Chapter 17

[English text for this chapter is available]

vāmadeva uvāca |
niyatyadhastātprakṛteruparisthaḥ pumāniti |
pūrvatra bhavatā proktamidānīṃ kathamanyathā || 1 ||
[Analyze grammar]

māyayā saṃkucadrūpastadadhastāditi prabho |
iti me saṃśayaṃ nātha chettumarhasi tattvataḥ || 2 ||
[Analyze grammar]

śrīsubahmaṇya uvāca |
advaitaśaivavādo'yaṃ dvaitanna sahate kvacit |
dvaitaṃ ca naśvaraṃ brahmādvaitamparamanaśvaram || 3 ||
[Analyze grammar]

sarvajñassarvakartā ca śivassarveśvaro'guṇaḥ |
tridevajanako brahmā saccidānandavigrahaḥ || 4 ||
[Analyze grammar]

sa eva śaṃkaro devassvecchayā ca svamāyayā |
saṃkucadrūpa iva sanpuruṣassaṃbabhūva ha || 5 ||
[Analyze grammar]

kalādi pañcakenaiva bhoktṛtvena prakalpitaḥ |
prakṛtisthaḥ pumāneṣa bhuṅkte prakṛtijānguṇān || 6 ||
[Analyze grammar]

iti sthānadvayāntasthaḥ puruṣo na virodhakaḥ |
saṃkucannijarūpāṇāṃ jñānādīnāṃ samaṣṭimān || 7 ||
[Analyze grammar]

sattvādiguṇasādhyaṃ ca budhyāditritayātmakam |
cittamprakṛtitattvaṃ tadāsītsattvādikāraṇāt || 8 ||
[Analyze grammar]

sāttvikādivibhedena guṇāḥ prakṛtisambhavāḥ |
guṇebhyo buddhirutpannā vastuniścayakāriṇī || 9 ||
[Analyze grammar]

tato mahānahaṅkārastato buddhīndriyāṇi ca |
jātāni manaso rūpaṃ syātsaṃkalpavikalpakam || 10 ||
[Analyze grammar]

buddhīndriyāṇi śrotraṃ tvak cakṣurjihvā ca nāsikā |
śabdaḥ sparśaśca rūpaṃ ca raso gandhaśca gocaraḥ || 11 ||
[Analyze grammar]

buddhīndriyāṇāṃ kathitaḥ śrotrādikramatastataḥ |
vaikārikādahaṃkārāttanmātrāṇyabhavankramāt || 12 ||
[Analyze grammar]

tāni proktāni sūkṣmāṇi munibhi stattvadarśibhiḥ |
karmendriyāṇi jñeyāni svakāryyasahitāni ca || 13 ||
[Analyze grammar]

viprarṣe vākkarau pādau pāyūpasthau ca tatkriyāḥ |
vacanādānagamanavisarggānandasaṃjñitāḥ || 14 ||
[Analyze grammar]

bhūtādikādahaṃkārāttanmātrāṇyabhavankramāt |
tāni sūkṣmāṇi rūpāṇī śabdādīnāmiti sthitiḥ || 15 ||
[Analyze grammar]

tebhyaścākāśavāyvagnijalabhūmijaniḥ kramāt |
vijñeyā muniśārdūla pañcabhūtamitīṣyate || 16 ||
[Analyze grammar]

avakāśapradānaṃ ca vāhakatvañca pāvanam |
saṃrambho dhāranteṣāṃ vyāpārāḥ parikīrtitāḥ || 17 ||
[Analyze grammar]

vāmadeva uvāca |
bhūtasṛṣṭiḥ purā proktā kalādibhyaḥ kathampunaḥ |
anyathā procyate skanda saṃdeho'tra mahānmama || 18 ||
[Analyze grammar]

ātmatattvamakārassyādvidyā syādustataḥ param |
śivatattvammakārassyādvāmadeveti ciṃtyatām || 19 ||
[Analyze grammar]

bindunādau tu vijñeyau sarvatattvārthakāvubhau |
tatratyā devatāyāśca tā mune śṛṇu sāmpratam || 20 ||
[Analyze grammar]

brahmā viṣṇuśca rudraśca maheśvarasadāśivau |
te hi sākṣācchivasyaiva mūrtayaḥ śrutiviśrutāḥ || 21 ||
[Analyze grammar]

ityuktambhavatā pūrvamidānīmucyate'nyathā |
tanmātrebhyo bhavantīti sandeho'tra mahānmama || 22 ||
[Analyze grammar]

kṛtvā tatkaruṇāṃ skanda saṃśayaṃ chettumarhasi |
ityākarṇya munervākyaṃ kumāraḥ pratyabhāṣata || 23 ||
[Analyze grammar]

śrīsubrahmaṇya uvāca |
tasmādveti samārabhya bhūtasṛṣṭikrame mune |
tāñchṛṇuṣva mahāprājña sāvadhānatayā da rāt || 24 ||
[Analyze grammar]

jātāni pañca bhūtāni kalābhya iti niścitam |
sthūlaprapañcarūpāṇi tāni bhūtapatervapuḥ || 25 ||
[Analyze grammar]

śivatattvādi pṛthvyantaṃ tattvānāmudayakrame |
tanmātrebhyo bhavantīti vaktavyāni kramānmune || 26 ||
[Analyze grammar]

tanmātrāṇāṃ kalānāmapyaikyaṃ syādbhūtakāraṇam |
aviruddhatva mevātra viddhi brahmāvidāṃvara || 27 ||
[Analyze grammar]

sthūlasūkṣmātmake viśve candrasūryyādayo grahāḥ |
sanakṣatrāśca saṃjātāstathānye jyotiṣāṃ gaṇāḥ || 28 ||
[Analyze grammar]

brahmaviṣṇumaheśādidevatā bhūtajātayaḥ |
indrādayo'pi dikpālā devāśca pitaro'surāḥ || 29 ||
[Analyze grammar]

rākṣasā mānuṣāścānye jaṃgamatvavibhāginaḥ |
paśavaḥ pakṣiṇaḥ kīṭāḥ pannagādi prabhedinaḥ || 30 ||
[Analyze grammar]

tarugulmalatauṣadhyaḥ parvatāścāṣṭa viśrutāḥ |
gaṃgādyāssaritassapta sāgarāśca maharddhayaḥ || 31 ||
[Analyze grammar]

yatkiṃcidvastujātantatsarvamatra pratiṣṭhitam |
vicāraṇīyaṃ sadbudhyā na bahirmunisattama || 32 ||
[Analyze grammar]

strīpuṃrūpamidaṃ viśvaṃ śivaśaktyātmakaṃ budhaiḥ |
bhavādṛśairupāsyaṃ syācchivajñānaviśāradaiḥ || 33 ||
[Analyze grammar]

sarvaṃ brahmetyupāsīta sarvaṃ vai rudra ityapi |
śrutirāha mune tasmātprapañcātmā sadāśivaḥ || 34 ||
[Analyze grammar]

aṣṭatriṃśatkalānyāsasāmarthyādvaitabhāvanā |
sadāśivo'hameveti bhāvi tātmā guruḥ śivaḥ || 35 ||
[Analyze grammar]

evaṃ vicārī sacchiṣyo gurussyātsa śivassvayam |
prapañcadevatāyaṃtramaṃtrātmā na hi saṃśayaḥ || 36 ||
[Analyze grammar]

ācāryya rūpayā vipra saṃchinnākhilabandhanaḥ |
śiśuḥ śivapadāsakto gurvātmā bhavati dhuvam || 37 ||
[Analyze grammar]

yadasti vastu tatsarvaṃ guṇa prādhānyayogataḥ |
samastaṃ vyastamapi ca praṇavārthampracakṣate || 38 ||
[Analyze grammar]

rāgādidoṣarahitaṃ vedasāraḥ śivo diśaḥ |
tubhyamme kathitamprītyā'dvaitajñānaṃ śivapriyam || 39 ||
[Analyze grammar]

yo hyanyathaitanmanute madvaco madagarvitaḥ |
devo vā mānavassiddho gandharvo manujo'pi vā || 40 ||
[Analyze grammar]

durātmanastasya śiraśchiṃdyāṃ samatayāddhruvam |
sacchaktyā ripukālāgnikalpayā na hi saṃśayaḥ || 41 ||
[Analyze grammar]

bhavāneva mune sākṣācchivādvaitavidāṃvaraḥ |
śivajñānopadeśe hi śivācārapradarśakaḥ || 42 ||
[Analyze grammar]

yaddehabhasmasamparkātsaṃchinnāghavrajo'śuciḥ |
mahāpiśācaḥ samprāpya tvatkṛpātassatāṃ gatim || 43 ||
[Analyze grammar]

śivayogīti saṃkhyātatriloka vibhavo bhavān |
bhavatkaṭākṣasamparkātpaśu paśupatirbhavet || 44 ||
[Analyze grammar]

tava tasya mayi prekṣā lokāśikṣārthamādarāt |
lokopakārakaraṇe vicarantīha sādhavaḥ || 45 ||
[Analyze grammar]

idaṃ rahasyamparamaṃ pratiṣṭhitamatastvayi |
tvamapi śraddhayā bhaktyā praṇaveṣveva sādaram || 46 ||
[Analyze grammar]

upaviśya ca tānsarvānsaṃyojya parameśvare |
śivācāraṃ grāhayasva bhūtirudrākṣamiśritam || 47 ||
[Analyze grammar]

tvaṃ śivo hi śivācārī samprāptādvaitabhāvataḥ |
vicaraṃlokarakṣāyai sukhamakṣayamāpnuhi || 48 ||
[Analyze grammar]

|| sūta uvāca |
śrutvedamadbhutamataṃ hi ṣaḍānanoktaṃ vedāntaniṣṭhitamṛṣistu vinamramūrttiḥ |
bhūtvā praṇamya bahuśo bhuvi daṇḍavattatpādāravindaviharanmadhupatvamāpa || 49 ||
[Analyze grammar]

iti śrīśivamahāpurāṇe ṣaṣṭhyāṃ kailāsasaṃhitāyāṃ śivādvaitajñānakathanādi sṛṣṭikathanaṃ nāma saptadaśo'dhyāyaḥ || 17 ||
[Analyze grammar]