Chapter 1

[English text for this chapter is available]

atha śrīskānde mahāpurāṇe prathamaṃ māheśvarakhaṇḍaṃ prārabhyate |
śrīgaṇeśāya namaḥ |
oṃnamo bhagavate vāsudevāya |
oṃnārāyaṇaṃ namaskṛtya naraṃ caiva narottamam |
devīṃ sarasvatī caiva tato jayamudīrayet || 1 ||
[Analyze grammar]

vyāsa uvāca |
yasyājñayā jagatsraṣṭāviriṃciḥ pālako hariḥ |
saṃhartā kālarudrākhyo namastasmai pinākine || 1 ||
[Analyze grammar]

tīrthānāmuttamaṃ tīrthaṃ kṣetrāṇāṃ kṣetramuttamam |
tatraiva naimiṣāraṇye saunakādyāstapodhanāḥ |
dīrghasatraṃ prakurvaṃtaḥ satriṇaḥ karmacetasaḥ || 2 ||
[Analyze grammar]

teṣāṃ sadarśanautsukyādāgato hi mahātapāḥ |
vyāsaśiṣyo mahāprājño lomaśonāma nāmataḥ || 3 ||
[Analyze grammar]

tatrāgataṃ te dadṛśurmunayo dīrghasatriṇaḥ |
uttasthuryugapatsarve sārghyahastāḥ samutsukāḥ || 4 ||
[Analyze grammar]

dattvārghyapādyaṃ satkṛtya munayo vītakalmaṣāḥ |
taṃ papracchurmahābhāgāḥ śivadharmaṃ savistaram || 5 ||
[Analyze grammar]

ṛṣaya ūcuḥ |
kathayasva mahāprājña devadevasya śūlinaḥ |
mahimānaṃ mahābhāga dhyānārcanasamanvitam || 6 ||
[Analyze grammar]

saṃmārjane kiṃ phalaṃ syāttathā raṃgāvalīṣu ca |
pradāne darpaṇasyātha tathā vai cāmarasya ca || 7 ||
[Analyze grammar]

pradāne ca vitānasya tathā dhārāgṛhasya ca |
dīpadāne kiṃ phalaṃ syātpūjāyāṃ kiṃ phalaṃ bhavet || 8 ||
[Analyze grammar]

kānikāni ca puṇyāni kathyatāṃ śivapūjane |
itihāsapurāṇāni vedādhyayanameva ca || 9 ||
[Analyze grammar]

śivasyāgre prakurvaṃti kārayantyatha vā narāḥ |
kiṃ phalaṃ ca nṛṇāṃ teṣāṃ kathyatāṃ vistareṇa hi || 10 ||
[Analyze grammar]

śivākhyānaparoloke tvatto nānyo'sti vai mune || 11 ||
[Analyze grammar]

iti śrutvā vacasteṣāṃ munīnāṃ bhāvitātmanām |
uvāca vyāsaśiṣyo'sau śivamāhātmyamuttamam || 12 ||
[Analyze grammar]

lomaśa uvāca |
aṣṭādaśapurāṇeṣu gīyate vai paraḥ śivaḥ |
tasmācchivasya māhātmyaṃ vaktuṃ ko'pi na pāryate || 13 ||
[Analyze grammar]

śiveti dvyakṣaraṃ nāma vyāhariiṣyaṃti ye janāḥ |
teṣāṃ svargaśca mokṣaśca bhaviṣyati na cānyathā || 14 ||
[Analyze grammar]

udāro hi mahādevo devānāṃ patiriśvaraḥ |
yena sarvaṃ pradattaṃ hi tasmātsarva iti smṛtaḥ || 15 ||
[Analyze grammar]

te dhanyāste mahātmāno ye bhajaṃti sadā śivam || 16 ||
[Analyze grammar]

vinā sadāśivaṃ yohi saṃsāraṃ tartumicchati |
sa mūḍho hi mahāpāpaḥ śivadveṣī na saṃśayaḥ || 17 ||
[Analyze grammar]

bhakṣitaṃ hi garaṃ yena dakṣayajño vināśitaḥ |
kālasya dahanaṃ yena kṛtaṃ rājñaḥ pramocanam || 18 ||
[Analyze grammar]

ṛṣaya ūcuḥ |
yathā garaṃ bhakṣitaṃ ca yathā yajño vināśitaḥ |
dakṣasya ca tathā brūhi paraṃ kautūhalaṃ hi naḥ || 19 ||
[Analyze grammar]

sūta uvāca |
dākṣāyaṇī purā dattā śaṃkarāya mahātmane |
vacanādbrahmaṇo viprā dakṣeṇa parameṣṭhinaḥ || 20 ||
[Analyze grammar]

ekadā hi sa dakṣo vai naimiṣāraṇyamāgataḥ |
yadṛcchāvaśamāpanna ṛṣibhiḥ paripūjitaḥ || 21 ||
[Analyze grammar]

stutibhiḥ praṇipātaiśca tathā sarvaiḥ surāsuraiḥ |
tatra sthito mahādevo nābhyutthānābhivādane |
cakārāsya tataḥ kruddho dakṣo vacanabravīt || 22 ||
[Analyze grammar]

sarvatra sarve hi surāsurā bhṛśaṃ namaṃti māṃ vipravarāḥ samutsukāḥ |
kathaṃ hyasau durjanavanmahātmā bhūtādibhiḥ pretapiśācayuktaḥ |
śmaśānavāsī nirapatrapo hyayaṃ kathaṃ praṇāmaṃ na karoti me'dhunā || 23 ||
[Analyze grammar]

pākhaṃḍino durjanāḥ pāpaśīlā vipraṃ dṛṣṭvā coddhatā unmadāśca |
vadhyāstyājyāḥ sadbhirevaṃvidhā hi tasmādenaṃ śāpituṃ codyato'smi || 24 ||
[Analyze grammar]

ityevamuktvā sa mahātapāstadā ruṣānvito rudramidaṃ babhāṣe || 25 ||
[Analyze grammar]

śrṛṇvaṃtvamī vipratamā idānīṃ vaco hi me kartumihārhathaitat |
rudro hyayaṃ yajñabāhyo vṛto me varṇātīto varṇaparo yataśca || 26 ||
[Analyze grammar]

naṃdī niśamya tadvākyaṃ śailādo hi ruṣānvitaḥ |
abravīttvarito dakṣaṃ śāpadaṃ taṃ mahāprabham || 27 ||
[Analyze grammar]

nandyuvāca |
yajñabāhyo hi me svāmī maheśo'yaṃ kṛtaḥ katham |
yasya smaraṇamātreṇa yajñāśca saphalā hyamī || 28 ||
[Analyze grammar]

yajño dānaṃ tapaścaiva tīrthāni vividhāni ca |
yasya nāmnā pavitrāṇi soyaṃ śapto'dhunā katham || 29 ||
[Analyze grammar]

vṛthā te brahmacāpalyācchapto'yaṃ dakṣa durmate |
yenedaṃ pālitaṃ viśvaṃ sarveṇa ca mahātmanā |
śapto'yaṃ sa kathaṃ pāpa rudro'yaṃ brāhmaṇādhama || 30 ||
[Analyze grammar]

evaṃ nirbhārtsitastena naṃdinā hi prajāpatiḥ |
naṃdinaṃ ca śaśāpātha dakṣo roṣasamanvitaḥ || 31 ||
[Analyze grammar]

yūyaṃ sarve rudravarā vedabāhyāśca vai bhṛśam |
śaptāhi vedamārgaiśca tathā tyaktā maharṣibhiḥ || 32 ||
[Analyze grammar]

pāṣaṃḍavādasaṃyuktāḥ śiṣṭa'cārabahiṣkṛtāḥ |
kapālinaḥ pānaratāstathā kālamukhā hyamī || 33 ||
[Analyze grammar]

iti śaptāstadā tena dakṣeṇa śivakiṃkarāḥ |
tadā prakupito naṃdī dakṣaṃ śaptuṃ pracakrame || 34 ||
[Analyze grammar]

śaptā vayaṃ tvayā vipra sādhavaḥ śivakiṃkarāḥ |
vṛthaiva brahmacāpalyādahaṃ śāpaṃ dadāmi te || 35 ||
[Analyze grammar]

vedavādaratā yūyaṃ nānyadastītivādinaḥ |
kāmātmānaḥ svargaparā lobhamohasamanvitāḥ || 36 ||
[Analyze grammar]

vaidikaṃ ca puraskṛtya brāhmaṇāḥ śūdrayājakāḥ |
daridriṇo bhaviṣyaṃti pratigraharatāḥ sadā || 37 ||
[Analyze grammar]

dakṣa kecidbhaviṣyanti brāhmaṇā brahmarākṣasāḥ |
lomaśa uvāca |
viprāste śapitāstena naṃdinā kopinā bhṛśam || 38 ||
[Analyze grammar]

athākarṇyeśvaro vākyaṃ naṃdinaḥ prahasanniva |
uvāca vākyaṃ madhuraṃ bodhayayuktaṃ sadāśivaḥ || 39 ||
[Analyze grammar]

mahādeva uvāca |
kopaṃ nārhasi vai kartuṃ brāhmaṇānprati vai sadā |
brāhmaṇāguravo hyete vedavādaratāḥ sadā || 40 ||
[Analyze grammar]

vedo maṃtramayaḥ sākṣāttathā sūktamayo bhṛśam |
sūkte pratiṣṭhito hyātmā sarveṣāmapi dehinām || 41 ||
[Analyze grammar]

tasmānnātmavido nindyā ātmaivāhaṃ na cetaraḥ |
ko'yaṃ kastvaṃ kva cāhaṃ vai kasmācchaptā hi vai dvijāḥ || 42 ||
[Analyze grammar]

prapaṃcaracanāṃ hitvā buddho bhava mahāmate |
tattvajñānena nirvartya svasthaḥ krodhādivarjitaḥ || 43 ||
[Analyze grammar]

evaṃ prabodhitastena śaṃbhunā parameṣṭhinā |
vivekaparamo bhūtvā śailādo hi mahātapāḥ |
śivena saha saṃgamya paramānaṃdasaṃplutaḥ || 44 ||
[Analyze grammar]

dakṣopi hi ruṣā'viṣṭaṛṣibhiḥ parivāritaḥ |
yayau sthānaṃ svakaṃ tatra praviveśa ruṣā'nvitaḥ || 45 ||
[Analyze grammar]

śraddhāṃ vihāya paramāṃ śivapūjakānāṃ niṃdāparaḥ sa hi babhūva narādhamaśca |
sarvairmaharṣibhirupetya sa tatra śarvaṃ devaṃ nininda na babhūva kadāpi śāntaḥ || 46 ||
[Analyze grammar]