Chapter 23

[English text for this chapter is available]

ṛṣaya ūcuḥ |
vicitreyaṃ kathā puṇyā dhanyā yaśovidhāyinī |
sarvapāpaharā proktā bhavatā vadatāṃ vara || 1 ||
[Analyze grammar]

sṛṣṭisaṃbaṃdhametannastadbhavānvaktumarhati |
pūrvameva yathāsṛṣṭirvistarātsūtanaṃdana || 2 ||
[Analyze grammar]

sūta uvāca |
vistareṇa pravakṣyāmi sṛṣṭisaṃhārakāraṇam |
śrutamātreṇa yasyāpi naraḥ sarvajñatāṃ vrajet || 3 ||
[Analyze grammar]

hiraṇyakaśyapenāpi vyāpitaṃ bhuvanatrayam |
tapasārādhya prabahmāṇaṃ varaṃ prāptaṃ sudurlabham || 4 ||
[Analyze grammar]

tasmāddevānmahābhāgādamaratvaṃ tathaiva ca |
devāṃllokānsa saṃvyāpya prabhutvaṃ svayamarjitam || 5 ||
[Analyze grammar]

tato devāḥ sagaṃdharvā munayo vedapāragāḥ |
nāgāśca kinnarāḥ siddhā yakṣāścaiva tathāpare || 6 ||
[Analyze grammar]

brahmāṇaṃ tu puraskṛtya jagmurnārāyaṇaṃ prabhum |
kṣīrasāgarasaṃsuptaṃ yoganidrāṃ gataṃ prabhum || 7 ||
[Analyze grammar]

taṃ saṃbodhya mahāstotrairdevāḥ prāṃjalayastathā |
saṃbuddhe sati deveśe vṛttaṃ tasya durātmanaḥ || 8 ||
[Analyze grammar]

ācacakṣurmahāprājña samākarṇya jagatpatiḥ |
nṛsiṃharūpamāsthāya hiraṇyakaśipuṃ vyahan || 9 ||
[Analyze grammar]

punarvārāharūpeṇa hiraṇyākṣo mahābalaḥ |
uddhṛtā vasudhā puṇyā asuro ghātitastadā || 10 ||
[Analyze grammar]

anyāṃścaghātayāmāsa dānavānghoradarśanān |
evaṃ caiteṣu naṣṭeṣu dānaveṣu mahatsu ca || 11 ||
[Analyze grammar]

anyeṣu teṣu naṣṭeṣu ditiputreṣu vai tadā |
punaḥ sthāneṣu prāpteṣu deveṣu ca mahatsu ca || 12 ||
[Analyze grammar]

yajñeṣveva pravṛtteṣu sarveṣu dharmakarmasu |
sustheṣu sarvalokeṣu sā ditirduḥkhapīḍitā || 13 ||
[Analyze grammar]

putraśokena saṃtaptā hāhābhūtā vicetanā |
bhartāraṃ sūryasaṃkāśaṃ tapastejaḥ samanvitam || 14 ||
[Analyze grammar]

dātāraṃ ca mahātmānaṃ bhartāraṃ kaśyapaṃ tadā |
bhaktyā praṇamya viprendra tamuvāca mahāmatim || 15 ||
[Analyze grammar]

bhagavannaṣṭaputrāhaṃ kṛtā devena cakriṇā |
daiteyā dānavāḥ sarve devaiścaiva nipātitāḥ || 16 ||
[Analyze grammar]

putraśokānalenāhaṃ saṃtaptā munisattama |
mamānaṃdakaraṃ putraṃ sarvatejoharaṃ vibho || 17 ||
[Analyze grammar]

subalaṃ cārusarvāṃgaṃ devarājasamaprabham |
buddhimaṃtaṃ susarvajñaṃ jñātāraṃ sarvapaṃḍitam || 18 ||
[Analyze grammar]

tapastejaḥ samāyuktaṃ sabalaṃ cārulakṣaṇam |
brahmaṇyaṃ jñānavettāraṃ devabrāhmaṇapūjakam || 19 ||
[Analyze grammar]

jetāraṃ sarvalokānāṃ mamānaṃdakaraṃ dvija |
sarvalakṣaṇasaṃpannaṃ putraṃ me dehi tvaṃ vibho || 20 ||
[Analyze grammar]

evamākarṇya vai tasyāḥ kaśyapo vākyamuttamam |
kṛpāviṣṭamanāstuṣṭo duḥkhitāyā dvijottama || 21 ||
[Analyze grammar]

tāmuvāca mahābhāga kṛpaṇāṃ dīnamānasām |
tasyāḥ śirasi saṃnyasya svahastaṃ bhāvatatparaḥ || 22 ||
[Analyze grammar]

bhaviṣyati mahābhāge yādṛśo vāṃchitaḥ sutaḥ |
evamuktvā jagāmāsau meruṃ girivarottamam || 23 ||
[Analyze grammar]

tapastepe nirālaṃbaḥ sādhayanparamavrataḥ |
etasminnaṃtare sā tu dadhāra garbhamuttamam || 24 ||
[Analyze grammar]

sā ditiḥ sarvadharmajñā cārukarmā manasvinī |
śatavarṣapramāṇaṃ sā śuci svāṃtā babhūva ha || 25 ||
[Analyze grammar]

tayā vai janitaḥ putro brahmatejaḥ samanvitaḥ |
atha kaśyapa āyāto harṣeṇa mahatānvitaḥ || 26 ||
[Analyze grammar]

cakāra nāma medhāvī tasya putrasya sattamaḥ |
balamityabravītputraṃ nāmataḥ sadṛśo mahān || 27 ||
[Analyze grammar]

evaṃ nāma cakārātha vratabaṃdhaṃ cakāra saḥ |
prāha putra mahābhāga brahmacaryaṃ prasādhaya || 28 ||
[Analyze grammar]

evamevaṃ kariṣyāmi tava vākyaṃ dvijottama |
vedasyādhyayanaṃ kuryāṃ brahmacaryeṇa sattama || 29 ||
[Analyze grammar]

evaṃ varṣaśataṃ sāgraṃ gataṃ tasya tapasyataḥ |
mātuḥ samakṣamāyātastapastejaḥ samanvitaḥ || 30 ||
[Analyze grammar]

tapovīryamayaṃ divyaṃ brahmacaryaṃ mahātmanaḥ |
ditiḥ paśyati putrasya harṣeṇa mahatānvitā || 31 ||
[Analyze grammar]

tamuvāca mahātmānaṃ balaṃ putraṃ tapasvinam |
medhāvinaṃ mahātmānaṃ prajñājñānaviśāradam || 32 ||
[Analyze grammar]

tvayi jīvati medhāvinprajīvaṃti sutā mama |
hiraṇyakaśipādyāste ye hatāścakrapāṇinā || 33 ||
[Analyze grammar]

vairaṃ sādhaya me vatsa jahi devānripūnraṇe |
sā danustamuvācedaṃ balaṃ putraṃ mahābalam || 34 ||
[Analyze grammar]

ādāviṃdraṃ hi deveṃdraṃ drutaṃ sūdaya putraka |
paścāddevā nipātyaṃtāṃ tato garuḍavāhanaḥ || 35 ||
[Analyze grammar]

tayorākarṇya sā devī aditiḥ patidevatā |
duḥkhena mahatāviṣṭā putramiṃdramabhāṣata || 36 ||
[Analyze grammar]

ditiputro mahākāyo varddhate brahmatejasā |
devānāṃ hi vadhārthāya tapastepe niraṃjane || 37 ||
[Analyze grammar]

evaṃ jānīhi deveśa yadi kṣemamihecchasi |
evamākarṇya tadvākyaṃ sa mātuḥ pākaśāsanaḥ || 38 ||
[Analyze grammar]

ciṃtāmavāpa duḥkhena mahatīṃ devarāṭtadā |
mahābhayena saṃtrastaściṃtayāmāsa vai tataḥ || 39 ||
[Analyze grammar]

kathamenaṃ haniṣyāmi devadharmavidūṣakam |
iti niścitya deveśo balasya nidhanaṃ prati || 40 ||
[Analyze grammar]

ekadā hi balaḥ sopi saṃdhyārthaṃ siṃdhumāśritaḥ |
kṛṣṇājinena divyena daṃḍakāṣṭhena rājitaḥ || 41 ||
[Analyze grammar]

amalenāpi puṇyena brahmacaryeṇa tena saḥ |
sāgarasyopakaṃṭhe taṃ saṃdhyāsanamupāgatam || 42 ||
[Analyze grammar]

japamānaṃ suśāṃtaṃ taṃ dadṛśe pākaśāsanaḥ |
vajreṇa tena divyena tāḍito ditinaṃdanaḥ || 43 ||
[Analyze grammar]

balaṃ nipatitaṃ dṛṣṭvā gatasatvaṃ gataṃ bhuvi |
harṣeṇa mahatāviṣṭo devarāṇmumude tadā || 44 ||
[Analyze grammar]

evaṃ nipātya taṃ daityaṃ ditinaṃdanameva ca |
rājyaṃ cakāra dharmātmā sukhena pākaśāsanaḥ || 45 ||
[Analyze grammar]

iti śrīpadmapurāṇe paṃcapaṃcāśatsahasrasaṃhitāyāṃ bhūmikhaṃḍe bala |
daityavadhonāma trayoviṃśo'dhyāyaḥ || 23 ||
[Analyze grammar]