Chapter 115

yathākathitadoṣaparihāropadeśo nāma sargaḥ |
pañcadaśottaraśatatamaḥ sargaḥ |
vālmīkiḥ |
evamukto bhagavatā vasiṣṭhena mahātmanā |
rāmaḥ kamalapattrākṣa unmīlita ivābabhau || 1 ||
[Analyze grammar]

vikāsitāntaḥkaraṇaśśobhāmalamupāyayau |
āśvastastamasi kṣīṇe padmo'rkālokavāniva || 2 ||
[Analyze grammar]

bodhavismayasañjātasaumyasmitasitānanaḥ |
dantaraśmisudhādhautāmimāṃ vācamuvāca ca || 3 ||
[Analyze grammar]

rāmaḥ |
aho nu citraṃ padmotthairbaddhāstantubhiradrayaḥ |
avidyamānā yāvidyā tayā sarve vaśīkṛtāḥ || 4 ||
[Analyze grammar]

idaṃ tadvajratāṃ yātaṃ rūpamasmiñjagattraye |
avidyayāpi yannāma sadevāsadiva sthitam || 5 ||
[Analyze grammar]

asyāḥ saṃsāramāyāyā naṭyāstribhuvanāṅgane |
rūpaṃ sadavabodhārthaṃ kathayānugrahātpunaḥ || 6 ||
[Analyze grammar]

anyacca saṃśayo'yaṃ me mahātman hṛdi vartate |
lavaṇo'sau mahābhāgaḥ kiṃ tāmāpadamāptavān || 7 ||
[Analyze grammar]

saṃśliṣṭayorahatayordvayorvā dehadehinoḥ |
brahman ka iva saṃsārī śubhāśubhaphalaikabhuk || 8 ||
[Analyze grammar]

lavaṇasya tathā dattvā tāmāpadamanuttamām |
kiṃ gataścañcalārambhaḥ kaścāsāvaindrajālikaḥ || 9 ||
[Analyze grammar]

vasiṣṭhaḥ |
kāṣṭhakuḍyopamo deho na kiñcana ivānagha |
svapnāloka ivānena cetasā parikalpyate || 10 ||
[Analyze grammar]

cetastu jīvatāṃ yātaṃ cicchaktiparirūṣitam |
viddhi saṃsāri sumate kapipotakacañcalam || 11 ||
[Analyze grammar]

ceto hi karmabhāgdehe nānākāraṃ śarīradhṛt |
ahaṅkāramanojīvanāmabhiḥ parikathyate || 12 ||
[Analyze grammar]

tasyemānyaprabuddhasya suprabuddhasya rāghava |
sukhadukhānyanantāni na śarīrasya kānicit || 13 ||
[Analyze grammar]

aprabuddhaṃ mano nānāsañjñākalpitakalpanam |
vṛttīranupataccitrā vicitrākṛtitāṃ gatam || 14 ||
[Analyze grammar]

aprabuddham bhaved yāvannidrāntaṃ tāvadeva hi |
sambhramaṃ paśyati svapne na prabuddhaḥ kadācana || 15 ||
[Analyze grammar]

ajñānanidrākulito jīvo yāvanna bodhitaḥ |
tāvatpaśyati durbodhaṃ saṃsārārambhavibhramam || 16 ||
[Analyze grammar]

samprabuddhasya manasastamaḥ sarvaṃ vilīyate |
kamalasya yathā hyāndhyaṃ dinālokavikāsinaḥ || 17 ||
[Analyze grammar]

cittāvidyāmanojīvavāsaneti kṛtātmabhiḥ |
karmātmeti ca yaḥ proktaḥ sa dehī duḥkhakovidaḥ || 18 ||
[Analyze grammar]

jaḍo deho na duḥkhārho duḥkhī jīvo'vicārataḥ |
avicāro ghanājñānādajñānaṃ duḥkhakāraṇam || 19 ||
[Analyze grammar]

śubhāśubhānāṃ dharmāṇāṃ jīvo viṣayatāṃ gataḥ |
avivekaikadoṣeṇa kośe nedaṃ mahāpadam || 20 ||
[Analyze grammar]

avivekāmayottabdhaṃ mano vividhavṛttimat |
nānākāravihāreṇa paribhramati cakravat || 21 ||
[Analyze grammar]

udeti rauti hantyatti yāti valgati nandati |
mana eva śarīre'sminna śarīraṃ kadācana || 22 ||
[Analyze grammar]

yathā gṛhapatirgehe rathe vā sārathiryathā |
yathā bhujaṅgo bhastrāyāṃ śarīre'smiṃstathā manaḥ || 23 ||
[Analyze grammar]

acale cañcalākāraḥ pādape pavano yathā |
sphuratyevaṃ mano dehe sthito deho na cetasi || 24 ||
[Analyze grammar]

sarveṣu sukhaduḥkheṣu sarvāsu kalanāsu ca |
manaḥ kartṛ mano bhoktṛ mānasaṃ viddhi mānavam || 25 ||
[Analyze grammar]

atra te śṛṇu vakṣyāmi vṛttāntamimamadbhutam |
lavaṇo'sau yathā yātaścaṇḍālatvaṃ manobhramāt || 26 ||
[Analyze grammar]

manaḥ karmaphalaṃ bhuṅkte śubhaṃ vāśubhameva vā |
yathaitadbudhyase nūnaṃ tathākarṇaya rāghava || 27 ||
[Analyze grammar]

hariścandrakulotthena lavaṇena purānagha |
ekāntaikopaviṣṭena cintitaṃ manasā ciram || 28 ||
[Analyze grammar]

pitāmaho me sumahān rājasūyasya yājakaḥ |
ahaṃ tasya kule jātastaṃ yaje manasā makham || 29 ||
[Analyze grammar]

iti sañcintya manasā kṛtvā sambhāramāditaḥ |
rājasūyasya dīkṣāyāṃ viveśa sa mahīpatiḥ || 30 ||
[Analyze grammar]

ṛtvijaścārcayāmāsa pūjayāmāsa sanmunīn |
devatā vandayāmāsa jvālayāmāsa pāvakam || 31 ||
[Analyze grammar]

tasyetthaṃ yajamānasya manasyupavanāntare |
yayau saṃvatsaraḥ sāgro devarṣidvijapūjayā || 32 ||
[Analyze grammar]

bhūtebhyo dvijapūrvebhyo dattvā sarvasvadakṣiṇām |
vyabudhyata dinasyānte svasminnupavane nṛpaḥ || 33 ||
[Analyze grammar]

evaṃ sa lavaṇo rājā rājasūyamavāptavān |
manasaiva hi puṣṭena yuktastasya phalena ca || 34 ||
[Analyze grammar]

ataścittaṃ naraṃ viddhi bhoktāraṃ sukhaduḥkhayoḥ |
tadanādāvanāyāse satye yojaya rāghava || 35 ||
[Analyze grammar]

pūrṇe cetasi sampūrṇaḥ pumānnaṣṭe vinaśyati |
deho'hamiti yeṣāṃ tu niścayastairalaṃ budhaiḥ || 36 ||
[Analyze grammar]

pūrṇe vivekavati cetasi samprabuddhe duḥkhānyalaṃ vigalitāni viviktabuddheḥ |
bhāsvatkaraprakaṭite nanu padmaṣaṇḍe saṅkocajāḍyatimirāṇi ciraṃ kṛtāni || 37 ||
[Analyze grammar]