Chapter 9

[English text for this chapter is available]

nandīśvara uvāca |
sanatkumāra sarvajña bhairavīmaparāṃ kathām |
śṛṇu prītyā mahādoṣasaṃhartrīmbhaktivarddhinīm || 1 ||
[Analyze grammar]

tatsānnidhyaṃ bhairavo'pi kālo'bhūtkālakālanaḥ |
sa devadevavākyena bibhratkāpālikaṃ vratam || 2 ||
[Analyze grammar]

kapālapāṇirviśvātmā cacāra bhuvanatrayam |
nātyākṣīccāpi taṃ devaṃ brahmahatyāpi dāruṇā || 3 ||
[Analyze grammar]

pratitīrthaṃ bhramanvāpi vimukto brahmahatyayā |
ataḥ kāmārimahimā sarvopi hyavagamyatām || 4 ||
[Analyze grammar]

pramathaiḥ sevyamāno'pi hyekadā viharanharaḥ |
kāpāliko yayau svairī nārāyaṇaniketanam || 5 ||
[Analyze grammar]

athāyāntaṃ mahākālaṃ trinetraṃ sarpakuṇḍalam |
mahādevāṃśasambhūtaṃ pūrṇākāraṃ ca bhairavam || 6 ||
[Analyze grammar]

papāta daṇḍavadbhūmau taṃ dṛṣṭvā garuḍadhvajaḥ |
devāśca munayaścaiva devanāryyaḥ samantataḥ || 7 ||
[Analyze grammar]

atha viṣṇuḥ praṇamyainaṃ prayātaḥ kamalāpatiḥ |
śirasyañjalimādhāya tuṣṭāva vividhaiḥ stavaḥ || 8 ||
[Analyze grammar]

sānando'tha hariḥ prāha prasannātmā mahāmune |
kṣīrodamathanodbhūtāṃ padmāṃ padmālayāṃ mudā || 9 ||
[Analyze grammar]

viṣṇuruvāca |
priye paśyābjanayane dhanyāsi subhage'naghe |
dhanyo'haṃ devi suśroṇi yatpaśyāvo jagatpatim || 10 ||
[Analyze grammar]

ayandhātā vidhātā ca lokānāṃ prabhurīśvaraḥ |
anādiḥ śaraṇaḥ śāntaḥ puraḥ ṣaḍviṃśasaṃmitaḥ || 11 ||
[Analyze grammar]

sarvajñaḥ sarvayogīśassarvabhūtaikanāyakaḥ |
sarvabhūtāntarātmāyaṃ sarveṣāṃ sarvadaḥ sadā || 12 ||
[Analyze grammar]

ye vinidrā viniśvāsāḥ śāntā dhyānaparāyaṇāḥ || |
dhiyā paśyaṃti hṛdaye soyaṃ padme samīkṣatām || 13 ||
[Analyze grammar]

yaṃ vidurvvedatattvajñā yogino yatamānasāḥ |
arūpo rūpavānbhūtvā so'yamāyāti sarvagaḥ || 14 ||
[Analyze grammar]

aho vicitraṃ devasya ceṣṭitamparameṣṭhinaḥ |
yasyākhyāṃ bruvato nityaṃ na dehaḥ so'pi dehabhṛt || 15 ||
[Analyze grammar]

taṃ dṛṣṭvā na punarjanma labhyate mānavairbhuvi |
soyamāyāti bhagavāṃstryambakaśśaśibhūṣaṇaḥ || 16 ||
[Analyze grammar]

puṇḍarīkadalāyāme dhanye me'dya vilocane |
yaddṛśyate mahādevo hyābhyāṃ lakṣmi maheśvaraḥ || 17 ||
[Analyze grammar]

dhigdhikpadantu devānāṃ paraṃ dṛṣṭvā na śaṃkaram |
labhyate yatra nirvāṇaṃ sarva duḥkhāntakṛttu yat || 18 ||
[Analyze grammar]

devatvādaśubhaṃ kiñciddevaloke na vidyate |
dṛṣṭvāpi sarve deveśaṃ yanmuktinna labhāmahe || 19 ||
[Analyze grammar]

evamuktvā hṛṣīkeśassaṃprahṛṣṭatanūruhaḥ |
praṇipatya mahādevamidamāha vṛṣadhvajam || 20 ||
[Analyze grammar]

viṣṇuruvāca |
kimidandevadevena sarvajñena tvayā vibho |
kriyate jagatāṃ dhātrā sarvapāpaharāvyaya || 21 ||
[Analyze grammar]

krīḍeyantava deveśa trilocana mahāmate |
kiṅkāraṇaṃ virūpākṣa ceṣṭitante smarārdana || 22 ||
[Analyze grammar]

kimarthaṃ bhagavañchambho bhikṣāñcarasi śaktipa |
saṃśayo me jagannātha eṣa trailokyarājyada || 23 ||
[Analyze grammar]

|| nandīśvara uvāca |
evamuktastataḥ śambhurviṣṇunā bhairavo haraḥ |
pratyuvācādbhutotissa viṣṇuṃ hi vihasanprabhuḥ || 24 ||
[Analyze grammar]

|| bhairava uvāca |
brahmaṇastu śiraśchinnamaṃgulyāgranakhena ha |
tadaghampratihantuṃ hi carāmyetadvrataṃ śubham || 25 ||
[Analyze grammar]

nandīśvara uvāca |
evamukto maheśena bhairaveṇa ramāpatiḥ |
smṛtvā kiṃcinnataśirāḥ punarevamajijñapat || 26 ||
[Analyze grammar]

|| viṣṇuruvāca |
yathecchasi tathā krīḍa sarvavighnopanodaka |
māyayā māṃ mahādeva nācchādayitumarhasi || 27 ||
[Analyze grammar]

nābhīkamalakośāttu koṭiśaḥ kamalāsanāḥ |
kalpe kalpe purā hyānsatyaṃ yogabalādvibho || 28 ||
[Analyze grammar]

tyaja māyāmimāndeva dustarāmakṛtātmabhiḥ |
brahmādayo mahādeva māyayā tava mohitāḥ || 29 ||
[Analyze grammar]

yathāvadanugacchāmi ceṣṭitante śivāpate |
tavaivānugrahācchambho sarveśvara satāṃgate || 30 ||
[Analyze grammar]

saṃhārakāle saṃprāpte sadevānnikhilānmunīn |
lokānvarṇāśramavato hariṣyasi yadā hara || 31 ||
[Analyze grammar]

tadā kṛte mahādeva pāpaṃ brahmavadhādikam |
pāratantryaṃ na te śambho svairaṃ krīḍatyato bhavān || 32 ||
[Analyze grammar]

arghīva brahmaṇo hyasthnāṃ srakkaṇṭhe tava bhāsate |
tathādyanugatā śambho brahmahatyā tavānagha || 33 ||
[Analyze grammar]

kṛtvāpi sumahatpāpaṃ yastvāṃ smarati mānavaḥ |
ādhāraṃ jagatāmīśa tasya pāpaṃ vilīyate || 34 ||
[Analyze grammar]

yathā tamo na tiṣṭheta sannidhāvaṃśumālinaḥ |
tathaiva tava yo bhaktaḥ pāpantasya vrajetkṣayam || 35 ||
[Analyze grammar]

yaścintayati puṇyātmā tava pādāmbujadvayam |
brahmahatyākṛtamapi pāpantasya vrajetkṣayam || 36 ||
[Analyze grammar]

tava nāmānuraktā vāgyasya puṃso jagatpate |
apyadrikūṭatulitaṃ nainastamanubādhate || 37 ||
[Analyze grammar]

paramātmanparandhāma svecchābhidhṛtavigraha |
kutūhalaṃ taveśedaṃ kṛpaṇādhīnateśvara || 38 ||
[Analyze grammar]

adya dhanyo'smi deveśa yatra paśyaṃti yoginaḥ |
paśyāmi taṃ jaganmūrtti parameśvaramavyayam || 39 ||
[Analyze grammar]

adya me paramo lābhastvadya me maṃgalaṃ param |
taṃ dṛṣṭvāmṛta tṛptasya tṛṇaṃ svargāpavargakam || 40 ||
[Analyze grammar]

itthaṃ vadati goviṃde vimalā padmayā tayā |
manorathavatī nāma bhikṣā pātre samarpitā || 41 ||
[Analyze grammar]

bhikṣāṭanāya devo'pi niragātparayā mudā |
anyatrāpi mahādevo bhairavaścāttavigrahaḥ || 42 ||
[Analyze grammar]

dṛṣṭvānuyāyinīṃ tāntu samāhūya janārdanaḥ |
saṃprārthayadbrahmahatyāṃ vimuṃca tvaṃ triśūlinam || 43 ||
[Analyze grammar]

|| brahmahatyovāca |
anenāpi miṣeṇāhaṃ saṃsevyāmuṃ vṛṣadhvajam |
ātmānampāvayiṣyāmi tvapunarbhavadarśanam || 44 ||
[Analyze grammar]

nandīśvara uvāca |
sā tatyāja na tatpārśvaṃ vyāhṛtāpi murāriṇā |
tamūce'tha hariṃ śaṃbhuḥ smerāsyo bhairavo vacaḥ || 45 ||
[Analyze grammar]

bhairava uvāca |
tvadvākpīyūṣapānena tṛpto'smi bahumānada |
svabhāvo'yaṃ hi sādhūnāṃ yattvaṃ vadasi māpate || 46 ||
[Analyze grammar]

varaṃ vṛṇīṣva goviṃda varado'smi tavānagha |
agraṇīrmama bhaktānāṃ tvaṃ hare nirvikāravān || 47 ||
[Analyze grammar]

no mādyanti tathā bhaikṣyairbhikṣavo'pyatisaṃskṛtaiḥ |
yathā mānasudhāpānairnanu bhikṣāṭanajvarāḥ || 48 ||
[Analyze grammar]

nandīśvara uvāca |
ityākarṇya vacaḥ śaṃbho bhairavasya parātmanaḥ |
suprasannataro bhūtvā samavocanmaheśvaram || 49 ||
[Analyze grammar]

viṣṇuruvāca |
eṣa eva varaḥ ślāghyo yadahaṃ dektādhipam |
paśyāmi tvāndevadeva manovāṇī pathātigam || 50 ||
[Analyze grammar]

adabhreyaṃ sudhādṛṣṭiranayā me mahotsavaḥ |
ayattnanidhilābhoyaṃ vīkṣaṇaṃ hara te satām || 51 ||
[Analyze grammar]

aviyogo'stu me deva tvadaṃghriyugalena vai |
eṣa eva varaḥ śaṃbho nānyaṃ kaścid vṛṇe varam || 52 ||
[Analyze grammar]

śrībhairavī uvāca |
evambhavatu te tāta yattvayoktaṃ mahāmate |
sarveṣāmapi devānāṃ varadastvaṃ bhaviṣyasi || 53 ||
[Analyze grammar]

nandīśvara uvāca |
anugṛhyeti daityāri keṃdrādribhuvanecaram |
bheje vimuktanagarīṃ nāmnā vārāṇasīṃ purīm || 54 ||
[Analyze grammar]

kṣetre praviṣṭamātre'tha bhairave bhīṣaṇākṛtau |
hāhetyuktvā brahmahatyā pātālaṃ cāviśattadā || 95 ||
[Analyze grammar]

kapālaṃ brāhmaṇaḥ sadyo bhairavasya karāṃbujāt |
papāta bhuvi tattīrthamabhūtkāpālamocanam || 56 ||
[Analyze grammar]

kapālaṃ brahmaṇo rudrassarveṣāmeva paśyatām |
hastātpatantamālokya nanarta parayā mudā || 57 ||
[Analyze grammar]

vidheḥ kapālaṃ nāmuṃcatkaramatyantadussaham |
parasya bhramataḥ kvāpi tatkāśyāṃ kṣaṇato'patat || 58 ||
[Analyze grammar]

śūlino brahmaṇo hatyā nāpaiti sma ca yā kvacit |
sā kāśyāṃ kṣaṇato naṣṭā tasmātsevyā hi kāśikā || 59 ||
[Analyze grammar]

kapālamocanaṃ kāśyāṃ yaḥ smarettīrthamuttamam |
ihānyatrāpi yatpāpaṃ kṣipraṃ tasya praṇaśyati || 60 ||
[Analyze grammar]

āgatya tīrthapravare snānaṃ kṛtvā vidhānataḥ |
tarpayitvā pitṝndevānmucyate brahmahatyayā || 61 ||
[Analyze grammar]

kapālamocanaṃ tīrthaṃ puraskṛtvā tu bhairavaḥ |
tatraiva tasthau bhaktānāṃ bhakṣayannaghasantatim || 62 ||
[Analyze grammar]

kṛṣṇāṣṭamyāntu mārgasya māsasya parameśvaraḥ |
āvirbabhūva sallīlo bhairavātmā satāmpriyaḥ || 63 ||
[Analyze grammar]

mārgaśīrṣāsitāṣṭamyāṃ kālabhairavasannidhau |
upoṣya jāgaraṃ kurvanmahāpāpaiḥ pramucyate || 64 ||
[Analyze grammar]

anyatrāpi naro bhaktyā tadvrataṃ yaḥ kariṣyati |
sa jāgaraṃ mahāpāpairmukto yāsyati sadgatim || 65 ||
[Analyze grammar]

anekajanmaniyutairyatkṛtaṃ jantubhistvagham |
tatsarvaṃ vilayaṃ yāti kālabhairavadarśanāt || 66 ||
[Analyze grammar]

kālabhairavabhaktānāṃ pātakāni karoti yaḥ |
sa mūḍho duḥkhito bhūtvā punardurgatimāpnuyāt || 67 ||
[Analyze grammar]

viśveśvare'pi ye bhaktā no bhaktāḥ kālabhairave |
te labhante mahāduḥkhaṃ kāśyāṃ caiva viśeṣataḥ || 68 ||
[Analyze grammar]

vārāṇasyāmuṣitvā yo bhairavaṃ na bhajennaraḥ |
tasya pāpāni varddhante śuklapakṣe yathā śaśī || 69 ||
[Analyze grammar]

kālarājaṃ na yaḥ kāśyāṃ pratibhūtāṣṭamīkujam |
bhajettasya kṣayaṃ puṇyaṃ kṛṣṇapakṣe yathā śaśī || 70 ||
[Analyze grammar]

śrutvākhyānamidampuṇyambrahmahatyāpanodakam |
bhairavotpattisaṃjñaṃ ca sarvapāpaiḥ pramucyate || 71 ||
[Analyze grammar]

bandhanāgārasaṃstho'pi prāpto'pi vipadamparām |
prādurbhāvaṃ bhairavasya śrutvā mucyeta saṅkaṭāt || 72 ||
[Analyze grammar]

iti śrīśivamahāpurāṇe tṛtīyāyāṃśata rudrasaṃhitāyāṃ bhairavāvatāralīlāvarṇanaṃ nāma navamo'dhyāyaḥ || 9 ||
[Analyze grammar]