Chapter 32

[English text for this chapter is available]

atha nadyutpādanāyāgastvaṃ prati aśarīryuktiḥ |
bharadvāja uvāca |
sa kadācinmunivaraḥ kṛtapaurvāhnikakriyaḥ |
viveśa devatāgāraṃ samārādhayituṃ śivam || 1 ||
[Analyze grammar]

adṛśyarūpā vāgdevī tatrāśrāvi mahātmanā |
tenādbhutopapannena vyaktavarṇasamujjvalā || 2 ||
[Analyze grammar]

ākāśavāṇyuvācainamagastyaṃ japatāṃ varam |
nadīhīno hyayaṃ deśaḥ prasiddho'pi na śobhate || 3 ||
[Analyze grammar]

jñānavijñānavimukhaḥ sākāra iva bhūsuraḥ |
dīkṣeva dakṣiṇāhīnā jyotsnāhīneva śarvarī || 4 ||
[Analyze grammar]

na vibhāti nadīhīnā pṛthvīyaṃ bhūsurottama |
pravartaya nadīṃ kāñcillokānāṃ hitakāmyayā || 5 ||
[Analyze grammar]

agādhaduritodbhūtabhītimocanaśālinīm |
hitametatsuraughānāmetanmunivarārthitam || 6 ||
[Analyze grammar]

bhadrametanmanuṣyāṇāmetadācara suvrata |
devānāmṛṣivaryāṇāṃ bhūjanānāṃ hitāvahām || 7 ||
[Analyze grammar]

pāpapaṃkapraśamanīṃ pravartaya mahānadīm || 8 ||
[Analyze grammar]

śrībharadvāja uvāca |
tadākarṇya vaco vipraḥ kṣaṇaṃ cintāparāyaṇaḥ |
samāpya devatāpūjāṃ bahirvedyāmupāviśat || 9 ||
[Analyze grammar]

ānāyayāmāsa tadā tadāśramagatānmunīn |
teṣāmakathayaccāsau divyavāṇīritaṃ vacaḥ || 10 ||
[Analyze grammar]

tadadbhutamupaśrutya munayo hṛṣṭamānasāḥ || 11 ||
[Analyze grammar]

abhivandya muniśreṣṭhaṃ maitrāvaruṇimabruvan || 12 ||
[Analyze grammar]

atha suvarṇamukharyutpādanāyāgastyaṃ prati maharṣiprārthanā |
munaya ūcuḥ |
āścaryāṇāṃ mahāścaryaṃ maṃgalānāṃ ca maṃgalam |
tavaiva śobhate divyaṃ tvaccaritraṃ kṛpānidhe || 13 ||
[Analyze grammar]

tava huṃkāramātreṇa bhraṣṭo devādhirājyataḥ |
nahuṣaḥ kīṭatāṃ prāpa tataścitraṃ na vidyate || 14 ||
[Analyze grammar]

samāvṛtadharācakraḥ kallolātāḍitāmbaraḥ |
kiṃ nvato vidyate citraṃ yadabdhiśculakīkṛtaḥ || 15 ||
[Analyze grammar]

sūryamārganirodhārthaṃ pravṛtto vindhyabhūdharaḥ |
tvayā praśāṃtiṃ gamitaḥ kiṃ nvato vidyate param || 16 ||
[Analyze grammar]

tavādbhutāni karmāṇi kaḥ stotuṃ prabhavedbhuvi |
manmahābhāgyayogāttvaṃ prāpto'sīti śarīritām || 17 ||
[Analyze grammar]

vayaṃ kṛtārthāḥ saṃjātāstrailokye yanmahāmune |
nivasāmo'tra bhavatā sanāthā hyāśramasthale || 18 ||
[Analyze grammar]

varṇyo hi yāmyato dūre viṣayo'yaṃ dvijottama |
samastavastupūrṇopi nadīhīno na rājate || 19 ||
[Analyze grammar]

kimalabdhanadīsnānenā'munā hatajanmanā |
anadīke janapade vāsādajananaṃ varam || 20 ||
[Analyze grammar]

paripākastu bhāgyānāmasmākaṃ samupasthitaḥ |
yadādiṣṭosi vibudhaiḥ pravartaya mahānadīm || 21 ||
[Analyze grammar]

pravartitāyāṃ deśesminmahānadyāṃ tavānagha |
kadā nu khalu yāsyāmaḥ kṛtasnānā kṛtārthatām || 22 ||
[Analyze grammar]

kiṃ vitarkeṇa bahunā prayatnaḥ kriyatāṃ dhuvam |
samānetuṃ jagadvandyāṃ śaraṇyāṃ sariduttamām || 23 ||
[Analyze grammar]

śrībharadvāja uvāca |
sa teṣāṃ vacanaṃ hṛdyaṃ mānayitvā mahādvijaḥ |
samāneṣyāmi saritamiti cakre viniścayam || 24 ||
[Analyze grammar]

atha suvarṇamukharyāvirbhāvāyāgastyakṛtatapaḥprakāraḥ |
munīśvarairanujñātastānabhyarcya surānapi |
viśeṣapūjāṃ vidhivadvidhāya puravidviṣaḥ || 25 ||
[Analyze grammar]

aṃgīkṛtya vrataṃ gāḍhaṃ bahulakleśaduḥsaham |
ananyasulabhaṃ yatnātsa cakāra mahattapaḥ || 26 ||
[Analyze grammar]

ghoreṣu gharmadivaseṣvantarastho havirbhujām |
caturṇāṃ savitṛnyastadṛṣṭirnāpayayau klamam || 27 ||
[Analyze grammar]

vārṣikeṣu dineṣūgravāyusampātaduḥsahaiḥ |
āsāraistāḍyamāno'pi nodvegamagamaddhṛdi || 28 ||
[Analyze grammar]

hemante samaye tiṣṭhankaṇṭhadaghneṣu vāriṣu |
japadhyānaparo bhūtvā na kiñcidvikṛtiṃ yayau || 29 ||
[Analyze grammar]

tataḥ samīhitārthasya vilambamavalokya saḥ |
punargāḍhatarāṃ niṣṭhāṃ prapede lokabhīṣaṇām || 30 ||
[Analyze grammar]

nigṛhya mānasīṃ vṛttiṃ nirāhāro jitendriyaḥ |
avijñātabahirvṛttistasthau pāṣāṇavattadā || 31 ||
[Analyze grammar]

evaṃ tapasyatastasya sarvāṅgeṣu hutāśanaḥ |
abhraṃliho jvalajjyotirniścakrāma bhayaṅkaraḥ || 32 ||
[Analyze grammar]

tato'dbhutaśikhājālairāvṛtāḥ sarvato diśaḥ |
samudagrabhayodvignā janaughāḥ paricukruśuḥ || 33 ||
[Analyze grammar]

tadā tathāvidhaṃ ghoraṃ jagatsaṃkṣobhamāgatam |
devā vijñāpayāmāsurnamaskṛtyābjajanmane || 34 ||
[Analyze grammar]

athāgastyāśramaṃ prati caturmukhāgamanam |
tānāśvāsya tato brahmā siddhagandharvasevitaḥ |
prādurāsītkumbhabhuvaḥ purobhāge tapasyataḥ || 35 ||
[Analyze grammar]

tamāgataṃ samālokya brahmāṇaṃ paramaṃ dvijaḥ |
praṇamya vividhaiḥ stotraistoṣayāmāsa tanmanāḥ || 36 ||
[Analyze grammar]

tatastaṃ vinayānamramagastyaṃ vīkṣya padmabhūḥ |
prasādasumukho bhūtvā pūtāṃ giramupādade || 37 ||
[Analyze grammar]

brahmovāca |
parituṣṭo'smi tapasā duścareṇa tavānagha |
vṛṇīṣva yadyadiṣṭaṃ te tattaddāsyāmi suvrata || 38 ||
[Analyze grammar]

agastya uvāca |
tava prasādātsakalamupapannaṃ mama prabho |
saṃprayacchasi cetkāmaṃ yāce niḥśaṃkayā dhiyā || 39 ||
[Analyze grammar]

nadīhīnamimaṃ deśaṃ dṛṣṭvā khidyati me manaḥ |
arthāvavodharahitaṃ śrutipāṭhamivādhikam || 40 ||
[Analyze grammar]

urvīṃ pāvayituṃ dakṣāṃ rakṣituṃ ca mahānadīm |
prasādaṃ kuru deveśa mameṣṭamidameva hi || 41 ||
[Analyze grammar]

athāgastyaprārthanayā gaṅgāṃ prati caturmukhacodanā |
śrībharadvāja uvāca |
agastyasya vacaḥ śrutvā bhūyādevamiti bruvan |
sasmāra manasā brahmā suravartmāśrayāṃ nadīm || 42 ||
[Analyze grammar]

athopetya viyadgaṃgā purastātparameṣṭhinaḥ |
atiṣṭhanmukuṭanyastapraśastāñjalibhāsurā || 43 ||
[Analyze grammar]

svaśāsanātsamāyātāṃ vinayānatamastakām |
tāṃ sarvajagatāṃ dhātrīmidaṃ vacanamabravīt || 44 ||
[Analyze grammar]

brahmovāca |
gaṃge mayānuśāsyāsi kārye lokopakārake |
tavāpi lokarakṣāyāṃ mameva niyatā sthitiḥ || 45 ||
[Analyze grammar]

deśe nadīvihīne'tra pravartayitumāpagām |
hitārthaṃ sarvalokānāṃ kumbhajanmā samīhate || 46 ||
[Analyze grammar]

tasmāttvamavatīryorvīṃ svāṃśenaikena bhūjanān |
punīhi gaccha vasudhāmetaddarśitavartmanā || 47 ||
[Analyze grammar]

bhūloke saṃpravṛtte tu pravāhe siddhikāṃkṣiṇaḥ |
seviṣyante suravarā munivaryāśca saṃtatam || 48 ||
[Analyze grammar]

nadīṣūttamatāṃ yāhi trāhi tvatsaṃśrayāñjanān |
kuru priyamagastyasya gaccha bhadre yathāsukham || 49 ||
[Analyze grammar]

bharadvāja uvāca |
ityuktvāntardadhe brahmā tayā nadyā ca tena ca |
praṇāmapūjanastotrairviśeṣairabhinanditaḥ || 50 ||
[Analyze grammar]

athāgastyasamīpe svāṃśatvena gaṃgākṛtanadyutpattyabhyupagamaḥ |
atha gaṃgā munipateḥ purastātsvāṃśasaṃbhavām |
divyatejomayīṃ mūrtiṃ darśayitvā vaco'bravīt || 51 ||
[Analyze grammar]

gaṃgovāca |
madīyāṃśo'yamavanīṃ saṃprāpya munivallabha |
pūrayiṣyati te'bhīṣṭaṃ nadīrūpaṃ samāśritaḥ || 52 ||
[Analyze grammar]

bharadvāja uvāca |
ityuktvā siddhavāhinyāṃ gatāyāṃ tatprayuktayā |
gantavyaṃ vartmanā kenetyukto muniruvāca tām || 53 ||
[Analyze grammar]

agastya uvāca |
gacchanpurastātkalyāṇi tvadīyagamanocitam |
ahaṃ pradarśayiṣyāmi mārgaṃ tvaṃ māmanuvraja || 54 ||
[Analyze grammar]

ityuktā muninā tena saṃprahṛṣṭā tavānagha |
yadiṣṭaṃ tatkariṣye'hamiti provāca sā śubhā || 55 ||
[Analyze grammar]

atha muniravatārya tāṃ nagendrāddhṛtataṭinītanumabhrasaṃgiśṛṅgāt |
muditataramanā yayau purastāttadabhimatāṃ padavīṃ pradarśayansaḥ || 56 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye śrīsuvarṇamukharīmāhātmyapraśaṃsāyāṃ suvarṇamukharyāvirbhāvavarṇanaṃnāma dvātriṃśo'dhyāyaḥ || 32 ||
[Analyze grammar]