Chapter 41

saṃjaya uvāca |
tato dhanaṃjayaṃ dṛṣṭvā bāṇagāṇḍīvadhāriṇam |
punareva mahānādaṃ vyasṛjanta mahārathāḥ || 1 ||
[Analyze grammar]

pāṇḍavāḥ somakāścaiva ye caiṣāmanuyāyinaḥ |
dadhmuśca muditāḥ śaṅkhānvīrāḥ sāgarasaṃbhavān || 2 ||
[Analyze grammar]

tato bheryaśca peśyaśca krakacā goviṣāṇikāḥ |
sahasaivābhyahanyanta tataḥ śabdo mahānabhūt || 3 ||
[Analyze grammar]

atha devāḥ sagandharvāḥ pitaraśca janeśvara |
siddhacāraṇasaṃghāśca samīyuste didṛkṣayā || 4 ||
[Analyze grammar]

ṛṣayaśca mahābhāgāḥ puraskṛtya śatakratum |
samīyustatra sahitā draṣṭuṃ tadvaiśasaṃ mahat || 5 ||
[Analyze grammar]

tato yudhiṣṭhiro dṛṣṭvā yuddhāya susamudyate |
te sene sāgaraprakhye muhuḥ pracalite nṛpa || 6 ||
[Analyze grammar]

vimucya kavacaṃ vīro nikṣipya ca varāyudham |
avaruhya rathāttūrṇaṃ padbhyāmeva kṛtāñjaliḥ || 7 ||
[Analyze grammar]

pitāmahamabhiprekṣya dharmarājo yudhiṣṭhiraḥ |
vāgyataḥ prayayau yena prāṅmukho ripuvāhinīm || 8 ||
[Analyze grammar]

taṃ prayāntamabhiprekṣya kuntīputro dhanaṃjayaḥ |
avatīrya rathāttūrṇaṃ bhrātṛbhiḥ sahito'nvayāt || 9 ||
[Analyze grammar]

vāsudevaśca bhagavānpṛṣṭhato'nujagāma ha |
yathāmukhyāśca rājānastamanvājagmurutsukāḥ || 10 ||
[Analyze grammar]

arjuna uvāca |
kiṃ te vyavasitaṃ rājanyadasmānapahāya vai |
padbhyāmeva prayāto'si prāṅmukho ripuvāhinīm || 11 ||
[Analyze grammar]

bhīmasena uvāca |
kva gamiṣyasi rājendra nikṣiptakavacāyudhaḥ |
daṃśiteṣvarisainyeṣu bhrātṝnutsṛjya pārthiva || 12 ||
[Analyze grammar]

nakula uvāca |
evaṃgate tvayi jyeṣṭhe mama bhrātari bhārata |
bhīrme dunoti hṛdayaṃ brūhi gantā bhavānkva nu || 13 ||
[Analyze grammar]

sahadeva uvāca |
asminraṇasamūhe vai vartamāne mahābhaye |
yoddhavye kva nu gantāsi śatrūnabhimukho nṛpa || 14 ||
[Analyze grammar]

saṃjaya uvāca |
evamābhāṣyamāṇo'pi bhrātṛbhiḥ kurunandana |
novāca vāgyataḥ kiṃcidgacchatyeva yudhiṣṭhiraḥ || 15 ||
[Analyze grammar]

tānuvāca mahāprājño vāsudevo mahāmanāḥ |
abhiprāyo'sya vijñāto mayeti prahasanniva || 16 ||
[Analyze grammar]

eṣa bhīṣmaṃ tathā droṇaṃ gautamaṃ śalyameva ca |
anumānya gurūnsarvānyotsyate pārthivo'ribhiḥ || 17 ||
[Analyze grammar]

śrūyate hi purākalpe gurūnananumānya yaḥ |
yudhyate sa bhavedvyaktamapadhyāto mahattaraiḥ || 18 ||
[Analyze grammar]

anumānya yathāśāstraṃ yastu yudhyenmahattaraiḥ |
dhruvastasya jayo yuddhe bhavediti matirmama || 19 ||
[Analyze grammar]

evaṃ bruvati kṛṣṇe tu dhārtarāṣṭracamūṃ prati |
hāhākāro mahānāsīnniḥśabdāstvapare'bhavan || 20 ||
[Analyze grammar]

dṛṣṭvā yudhiṣṭhiraṃ dūrāddhārtarāṣṭrasya sainikāḥ |
mithaḥ saṃkathayāṃ cakrurneśo'sti kulapāṃsanaḥ || 21 ||
[Analyze grammar]

vyaktaṃ bhīta ivābhyeti rājāsau bhīṣmamantikāt |
yudhiṣṭhiraḥ sasodaryaḥ śaraṇārthaṃ prayācakaḥ || 22 ||
[Analyze grammar]

dhanaṃjaye kathaṃ nāthe pāṇḍave ca vṛkodare |
nakule sahadeve ca bhīto'bhyeti ca pāṇḍavaḥ || 23 ||
[Analyze grammar]

na nūnaṃ kṣatriyakule jātaḥ saṃprathite bhuvi |
yathāsya hṛdayaṃ bhītamalpasattvasya saṃyuge || 24 ||
[Analyze grammar]

tataste kṣatriyāḥ sarve praśaṃsanti sma kauravān |
hṛṣṭāḥ sumanaso bhūtvā cailāni dudhuvuḥ pṛthak || 25 ||
[Analyze grammar]

vyanindanta tataḥ sarve yodhāstatra viśāṃ pate |
yudhiṣṭhiraṃ sasodaryaṃ sahitaṃ keśavena ha || 26 ||
[Analyze grammar]

tatastatkauravaṃ sainyaṃ dhikkṛtvā tu yudhiṣṭhiram |
niḥśabdamabhavattūrṇaṃ punareva viśāṃ pate || 27 ||
[Analyze grammar]

kiṃ nu vakṣyati rājāsau kiṃ bhīṣmaḥ prativakṣyati |
kiṃ bhīmaḥ samaraślāghī kiṃ nu kṛṣṇārjunāviti || 28 ||
[Analyze grammar]

vivakṣitaṃ kimasyeti saṃśayaḥ sumahānabhūt |
ubhayoḥ senayo rājanyudhiṣṭhirakṛte tadā || 29 ||
[Analyze grammar]

sa vigāhya camūṃ śatroḥ śaraśaktisamākulām |
bhīṣmamevābhyayāttūrṇaṃ bhrātṛbhiḥ parivāritaḥ || 30 ||
[Analyze grammar]

tamuvāca tataḥ pādau karābhyāṃ pīḍya pāṇḍavaḥ |
bhīṣmaṃ śāṃtanavaṃ rājā yuddhāya samupasthitam || 31 ||
[Analyze grammar]

yudhiṣṭhira uvāca |
āmantraye tvāṃ durdharṣa yotsye tāta tvayā saha |
anujānīhi māṃ tāta āśiṣaśca prayojaya || 32 ||
[Analyze grammar]

bhīṣma uvāca |
yadyevaṃ nābhigacchethā yudhi māṃ pṛthivīpate |
śapeyaṃ tvāṃ mahārāja parābhāvāya bhārata || 33 ||
[Analyze grammar]

prīto'smi putra yudhyasva jayamāpnuhi pāṇḍava |
yatte'bhilaṣitaṃ cānyattadavāpnuhi saṃyuge || 34 ||
[Analyze grammar]

vriyatāṃ ca varaḥ pārtha kimasmatto'bhikāṅkṣasi |
evaṃ gate mahārāja na tavāsti parājayaḥ || 35 ||
[Analyze grammar]

arthasya puruṣo dāso dāsastvartho na kasyacit |
iti satyaṃ mahārāja baddho'smyarthena kauravaiḥ || 36 ||
[Analyze grammar]

atastvāṃ klībavadvākyaṃ bravīmi kurunandana |
hṛto'smyarthena kauravya yuddhādanyatkimicchasi || 37 ||
[Analyze grammar]

yudhiṣṭhira uvāca |
mantrayasva mahāprājña hitaiṣī mama nityaśaḥ |
yudhyasva kauravasyārthe mamaiṣa satataṃ varaḥ || 38 ||
[Analyze grammar]

bhīṣma uvāca |
rājankimatra sāhyaṃ te karomi kurunandana |
kāmaṃ yotsye parasyārthe brūhi yatte vivakṣitam || 39 ||
[Analyze grammar]

yudhiṣṭhira uvāca |
kathaṃ jayeyaṃ saṃgrāme bhavantamaparājitam |
etanme mantraya hitaṃ yadi śreyaḥ prapaśyasi || 40 ||
[Analyze grammar]

bhīṣma uvāca |
na taṃ paśyāmi kaunteya yo māṃ yudhyantamāhave |
vijayeta pumānkaścidapi sākṣācchatakratuḥ || 41 ||
[Analyze grammar]

yudhiṣṭhira uvāca |
hanta pṛcchāmi tasmāttvāṃ pitāmaha namo'stu te |
jayopāyaṃ bravīhi tvamātmanaḥ samare paraiḥ || 42 ||
[Analyze grammar]

bhīṣma uvāca |
na śatruṃ tāta paśyāmi samare yo jayeta mām |
na tāvanmṛtyukālo me punarāgamanaṃ kuru || 43 ||
[Analyze grammar]

saṃjaya uvāca |
tato yudhiṣṭhiro vākyaṃ bhīṣmasya kurunandana |
śirasā pratijagrāha bhūyastamabhivādya ca || 44 ||
[Analyze grammar]

prāyātpunarmahābāhurācāryasya rathaṃ prati |
paśyatāṃ sarvasainyānāṃ madhyena bhrātṛbhiḥ saha || 45 ||
[Analyze grammar]

sa droṇamabhivādyātha kṛtvā caiva pradakṣiṇam |
uvāca vācā durdharṣamātmaniḥśreyasaṃ vacaḥ || 46 ||
[Analyze grammar]

āmantraye tvāṃ bhagavanyotsye vigatakalmaṣaḥ |
jayeyaṃ ca ripūnsarvānanujñātastvayā dvija || 47 ||
[Analyze grammar]

droṇa uvāca |
yadi māṃ nābhigacchethā yuddhāya kṛtaniścayaḥ |
śapeyaṃ tvāṃ mahārāja parābhāvāya sarvaśaḥ || 48 ||
[Analyze grammar]

tadyudhiṣṭhira tuṣṭo'smi pūjitaśca tvayānagha |
anujānāmi yudhyasva vijayaṃ samavāpnuhi || 49 ||
[Analyze grammar]

karavāṇi ca te kāmaṃ brūhi yatte'bhikāṅkṣitam |
evaṃ gate mahārāja yuddhādanyatkimicchasi || 50 ||
[Analyze grammar]

arthasya puruṣo dāso dāsastvartho na kasyacit |
iti satyaṃ mahārāja baddho'smyarthena kauravaiḥ || 51 ||
[Analyze grammar]

atastvāṃ klībavadbrūmo yuddhādanyatkimicchasi |
yotsyāmi kauravasyārthe tavāśāsyo jayo mayā || 52 ||
[Analyze grammar]

yudhiṣṭhira uvāca |
jayamāśāssva me brahmanmantrayasva ca maddhitam |
yudhyasva kauravasyārthe vara eṣa vṛto mayā || 53 ||
[Analyze grammar]

droṇa uvāca |
dhruvaste vijayo rājanyasya mantrī haristava |
ahaṃ ca tvābhijānāmi raṇe śatrūnvijeṣyasi || 54 ||
[Analyze grammar]

yato dharmastataḥ kṛṣṇo yataḥ kṛṣṇastato jayaḥ |
yudhyasva gaccha kaunteya pṛccha māṃ kiṃ bravīmi te || 55 ||
[Analyze grammar]

yudhiṣṭhira uvāca |
pṛcchāmi tvāṃ dvijaśreṣṭha śṛṇu me yadvivakṣitam |
kathaṃ jayeyaṃ saṃgrāme bhavantamaparājitam || 56 ||
[Analyze grammar]

droṇa uvāca |
na te'sti vijayastāvadyāvadyudhyāmyahaṃ raṇe |
mamāśu nidhane rājanyatasva saha sodaraiḥ || 57 ||
[Analyze grammar]

yudhiṣṭhira uvāca |
hanta tasmānmahābāho vadhopāyaṃ vadātmanaḥ |
ācārya praṇipatyaiṣa pṛcchāmi tvāṃ namo'stu te || 58 ||
[Analyze grammar]

droṇa uvāca |
na śatruṃ tāta paśyāmi yo māṃ hanyādraṇe sthitam |
yudhyamānaṃ susaṃrabdhaṃ śaravarṣaughavarṣiṇam || 59 ||
[Analyze grammar]

ṛte prāyagataṃ rājannyastaśastramacetanam |
hanyānmāṃ yudhi yodhānāṃ satyametadbravīmi te || 60 ||
[Analyze grammar]

śastraṃ cāhaṃ raṇe jahyāṃ śrutvā sumahadapriyam |
śraddheyavākyātpuruṣādetatsatyaṃ bravīmi te || 61 ||
[Analyze grammar]

saṃjaya uvāca |
etacchrutvā mahārāja bhāradvājasya dhīmataḥ |
anumānya tamācāryaṃ prāyācchāradvataṃ prati || 62 ||
[Analyze grammar]

so'bhivādya kṛpaṃ rājā kṛtvā cāpi pradakṣiṇam |
uvāca durdharṣatamaṃ vākyaṃ vākyaviśāradaḥ || 63 ||
[Analyze grammar]

anumānaye tvāṃ yotsyāmi guro vigatakalmaṣaḥ |
jayeyaṃ ca ripūnsarvānanujñātastvayānagha || 64 ||
[Analyze grammar]

kṛpa uvāca |
yadi māṃ nābhigacchethā yuddhāya kṛtaniścayaḥ |
śapeyaṃ tvāṃ mahārāja parābhāvāya sarvaśaḥ || 65 ||
[Analyze grammar]

arthasya puruṣo dāso dāsastvartho na kasyacit |
iti satyaṃ mahārāja baddho'smyarthena kauravaiḥ || 66 ||
[Analyze grammar]

teṣāmarthe mahārāja yoddhavyamiti me matiḥ |
atastvāṃ klībavadbrūmi yuddhādanyatkimicchasi || 67 ||
[Analyze grammar]

yudhiṣṭhira uvāca |
hanta pṛcchāmi te tasmādācārya śṛṇu me vacaḥ || 68 ||
[Analyze grammar]

saṃjaya uvāca |
ityuktvā vyathito rājā novāca gatacetanaḥ |
taṃ gautamaḥ pratyuvāca vijñāyāsya vivakṣitam |
avadhyo'haṃ mahīpāla yudhyasva jayamāpnuhi || 69 ||
[Analyze grammar]

prītastvabhigamenāhaṃ jayaṃ tava narādhipa |
āśāsiṣye sadotthāya satyametadbravīmi te || 70 ||
[Analyze grammar]

etacchrutvā mahārāja gautamasya vacastadā |
anumānya kṛpaṃ rājā prayayau yena madrarāṭ || 71 ||
[Analyze grammar]

sa śalyamabhivādyātha kṛtvā cābhipradakṣiṇam |
uvāca rājā durdharṣamātmaniḥśreyasaṃ vacaḥ || 72 ||
[Analyze grammar]

anumānaye tvāṃ yotsyāmi guro vigatakalmaṣaḥ |
jayeyaṃ ca mahārāja anujñātastvayā ripūn || 73 ||
[Analyze grammar]

śalya uvāca |
yadi māṃ nābhigacchethā yuddhāya kṛtaniścayaḥ |
śapeyaṃ tvāṃ mahārāja parābhāvāya vai raṇe || 74 ||
[Analyze grammar]

tuṣṭo'smi pūjitaścāsmi yatkāṅkṣasi tadastu te |
anujānāmi caiva tvāṃ yudhyasva jayamāpnuhi || 75 ||
[Analyze grammar]

brūhi caiva paraṃ vīra kenārthaḥ kiṃ dadāmi te |
evaṃ gate mahārāja yuddhādanyatkimicchasi || 76 ||
[Analyze grammar]

arthasya puruṣo dāso dāsastvartho na kasyacit |
iti satyaṃ mahārāja baddho'smyarthena kauravaiḥ || 77 ||
[Analyze grammar]

kariṣyāmi hi te kāmaṃ bhāgineya yathepsitam |
bravīmyataḥ klībavattvāṃ yuddhādanyatkimicchasi || 78 ||
[Analyze grammar]

yudhiṣṭhira uvāca |
mantrayasva mahārāja nityaṃ maddhitamuttamam |
kāmaṃ yudhya parasyārthe varametadvṛṇomyaham || 79 ||
[Analyze grammar]

śalya uvāca |
brūhi kimatra sāhyaṃ te karomi nṛpasattama |
kāmaṃ yotsye parasyārthe vṛto'smyarthena kauravaiḥ || 80 ||
[Analyze grammar]

yudhiṣṭhira uvāca |
sa eva me varaḥ satya udyoge yastvayā kṛtaḥ |
sūtaputrasya saṃgrāme kāryastejovadhastvayā || 81 ||
[Analyze grammar]

śalya uvāca |
saṃpatsyatyeṣa te kāmaḥ kuntīputra yathepsitaḥ |
gaccha yudhyasva visrabdhaṃ pratijāne jayaṃ tava || 82 ||
[Analyze grammar]

saṃjaya uvāca |
anumānyātha kaunteyo mātulaṃ madrakeśvaram |
nirjagāma mahāsainyādbhrātṛbhiḥ parivāritaḥ || 83 ||
[Analyze grammar]

vāsudevastu rādheyamāhave'bhijagāma vai |
tata enamuvācedaṃ pāṇḍavārthe gadāgrajaḥ || 84 ||
[Analyze grammar]

śrutaṃ me karṇa bhīṣmasya dveṣātkila na yotsyasi |
asmānvaraya rādheya yāvadbhīṣmo na hanyate || 85 ||
[Analyze grammar]

hate tu bhīṣme rādheya punareṣyasi saṃyuge |
dhārtarāṣṭrasya sāhāyyaṃ yadi paśyasi cetsamam || 86 ||
[Analyze grammar]

karṇa uvāca |
na vipriyaṃ kariṣyāmi dhārtarāṣṭrasya keśava |
tyaktaprāṇaṃ hi māṃ viddhi duryodhanahitaiṣiṇam || 87 ||
[Analyze grammar]

saṃjaya uvāca |
tacchrutvā vacanaṃ kṛṣṇaḥ saṃnyavartata bhārata |
yudhiṣṭhirapurogaiśca pāṇḍavaiḥ saha saṃgataḥ || 88 ||
[Analyze grammar]

atha sainyasya madhye tu prākrośatpāṇḍavāgrajaḥ |
yo'smānvṛṇoti tadahaṃ varaye sāhyakāraṇāt || 89 ||
[Analyze grammar]

atha tānsamabhiprekṣya yuyutsuridamabravīt |
prītātmā dharmarājānaṃ kuntīputraṃ yudhiṣṭhiram || 90 ||
[Analyze grammar]

ahaṃ yotsyāmi miṣataḥ saṃyuge dhārtarāṣṭrajān |
yuṣmadarthe mahārāja yadi māṃ vṛṇuṣe'nagha || 91 ||
[Analyze grammar]

yudhiṣṭhira uvāca |
ehyehi sarve yotsyāmastava bhrātṝnapaṇḍitān |
yuyutso vāsudevaśca vayaṃ ca brūma sarvaśaḥ || 92 ||
[Analyze grammar]

vṛṇomi tvāṃ mahābāho yudhyasva mama kāraṇāt |
tvayi piṇḍaśca tantuśca dhṛtarāṣṭrasya dṛśyate || 93 ||
[Analyze grammar]

bhajasvāsmānrājaputra bhajamānānmahādyute |
na bhaviṣyati durbuddhirdhārtarāṣṭro'tyamarṣaṇaḥ || 94 ||
[Analyze grammar]

saṃjaya uvāca |
tato yuyutsuḥ kauravyaḥ parityajya sutāṃstava |
jagāma pāṇḍuputrāṇāṃ senāṃ viśrāvya dundubhim || 95 ||
[Analyze grammar]

tato yudhiṣṭhiro rājā saṃprahṛṣṭaḥ sahānujaiḥ |
jagrāha kavacaṃ bhūyo dīptimatkanakojjvalam || 96 ||
[Analyze grammar]

pratyapadyanta te sarve rathānsvānpuruṣarṣabhāḥ |
tato vyūhaṃ yathāpūrvaṃ pratyavyūhanta te punaḥ || 97 ||
[Analyze grammar]

avādayandundubhīṃśca śataśaścaiva puṣkarān |
siṃhanādāṃśca vividhānvineduḥ puruṣarṣabhāḥ || 98 ||
[Analyze grammar]

rathasthānpuruṣavyāghrānpāṇḍavānprekṣya pārthivāḥ |
dhṛṣṭadyumnādayaḥ sarve punarjahṛṣire mudā || 99 ||
[Analyze grammar]

gauravaṃ pāṇḍuputrāṇāṃ mānyānmānayatāṃ ca tān |
dṛṣṭvā mahīkṣitastatra pūjayāṃ cakrire bhṛśam || 100 ||
[Analyze grammar]

sauhṛdaṃ ca kṛpāṃ caiva prāptakālaṃ mahātmanām |
dayāṃ ca jñātiṣu parāṃ kathayāṃ cakrire nṛpāḥ || 101 ||
[Analyze grammar]

sādhu sādhviti sarvatra niśceruḥ stutisaṃhitāḥ |
vācaḥ puṇyāḥ kīrtimatāṃ manohṛdayaharṣiṇīḥ || 102 ||
[Analyze grammar]

mlecchāścāryāśca ye tatra dadṛśuḥ śuśruvustadā |
vṛttaṃ tatpāṇḍuputrāṇāṃ ruruduste sagadgadāḥ || 103 ||
[Analyze grammar]

tato jaghnurmahābherīḥ śataśaścaiva puṣkarān |
śaṅkhāṃśca gokṣīranibhāndadhmurhṛṣṭā manasvinaḥ || 104 ||
[Analyze grammar]