Chapter 39

dhṛtarāṣṭra uvāca |
anīśvaro'yaṃ puruṣo bhavābhave sūtraprotā dārumayīva yoṣā |
dhātrā tu diṣṭasya vaśe kilāyaṃ tasmādvada tvaṃ śravaṇe dhṛto'ham || 1 ||
[Analyze grammar]

vidura uvāca |
aprāptakālaṃ vacanaṃ bṛhaspatirapi bruvan |
labhate buddhyavajñānamavamānaṃ ca bhārata || 2 ||
[Analyze grammar]

priyo bhavati dānena priyavādena cāparaḥ |
mantraṃ mūlabalenānyo yaḥ priyaḥ priya eva saḥ || 3 ||
[Analyze grammar]

dveṣyo na sādhurbhavati na medhāvī na paṇḍitaḥ |
priye śubhāni karmāṇi dveṣye pāpāni bhārata || 4 ||
[Analyze grammar]

na sa kṣayo mahārāja yaḥ kṣayo vṛddhimāvahet |
kṣayaḥ sa tviha mantavyo yaṃ labdhvā bahu nāśayet || 5 ||
[Analyze grammar]

samṛddhā guṇataḥ kecidbhavanti dhanato'pare |
dhanavṛddhānguṇairhīnāndhṛtarāṣṭra vivarjayet || 6 ||
[Analyze grammar]

dhṛtarāṣṭra uvāca |
sarvaṃ tvamāyatīyuktaṃ bhāṣase prājñasaṃmatam |
na cotsahe sutaṃ tyaktuṃ yato dharmastato jayaḥ || 7 ||
[Analyze grammar]

vidura uvāca |
svabhāvaguṇasaṃpanno na jātu vinayānvitaḥ |
susūkṣmamapi bhūtānāmupamardaṃ prayokṣyate || 8 ||
[Analyze grammar]

parāpavādaniratāḥ paraduḥkhodayeṣu ca |
parasparavirodhe ca yatante satatotthitāḥ || 9 ||
[Analyze grammar]

sadoṣaṃ darśanaṃ yeṣāṃ saṃvāse sumahadbhayam |
arthādāne mahāndoṣaḥ pradāne ca mahadbhayam || 10 ||
[Analyze grammar]

ye pāpā iti vikhyātāḥ saṃvāse parigarhitāḥ |
yuktāścānyairmahādoṣairye narāstānvivarjayet || 11 ||
[Analyze grammar]

nivartamāne sauhārde prītirnīce praṇaśyati |
yā caiva phalanirvṛttiḥ sauhṛde caiva yatsukham || 12 ||
[Analyze grammar]

yatate cāpavādāya yatnamārabhate kṣaye |
alpe'pyapakṛte mohānna śāntimupagacchati || 13 ||
[Analyze grammar]

tādṛśaiḥ saṃgataṃ nīcairnṛśaṃsairakṛtātmabhiḥ |
niśāmya nipuṇaṃ buddhyā vidvāndūrādvivarjayet || 14 ||
[Analyze grammar]

yo jñātimanugṛhṇāti daridraṃ dīnamāturam |
sa putrapaśubhirvṛddhiṃ yaśaścāvyayamaśnute || 15 ||
[Analyze grammar]

jñātayo vardhanīyāstairya icchantyātmanaḥ śubham |
kulavṛddhiṃ ca rājendra tasmātsādhu samācara || 16 ||
[Analyze grammar]

śreyasā yokṣyase rājankurvāṇo jñātisatkriyām |
viguṇā hyapi saṃrakṣyā jñātayo bharatarṣabha || 17 ||
[Analyze grammar]

kiṃ punarguṇavantaste tvatprasādābhikāṅkṣiṇaḥ |
prasādaṃ kuru dīnānāṃ pāṇḍavānāṃ viśāṃ pate || 18 ||
[Analyze grammar]

dīyantāṃ grāmakāḥ kecitteṣāṃ vṛttyarthamīśvara |
evaṃ loke yaśaḥprāpto bhaviṣyasi narādhipa || 19 ||
[Analyze grammar]

vṛddhena hi tvayā kāryaṃ putrāṇāṃ tāta rakṣaṇam |
mayā cāpi hitaṃ vācyaṃ viddhi māṃ tvaddhitaiṣiṇam || 20 ||
[Analyze grammar]

jñātibhirvigrahastāta na kartavyo bhavārthinā |
sukhāni saha bhojyāni jñātibhirbharatarṣabha || 21 ||
[Analyze grammar]

saṃbhojanaṃ saṃkathanaṃ saṃprītiśca parasparam |
jñātibhiḥ saha kāryāṇi na virodhaḥ kathaṃcana || 22 ||
[Analyze grammar]

jñātayastārayantīha jñātayo majjayanti ca |
suvṛttāstārayantīha durvṛttā majjayanti ca || 23 ||
[Analyze grammar]

suvṛtto bhava rājendra pāṇḍavānprati mānada |
adharṣaṇīyaḥ śatrūṇāṃ tairvṛtastvaṃ bhaviṣyasi || 24 ||
[Analyze grammar]

śrīmantaṃ jñātimāsādya yo jñātiravasīdati |
digdhahastaṃ mṛga iva sa enastasya vindati || 25 ||
[Analyze grammar]

paścādapi naraśreṣṭha tava tāpo bhaviṣyati |
tānvā hatānsutānvāpi śrutvā tadanucintaya || 26 ||
[Analyze grammar]

yena khaṭvāṃ samārūḍhaḥ paritapyeta karmaṇā |
ādāveva na tatkuryādadhruve jīvite sati || 27 ||
[Analyze grammar]

na kaścinnāpanayate pumānanyatra bhārgavāt |
śeṣasaṃpratipattistu buddhimatsveva tiṣṭhati || 28 ||
[Analyze grammar]

duryodhanena yadyetatpāpaṃ teṣu purā kṛtam |
tvayā tatkulavṛddhena pratyāneyaṃ nareśvara || 29 ||
[Analyze grammar]

tāṃstvaṃ pade pratiṣṭhāpya loke vigatakalmaṣaḥ |
bhaviṣyasi naraśreṣṭha pūjanīyo manīṣiṇām || 30 ||
[Analyze grammar]

suvyāhṛtāni dhīrāṇāṃ phalataḥ pravicintya yaḥ |
adhyavasyati kāryeṣu ciraṃ yaśasi tiṣṭhati || 31 ||
[Analyze grammar]

avṛttiṃ vinayo hanti hantyanarthaṃ parākramaḥ |
hanti nityaṃ kṣamā krodhamācāro hantyalakṣaṇam || 32 ||
[Analyze grammar]

paricchadena kṣetreṇa veśmanā paricaryayā |
parīkṣeta kulaṃ rājanbhojanācchādanena ca || 33 ||
[Analyze grammar]

yayościttena vā cittaṃ naibhṛtaṃ naibhṛtena vā |
sameti prajñayā prajñā tayormaitrī na jīryate || 34 ||
[Analyze grammar]

durbuddhimakṛtaprajñaṃ channaṃ kūpaṃ tṛṇairiva |
vivarjayīta medhāvī tasminmaitrī praṇaśyati || 35 ||
[Analyze grammar]

avalipteṣu mūrkheṣu raudrasāhasikeṣu ca |
tathaivāpetadharmeṣu na maitrīmācaredbudhaḥ || 36 ||
[Analyze grammar]

kṛtajñaṃ dhārmikaṃ satyamakṣudraṃ dṛḍhabhaktikam |
jitendriyaṃ sthitaṃ sthityāṃ mitramatyāgi ceṣyate || 37 ||
[Analyze grammar]

indriyāṇāmanutsargo mṛtyunā na viśiṣyate |
atyarthaṃ punarutsargaḥ sādayeddaivatānyapi || 38 ||
[Analyze grammar]

mārdavaṃ sarvabhūtānāmanasūyā kṣamā dhṛtiḥ |
āyuṣyāṇi budhāḥ prāhurmitrāṇāṃ cāvimānanā || 39 ||
[Analyze grammar]

apanītaṃ sunītena yo'rthaṃ pratyāninīṣate |
matimāsthāya sudṛḍhāṃ tadakāpuruṣavratam || 40 ||
[Analyze grammar]

āyatyāṃ pratikārajñastadātve dṛḍhaniścayaḥ |
atīte kāryaśeṣajño naro'rthairna prahīyate || 41 ||
[Analyze grammar]

karmaṇā manasā vācā yadabhīkṣṇaṃ niṣevate |
tadevāpaharatyenaṃ tasmātkalyāṇamācaret || 42 ||
[Analyze grammar]

maṅgalālambhanaṃ yogaḥ śrutamutthānamārjavam |
bhūtimetāni kurvanti satāṃ cābhīkṣṇadarśanam || 43 ||
[Analyze grammar]

anirvedaḥ śriyo mūlaṃ duḥkhanāśe sukhasya ca |
mahānbhavatyanirviṇṇaḥ sukhaṃ cātyantamaśnute || 44 ||
[Analyze grammar]

nātaḥ śrīmattaraṃ kiṃcidanyatpathyatamaṃ tathā |
prabhaviṣṇoryathā tāta kṣamā sarvatra sarvadā || 45 ||
[Analyze grammar]

kṣamedaśaktaḥ sarvasya śaktimāndharmakāraṇāt |
arthānarthau samau yasya tasya nityaṃ kṣamā hitā || 46 ||
[Analyze grammar]

yatsukhaṃ sevamāno'pi dharmārthābhyāṃ na hīyate |
kāmaṃ tadupaseveta na mūḍhavratamācaret || 47 ||
[Analyze grammar]

duḥkhārteṣu pramatteṣu nāstikeṣvalaseṣu ca |
na śrīrvasatyadānteṣu ye cotsāhavivarjitāḥ || 48 ||
[Analyze grammar]

ārjavena naraṃ yuktamārjavātsavyapatrapam |
aśaktimantaṃ manyanto dharṣayanti kubuddhayaḥ || 49 ||
[Analyze grammar]

atyāryamatidātāramatiśūramativratam |
prajñābhimāninaṃ caiva śrīrbhayānnopasarpati || 50 ||
[Analyze grammar]

agnihotraphalā vedāḥ śīlavṛttaphalaṃ śrutam |
ratiputraphalā dārā dattabhuktaphalaṃ dhanam || 51 ||
[Analyze grammar]

adharmopārjitairarthairyaḥ karotyaurdhvadehikam |
na sa tasya phalaṃ pretya bhuṅkte'rthasya durāgamāt || 52 ||
[Analyze grammar]

kāntāravanadurgeṣu kṛcchrāsvāpatsu saṃbhrame |
udyateṣu ca śastreṣu nāsti śeṣavatāṃ bhayam || 53 ||
[Analyze grammar]

utthānaṃ saṃyamo dākṣyamapramādo dhṛtiḥ smṛtiḥ |
samīkṣya ca samārambho viddhi mūlaṃ bhavasya tat || 54 ||
[Analyze grammar]

tapo balaṃ tāpasānāṃ brahma brahmavidāṃ balam |
hiṃsā balamasādhūnāṃ kṣamā guṇavatāṃ balam || 55 ||
[Analyze grammar]

aṣṭau tānyavrataghnāni āpo mūlaṃ phalaṃ payaḥ |
havirbrāhmaṇakāmyā ca gurorvacanamauṣadham || 56 ||
[Analyze grammar]

na tatparasya saṃdadhyātpratikūlaṃ yadātmanaḥ |
saṃgraheṇaiṣa dharmaḥ syātkāmādanyaḥ pravartate || 57 ||
[Analyze grammar]

akrodhena jayetkrodhamasādhuṃ sādhunā jayet |
jayetkadaryaṃ dānena jayetsatyena cānṛtam || 58 ||
[Analyze grammar]

strīdhūrtake'lase bhīrau caṇḍe puruṣamānini |
caure kṛtaghne viśvāso na kāryo na ca nāstike || 59 ||
[Analyze grammar]

abhivādanaśīlasya nityaṃ vṛddhopasevinaḥ |
catvāri saṃpravardhante kīrtirāyuryaśobalam || 60 ||
[Analyze grammar]

atikleśena ye'rthāḥ syurdharmasyātikrameṇa ca |
arervā praṇipātena mā sma teṣu manaḥ kṛthāḥ || 61 ||
[Analyze grammar]

avidyaḥ puruṣaḥ śocyaḥ śocyaṃ mithunamaprajam |
nirāhārāḥ prajāḥ śocyāḥ śocyaṃ rāṣṭramarājakam || 62 ||
[Analyze grammar]

adhvā jarā dehavatāṃ parvatānāṃ jalaṃ jarā |
asaṃbhogo jarā strīṇāṃ vākśalyaṃ manaso jarā || 63 ||
[Analyze grammar]

anāmnāyamalā vedā brāhmaṇasyāvrataṃ malam |
kautūhalamalā sādhvī vipravāsamalāḥ striyaḥ || 64 ||
[Analyze grammar]

suvarṇasya malaṃ rūpyaṃ rūpyasyāpi malaṃ trapu |
jñeyaṃ trapumalaṃ sīsaṃ sīsasyāpi malaṃ malam || 65 ||
[Analyze grammar]

na svapnena jayennidrāṃ na kāmena striyaṃ jayet |
nendhanena jayedagniṃ na pānena surāṃ jayet || 66 ||
[Analyze grammar]

yasya dānajitaṃ mitramamitrā yudhi nirjitāḥ |
annapānajitā dārāḥ saphalaṃ tasya jīvitam || 67 ||
[Analyze grammar]

sahasriṇo'pi jīvanti jīvanti śatinastathā |
dhṛtarāṣṭraṃ vimuñcecchāṃ na kathaṃcinna jīvyate || 68 ||
[Analyze grammar]

yatpṛthivyāṃ vrīhiyavaṃ hiraṇyaṃ paśavaḥ striyaḥ |
nālamekasya tatsarvamiti paśyanna muhyati || 69 ||
[Analyze grammar]

rājanbhūyo bravīmi tvāṃ putreṣu samamācara |
samatā yadi te rājansveṣu pāṇḍusuteṣu ca || 70 ||
[Analyze grammar]