Chapter 22

[English text for this chapter is available]

vyāsa uvāca |
praśnamekaṃ mahābhāga kariṣye sāṃprataṃ vada |
tvayaiva pūrvamuktaṃ hi suvrataṃ ca pratīśvaram || 1 ||
[Analyze grammar]

pūrvābhyāsena saṃdhyāyannārāyaṇamanāmayam |
kasyāṃ jñātyāṃ samutpannaḥ suvrataḥ pūrvajanmani || 2 ||
[Analyze grammar]

tanme tvaṃ sāṃprataṃ brūhi kathamārādhito hariḥ |
anenāpi sa deveśa koyaṃ puṇyasamāvilaḥ || 3 ||
[Analyze grammar]

brahmovāca |
vaidiśe nagare puṇye sarvaṛddhisamākule |
tatra rājā mahātejā ṛtadhvajasuto balī || 4 ||
[Analyze grammar]

tasyātmajo mahāprājño rukmabhūṣaṇaviśrutaḥ |
saṃdhyāvalī tasya bhāryā dharmapatnī yaśasvinī || 5 ||
[Analyze grammar]

tasyāṃ putraṃ samutpādya sa ātmasadṛśaṃ tataḥ |
tasya dharmāṃgadaṃ nāma cakāra nṛpanaṃdanaḥ || 6 ||
[Analyze grammar]

sarvalakṣaṇasaṃpannaḥ pitṛbhaktiparāyaṇaḥ |
rukmāṃgadasya tanayo yoyaṃ bhagavatāṃ varaḥ || 7 ||
[Analyze grammar]

pituḥ saukhyāya yenāpi mohinyai tu śiro dade |
vaiṣṇavena ca dharmeṇa pitṛbhaktyā tu tasya hi || 8 ||
[Analyze grammar]

suprasanno hṛṣīkeśaḥ sakāyo vaiṣṇavaṃ padam |
nītastu sarvadharmajño vaiṣṇavaḥ sātvatāṃ varaḥ || 9 ||
[Analyze grammar]

dharmāṃgado mahāprājñaḥ prajñājñānaviśāradaḥ |
tatrastho vai mahāprājño dharmosau dharmabhūṣaṇaḥ || 10 ||
[Analyze grammar]

divyānmanonugānbhogānmodamānaḥ prabhuṃjati |
pūrṇe yugasahasrāṃte dharmo vai dharmabhūṣaṇaḥ || 11 ||
[Analyze grammar]

tasmātpadātparibhraṣṭo viṣṇoścaiva prasādataḥ |
suvrato nāma medhāvī sumanānaṃdavarddhanaḥ || 12 ||
[Analyze grammar]

somaśarmasya tanayaḥ śreṣṭho bhagavatāṃ varaḥ |
tapaścacāra medhāvī viṣṇudhyānaparobhavat || 13 ||
[Analyze grammar]

kāmakrodhādikāndoṣānparityajya dvijottamaḥ |
saṃyamyacaindriyaṃ vargaṃ tapastepe niraṃtaram || 14 ||
[Analyze grammar]

vaiḍūryaparvataśreṣṭhe siddheśvarasya sannidhau |
ekīkṛtya manaścāyaṃ saṃyojya viṣṇunā saha || 15 ||
[Analyze grammar]

evaṃ varṣaśataṃ sthitvā dhyānenāsya mahātmanaḥ |
suprasanno jagannāthaḥ śaṃkhacakragadādharaḥ || 16 ||
[Analyze grammar]

tasmai varaṃ dadāvanyaṃ salakṣmyā saha keśavaḥ |
bhobhoḥ suvrata dharmātmanbudhyasva vibudhāṃvara || 17 ||
[Analyze grammar]

varaṃ varaya bhadraṃ te kṛṣṇo'haṃ te samāgataḥ |
evamākarṇya medhāvī viṣṇorvākyamanuttamam || 18 ||
[Analyze grammar]

harṣeṇa mahatāviṣṭo dṛṣṭvā devaṃ janārdanam |
baddhāṃjalipuṭo bhūtvā praṇāmamakarottadā || 19 ||
[Analyze grammar]

suvrata uvāca |
saṃsārasāgaramatīva mahāsuduḥkhajālormibhirvividhamohacayaistaraṃgaiḥ |
saṃpūrṇamasti nijadoṣaguṇaistu prāptastasmātsamuddhara janārdanamāśudīnam || 20 ||
[Analyze grammar]

karmāṃbude mahati garjativarṣatīva vidyullatollasatipātakasaṃcayairme |
mohāṃdhakārapaṭalairmama nāsti dṛṣṭirdīnasya tasya madhusūdana dehi hastam || 21 ||
[Analyze grammar]

saṃsārakānanaghanaṃ bahuduḥkhavṛkṣaiḥ saṃsevyamānamapi mohamayaiśca siṃhaiḥ |
saṃdīptamasti karuṇābahuvahnitejaḥ saṃtapyamānamaniśaṃ paripāhi kṛṣṇa || 22 ||
[Analyze grammar]

saṃsāravṛkṣamatijīrṇamapīha uccaṃ māyāsukaṃdakaruṇā bahuduḥkhaśākham |
jāyādisaṃgacchadanaṃ phalitaṃ murāre tatrādhirūḍhapatitaṃ bhagavanhi rakṣa || 23 ||
[Analyze grammar]

duḥkhānalairvividhamohamayaiḥ sudhūmaiḥ śokairviyogamaraṇāṃtika sannibhaiśca |
dagdhosmi kṛṣṇa satataṃ mama dehi mokṣaṃ jñānāṃbudaiḥ samabhiṣiṃca sadaiva māṃ tvam || 24 ||
[Analyze grammar]

ghorāṃdhakārapaṭale mahatīva garte saṃsāranāmnipatitaṃ satataṃ hi kṛṣṇa |
tvaṃ satkṛpo mama hi dīnabhayāturasya tasmādvirajyaśaraṇaṃ tava āgatosmi || 25 ||
[Analyze grammar]

tvāmeva ye niyatamānasabhāvayuktā dhyāyaṃti jñānamanasā padavīṃ labhaṃte |
natvaiva pādayugalaṃ ca mahāsupuṇyaṃ yaddevakinnaragaṇāḥ pariciṃtayaṃti || 26 ||
[Analyze grammar]

nānyaṃ vadāmi na bhajāmi na ciṃtayāmi tvatpādapadmayugalaṃ satataṃ namāmi |
kāmaṃ tvameva mama pūraya medya kṛṣṇa dūreṇa yātu mama pātakasaṃcayaste || 27 ||
[Analyze grammar]

dāsosmi deva tava kiṃkarajanmajanma tvatpādapadmayugalaṃ satataṃ smarāmi || 28 ||
[Analyze grammar]

yadi kṛṣṇa prasannosi dehi me suvaraṃ prabho |
manmātāpitarau kṛṣṇa sakāyau maṃdire naya || 29 ||
[Analyze grammar]

ātmanaśca mahādeva mayāsaha na saṃśayaḥ |
śrīkṛṣṇa uvāca |
evaṃ te paramaṃ kāryaṃ bhaviṣyati na saṃśayaḥ || 30 ||
[Analyze grammar]

tasya tuṣṭo hṛṣīkeśo bhaktyā tasya pratoṣitaḥ |
prayātau vaiṣṇavaṃ lokaṃ dāhapralayavarjitau || 31 ||
[Analyze grammar]

suvratena samaṃ tau dvau sumanā somaśarmakau |
yāvatkalpadvayaṃ prāptaṃ tāvatsa suvrato dvijaḥ || 32 ||
[Analyze grammar]

bubhuje bubhuje divyāṃllokāṃścaiva mahāmate |
devakāryārthamatraiva kāśyapasya gṛhaṃ punaḥ || 33 ||
[Analyze grammar]

avatīrṇo mahāprājño vacanāttasya cakriṇaḥ |
aiṃdraṃ padaṃ hi yo bhuṃkte viṣṇoścaiva prasādataḥ || 34 ||
[Analyze grammar]

vasudatteti vikhyātaḥ sarvadevairnamaskṛtaḥ |
aiṃdraṃ padaṃ hi yo bhuṃkte sāṃprataṃ vāsavo divi || 35 ||
[Analyze grammar]

etatte sarvamākhyātaṃ sṛṣṭisaṃbaṃdhakāraṇam |
anyadevaṃ pravakṣyāmi yadeva paripṛcchasi || 36 ||
[Analyze grammar]

vyāsa uvāca |
dharmāṅgado mahāprājño rukmāṅgadasuto balī |
ādye kṛtayuge jātaḥ sṛṣṭikāle sa vāsavaḥ || 37 ||
[Analyze grammar]

tatkathaṃ devadeveśa anyo dharmāṅgado bhuvi |
anyo rukmāṃṅgado rājā kiṃ cāyaṃ tridaśādhipaḥ || 38 ||
[Analyze grammar]

etanme saṃśayaṃ jātaṃ tadbhavānvaktumarhati |
brahmovāca |
haṃta te kathayiṣyāmi sarvasaṃdehanāśanam || 39 ||
[Analyze grammar]

devasya līlāsṛṣṭyarthe vartate dvijasattama |
yathā vārāśca pakṣāśca māsāśca ṛtavo yathā || 40 ||
[Analyze grammar]

saṃvatsarāśca manavastathā yāṃti yugāḥ punaḥ |
paścātkalpaḥ samāyāti vrajāmyevaṃ janārdanam || 41 ||
[Analyze grammar]

ahameva mahāprājña mayi yāṃti carācarāḥ |
punaḥ sṛjati yogātmā pūrvavadviśvameva hi || 42 ||
[Analyze grammar]

punarahaṃ punarvedāḥ punaste devatā dvijāḥ |
tathā bhūpāśca te sarve svacaritrasamāvilāḥ || 43 ||
[Analyze grammar]

prabhavaṃti mahābhāga vidvāṃstatra na muhyati |
pūrvakalpe mahābhāgo yathā rukmāṃgado nṛpaḥ || 44 ||
[Analyze grammar]

tathā dharmāṃgadaścāyaṃ saṃjātaḥ khyātimāndvijaḥ |
rāmādayo mahāprājñā yayātirnahuṣastathā || 45 ||
[Analyze grammar]

manvādayo mahātmānaḥ prabhavaṃti layaṃti ca |
aiṃdraṃ padaṃ prabhuṃjaṃti rājāno dharmatatparāḥ || 46 ||
[Analyze grammar]

yathā dharmāṃgado vīraḥ prabhuṃjati mahatpadam |
evaṃ vedāśca devāśca purāṇāḥ smṛtipūrvakāḥ || 47 ||
[Analyze grammar]

etattu sarvamākhyātaṃ tavāgre dvijasattama |
caritaṃ suvratasyātha puṇyaṃ sugatidāyakam || 48 ||
[Analyze grammar]

avyaktaṃ tu mahābhāga prabravīmi tavāgrataḥ || 49 ||
[Analyze grammar]

iti śrīpadmapurāṇe paṃcapaṃcāśatsahasrasaṃhitāyāṃ bhūmikhaṃḍe aiṃdre suvrato |
pākhyānaṃnāma dvāviṃśo'dhyāyaḥ || 22 ||
[Analyze grammar]