Chapter 33

[English text for this chapter is available]

nandīśvara uvāca |
sanatkumāra suprītyā śivasya paramātmanaḥ |
avatāraṃ śṛṇu vibhorjaṭilāhvaṃ supāvanam || 1 ||
[Analyze grammar]

purā satī dakṣakanyā tyaktvā dehaṃ piturmakhe |
svapitrā'nādṛtā jajñe menāyāṃ himabhūdharāt || 2 ||
[Analyze grammar]

sā gatvā gahane'raṇye tepe suvi malaṃ tapaḥ |
śaṃkarampatimicchantī sakhībhyāṃ saṃyutā śivā |
tattapaḥsuparīkṣārthaṃ saptarṣīnpraiṣayacchivaḥ |
tapaḥsthānaṃ tu pārvatyā nānālīlāviśāradaḥ || 4 ||
[Analyze grammar]

te gatvā tatra munayaḥ parīkṣāṃ cakrurādarāt |
tasyāḥ suyatnato naiva samarthā hyabhavaṃśca te || 5 ||
[Analyze grammar]

tatrāgatya śivaṃ natvā vṛttāntaṃ ca nivedya tat |
tadājñāṃ samanuprāpya svarlokaṃ jagmurādarāt || 6 ||
[Analyze grammar]

gateṣu muniṣu svasthānaṃ śaṃkaraḥ svayam |
parīkṣituṃ śivāvṛttamaicchatsūtikaraḥ prabhuḥ || 7 ||
[Analyze grammar]

suprasannastapasvīcchāśamanādayamīśvaraḥ |
brahmacaryyasvarūpo'bhūttadādbhutataraḥ prabhuḥ || 8 ||
[Analyze grammar]

atīva sthaviro vipradehadhārī svatejasā |
prajvalanmanasā hṛṣṭo daṇḍī chatrī mahojjalaḥ || 9 ||
[Analyze grammar]

dhṛtvaivaṃ jaṭilaṃ rūpaṃ jagāma girijāvanam |
atiprītiyutaḥ śambhuśśaṅkaro bhaktavatsalaḥ || 10 ||
[Analyze grammar]

tatrāpaśyastthitāndevīṃ sakhībhiḥ parivāritām |
vedikopari śuddhāntāṃ śivāmiva vidhoḥ kalām || 11 ||
[Analyze grammar]

śaṃbhurnirīkṣya tāndevīṃ brahmacārisvarūpavān |
upakaṇṭhaṃ yayau prītyā cotsukī bhaktavatsalaḥ || 12 ||
[Analyze grammar]

āgataṃ sā tadā dṛṣṭvā brāhmaṇaṃ tejasādbhutam |
aṃgeṣu lomaśaṃ śāntaṃ daṇḍacarmasamanvitam || 13 ||
[Analyze grammar]

brahmacaryyadharaṃ vṛddhaṃ jaṭilaṃ sakamaṇḍalum |
apūjayatparaprītyā sarvapūjopahārakaiḥ || 14 ||
[Analyze grammar]

tatastā pārvatīdevī pūjitaṃ parayā mudā |
kuśalaṃ paryapṛcchattaṃ brahmacāriṇamādarāt || 15 ||
[Analyze grammar]

brahmacārisvarūpeṇa kastvaṃ hi kuta āgataḥ |
idṃ vanaṃ bhāsayasi vada vedavidāṃ vara || 16 ||
[Analyze grammar]

nandīśvara uvāca |
iti pṛṣṭastu pārvatyā brahmacārī sa vai dvijaḥ |
pratyuvāca drutamprītyā śivābhāvaparīkṣayā || 17 ||
[Analyze grammar]

brahmacāryyuvāca |
ahamicchābhigāmī ca brahmacārī dvijosmi vai |
tapasvī sukhado'nyeṣāmupakārī na saṃśayaḥ || 18 ||
[Analyze grammar]

nandīśvara uvāca |
ityuktvā brahmacārī sa śaṃkaro bhaktavatsalaḥ || |
tasthivānupakaṇṭhaṃ sa gopāyanrūpamātmanaḥ || 19 ||
[Analyze grammar]

brahmacāryyuvāca |
kimbravīmi mahādevi kathanīyanna vidyate |
mahānarthakaraṃ vṛttaṃ dṛśyate vikṛtaṃ mahat || 20 ||
[Analyze grammar]

nave vayasi sadbhogasādhane sukhakāraṇe |
mahopacārasadbhogairvṛthaiva tvaṃ tapasyasi || 2 ||
[Analyze grammar]

kā tvaṃ kasyāsi tanayā kimarthaṃ vijane vane |
tapaścarasi durdharṣaṃ munibhiḥ prayatātmabhiḥ || 22 ||
[Analyze grammar]

nandīśvara uvāca |
iti tadvacanaṃ śrutvā prahasya parameśvarī |
uvāca vacanaṃ prītyā brahmacāriṇamuttamam || 23 ||
[Analyze grammar]

pārvatyuvāca |
śṛṇu vipra brahmacārinmadavṛttamakhilaṃ mune |
janma me bhārate varṣe sāmprataṃ himavadgṛhe || 24 ||
[Analyze grammar]

pūrvaṃ dakṣagṛhe janma satī śaṅkarakāminī |
yogena tyaktadehāhaṃ tātena patinindinā || 25 ||
[Analyze grammar]

atra janmani saṃprāpya supuṇyena śivo dvija |
māṃ tyaktvā bhasmasātkṛtvā manmathaṃ sa jagāma ha || 26 ||
[Analyze grammar]

prayāte śaṅkare tāpādvrīḍitāhaṃ piturgṛhāt |
āgacchamatra tapase guruvākyena saṃyatā || 27 ||
[Analyze grammar]

manasā vacasā sākṣātkarmaṇā patibhāvataḥ |
satyambravīmi no'satyaṃ saṃvṛtaḥ śaṅkaro mayā || 28 ||
[Analyze grammar]

jānāmi durlabhaṃ vastu kathamprāpyaṃ mayā bhavet |
tathāpi manasautsukyāttapyate me tapo'dhunā || 29 ||
[Analyze grammar]

hitvendrapramukhāndevānviṣṇumbrahmāṇamapyaham |
patimpinākapāṇiṃ vai prāptumicchāmi satyataḥ || 30 ||
[Analyze grammar]

nandīśvara uvāca |
ityevaṃ vacanaṃ śrutvā pārvatyā hi suniścitam |
mune sa jaṭilo rudro vihasanvākyamabravīt || 31 ||
[Analyze grammar]

jaṭila uvāca |
himācalasute devi kā buddhiḥ svīkṛtā tvayā |
rudrārthaṃ vibudhānhitvā karoṣi vipulantapaḥ || 32 ||
[Analyze grammar]

jānāmyahaṃ ca taṃ rudraṃ śṛṇu tvampravadāmi te |
vṛṣadhvajassa rudro hi vikṛtātmā jaṭādharaḥ || 33 ||
[Analyze grammar]

ekākī ca sadā nityaṃ virāgī ca viśeṣataḥ |
tasmāttvaṃ tena rudreṇa mano yoktuṃ na cārhasi || 34 ||
[Analyze grammar]

sarvaṃ viruddhaṃ rūpādi tava devi harasya ca |
mahyaṃ na rocate hyetadyadīcchasi tathā kuru || 35 ||
[Analyze grammar]

nandīśvara uvāca |
ityuktvā ca punā rudro brahmacārisvarūpavān |
nininda bahudhātmānaṃ tadagre tāṃ parīkṣitum || 36 ||
[Analyze grammar]

tacchrutvā pārvatī devī vipravākyaṃ durāsadam |
pratyuvāca mahākruddhā śivanindāparaṃ ca tam || 37 ||
[Analyze grammar]

etāvaddhi mayā jñātaṃ kaściddhanyo bhaviṣyati |
parantu sakalaṃ jñātamavadhyo dṛśyate'dhunā || 38 ||
[Analyze grammar]

brahmacārisvarūpeṇa kaścittvaṃ dhūrta āgataḥ |
śivanindā kṛtā mūḍha tvayā manyurabhūnmama || 39 ||
[Analyze grammar]

śivaṃ tvaṃ ca na jānāsi śivāttvaṃ hi bahirmukhaḥ |
tvatpūjā ca kṛtā yanme tasmāttāpayutā'bhavam || 40 ||
[Analyze grammar]

śivanindāṃ karotīha tattvamajñāya yaḥ pumān |
ājanmasaṃcitaṃ puṇyaṃ tasya bhasmībhavatyuta || 41 ||
[Analyze grammar]

śivavidveṣiṇaṃ spṛṣṭvā prāyaścittaṃ samācaret || 42 ||
[Analyze grammar]

re re duṣṭa tvayā proktamahaṃ jānāmi śaṃkaram |
niścayena na vijñātaḥ śiva eva paraḥ prabhuḥ || 43 ||
[Analyze grammar]

yathā tathā bhavedrudro māyayā bahurūpavān |
mamābhīṣṭaprado'tyantaṃ nirvikāraḥ satāmpriyaḥ || 44 ||
[Analyze grammar]

nandīśvara uvāca |
ityuktvā taṃ śivā devī śivatattvaṃ jagāda sā |
yatra brahmatayā rudraḥ kathyate nirguṇo'vyayaḥ || 45 ||
[Analyze grammar]

tadākarṇya vaco devyā brahmacārī sa vai dvijaḥ |
punarvacanamādātuṃ yāvadeva pracakrame || 46 ||
[Analyze grammar]

provāca girijā tāvatsvasakhīṃ vijayāndrutam |
śivāsaktamanovṛttiḥ śivanindāparāṅmukhī || 47 ||
[Analyze grammar]

girijovāca |
vāraṇīyaḥ prayatnena sakhyayaṃ hi dvijādhamaḥ |
punarvaktumanāścāyaṃ śivanindāṃ kariṣyati || 48 ||
[Analyze grammar]

na kevalaṃ bhavetpāpaṃ nindākartuḥ śivasya hi |
yo vai śṛṇoti tannindāṃ pāpabhāksa bhavediha || 49 ||
[Analyze grammar]

śivanindākaro vadhyassarvathā śivakiṃkaraiḥ |
brāhmaṇaścetsa vai tyājyo gantavyaṃ tatsthalāddrutam || 50 ||
[Analyze grammar]

ayanduṣṭaḥ punarniṃdāṃ kariṣyati śivasya hi |
brāhmaṇatvādavadhyaśca tyājyo'dṛśyaśca sarvathā || 51 ||
[Analyze grammar]

sthalametaddrutaṃ hitvā yāsyāmo'nyatra mā ciram |
yathā saṃbhāṣaṇaṃ na syādanenāviduṣā punaḥ || 92 ||
[Analyze grammar]

|| nandīśvara uvāca |
ityuktvā comayā yāvatpadamutkṣipyate mune |
asau tāvacchivaḥ sākṣādālalambe paṭaṃ svayam || 53 ||
[Analyze grammar]

kṛtvā svarūpaṃ divyaṃ ca śivādhyānaṃ yathā tathā |
darśayitvā śivāyai tāmuvācāvāṅmukhī śivaḥ || 54 ||
[Analyze grammar]

śiva uvāca |
kutra tvaṃ yāsi māṃ hitvā na tvantyājyā mayā śive |
mayā parīkṣitāsi tvaṃ dṛḍhabhaktāsi me'naghe || 55 ||
[Analyze grammar]

brahmacārisvarūpeṇa bhāvamicchustvadīyakam |
tavopakaṇṭhamāgatya prāvocaṃ vividhaṃ vacaḥ || 56 ||
[Analyze grammar]

prasannosmi dṛḍhaṃ bhaktyā śive tava viśeṣataḥ |
cittepsitaṃ varaṃ brūhi nādeyaṃ vidyate tava || 57 ||
[Analyze grammar]

adyaprabhṛti te dāsastapobhiḥ premanirbhare |
kṛto'smi tava saundaryyātkṣaṇa eko yugāyate || 58 ||
[Analyze grammar]

tyajyatāṃ ca tvayā lajjā mama patnī sanātanī |
ehi priye tvayā sākaṃ drutaṃ yāmi svakaṃ girim || 59 ||
[Analyze grammar]

ityuktavati deveśe śivāti mudamāpa sā |
tapoduḥkhantu yatsarvaṃ tajjahau drutameva hi || 60 ||
[Analyze grammar]

tataḥ prahṛṣṭā sā dṛṣṭvā divyarūpaṃ śivasya tat |
pratyuvāca prabhuṃ prītyā lajjayādho mukhī śivā || 61 ||
[Analyze grammar]

śivovāca |
yadi prasanno deveśa karoṣi ca kṛpāṃ mayi |
patirme bhava deveśa ityuktaśśivayā śivaḥ || 62 ||
[Analyze grammar]

gṛhītvā vidhivatpāṇiṃ kailāsaṃ sa tayā yayau |
patiṃ taṃ girijā prāpya devakāryaṃ cakāra sā || 63 ||
[Analyze grammar]

iti proktastu te tāta brahmacāri svarūpakaḥ |
śivāvatāro hi mayā śivābhāvaparīkṣakaḥ || 64 ||
[Analyze grammar]

idamākhyānamanaghaṃ paramaṃ vyāhṛtaṃ mayā |
ya etacchṛṇuyātprītyā sukhī gatimāpnuyāt || 65 ||
[Analyze grammar]