Chapter 38

vidura uvāca |
ūrdhvaṃ prāṇā hyutkrāmanti yūnaḥ sthavira āyati |
pratyutthānābhivādābhyāṃ punastānpratipadyate || 1 ||
[Analyze grammar]

pīṭhaṃ dattvā sādhave'bhyāgatāya ānīyāpaḥ parinirṇijya pādau |
sukhaṃ pṛṣṭvā prativedyātmasaṃsthaṃ tato dadyādannamavekṣya dhīraḥ || 2 ||
[Analyze grammar]

yasyodakaṃ madhuparkaṃ ca gāṃ ca namantravitpratigṛhṇāti gehe |
lobhādbhayādarthakārpaṇyato vā tasyānarthaṃ jīvitamāhurāryāḥ || 3 ||
[Analyze grammar]

cikitsakaḥ śalyakartāvakīrṇī stenaḥ krūro madyapo bhrūṇahā ca |
senājīvī śrutivikrāyakaśca bhṛśaṃ priyo'pyatithirnodakārhaḥ || 4 ||
[Analyze grammar]

avikreyaṃ lavaṇaṃ pakvamannaṃ dadhi kṣīraṃ madhu tailaṃ ghṛtaṃ ca |
tilā māṃsaṃ mūlaphalāni śākaṃ raktaṃ vāsaḥ sarvagandhā guḍaśca || 5 ||
[Analyze grammar]

aroṣaṇo yaḥ samaloṣṭakāñcanaḥ prahīṇaśoko gatasaṃdhivigrahaḥ |
nindāpraśaṃsoparataḥ priyāpriye carannudāsīnavadeṣa bhikṣukaḥ || 6 ||
[Analyze grammar]

nīvāramūleṅgudaśākavṛttiḥ susaṃyatātmāgnikāryeṣvacodyaḥ |
vane vasannatithiṣvapramatto dhuraṃdharaḥ puṇyakṛdeṣa tāpasaḥ || 7 ||
[Analyze grammar]

apakṛtvā buddhimato dūrastho'smīti nāśvaset |
dīrghau buddhimato bāhū yābhyāṃ hiṃsati hiṃsitaḥ || 8 ||
[Analyze grammar]

na viśvasedaviśvaste viśvaste nātiviśvaset |
viśvāsādbhayamutpannaṃ mūlānyapi nikṛntati || 9 ||
[Analyze grammar]

anīrṣyurguptadāraḥ syātsaṃvibhāgī priyaṃvadaḥ |
ślakṣṇo madhuravākstrīṇāṃ na cāsāṃ vaśago bhavet || 10 ||
[Analyze grammar]

pūjanīyā mahābhāgāḥ puṇyāśca gṛhadīptayaḥ |
striyaḥ śriyo gṛhasyoktāstasmādrakṣyā viśeṣataḥ || 11 ||
[Analyze grammar]

piturantaḥpuraṃ dadyānmāturdadyānmahānasam |
goṣu cātmasamaṃ dadyātsvayameva kṛṣiṃ vrajet |
bhṛtyairvaṇijyācāraṃ ca putraiḥ seveta brāhmaṇān || 12 ||
[Analyze grammar]

adbhyo'gnirbrahmataḥ kṣatramaśmano lohamutthitam |
teṣāṃ sarvatragaṃ tejaḥ svāsu yoniṣu śāmyati || 13 ||
[Analyze grammar]

nityaṃ santaḥ kule jātāḥ pāvakopamatejasaḥ |
kṣamāvanto nirākārāḥ kāṣṭhe'gniriva śerate || 14 ||
[Analyze grammar]

yasya mantraṃ na jānanti bāhyāścābhyantarāśca ye |
sa rājā sarvataścakṣuściramaiśvaryamaśnute || 15 ||
[Analyze grammar]

kariṣyanna prabhāṣeta kṛtānyeva ca darśayet |
dharmakāmārthakāryāṇi tathā mantro na bhidyate || 16 ||
[Analyze grammar]

giripṛṣṭhamupāruhya prāsādaṃ vā rahogataḥ |
araṇye niḥśalāke vā tatra mantro vidhīyate || 17 ||
[Analyze grammar]

nāsuhṛtparamaṃ mantraṃ bhāratārhati veditum |
apaṇḍito vāpi suhṛtpaṇḍito vāpyanātmavān |
amātye hyarthalipsā ca mantrarakṣaṇameva ca || 18 ||
[Analyze grammar]

kṛtāni sarvakāryāṇi yasya vā pārṣadā viduḥ |
gūḍhamantrasya nṛpatestasya siddhirasaṃśayam || 19 ||
[Analyze grammar]

apraśastāni karmāṇi yo mohādanutiṣṭhati |
sa teṣāṃ viparibhraṃśe bhraśyate jīvitādapi || 20 ||
[Analyze grammar]

karmaṇāṃ tu praśastānāmanuṣṭhānaṃ sukhāvaham |
teṣāmevānanuṣṭhānaṃ paścāttāpakaraṃ mahat || 21 ||
[Analyze grammar]

sthānavṛddhikṣayajñasya ṣāḍguṇyaviditātmanaḥ |
anavajñātaśīlasya svādhīnā pṛthivī nṛpa || 22 ||
[Analyze grammar]

amoghakrodhaharṣasya svayaṃ kṛtyānvavekṣiṇaḥ |
ātmapratyayakośasya vasudheyaṃ vasuṃdharā || 23 ||
[Analyze grammar]

nāmamātreṇa tuṣyeta chatreṇa ca mahīpatiḥ |
bhṛtyebhyo visṛjedarthānnaikaḥ sarvaharo bhavet || 24 ||
[Analyze grammar]

brāhmaṇo brāhmaṇaṃ veda bhartā veda striyaṃ tathā |
amātyaṃ nṛpatirveda rājā rājānameva ca || 25 ||
[Analyze grammar]

na śatruraṅkamāpanno moktavyo vadhyatāṃ gataḥ |
ahatāddhi bhayaṃ tasmājjāyate nacirādiva || 26 ||
[Analyze grammar]

daivateṣu ca yatnena rājasu brāhmaṇeṣu ca |
niyantavyaḥ sadā krodho vṛddhabālātureṣu ca || 27 ||
[Analyze grammar]

nirarthaṃ kalahaṃ prājño varjayenmūḍhasevitam |
kīrtiṃ ca labhate loke na cānarthena yujyate || 28 ||
[Analyze grammar]

prasādo niṣphalo yasya krodhaścāpi nirarthakaḥ |
na taṃ bhartāramicchanti ṣaṇḍhaṃ patimiva striyaḥ || 29 ||
[Analyze grammar]

na buddhirdhanalābhāya na jāḍyamasamṛddhaye |
lokaparyāyavṛttāntaṃ prājño jānāti netaraḥ || 30 ||
[Analyze grammar]

vidyāśīlavayovṛddhānbuddhivṛddhāṃśca bhārata |
dhanābhijanavṛddhāṃśca nityaṃ mūḍho'vamanyate || 31 ||
[Analyze grammar]

anāryavṛttamaprājñamasūyakamadhārmikam |
anarthāḥ kṣipramāyānti vāgduṣṭaṃ krodhanaṃ tathā || 32 ||
[Analyze grammar]

avisaṃvādanaṃ dānaṃ samayasyāvyatikramaḥ |
āvartayanti bhūtāni samyakpraṇihitā ca vāk || 33 ||
[Analyze grammar]

avisaṃvādako dakṣaḥ kṛtajño matimānṛjuḥ |
api saṃkṣīṇakośo'pi labhate parivāraṇam || 34 ||
[Analyze grammar]

dhṛtiḥ śamo damaḥ śaucaṃ kāruṇyaṃ vāganiṣṭhurā |
mitrāṇāṃ cānabhidrohaḥ saptaitāḥ samidhaḥ śriyaḥ || 35 ||
[Analyze grammar]

asaṃvibhāgī duṣṭātmā kṛtaghno nirapatrapaḥ |
tādṛṅnarādhamo loke varjanīyo narādhipa || 36 ||
[Analyze grammar]

na sa rātrau sukhaṃ śete sasarpa iva veśmani |
yaḥ kopayati nirdoṣaṃ sadoṣo'bhyantaraṃ janam || 37 ||
[Analyze grammar]

yeṣu duṣṭeṣu doṣaḥ syādyogakṣemasya bhārata |
sadā prasādanaṃ teṣāṃ devatānāmivācaret || 38 ||
[Analyze grammar]

ye'rthāḥ strīṣu samāsaktāḥ prathamotpatiteṣu ca |
ye cānāryasamāsaktāḥ sarve te saṃśayaṃ gatāḥ || 39 ||
[Analyze grammar]

yatra strī yatra kitavo yatra bālo'nuśāsti ca |
majjanti te'vaśā deśā nadyāmaśmaplavā iva || 40 ||
[Analyze grammar]

prayojaneṣu ye saktā na viśeṣeṣu bhārata |
tānahaṃ paṇḍitānmanye viśeṣā hi prasaṅginaḥ || 41 ||
[Analyze grammar]

yaṃ praśaṃsanti kitavā yaṃ praśaṃsanti cāraṇāḥ |
yaṃ praśaṃsanti bandhakyo na sa jīvati mānavaḥ || 42 ||
[Analyze grammar]

hitvā tānparameṣvāsānpāṇḍavānamitaujasaḥ |
āhitaṃ bhārataiśvaryaṃ tvayā duryodhane mahat || 43 ||
[Analyze grammar]

taṃ drakṣyasi paribhraṣṭaṃ tasmāttvaṃ nacirādiva |
aiśvaryamadasaṃmūḍhaṃ baliṃ lokatrayādiva || 44 ||
[Analyze grammar]