Chapter 141

saṃjaya uvāca |
keśavasya tu tadvākyaṃ karṇaḥ śrutvā hitaṃ śubham |
abravīdabhisaṃpūjya kṛṣṇaṃ madhuniṣūdanam |
jānanmāṃ kiṃ mahābāho saṃmohayitumicchasi || 1 ||
[Analyze grammar]

yo'yaṃ pṛthivyāḥ kārtsnyena vināśaḥ samupasthitaḥ |
nimittaṃ tatra śakunirahaṃ duḥśāsanastathā |
duryodhanaśca nṛpatirdhṛtarāṣṭrasuto'bhavat || 2 ||
[Analyze grammar]

asaṃśayamidaṃ kṛṣṇa mahadyuddhamupasthitam |
pāṇḍavānāṃ kurūṇāṃ ca ghoraṃ rudhirakardamam || 3 ||
[Analyze grammar]

rājāno rājaputrāśca duryodhanavaśānugāḥ |
raṇe śastrāgninā dagdhāḥ prāpsyanti yamasādanam || 4 ||
[Analyze grammar]

svapnā hi bahavo ghorā dṛśyante madhusūdana |
nimittāni ca ghorāṇi tathotpātāḥ sudāruṇāḥ || 5 ||
[Analyze grammar]

parājayaṃ dhārtarāṣṭre vijayaṃ ca yudhiṣṭhire |
śaṃsanta iva vārṣṇeya vividhā lomaharṣaṇāḥ || 6 ||
[Analyze grammar]

prājāpatyaṃ hi nakṣatraṃ grahastīkṣṇo mahādyutiḥ |
śanaiścaraḥ pīḍayati pīḍayanprāṇino'dhikam || 7 ||
[Analyze grammar]

kṛtvā cāṅgārako vakraṃ jyeṣṭhāyāṃ madhusūdana |
anurādhāṃ prārthayate maitraṃ saṃśamayanniva || 8 ||
[Analyze grammar]

nūnaṃ mahadbhayaṃ kṛṣṇa kurūṇāṃ samupasthitam |
viśeṣeṇa hi vārṣṇeya citrāṃ pīḍayate grahaḥ || 9 ||
[Analyze grammar]

somasya lakṣma vyāvṛttaṃ rāhurarkamupeṣyati |
divaścolkāḥ patantyetāḥ sanirghātāḥ sakampanāḥ || 10 ||
[Analyze grammar]

niṣṭananti ca mātaṅgā muñcantyaśrūṇi vājinaḥ |
pānīyaṃ yavasaṃ cāpi nābhinandanti mādhava || 11 ||
[Analyze grammar]

prādurbhūteṣu caiteṣu bhayamāhurupasthitam |
nimitteṣu mahābāho dāruṇaṃ prāṇināśanam || 12 ||
[Analyze grammar]

alpe bhukte purīṣaṃ ca prabhūtamiha dṛśyate |
vājināṃ vāraṇānāṃ ca manuṣyāṇāṃ ca keśava || 13 ||
[Analyze grammar]

dhārtarāṣṭrasya sainyeṣu sarveṣu madhusūdana |
parābhavasya talliṅgamiti prāhurmanīṣiṇaḥ || 14 ||
[Analyze grammar]

prahṛṣṭaṃ vāhanaṃ kṛṣṇa pāṇḍavānāṃ pracakṣate |
pradakṣiṇā mṛgāścaiva tatteṣāṃ jayalakṣaṇam || 15 ||
[Analyze grammar]

apasavyā mṛgāḥ sarve dhārtarāṣṭrasya keśava |
vācaścāpyaśarīriṇyastatparābhavalakṣaṇam || 16 ||
[Analyze grammar]

mayūrāḥ puṣpaśakunā haṃsāḥ sārasacātakāḥ |
jīvaṃ jīvakasaṃghāścāpyanugacchanti pāṇḍavān || 17 ||
[Analyze grammar]

gṛdhrāḥ kākā baḍāḥ śyenā yātudhānāḥ śalāvṛkāḥ |
makṣikāṇāṃ ca saṃghātā anugacchanti kauravān || 18 ||
[Analyze grammar]

dhārtarāṣṭrasya sainyeṣu bherīṇāṃ nāsti nisvanaḥ |
anāhatāḥ pāṇḍavānāṃ nadanti paṭahāḥ kila || 19 ||
[Analyze grammar]

udapānāśca nardanti yathā govṛṣabhāstathā |
dhārtarāṣṭrasya sainyeṣu tatparābhavalakṣaṇam || 20 ||
[Analyze grammar]

māṃsaśoṇitavarṣaṃ ca vṛṣṭaṃ devena mādhava |
tathā gandharvanagaraṃ bhānumantamupasthitam |
saprākāraṃ saparikhaṃ savapraṃ cārutoraṇam || 21 ||
[Analyze grammar]

kṛṣṇaśca parighastatra bhānumāvṛtya tiṣṭhati |
udayāstamaye saṃdhye vedayāno mahadbhayam |
ekā sṛgvāśate ghoraṃ tatparābhavalakṣaṇam || 22 ||
[Analyze grammar]

kṛṣṇagrīvāśca śakunā lambamānā bhayānakāḥ |
saṃdhyāmabhimukhā yānti tatparābhavalakṣaṇam || 23 ||
[Analyze grammar]

brāhmaṇānprathamaṃ dveṣṭi gurūṃśca madhusūdana |
bhṛtyānbhaktimataścāpi tatparābhavalakṣaṇam || 24 ||
[Analyze grammar]

pūrvā diglohitākārā śastravarṇā ca dakṣiṇā |
āmapātrapratīkāśā paścimā madhusūdana || 25 ||
[Analyze grammar]

pradīptāśca diśaḥ sarvā dhārtarāṣṭrasya mādhava |
mahadbhayaṃ vedayanti tasminnutpātalakṣaṇe || 26 ||
[Analyze grammar]

sahasrapādaṃ prāsādaṃ svapnānte sma yudhiṣṭhiraḥ |
adhirohanmayā dṛṣṭaḥ saha bhrātṛbhiracyuta || 27 ||
[Analyze grammar]

śvetoṣṇīṣāśca dṛśyante sarve te śuklavāsasaḥ |
āsanāni ca śubhrāṇi sarveṣāmupalakṣaye || 28 ||
[Analyze grammar]

tava cāpi mayā kṛṣṇa svapnānte rudhirāvilā |
āntreṇa pṛthivī dṛṣṭā parikṣiptā janārdana || 29 ||
[Analyze grammar]

asthisaṃcayamārūḍhaścāmitaujā yudhiṣṭhiraḥ |
suvarṇapātryāṃ saṃhṛṣṭo bhuktavānghṛtapāyasam || 30 ||
[Analyze grammar]

yudhiṣṭhiro mayā dṛṣṭo grasamāno vasuṃdharām |
tvayā dattāmimāṃ vyaktaṃ bhokṣyate sa vasuṃdharām || 31 ||
[Analyze grammar]

uccaṃ parvatamārūḍho bhīmakarmā vṛkodaraḥ |
gadāpāṇirnaravyāghro vīkṣanniva mahīmimām || 32 ||
[Analyze grammar]

kṣapayiṣyati naḥ sarvānsa suvyaktaṃ mahāraṇe |
viditaṃ me hṛṣīkeśa yato dharmastato jayaḥ || 33 ||
[Analyze grammar]

pāṇḍuraṃ gajamārūḍho gāṇḍīvī sa dhanaṃjayaḥ |
tvayā sārdhaṃ hṛṣīkeśa śriyā paramayā jvalan || 34 ||
[Analyze grammar]

yūyaṃ sarvānvadhiṣyadhvaṃ tatra me nāsti saṃśayaḥ |
pārthivānsamare kṛṣṇa duryodhanapurogamān || 35 ||
[Analyze grammar]

nakulaḥ sahadevaśca sātyakiśca mahārathaḥ |
śuddhakeyūrakaṇṭhatrāḥ śuklamālyāmbarāvṛtāḥ || 36 ||
[Analyze grammar]

adhirūḍhā naravyāghrā naravāhanamuttamam |
traya ete mahāmātrāḥ pāṇḍuracchatravāsasaḥ || 37 ||
[Analyze grammar]

śvetoṣṇīṣāśca dṛśyante traya eva janārdana |
dhārtarāṣṭrasya sainyeṣu tānvijānīhi keśava || 38 ||
[Analyze grammar]

aśvatthāmā kṛpaścaiva kṛtavarmā ca sātvataḥ |
raktoṣṇīṣāśca dṛśyante sarve mādhava pārthivāḥ || 39 ||
[Analyze grammar]

uṣṭrayuktaṃ samārūḍhau bhīṣmadroṇau janārdana |
mayā sārdhaṃ mahābāho dhārtarāṣṭreṇa cābhibho || 40 ||
[Analyze grammar]

agastyaśāstāṃ ca diśaṃ prayātāḥ sma janārdana |
acireṇaiva kālena prāpsyāmo yamasādanam || 41 ||
[Analyze grammar]

ahaṃ cānye ca rājāno yacca tatkṣatramaṇḍalam |
gāṇḍīvāgniṃ pravekṣyāma iti me nāsti saṃśayaḥ || 42 ||
[Analyze grammar]

kṛṣṇa uvāca |
upasthitavināśeyaṃ nūnamadya vasuṃdharā |
tathā hi me vacaḥ karṇa nopaiti hṛdayaṃ tava || 43 ||
[Analyze grammar]

sarveṣāṃ tāta bhūtānāṃ vināśe samupasthite |
anayo nayasaṃkāśo hṛdayānnāpasarpati || 44 ||
[Analyze grammar]

karṇa uvāca |
api tvā kṛṣṇa paśyāma jīvanto'smānmahāraṇāt |
samuttīrṇā mahābāho vīrakṣayavināśanāt || 45 ||
[Analyze grammar]

atha vā saṃgamaḥ kṛṣṇa svarge no bhavitā dhruvam |
tatredānīṃ sameṣyāmaḥ punaḥ sārdhaṃ tvayānagha || 46 ||
[Analyze grammar]

saṃjaya uvāca |
ityuktvā mādhavaṃ karṇaḥ pariṣvajya ca pīḍitam |
visarjitaḥ keśavena rathopasthādavātarat || 47 ||
[Analyze grammar]

tataḥ svarathamāsthāya jāmbūnadavibhūṣitam |
sahāsmābhirnivavṛte rādheyo dīnamānasaḥ || 48 ||
[Analyze grammar]

tataḥ śīghrataraṃ prāyātkeśavaḥ sahasātyakiḥ |
punaruccārayanvāṇīṃ yāhi yāhīti sārathim || 49 ||
[Analyze grammar]