Chapter 8

[English text for this chapter is available]

atha bhairavāvatāramāha |
nandīśvara uvāca |
sanatkumāra sarvvajña śṛṇu tvaṃ bhairavīṃ kathām |
yasyāḥ śravaṇamātreṇa śaivī bhaktirdṛḍhā bhavet || 1 ||
[Analyze grammar]

bhairavaḥ pūrṇarūpo hi śaṃkarasya parātmanaḥ |
mūḍhāstaṃ vai na jānanti mohitāśśivamāyayā || 2 ||
[Analyze grammar]

sanatkumāra no vetti mahimānaṃ maheśituḥ |
caturbhujo'pi viṣṇurvai caturvvaktro'pi vai vidhiḥ || 3 ||
[Analyze grammar]

citramatra na kiñcidvai durjñeyā khalu śāmbhavī |
tayā saṃmohitāssarve nārcayantyapi tamparam || 4 ||
[Analyze grammar]

veda cedyadi vātmānaṃ sa eva parameśvaraḥ |
tadā vihanti te sarvve svecchayā na hi ke'pi tam || 5 ||
[Analyze grammar]

sarvvago'pi maheśāno nekṣyate mūḍhabuddhibhiḥ |
devavad budhyate loke yo'tīto manasāṃ girām || 6 ||
[Analyze grammar]

atretihāsaṃ vakṣye'haṃ paramarṣe purātanam |
śṛṇu taṃ śraddhayā tāta paramaṃ jñānakāraṇam || 7 ||
[Analyze grammar]

meruśṛṅge'dbhute ramye sthitambrahmāṇamīśvaram |
jagmurdevarṣayaḥ sarvve sutattvaṃ jñātumicchayā || 8 ||
[Analyze grammar]

tatrāgatya vidhinnatvā papracchuste mahādarāt |
kṛtāñjalipuṭāssarve nataskandhā munīśvarāḥ || 9 ||
[Analyze grammar]

devarṣaya ūcuḥ |
devadeva prajānātha sṛṣṭikṛllokanāyaka |
tattvato vada cāsmabhyaṃ kimekaṃ tattvamavyayam || 10 ||
[Analyze grammar]

nandīśvara uvāca |
sa māyayā maheśasya mohitaḥ padmasambhavaḥ |
avijñāya parambhāvaṃ saṃbhāvaṃ pratyuvāca ha || 11 ||
[Analyze grammar]

brahmovāca |
he surā ṛṣayaḥ sarvve sumatyā śṛṇutādarāt |
vacmyahaṃ paramaṃ tattvamavyayaṃ vai yathārthataḥ || 12 ||
[Analyze grammar]

jagadyonirahaṃ dhātā svayambhūraja īśvaraḥ |
anādibhāgahaṃ brahma hyeka ātmā nirañjanaḥ || 13 ||
[Analyze grammar]

pravartako hi jagatāmahameva nivarttakaḥ |
saṃvartako madadhiko nānyaḥ kaścitsurottamāḥ || 14 ||
[Analyze grammar]

nandīśvara uvāca |
tasyaivaṃ vadato dhāturviṣṇustatra sthito mune |
provāca prahasanvākyaṃ saṃkruddho mohito'jayā || 15 ||
[Analyze grammar]

na caitaducitā brahmanyogayuktasya mūrkhatā |
avijñāya paraṃ tattvaṃ vṛthaitatte nigadyate || 16 ||
[Analyze grammar]

kartā vai sarvalokānāṃ paramātmā paraḥ pumān |
yajño nārāyaṇo devo māyādhīśaḥ parā gatiḥ || 17 ||
[Analyze grammar]

mamājñayā tvayā brahmansṛṣṭireṣā vidhī yate |
jagatāṃ jīvanaṃ naiva māmanādṛtya ceśvaram || 18 ||
[Analyze grammar]

evaṃ triprakṛtau mohātparasparajayaiṣiṇau |
procaturnigamāṃścātra pramāṇe sarvathā tanau || 19 ||
[Analyze grammar]

praṣṭavyāste viśeṣeṇa sthitā mūrtidharāśca te |
papracchatuḥ pramāṇajñānityuktvā caturo'pi tān || 20 ||
[Analyze grammar]

vidhiviṣṇū ūcatuḥ |
vedāḥ pramāṇaṃ sarvvatra pratiṣṭhā paramāmitāḥ |
yūyaṃ vadata viśrabdhaṃ kimekaṃ tattvamavyayam || 21 ||
[Analyze grammar]

nandīśvara uvāca |
ityākarṇya tayorvācaṃ punaste hi ṛgādayaḥ |
avadaṃstattvataḥ sarvve saṃsmarato paraṃ prabhum || 22 ||
[Analyze grammar]

yadi mānyā vayandevau sṛṣṭisthitikarau vibhū |
tadā pramāṇaṃ vakṣyāmo bhavatsandehabhedakam || 23 ||
[Analyze grammar]

nandīśvara uvāca |
śrutyuktavidhimākarṇya procatustau surau śrutīḥ |
yuṣmaduktaṃ pramāṇaṃ nau kintattvaṃ samyagucyatām || 24 ||
[Analyze grammar]

ṛgveda uvāca |
yadantassthāni bhūtāni yatassarvvampravarttate |
yadāhuḥ paramantattvaṃ sa rudrastveka eva hi || 25 ||
[Analyze grammar]

yajurveda uvāca |
yo yajñairakhilairīśo yogena ca samijyate |
yena pramāṇaṃ khalu nassa ekaḥ sarvvadṛk chivaḥ || 26 ||
[Analyze grammar]

sāmaveda uvāca |
yenedambhramyate viśvaṃ yogibhiryo vicintyate |
yadbhāsā bhāsate viśvaṃ sa ekastryambakaḥ paraḥ || 27 ||
[Analyze grammar]

atharvaveda uvāca |
yaṃ prapaśyanti deveśambhaktyanugrahiṇo janāḥ |
tamāhurekaṃ kaivalyaṃ śaṃkaraṃ duḥkhataḥ param || 28 ||
[Analyze grammar]

nandīśvara uvāca |
śrutyuktamidamākarṇyātīvamāyāvimohitau |
smitvāhaturvidhiharī nigamāṃstānvicetanau || 29 ||
[Analyze grammar]

vidhiharī ūcatuḥ |
he vedāḥ kimidaṃ yūyambhāṣante gatacetanāḥ |
kiñjātaṃ vo'dya sarvvaṃ hi naṣṭaṃ suvayunaṃ param || 30 ||
[Analyze grammar]

kathampramathanātho'sau ramamāṇo nirantaram |
digambaraḥ pītavarṇo śivayā dhūlidhūsaraḥ || 31 ||
[Analyze grammar]

virūpaveṣo jaṭilo vṛṣago vyālabhūṣaṇaḥ |
paraṃ brahmatvamāpannaḥ kva ca tatsaṃgavarjitam || 32 ||
[Analyze grammar]

ityudīritamākarṇya praṇavaḥ sarvagastayoḥ |
amūrto mūrtimānprītyā jṛmbhamāṇa uvāca tau || 33 ||
[Analyze grammar]

praṇava uvāca |
na hīśo bhagavāñchaktyā hyātmano vyatiriktayā |
kadācidramate rudro līlārūpadharo haraḥ || 34 ||
[Analyze grammar]

asau hi parameśānassvayaṃjyotissanātanaḥ |
ānandarūpā tasyaiṣā śaktirnāgantukī śivā || 35 ||
[Analyze grammar]

nandīśvara uvāca |
ityevamukto'pi tadā vidherviṣṇośca vai tadā |
nājñānamagamannāśaṃ śrīkaṇṭhasyaiva māyayā || 36 ||
[Analyze grammar]

prādurāsīttato jyotirubhayorantare mahat |
pūrayannijayā bhāsā dyāvābhūmyoryadantaram || 37 ||
[Analyze grammar]

jyotirmaṇḍalamadhyastho dadṛśe puruṣākṛtiḥ |
vidhikratubhyāṃ tatraiva mahādbhutatanurmune || 38 ||
[Analyze grammar]

prajajvālātha kopena brahmaṇaḥ pañcamaṃ śiraḥ |
āvayorantare ko'sau bibhṛyātpuruṣākṛtim || 39 ||
[Analyze grammar]

vidhiḥ saṃbhāvayedyāvattāvatsa trivilocanaḥ |
dṛṣṭaḥ kṣaṇena ca mahāpuruṣo nīlalohitaḥ || 40 ||
[Analyze grammar]

triśūlapāṇirbhālākṣo nāgoḍupavibhūṣaṇaḥ |
hiraṇyagarbhastaṃ dṛṣṭvā vihasanprāha mohitaḥ || 416 ||
[Analyze grammar]

brahmovāca |
nīlalohita jāne tvāṃ mā bhaiṣīścandraśekhara |
bhālasthalānmama purā rudraḥ prādurabhūdbhavān || 42 ||
[Analyze grammar]

rodanādrudranāmāpi yojito'si mayā purā |
māmeva śaraṇaṃ yāhi putra rakṣāṅkaromi te || 43 ||
[Analyze grammar]

|| nandīśvara uvāca |
atheśvaraḥ padmayoneḥ śrutvā garvavatīṃ giram |
cukopātīva ca tadā kurvanniva layammune || 44 ||
[Analyze grammar]

sa kopatassamutpādya puruṣaṃ bhairavaṃ kvacit |
prajvalantaṃ sumahasā prītyā ca parameśvaraḥ || 45 ||
[Analyze grammar]

īśvara uvāca |
prākca paṃkajajanmāsau śāsyaste kālabhairava |
kālavadrājase sākṣātkālarājastato bhavān || 46 ||
[Analyze grammar]

viśvaṃ bhartuṃ samarthosi bhīṣaṇādbhairavaḥ smṛtaḥ |
tvatto bheṣyati kālo'pi tatastvaṃ kālabhairavaḥ || 47 ||
[Analyze grammar]

āmardayiṣyati bhavānruṣṭo duṣṭātmano yataḥ |
āmardaka iti khyātiṃ tatassarvatra yāsyasi || 48 ||
[Analyze grammar]

yataḥ pāpāni bhaktānāṃ bhakṣayiṣyasi tatkṣaṇāt |
pāpabhakṣaṇa ityeva tava nāma bhaviṣyati || 49 ||
[Analyze grammar]

yā me muktipurī kāśī sarvvābhyo'hi garīyasī |
ādhipatyaṃ ca tasyāste kālarāja sadaiva hi || 50 ||
[Analyze grammar]

tatra ye pātakinarāsteṣāṃ śāstā tvameva hi |
śubhāśubhaṃ ca tatkarma citragupto likhiṣyati || 51 ||
[Analyze grammar]

nandīśvara uvāca |
etānvarānpragṛhyātha tatkṣaṇātkālabhairavaḥ |
vāmāṃgulinakhāgreṇa cakarta ca vidheśśiraḥ || 52 ||
[Analyze grammar]

yadaṃgamaparādhnoti kāryaṃ tasyaiva śāsanam |
ato yena kṛtā nindā tacchinnampañcamaṃ śiraḥ || 53 ||
[Analyze grammar]

atha cchinnaṃ vidhiśiro dṛṣṭvā bhītataro hariḥ |
śātarudriyamantraiśca bhaktyā tuṣṭāva śaṅkaram || 54 ||
[Analyze grammar]

bhīto hiraṇyagarbho'pi jajāpa śatarudriyam |
itthaṃ tau gatagarvau hi saṃjātau tatkṣaṇānmune || 99 ||
[Analyze grammar]

parabrahma śivaḥ sākṣātsaccidānandalakṣaṇaḥ |
paramātmā guṇātīta iti jñānamavāpatuḥ || 56 ||
[Analyze grammar]

sanatkumāra sarvajña śṛṇu me paramaṃ śubham |
yāvadgarvo bhavettāvajjñānaguptirviśeṣataḥ || 57 ||
[Analyze grammar]

tyaktvābhi mānaṃ puruṣo jānāti parameśvaram |
garviṇaṃ hanti viśveśo jāto garvāpahārakaḥ || 58 ||
[Analyze grammar]

atha viṣṇuvidhī jñātvā vigarvau parameśvaraḥ |
prasanno'bhūnmahādevo'karottāvabhayau prabhuḥ || 59 ||
[Analyze grammar]

āśvāsya tau mahādevaḥ prītaḥ praṇatavatsalaḥ |
prāha svāṃ mūrtimaparāṃ bhairavantaṃ kapardinam || 60 ||
[Analyze grammar]

mahādeva uvāca |
tvayā mānyo viṣṇurasau tathā śatadhṛtiḥ svayam |
kapālamvaidhasamvāpi nīlalohita dhāraya || 61 ||
[Analyze grammar]

brahmahatyāpanodāya vrataṃ lokāya darśaya |
cara tvaṃ satataṃ bhikṣāṃ kapālavratamāśritaḥ || 62 ||
[Analyze grammar]

ityuktvā paśyatastasya tejorūpaḥ śivo'bravīt |
utpādya caikāṃ kanyāntu brahmahatyābhiviśrutām || 63 ||
[Analyze grammar]

yāvadvārāṇasīndivyāmpurīmeṣāṃ gamiṣyati |
tāvattvaṃ bhīṣaṇe kālamanugacchograrūpiṇam || 64 ||
[Analyze grammar]

sarvatra te praveśo'sti tyaktvā vārāṇasīṃ purīm |
vārāṇasīṃ yadā gacchettanmuktāṃ bhava tatkṣaṇāt || 65 ||
[Analyze grammar]

nandīśvara uvāca |
niyojya tāmiti tadā brahmahatyāṃ ca tāmprabhuḥ |
mahādbhutaśca sa śivo'pyantardhānamagāttataḥ || 66 ||
[Analyze grammar]

iti śrīśivamahāpurāṇe tṛtīyāyāṃ śatarudrasaṃhitāyāṃ bhairavāvatāravarṇanaṃ nāmāṣṭamo'dhyāyaḥ || 8 ||
[Analyze grammar]