Chapter 10

[English text for this chapter is available]

śeṣa uvāca |
itthaṃ saṃśṛṇvato dharmānvasaṃtaḥ samupasthitaḥ |
yatra yajña kriyādīnāṃ prāraṃbhaḥ sumahātmanām || 1 ||
[Analyze grammar]

dṛṣṭvā taṃ samayaṃ dhīmānvasiṣṭhaḥ kalaśodbhavaḥ |
rāmacaṃdraṃ mahārājaṃ pratyuvāca yathocitam || 2 ||
[Analyze grammar]

vasiṣṭha uvāca |
rāmacaṃdra mahābāho samayaḥ paryabhūttava |
hayo yatra pramucyeta yajñārthaṃ paripūjitaḥ || 3 ||
[Analyze grammar]

sāmagrī kriyatāṃ tatra āhūyaṃtāṃ dvijottamāḥ |
karotu pūjāṃ bhagavānbrāhmaṇānāṃ yathocitām || 4 ||
[Analyze grammar]

dīnāṃdhakṛpaṇānāṃ ca dānaṃ svāṃte samutthitam |
dadātu vidhivatteṣāṃ pratipūjyādhimānya ca || 5 ||
[Analyze grammar]

bhavānkanakasatpatnyā dīkṣito'tra vrataṃ cara |
bhūmiśāyī brahmacārī vasubhogavivarjitaḥ || 6 ||
[Analyze grammar]

mṛgaśṛṃgadharaḥ kaṭyāṃ mekhalājinadaṃḍabhṛt |
karotu yajñasaṃbhāraṃ sarvadravyasamanvitam || 7 ||
[Analyze grammar]

iti śrutvā mahadvākyaṃ vasiṣṭhasya yathārthakam |
uvāca lakṣmaṇaṃ dhīmānnānārthaparibṛṃhitam || 8 ||
[Analyze grammar]

śrīrāma uvāca |
śṛṇu lakṣmaṇa madvākyaṃ śrutvā tatkuru satvaram |
hayamānaya yatnena vājimedhakriyocitam || 9 ||
[Analyze grammar]

śeṣa uvāca |
śrutvā vākyaṃ raghupateḥ śatrujillakṣmaṇastadā |
senāpatimuvācedaṃ vaco vividhavarṇanam || 10 ||
[Analyze grammar]

lakṣmaṇa uvāca |
vīrākarṇaya me vacaḥ sumadhuraṃ śrutvā tvarātaḥ punaḥ |
kāryaṃ tatkṣitipālamaulimukuṭairghṛṣṭāṃghri rāmājñayā |
senāṃ kālabalaprabhaṃjanabalaprodyatsamarthāṃginīṃ |
sajjāṃ sadrathahastipattisuhayārohairvidhe hyanvitām || 11 ||
[Analyze grammar]

sajjīyatāṃ vāyujavāsturaṃgāstaraṃgamālā lalitāṃghripātāḥ |
sadaśvacārairbahuśastradhāribhiḥ saṃrohitā vairibalaprahāribhiḥ || 12 ||
[Analyze grammar]

saṃlakṣyatāṃ hastinaḥ parvatābhā ādhoraṇaiḥ prāsakuṃtāgrahastaiḥ |
śūraiḥ sāstrairbhūridānopahārāḥ kṣībāṇaste sarvaśastrāstrapūrṇāḥ || 13 ||
[Analyze grammar]

vitatabahusamṛddhibhrājamānā rathā me pavanajavanavegairvājibhiryujyamānāḥ |
vividharipuvināśasmārakairāyudhāstrairbhṛtavalabhivibhāgānīyatāṃ sūtavṛṃdaiḥ || 14 ||
[Analyze grammar]

pattayaḥ śataśo mahyamāyāṃtvastrāgnyapāṇayaḥ |
hayamedhārhavāhasya rakṣaṇe vitatodyamāḥ || 15 ||
[Analyze grammar]

ityākarṇya vacastasya lakṣmaṇasya mahātmanaḥ |
senānī kālajinnāmā kārayāmāsa sajjatām || 16 ||
[Analyze grammar]

daśadhruvakamaṃḍito laghusuromaśobhānvito viviktagalaśuktibhṛdvitatakaṃṭhako śemaṇiḥ mukhe viśadakāṃtidhṛttvasitakāṃtibhṛtkarṇayorvyarājata tadāha yo dhṛtakarāgraraśmicchaṭaḥ || 17 ||
[Analyze grammar]

kalāsaṃśobhitamukhaḥ sphuradratnaviśobhitaḥ |
muktāphalānāṃ mālābhiḥ śobhito niryayau hayaḥ || 18 ||
[Analyze grammar]

śvetātapatraracitaḥ sitacāmaraśobhitaḥ |
bahuśobhāparītāṃgo niryayau hayarāṭtataḥ || 19 ||
[Analyze grammar]

agrato madhyataścaike pṛṣṭhataḥ sainikāstathā |
devā hariṃ yathāpūrvaṃ sevaṃte sevanocitam || 20 ||
[Analyze grammar]

atha sainyaṃ samāhūya sarvamājñāpayattadā |
hastyaśvarathapādātavṛndaiḥ subahusaṃkulam || 21 ||
[Analyze grammar]

tatastataḥ sametānāṃ sainyānāṃ śrūyate dhvaniḥ |
tato duṃdubhinādo'bhūttasminpuravare tadā || 22 ||
[Analyze grammar]

tanninādena śūrāṇāṃ priyeṇa mahatā tadā |
kaṃpaṃti giriśṛṃgāṇi prāsādā vicalaṃti ca || 23 ||
[Analyze grammar]

heṣāravo mahānāsīdvājināṃ muhyatāṃ nṛpa |
rathāṃgaghātasaṃghuṣṭā dharā saṃcalatīva sā || 24 ||
[Analyze grammar]

calitairgajayūthaiśca pṛthvī ruddhā samaṃtataḥ |
rajastu pracalattatra janāṃtarddhānamādadhāt || 25 ||
[Analyze grammar]

nirjagāma mahāsainyaṃ chatraiḥ saṃchādya bhāskaram |
senānyākālajinnāmnā preritaṃ janasaṃkulam || 26 ||
[Analyze grammar]

garjaṃtastalavīrāgryāḥ kurvaṃto raṇasaṃbhramam |
raghunāthasya yāgāya sajjāste prayayurmudā || 27 ||
[Analyze grammar]

mṛgamadamayamaṃgeṣvaṃgarāgaṃ dadhānāḥ kusumavimalamālāśobhitasvottamāṃgāḥ |
mukuṭakaṭakabhūṣābhūṣitāṃgāḥ samastāḥ prayayuravanināthapreritāste'pi sarve || 28 ||
[Analyze grammar]

ityevaṃ te mahārājaṃ yayuḥ senācarā varāḥ |
dhanurdharāḥ pāśadharāḥ khaḍgadhārāḥ sphuṭakramāḥ || 29 ||
[Analyze grammar]

evaṃ śanaiḥśanaiḥ prāpto maṃḍapaṃ yāgacihnitam |
hayaḥ khurakṣatatalāṃ bhūmiṃ kurvannabhaḥ plavan || 30 ||
[Analyze grammar]

rāmo dṛṣṭvā hariṃ prāptaṃ bahusaṃtuṣṭamānasaḥ |
vasiṣṭhaṃ prerayāmāsa kriyākartavyatāṃ prati || 31 ||
[Analyze grammar]

vasiṣṭho rāmamāhūya svarṇapatnīsamanvitam |
prayogaṃ kārayāmāsa brahmahatyāpanodanam || 32 ||
[Analyze grammar]

brahmacaryavratadharo mṛgaśṛṃgaparigrahaḥ |
tatkarma kārayāmāsa rāmaḥ parapuraṃjayaḥ || 33 ||
[Analyze grammar]

prārebhe yāgakarmārthaṃ kuṃḍaṃ maṇḍapasaṃmitam |
tatrācāryobhavaddhīmānvedaśāstravicāravit || 34 ||
[Analyze grammar]

vasiṣṭho raghunāthasya kulapūrvagururmuniḥ |
brahmaṃstatrācaradbrahmakarmāgastyastaponidhiḥ || 35 ||
[Analyze grammar]

vālmīkirmuniradhvaryurmuniḥ kaṇvastu dvārapaḥ |
aṣṭau dvārāṇi tatrāsansatoraṇa śubhāni vai || 36 ||
[Analyze grammar]

dvāri dvāri dvayaṃ vipra brāhmaṇasyādhimaṃtravit |
pūrvadvāri muniśreṣṭhau devalāsita saṃjñitau || 37 ||
[Analyze grammar]

dakṣiṇadvāri bhūmānau kaśyapātrī taponidhī |
paścimadvāri ṛṣabhau jātūkarṇyo'tha jājaliḥ || 38 ||
[Analyze grammar]

uttaradvāri tu munī dvau dvitaikata tāpasau |
evaṃ dvāravidhiṃ kṛtvā vasiṣṭhaḥ kalaśodbhavaḥ || 39 ||
[Analyze grammar]

hayavaryasya satpūjāṃ kartumārabhata dvija |
suvāsinyaḥ striyastatra vāsolaṃkārabhūṣitāḥ || 40 ||
[Analyze grammar]

haridrākṣatagaṃdhādyaiḥ pūjayāmāsurarcitam |
nīrājanaṃ tataḥ kṛtvā dhūpayitvāgurūkṣaṇaiḥ || 41 ||
[Analyze grammar]

vardhāpanaṃ tato veśyāścakrustā vāḍavājñayā |
evaṃ saṃpūjya vimale bhāle caṃdanacarcite || 42 ||
[Analyze grammar]

kuṃkumādikagaṃdhāḍhye sarvaśobhāsamanvite |
babaṃdha bhāsvaraṃ patraṃ taptahāṭakanirmitam || 43 ||
[Analyze grammar]

tatrālikhaddāśaratheḥ pratāpabalamūrjitam |
sūryavaṃśadhvajo dhanvī dhanurdīkṣā gururguruḥ || 44 ||
[Analyze grammar]

yaṃ devāḥ sāsurāḥ sarve namaṃti maṇimaulibhiḥ |
tasyātmajo vīrabaladarpahārī raghūdvahaḥ || 45 ||
[Analyze grammar]

rāmacaṃdro mahābhāgaḥ sarvaśūraśiromaṇiḥ |
tanmātā kosalanṛpapatnīgarbhasamudbhavā || 46 ||
[Analyze grammar]

tasyāḥ kukṣibhavaṃ ratnaṃ rāmaḥ śatrukṣayaṃkaraḥ |
karoti hayamedhaṃ vai brāhmaṇena suśikṣitaḥ || 47 ||
[Analyze grammar]

rāvaṇābhidhavipreṃdra vadhapāpāpanuttaye |
mocitastena vāhānāṃ mukhyo'sau vājināṃ varaḥ || 48 ||
[Analyze grammar]

mahābalaparīvāra parikhābhiḥ surakṣitaḥ |
tadrakṣako'sti tadbhrātā śatrughno lavaṇāṃtakaḥ || 49 ||
[Analyze grammar]

hastyaśvarathapādāta senāsaṃghasamanvitaḥ |
yasya rājña iti śreṣṭho mānaḥ syātsvabalonmadāt || 50 ||
[Analyze grammar]

vayaṃ dhanurdharāḥ śūrāḥ śreṣṭhā vayamihotkaṭāḥ |
te gṛhṇaṃtu balādvāhaṃ ratnamālāvibhūṣitam || 51 ||
[Analyze grammar]

manovegaṃ kāmajavaṃ sarvagatyadhibhāsvaram |
tato mocayitā bhrātā śatrughno līlayā hayam || 52 ||
[Analyze grammar]

śarāsanavinirmukta vatsadaṃtaiḥ śikhāśitaiḥ || 53 ||
[Analyze grammar]

ityevamādi vililekha mahāmunīṃdraḥ |
śrīrāmacaṃdra bhujavīryalasatpratāpam |
śobhānidhānamaticaṃcalavāyuvegaṃ |
pātālabhūtalaviśeṣagatiṃ mumoca || 54 ||
[Analyze grammar]

śatrughnamādideśātha rāmaḥ śastrabhṛtāṃ varaḥ |
yāhi vāhasya rakṣārthaṃ pṛṣṭhataḥ svairagāminaḥ || 55 ||
[Analyze grammar]

śatrughna gaccha vāhasya mārgaṃ bhadraṃ bhavettava |
bhavetāṃ śatruvijayau ripukarṣaṇa te bhujau || 56 ||
[Analyze grammar]

ye yoddhāraḥ pratiraṇagatāste tvayā vāraṇīyā |
vāhaṃ rakṣa svakaguṇagaṇaiḥ saṃyutaḥ sanmahorvyām |
suptānbhraṣṭānvigatavasanānbhītabhītāṃstu namrāṃ |
stānmā hanyāḥ sukṛtakṛtino yena śaṃsaṃti karma || 57 ||
[Analyze grammar]

virathā bhayasaṃtrastā ye vadaṃti vayaṃ tava |
te tvayā na hi haṃtavyāḥ śatrughna sukṛtaiṣiṇā || 58 ||
[Analyze grammar]

yo hanyādvimadaṃ mattaṃ suptaṃ magnaṃ bhayāturam |
tāvako'haṃ bruvāṇaṃ ca sa vrajatyadhamāṃ gatim || 59 ||
[Analyze grammar]

parasve cittavṛttiṃ tvaṃ mā kṛthāḥ pāradārike |
nīce ratiṃ na kurvīthāḥ sarvasadguṇapūritaḥ || 60 ||
[Analyze grammar]

vṛddhānāṃ preraṇaṃ pūrvaṃ mā kurvīthā raṇaṃ jaya |
pūjyapūjātikramaṃ tvaṃ mā vidhehi dayānvitaḥ || 61 ||
[Analyze grammar]

gāṃ vipraṃ ca namaskuryā vaiṣṇavaṃ dharmasaṃyutam |
abhivādya yato gacchestatra siddhimavāpnuyāḥ || 62 ||
[Analyze grammar]

viṣṇuḥ sarveśvaraḥ sākṣī sarvavyāpakadehabhṛt |
ye tadīyā mahābāho tadrūpā vicaraṃti hi || 63 ||
[Analyze grammar]

ye smaraṃti mahāviṣṇuṃ sarvabhūtahṛdi sthitam |
te maṃtavyā mahāviṣṇu samarūpā raghūdvaha || 64 ||
[Analyze grammar]

yasya svīyo na pārakyo yasya mitrasamo ripuḥ |
te vaiṣṇavāḥ kṣaṇādeva pāpinaṃ pāvayaṃti hi || 65 ||
[Analyze grammar]

yeṣāṃ priyaṃ bhāgavataṃ yeṣāṃ vai brāhmaṇāḥ priyāḥ |
vaikuṃṭhātpreṣitāste'tra lokapāvanahetave || 66 ||
[Analyze grammar]

yeṣāṃ vaktre harernāma hṛdi viṣṇuḥ sanātanaḥ |
udare viṣṇunaivedyaḥ sa śvapāko'pi vaiṣṇavaḥ || 67 ||
[Analyze grammar]

yeṣāṃ vedāḥ priyatamā na ca saṃsārajaṃ sukham |
svadharmaniratā ye ca tānnamaskurvihānvitān || 68 ||
[Analyze grammar]

śive viṣṇau na vā bhedo na ca brahmamaheśayoḥ |
teṣāṃ pādarajaḥ pūtaṃ vahāmyaghavināśanam || 69 ||
[Analyze grammar]

gaurī gaṃgā mahālakṣmīryasya nāsti pṛthaktayā |
te maṃtavyā narāḥ sarve svargalokādihāgatāḥ || 70 ||
[Analyze grammar]

śaraṇāgatarakṣī ca mānadānaparāyaṇaḥ |
yathāśakti hareḥ prītyai sa jñeyo vaiṣṇavottamaḥ || 71 ||
[Analyze grammar]

yasya nāma mahāpāparāśiṃ dahati satvaram |
tadīya caraṇadvaṃdve bhaktiryasya sa vaiṣṇavaḥ || 72 ||
[Analyze grammar]

iṃdriyāṇi vaśe yeṣāṃ mano'pi hariciṃtakam |
tānnamaskṛtya pūyātsahyā janmamaraṇāṃtikāt || 73 ||
[Analyze grammar]

parastriyaṃ tvaṃ karavālavattyajanbhaveryaśobhūṣaṇabhūtibhūmiḥ |
evaṃ mamādeśamathācaraṃśca labheḥ paraṃ dhāma suyogamīḍyam || 74 ||
[Analyze grammar]

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe |
śatrughnaśikṣākathanaṃnāma daśamo'dhyāyaḥ || 10 ||
[Analyze grammar]