Chapter 9

[English text for this chapter is available]

śrīrāma uvāca |
kīdṛśo'śvastatra bhāvyaḥ ko vidhistatra pūjane |
kathaṃ vā śakyate kartuṃ ke jeyāstatra vairiṇaḥ || 1 ||
[Analyze grammar]

agastya uvāca |
gaṃgājalasamānena varṇena vapuṣā śubhaḥ |
karṇe śyāmo mukhe raktaḥ pītaḥ pucche sulakṣitaḥ || 2 ||
[Analyze grammar]

manovegaḥ sarvagatiruccaiḥśravassamaprabhaḥ |
vājimedhe hayaḥ proktaḥ śubhalakṣaṇalakṣitaḥ || 3 ||
[Analyze grammar]

vaiśākhapūrṇamāsyāṃ tu pūjayitvā yathāvidhi |
patraṃ likhitvā bhāle tu svanāmabalacihnitam || 4 ||
[Analyze grammar]

mocanīyaḥ prayatnena rakṣakaiḥ parirakṣitaḥ |
yatra gacchati yajñāśvastatra gacchetsurakṣakaḥ || 5 ||
[Analyze grammar]

yastaṃbalānnibadhnāti svavīryabaladarpitaḥ |
tasmātprasabhamāneyaḥ parirakṣākarairhayaḥ || 6 ||
[Analyze grammar]

kartrā tāvatsuvidhinā sthātavyaṃ niyamādiha |
mṛgaśṛṃgadharo bhūtvā brahmacaryasamanvitaḥ || 7 ||
[Analyze grammar]

vrataṃ pālayamānasya yāvadvarṣamatikramet |
tāvaddīnāṃdhakṛpaṇāḥ paritoṣyā dhanādibhiḥ || 8 ||
[Analyze grammar]

annaṃ tu bahuśo deyaṃ dhanaṃ vā bhūri māriṣa |
yadyatprārthayate dhīmāṃstattadeva dadāti hi || 9 ||
[Analyze grammar]

evaṃ prakurvataḥ karma yajñaḥ saṃpūrṇatāṃ gataḥ |
karoti sarvapāpānāṃ nāśanaṃ ripunāśana || 10 ||
[Analyze grammar]

tasmādbhavānsamartho'sti karaṇe pālane'rcane |
kṛtvā kīrtiṃ suvimalāṃ pāvayānyāñjanānnṛpa || 11 ||
[Analyze grammar]

śrīrāma uvāca |
vilokaya dvijaśreṣṭha vājiśālāṃ mamādhunā |
tādṛśāḥ saṃti no vāśvāḥ śubhalakṣaṇalakṣitāḥ || 12 ||
[Analyze grammar]

iti śrutvā tu tadvākyamagastyaḥ karuṇākaraḥ |
uttasthau vīkṣamāṇo'yaṃ yāgārhānvājinaḥ śubhān || 13 ||
[Analyze grammar]

gatvātha tatra śālāyāṃ rāmacaṃdrasamanvitaḥ |
dadarśāśvānvicitrāṃgānmanovegānmahābalān || 14 ||
[Analyze grammar]

avanitalagatāḥ kiṃ vājirājasya vaṃśyāḥ kimatha raghupatīnāmekataḥ kīrtipiṃḍāḥ |
kimidamamṛtarāśirvāharūpeṇa siṃdhormuniriti manasoṃtarvismayaṃ prāpa paśyan || 15 ||
[Analyze grammar]

ekataḥ śoṇadehānāṃ vājināṃ paṃktiruttamā |
ekataḥ śyāmakarṇāśca kastūrīkāṃtisaprabhāḥ || 16 ||
[Analyze grammar]

ekataḥ kanakābhāśca tvanyato nīlavarṇinaḥ |
ekataḥ śabalairvarṇairviśiṣṭairvājibhirvṛtāḥ || 17 ||
[Analyze grammar]

evaṃ paśyanmuniḥ sarvānkautukāviṣṭamānasaḥ |
yayāvanyatra tāndraṣṭuṃ yāgayogyānhayānmuniḥ || 18 ||
[Analyze grammar]

dadarśa tatra śataśo baddhāṃstādṛśavarṇakān |
dṛṣṭvā vismayamāpede sa munirharṣitāṃgakaḥ || 19 ||
[Analyze grammar]

ekataḥ śyāmakarṇāṃśca sarvāṃgaiḥ kṣīrasannibhān |
pītapucchānmukhe raktāñchubhalakṣaṇalakṣitān || 20 ||
[Analyze grammar]

nirīkṣya parito'naghānvimalanīradhārānibhānmanojavanaśobhitānvimalakīrtipuṃjaprabhān |
payonidhiviśoṣako muniruvācasītāpatiṃ vicitrahayadarśanāddhṛṣitanetravaktraprabhaḥ || 21 ||
[Analyze grammar]

agastya uvāca |
hayamedhakratau yogyānvāhāṃste bahuśaḥ śubhān |
paśyato netrayorme'dya tṛptirnāsti raghūttama || 22 ||
[Analyze grammar]

rāmacaṃdra mahābhāga surāsuranamaskṛta |
yajñaṃ kuru mahārāja hayamedhaṃ suvistaram || 23 ||
[Analyze grammar]

surapatiriva sarvānyajñasaṃghānkariṣyaṃstapana iva suparvārātitoyaṃ viśoṣyan |
hataripugaṇamukhyaṃ sāṃparāyaṃ vijitya kṣititalasukhabhogaṃ kurvidaṃ bhūribhāga || 24 ||
[Analyze grammar]

ityevaṃ vākyavādena parituṣṭākhileṃdriyaḥ |
sarvānvai yajñasaṃbhārānājahāra manoharān || 25 ||
[Analyze grammar]

munyanvito mahārājaḥ sarayūtīramāgataḥ |
suvarṇalāṃgalairbhūmiṃ vicakarṣa mahīyasīm || 26 ||
[Analyze grammar]

vilikhya bhūmiṃ bahuśaścaturyojanasaṃmitām |
maṃḍapānracayāmāsa yajñārthaṃ sa narottamaḥ || 27 ||
[Analyze grammar]

kuṃḍaṃ tu vidhivatkṛtvā yonimekhalayānvitam |
anekaratnaracitaṃ sarvaśobhāsamanvitam || 28 ||
[Analyze grammar]

munīśvaro mahābhāgo vasiṣṭhaḥ sumahātapāḥ |
sarvaṃ tatkārayāmāsa vedaśāstravidhiśritam || 29 ||
[Analyze grammar]

preṣitāstena muninā śiṣyā munivarāśramān |
kathayāmāsurudyuktaṃ hayamedhe raghūttamam || 30 ||
[Analyze grammar]

ākāritāstadā sarve ṛṣayastapatāṃ varāḥ |
ājagmuḥ parameśasya darśane tvatilālasāḥ || 31 ||
[Analyze grammar]

nāradositanāmā ca parvataḥ kapilo muniḥ |
jātūkarṇyoṃ'girā vyāsa ārṣṭiṣeṇo'trirāsuriḥ || 32 ||
[Analyze grammar]

hārīto yājñavalkyaśca saṃvartaḥ śukasaṃjñitaḥ |
ityevamādayo rāma hayamedhavaraṃ yayuḥ || 33 ||
[Analyze grammar]

tānsarvānpūjayāmāsa raghurājo mahāmanāḥ |
pratyutthānābhivādābhyāmarghyaviṣṭarakādibhiḥ || 34 ||
[Analyze grammar]

gāṃ hiraṇyaṃ dadau tebhyaḥ prāyaśo dṛṣṭavikramaḥ |
mahadbhāgyaṃ tvadyame'sti yadyūyaṃ darśanaṃ gatāḥ || 35 ||
[Analyze grammar]

śeṣa uvāca |
evaṃ samākule brahmannṛṣivarya samāgame |
dharmavārtā babhūvāho varṇāśramasusaṃmatā || 36 ||
[Analyze grammar]

vātsyāyana uvāca |
kā dharmavārtā tatrāsītkiṃ vā kathitamadbhutam |
sādhavaḥ sarvalokānāṃ kāruṇyātkimutābruvan || 37 ||
[Analyze grammar]

śeṣa uvāca |
tānsametānmunīndṛṣṭvā rāmo dāśarathirmahān |
papraccha sarvadharmāṃśca sarvavarṇāśramocitān || 38 ||
[Analyze grammar]

te tu pṛṣṭā hi rāmeṇa dharmānprocurmahāguṇān |
tānpravakṣyāmi te sarvānyathāvidhi śṛṇuṣva tān || 39 ||
[Analyze grammar]

ṛṣaya ūcuḥ |
brāhmaṇena sadā kāryaṃ yajanādhyayanādikam |
vedānpaṭhitvā virajo naiva gārhasthyamāviśet || 40 ||
[Analyze grammar]

brāhmaṇena sadā tyājyaṃ nīcasevānujīvanam |
āpadgato'pi jīveta na śvavṛttyā kadācana || 41 ||
[Analyze grammar]

ṛtukālābhigamanaṃ dharmo'yaṃ gṛhiṇaḥ paraḥ |
strīṇāṃ varamanusmṛtyā'patyakāmothavā bhavet || 42 ||
[Analyze grammar]

divābhigamanaṃ puṃsāmanāyuṣyakaraṃ matam |
śrāddhāhaḥ sarvaparvāṇi yatastyājyāni dhīmatā || 43 ||
[Analyze grammar]

tatra gacchetstriyaṃ mohāddharmātpracyavate parāt |
ṛtukālābhigāmī yaḥ svadāranirataśca yaḥ || 44 ||
[Analyze grammar]

sarvadā brahmacārī ha vijñeyaḥ sa gṛhāśramī |
ṛtuḥ ṣoḍaśayāminyaścatasrastā sugarhitāḥ || 45 ||
[Analyze grammar]

putradāstāsu yā yugmā ayugmāḥ kanyakāpradāḥ |
tyaktvā caṃdramasaṃ duṣṭaṃ maghāṃ mūlaṃ vihāya ca || 46 ||
[Analyze grammar]

śuciḥ sannirviśetpatnīṃ puṃnāmarkṣe viśeṣataḥ |
śuciṃ putraṃ prasūyeta puruṣārthaprasādhanam || 47 ||
[Analyze grammar]

ārṣe vivāhe godvaṃdvaṃ yaduktaṃ tatpraśasyate |
śulkamaṇvapi kanyāyāḥ kanyākretustu pāpakṛt || 48 ||
[Analyze grammar]

vāṇijyaṃ nṛpateḥ sevā vedānadhyayanaṃ tathā |
kuvivāhaḥ kriyālopaḥ kulapātanahetavaḥ || 49 ||
[Analyze grammar]

annodaka payo mūlaphalairvāpi gṛhāśramī |
godānena tu yatpuṇyaṃ pātrāya vidhipūrvakam || 50 ||
[Analyze grammar]

anarcito'tithirgehādbhagnāśo yasya gacchati |
ājanmasaṃcitātpuṇyātkṣaṇātsa hi bahirbhavet || 51 ||
[Analyze grammar]

pitṛdevamanuṣyebhyo dattvāśnītāmṛtaṃ gṛhī |
svārthaṃ pacatyaghaṃ bhuṃkte kevalaṃ svodaraṃbhariḥ || 52 ||
[Analyze grammar]

ṣaṣṭhyaṣṭamyorviśetpāpaṃ taile māṃse sadaiva hi |
caturdaśyāṃ tathāmāyāṃ tyajeta kṣuramaṃganām || 53 ||
[Analyze grammar]

rajasvalāṃ na seveta nāśnīyātsaha bhāryayā |
ekavāsā na bhuṃjīta na bhuṃjītotkaṭāsane || 54 ||
[Analyze grammar]

nāśnaṃtīṃ striyamīkṣeta tejaḥkāmo narottamaḥ |
mukhenopadhamennāgniṃ nagnāṃ nekṣeta yoṣitam || 55 ||
[Analyze grammar]

nāṃghrī pratāpayedagnau na vastvaśuci nikṣipet |
prāṇihiṃsāṃ na kurvīta nāśnīyātsaṃdhyayordvayoḥ || 56 ||
[Analyze grammar]

nācakṣīta dhayaṃtīṃ gāṃ neṃdracāpaṃ pradarśayet |
na divodgatasāraṃ ca bhakṣayeddadhino niśi || 57 ||
[Analyze grammar]

strīṃ dharmiṇīṃ nābhivādennādyādātṛpti rātriṣu |
tauryatrikapriyo na syātkāṃsye pādau na dhāvayet || 58 ||
[Analyze grammar]

na dhārayedanyabhuktaṃ vāsaścopānahāvapi |
na bhinnabhājane'śnīyānnāśnītānnaṃ vidūṣitam || 59 ||
[Analyze grammar]

saṃviśennārdracaraṇo nocchiṣṭaḥ kvacidāvrajet |
śayāno vā na cāśnīyānnocchiṣṭaḥ saṃspṛśecchiraḥ || 60 ||
[Analyze grammar]

na manuṣyastutiṃ kuryānnātmānamavamānayet |
abhyudyataṃ na praṇametparamarmāṇi no vadet || 61 ||
[Analyze grammar]

evaṃ gārhasthyamāśritya vānaprasthāśramaṃ vrajet |
sastrīko vā gatastrīko virajyeta tataḥ param || 62 ||
[Analyze grammar]

ityevamādayo dharmā gaditā ṛṣibhistadā |
śrutā rāmeṇa mahatā sarvalokahitaiṣiṇā || 63 ||
[Analyze grammar]

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe sarvadharmopadeśonāma navamo'dhyāyaḥ || 9 ||
[Analyze grammar]