Chapter 18

[English text for this chapter is available]

|| śaunaka uvāca |
śrutvā vedāntasāraṃ tadrahasyamparamādbhutam |
kimpṛṣṭavānvāmadevo maheśvarasutaṃ tadā || 1 ||
[Analyze grammar]

dhanyo yogī vāmadevaḥ śivajñānaratassadā |
yatssambandhātkathotpannā divyā paramapāvanī || 2 ||
[Analyze grammar]

iti śrutvā munīnāntadvacanampremagarbhitam |
sūtaḥ prāha prasannastāñchivāsaktamanā budhaḥ || 3 ||
[Analyze grammar]

sūta uvāca |
dhanyā yūyaṃ mahādevabhaktā lokopakārakāḥ |
śṛṇudhvammunayassarve saṃvādaṃ ca tayoḥ punaḥ || 4 ||
[Analyze grammar]

śrutvā maheśatanayavacanaṃ dvaitanāśakam |
advaitajñānajanakaṃ santuṣṭo'bhūnmahānmuniḥ || 5 ||
[Analyze grammar]

natvā stutvā ca vividhaṃ kārtikeyaṃ śivātmajam |
punaḥ papraccha tattvaṃ hi vinayena mahāmuniḥ || 6 ||
[Analyze grammar]

vāmadeva uvāca |
bhagavansarvatattvajña ṣaṇmukhāmṛtavāridhe |
gurutvaṃ kathameteṣāṃ yatīnāmbhāvitātmanām || 7 ||
[Analyze grammar]

jīvānāṃ bhogamokṣādisiddhissidhyati yadvaśāt |
pāramparyyaṃ vinā naiṣā mupadeśādhikāritā || 8 ||
[Analyze grammar]

evaṃ ca kṣaurakarmāṃgaṃ snānañca kathamīdṛśam |
iti vijñāpaya svāminsaṃśayaṃ chettumarhasi || 9 ||
[Analyze grammar]

iti śrutvā kārtikeyo vāmadevavacaḥ smaran |
śivaṃ śivāṃ ca manasā vyācaṣṭumupacakrame || 10 ||
[Analyze grammar]

śrīsubrahmaṇya uvāca |
yogapaṭṭampravakṣyāmi gurutvaṃ yena jāyate |
tava snehādvāmadeva mahadgopyaṃ vimuktidam || 11 ||
[Analyze grammar]

vaiśākhe śrāvaṇemāsi tathāśvayuji kārtike |
mārgaśīrṣe ca māghe vā śuklapakṣe śubhe dine || 12 ||
[Analyze grammar]

paṃcamyāṃ paurṇamāsyāṃ vā kṛtaprābhātikakriyaḥ |
labdhānujñastu guruṇā snātvā niyatamānasaḥ || 13 ||
[Analyze grammar]

paryyaṃkaśaucaṃ kṛtvā tadvāsasāṃgaṃ pramṛjya ca |
dviguṇaṃ doramābadhya vāsasī paridhāya ca || 14 ||
[Analyze grammar]

kṣālitāṃghrirdvirācamya bhasma sadyādima ntrataḥ |
dhārayeddhi samādāya samuddhūlanamārgataḥ || 15 ||
[Analyze grammar]

gṛhītahasto guruṇā sānukūlena vai mune |
sacchiṣyaḥ sāñjalissvābhyāṃ hastābhyāmprāṅmukho yathā || 16 ||
[Analyze grammar]

tathopaveṣṭitastiṣṭhenmaṃḍape samalaṃkṛte |
gurvāsanavare śuddhe cailājinakuśottare || 17 ||
[Analyze grammar]

atha deśika ādāya śaṃkhaṃ sādhāramastrataḥ |
viśodhya tasya purataḥ sthāpayetsānukūlataḥ || 18 ||
[Analyze grammar]

sādhāraṃ śaṅkhamapi ca sampūjya kusumādibhiḥ |
niḥkṣipeda stravarmabhyāṃ śodhitaṃ tatra sajjalam || 19 ||
[Analyze grammar]

āpūrya pūrvavatpūjya ṣaḍaṃgoktakrameṇa ca |
praṇavena punastadvai saptadhaivābhimantrayet || 20 ||
[Analyze grammar]

abhyarcya gandhapuṣpādyairdhūpadīpau pradarśya ca |
saṃrakṣāstreṇa taṃ śaṃkhaṃ varmaṇāthāvaguṇṭhayet || 21 ||
[Analyze grammar]

dhenuśaṃkhākhyamudre ca darśayedatha deśikaḥ |
punassvapurataśśaṃkhaṃ dakṣiṇe deśa uttame || 22 ||
[Analyze grammar]

pūjyārghyoktavidhānena sundarammaṇḍalaṃ śubham |
kuryyātsampūjayettañca sugandhakusumā dibhiḥ || 23 ||
[Analyze grammar]

sādhāraṃ śodhitaṃ śuddhaṃ ghaṭantantupariṣkṛtam |
dhūpitaṃ sthāpitaṃ śuddhavāsitodaprapūritam || 24 ||
[Analyze grammar]

pañcatvakpañcapatraiśca mṛttikābhiśca pañcabhiḥ |
militaṃ ca sugandhena lepayettammunīśvara || 25 ||
[Analyze grammar]

vastrāmradaladūrvāgranārikelasumaistataḥ |
taṃ ghaṭaṃ vastubhiścānyaissaṃkuryātsamalaṃkṛtam || 26 ||
[Analyze grammar]

vinyasetpañcaratnāni ghaṭe tatra munīśvara |
hiraṇyañcāpi teṣāṃ vābhāve bhaktyā pravinyaset || 27 ||
[Analyze grammar]

nīlākhyaratnaṃ ca tathā ratne māṇikyahemanī |
pravālagomedake ca pañcaratnamidaṃ smṛtam || 28 ||
[Analyze grammar]

nṛmlaskamiti samprocya glūmityante 'tha deśikaḥ |
samyagvidhānataḥ prītyā sānukūlaḥ samarcayet || 29 ||
[Analyze grammar]

ādhāraśaktimārabhya yajanoktavidhānataḥ |
pañcāvaraṇamārgeṇa devamāvāhya pūjayet || 30 ||
[Analyze grammar]

nivedya pāyasānnañca tāṃbūlādi yathā purā |
nāmāṣṭakārcanāntaṃ ca kṛtvā tamabhimantrayet || 31 ||
[Analyze grammar]

praṇavāṣṭottaraśataṃ brahmabhiḥ pañcabhiḥ kramāt |
sadyādīśāntamapyastraṃ rakṣitaṃ varmaṇā punaḥ || 32 ||
[Analyze grammar]

avaguṃṭhya pradarśyātha dhūpadīpau ca bhaktitaḥ |
dhenuyonyākhyamudre ca samyaktatra pradarśayet || 23 ||
[Analyze grammar]

tataśca deśikastasya darbhairācchādya mastake |
maṇḍalastheśadigbhāge caturasraṃ prakalpayet || 34 ||
[Analyze grammar]

taduparyyāsanaṃ ramyaṃ kalpayitvā vidhānataḥ |
tatra saṃsthāpayecchiṣyaṃ śiśuṃ sānukūlataḥ || 35 ||
[Analyze grammar]

tataḥ kumbhaṃ samutthāya svastivācanapūrvakam |
abhiṣiṃcedguruḥ śiṣyaṃ prādakṣiṇyena mastake || 36 ||
[Analyze grammar]

praṇavaṃ pūrvamuccāryya saptadhā brahmabhi stataḥ |
pañcabhiścābhiṣekānte śaṃkhodenābhiveṣṭayet || 37 ||
[Analyze grammar]

cārudīpaṃ pradarśyātha vāsasā parimṛjya ca |
nūtanaṃ dorakaupīnaṃ vāsasī paridhāpayet || 38 ||
[Analyze grammar]

kṣālitāṃghrirdvirācamya dhṛtabhasmaguruśśiśum |
hastābhyāmavalaṃbyātha hastau maṃḍapamadhyataḥ || 39 ||
[Analyze grammar]

tadaṃgeṣu samālipya tadbhasma vidhinā guruḥ |
āsane saṃpraveśyātha kalpite sthāpayetsukham || 40 ||
[Analyze grammar]

pūrvābhimukhamātmīyatattvajñānābhilāṣiṇam |
svasanastho gururbrūyādamalātmā bhaveti tam || 41 ||
[Analyze grammar]

guruśca paripūrṇo'smi śiva ityacalasthitiḥ |
samādhimācaretsamyaṅmuhūrttaṃ gūḍhamānasaḥ || 42 ||
[Analyze grammar]

paścādunmīlya nayane sānukūlena cetasā |
sāṃjaliṃ saṃsthitaṃ śuddhaṃ paśyecchiṣyamanākulaḥ || 43 ||
[Analyze grammar]

svahastambhasitāliptaṃ vinyasya śiśumastake |
dakṣaśrutāvupadiśeddhaṃsassohamiti sphuṭam || 44 ||
[Analyze grammar]

tatrādyāhaṃpadasyārthaḥ śaktayātmā sa śivassvayam |
sa evāhaṃ śivosmīti svātmānaṃ saṃvibhāvaya || 45 ||
[Analyze grammar]

ya ityaṇorarthatattvamupadiśya tato vadet |
avāṃtarāṇāṃ vākyānāmarthatātparyamādarāt || 46 ||
[Analyze grammar]

vākyāni vacmi te brahmansāvadhānamatiśśṛṇu |
tāni dhāraya citte hi sa brūyāditi saṃsphuṭam || 47 ||
[Analyze grammar]

iti śrīśivamahāpurāṇe ṣaṣṭhyāṃ kailāsasaṃhitāyāṃ saṃnyāsapaddhatau śiṣyakaraṇavidhirnāmāṣṭādaśo'dhyāyaḥ || 18 ||
[Analyze grammar]