api te mūḍhā yatheṣṭaṃ kurviti bruvan || 15 ||
[Analyze grammar]

tatastadājñayā sarve devā daityāśca vāsukiḥ |
niṣeduḥ paṃktiśastatra svasvamaṇḍalamāśritāḥ || 16 ||
[Analyze grammar]

paṃktibaṃdhodyateṣveṣu mohinī sā tu dūrataḥ |
sammukhaṃ devapaṃktīnāṃ hemāsana upāviśat || 17 ||
[Analyze grammar]

svāṃtike cāmṛtaghaṭaṃ nidhāya straiṇalīlayā |
itastato vīkṣamāṇā tasthau niḥspṛhavatkṣaṇam || 18 ||
[Analyze grammar]

vipracittimukhāstarhi ye vai dānavayūthapāḥ |
saṃdigdhacittā mohinyāmāsandevāṃtikasthiteḥ || 19 ||
[Analyze grammar]

śanairupetya taddṛṣṭiṃ vañcayitvā sudhāghaṭam |
jahruḥ punardurātmāno raho gatvā pipāsavaḥ || 20 ||
[Analyze grammar]

naranārāyaṇau tatra munibhiḥ saha cāgatau |
āstāṃ tau dadṛśāte tāndānavānharato'mṛtam || 21 ||
[Analyze grammar]

nārāyaṇenerito'tha narastānsahasāruṇat |
balādācchidya tatkumbhaṃ mohinyai sa dadau drutam || 22 ||
[Analyze grammar]

tato naraṃ hantukāmā āttaśastrāstu dānavāḥ |
āpatanpaṃktivikṣepo hyasurāṇāmabhūnmahān || 23 ||
[Analyze grammar]

tadā naropi bhagavāndevadaityanarairapi |
ajeyo nirbhayo hyekaḥ sākaṃ tairyuyudhe balī || 24 ||
[Analyze grammar]

etasminnantare devānpaṃktisthānmohinīvapuḥ |
apāyayatsudhāṃ viṣṇuḥ sarvaśo laghucaṅkramaḥ || 25 ||
[Analyze grammar]

tatrāpi dānavo rāhuḥ sūryācandramasāntare |
praviśya devatāpaṃktāvupāviśadalakṣitaḥ || 26 ||
[Analyze grammar]

tatrāgatāyāṃ mohinyāṃ siñcantyāṃ tanmukhe sudhām |
dṛśā'sūsucatāṃ tasyai puṣpavantāvubhau ca tam || 27 ||
[Analyze grammar]

smṛtyāgatena cakreṇa tarhyevā'sya ca sāmṛtam |
śiraścicchedātimahanmāyāyoṣidvapuḥ prabhuḥ || 28 ||
[Analyze grammar]

tacchailaśṛṅgapratimaṃ grasallokānnadadbhṛśam |
grahatve sthāpayāmāsa lokānāṃ śāntaye hariḥ || 29 ||
[Analyze grammar]

devānsudhāṃ pāyayitvā jagṛhe pauruṣīṃ tanum |
bhagavānatha devāstu yuyudhuḥ saha dānavaiḥ || 30 ||
[Analyze grammar]

udanvatastaṭe yuddhaṃ devānāmasuraiḥ saha |
sudhāpānātibalināmāsīdviṣṇusahāyinām || 31 ||
[Analyze grammar]

tasmiṃstu tumule yuddhe nareṇendrādibhiśca te |
nihanyamānā asurāḥ palāyya viviśū rasām || 32 ||
[Analyze grammar]

sūryaścāstaṃ gatastāvatsarve devagaṇāstataḥ |
śriyontikamupājagmustaddarśanamahotsavāḥ || 33 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye devatāmṛtapānavarṇanaṃ nāma trayodaśo'dhyāyaḥ || 13 ||
[Analyze grammar]