Chapter 116

sukhaduḥkhabhokturupadeśanaṃ nāma sargaḥ |
ṣoḍaśottaraśatatamaḥ sargaḥ |
rāmaḥ |
rājasūyaphalaṃ prāptaṃ lavaṇena khila prabho |
pramāṇaṃ kimivātra syātkalpanājālaśambare || 1 ||
[Analyze grammar]

vasiṣṭhaḥ |
yadā śāmbarikaḥ kāle samprāpto lāvaṇīṃ sabhām |
tadāhamavasaṃ tatra tatpratyakṣeṇa dṛṣṭavān || 2 ||
[Analyze grammar]

ahaṃ sabhyaistatastatra gate śambarakāriṇi |
kimetaditi yatnena pṛṣṭaśca lavaṇena ca || 3 ||
[Analyze grammar]

cintayitvā mayā dṛṣṭvā tatra yatkathitaṃ tataḥ |
śṛṇu tatte pravakṣyāmi rāma śāmbarikehitam || 4 ||
[Analyze grammar]

rājasūyasya kartāro ye hi te dvādaśābdikam |
āpadduḥkhaṃ prāpnuvanti nānākāradaśāmayam || 5 ||
[Analyze grammar]

ataśśakreṇa gaganādduḥkhāya lavaṇasya saḥ |
prahito devadūto hi rāma śāmbarikākṛtiḥ || 6 ||
[Analyze grammar]

rājasūyakriyākartustasya dattvā mahāpadam |
agacchatsvanabhomārgaṃ surasiddhaniṣevitam || 7 ||
[Analyze grammar]

tasmātpratyakṣamevaitad rāma nātra sandeho'sti | mano hi vilakṣaṇānāṃ kriyāṇāṃ kartṛ bhoktṛ ca | tadeva nighṛṣya saṃśodhya cittaratnamiha himakaṇamivātapena vilīnatāṃ vivekena nītvā paraṃ śreyaḥ prāpsyasi | cittameva sakalabhuvanajagadāḍambarakāriṇīmavidyāṃ viddhi | sā vicitravikalpajālavaśādidamutpādayati | avidyācittajīvabuddhiśabdānāṃ bhedo nāsti vṛkṣataruśabdayoriveti jñātvā cittameva vilīnaṃ kuru || 8 ||
[Analyze grammar]

abhyudite tu cittavimalārkabimbe sakalavikalpoddāmatimirahāriṇi na tadasti rāghava yanna dṛśyate yannāsādyate yannātmīkriyate yanna parityajyate yanna śrīyate nātmīyaṃ yanna parakīyaṃ | sarvaṃ sarvadā sarvo bhavatīti paramārthaḥ || 9 ||
[Analyze grammar]

bhāvarāśistathā bodhe sarvo yātyekapiṇḍatām |
vicitramṛdbhāṇḍagaṇo yathāpakvo jale sthitaḥ || 10 ||
[Analyze grammar]

rāmaḥ |
evaṃ manovṛttiparikṣaye sakalasukhaduḥkhānāmantaḥ prāpyata iti bhagavatā proktam | tatkathaṃ mahātmannaticapalavṛtteḥ svarūpasyāsya manasaḥ sattā bhavati || 11 ||
[Analyze grammar]

vasiṣṭhaḥ |
raghukulendo śṛṇu manaḥpraśamane yuktim | jñātvā svaśvavāra iva duraśvaṃ manaḥ saṃyamayiṣyasi | iha hi tāvadbrahmaṇaḥ sarvabhūtānāṃ trividhotpattiriti pūrvamuktam | tatredamprathama tayā manaḥkalanodeti | sā brahmā bhavati | brahmarūpiṇī saṅkalpamayī bhūtvā yadeva saṅkalpayati tadeva paśyati | tenedaṃ bhuvanāḍambaraṃ kalpayati | tatra jananamaraṇasukhaduḥkhamohādikaṃ saṃsaraṇaṃ kalpayantī kalpānbahūnārambhamantharaṃ sthitvā svayaṃ vilīyate himakaṇikevātapagatā || 12 ||
[Analyze grammar]

kāloditasaṅkalpavaśātpunaranyatayā jāyate | sāpi punarvilīyate | punaranyodeti saiva veti bhūyo bhūyo'nusarantī saṃsāravṛttīs | svayamupaśamayya śāmyati | itthamanantā brahmakoṭayo'sminbrahmāṇḍe'nyeṣu ca samatītā bhaviṣyanti | santi cetarā anantā yāsāṃ saṅkhyā na vidyata eva || 13 ||
[Analyze grammar]

tatrāsyāṃ dṛṣṭau vartamānāyāmīśvarādāgatya jīvo yathā jāyate yayā ca mucyate tacchṛṇu | brahmaṇo manaśśaktirutthitā purassthitāmākāśaśaktimavalambya tatrasthapavanānupātinī ghanasaṅkalpatvaṃ gacchati | tataḥ punaḥprāptabhūtatanmātrapañcakatāmetyāntaḥkaraṇanāmnī satī sūkṣmā prakṛtirbhūtvā gaganapavanasamparkātprāleyarūpatāmupetya śālyoṣadhiṣu viśati | prāṇino garbhatāṃ vā gacchati | jāyate tasmāt | tataḥ puruṣaḥ sampadyate | tena tu puruṣeṇa jātamātreṇaiva bālyātprabhṛti vidyāgrahaṇaṃ kartavyaṃ | guravo'nugantavyāḥ | tataḥ kramātpuṃsastaveva camatkṛtirjāyate | tvatsadṛśacittavṛtteḥ puruṣasya heyopādeyavicāra utpadyate || 14 ||
[Analyze grammar]

tādṛgvivekavati saṅkalitābhimāne puṃsi sthite vimalasattvamayāgryajātau saptātmikāvatarati kramaśaśśivāya cetaḥprakāśanakarī nanu yogabhūmiḥ || 15 ||
[Analyze grammar]