Chapter 37

vidura uvāca |
saptadaśemānrājendra manuḥ svāyaṃbhuvo'bravīt |
vaicitravīrya puruṣānākāśaṃ muṣṭibhirghnataḥ || 1 ||
[Analyze grammar]

tānevendrasya hi dhanuranāmyaṃ namato'bravīt |
atho marīcinaḥ pādānanāmyānnamatastathā || 2 ||
[Analyze grammar]

yaścāśiṣyaṃ śāsati yaśca kupyate yaścātivelaṃ bhajate dviṣantam |
striyaśca yo'rakṣati bhadramastu te yaścāyācyaṃ yācati yaśca katthate || 3 ||
[Analyze grammar]

yaścābhijātaḥ prakarotyakāryaṃ yaścābalo balinā nityavairī |
aśraddadhānāya ca yo bravīti yaścākāmyaṃ kāmayate narendra || 4 ||
[Analyze grammar]

vadhvā hāsaṃ śvaśuro yaśca manyate vadhvā vasannuta yo mānakāmaḥ |
parakṣetre nirvapati yaśca bījaṃ striyaṃ ca yaḥ parivadate'tivelam || 5 ||
[Analyze grammar]

yaścaiva labdhvā na smarāmītyuvāca dattvā ca yaḥ katthati yācyamānaḥ |
yaścāsataḥ sāntvamupāsatīha ete'nuyāntyanilaṃ pāśahastāḥ || 6 ||
[Analyze grammar]

yasminyathā vartate yo manuṣyastasmiṃstathā vartitavyaṃ sa dharmaḥ |
māyācāro māyayā vartitavyaḥ sādhvācāraḥ sādhunā pratyudeyaḥ || 7 ||
[Analyze grammar]

dhṛtarāṣṭra uvāca |
śatāyuruktaḥ puruṣaḥ sarvavedeṣu vai yadā |
nāpnotyatha ca tatsarvamāyuḥ keneha hetunā || 8 ||
[Analyze grammar]

vidura uvāca |
ativādo'timānaśca tathātyāgo narādhipa |
krodhaścātivivitsā ca mitradrohaśca tāni ṣaṭ || 9 ||
[Analyze grammar]

eta evāsayastīkṣṇāḥ kṛntantyāyūṃṣi dehinām |
etāni mānavānghnanti na mṛtyurbhadramastu te || 10 ||
[Analyze grammar]

viśvastasyaiti yo dārānyaścāpi gurutalpagaḥ |
vṛṣalīpatirdvijo yaśca pānapaścaiva bhārata || 11 ||
[Analyze grammar]

śaraṇāgatahā caiva sarve brahmahaṇaiḥ samāḥ |
etaiḥ sametya kartavyaṃ prāyaścittamiti śrutiḥ || 12 ||
[Analyze grammar]

gṛhī vadānyo'napaviddhavākyaḥ śeṣānnabhoktāpyavihiṃsakaśca |
nānarthakṛttyaktakaliḥ kṛtajñaḥ satyo mṛduḥ svargamupaiti vidvān || 13 ||
[Analyze grammar]

sulabhāḥ puruṣā rājansatataṃ priyavādinaḥ |
apriyasya tu pathyasya vaktā śrotā ca durlabhaḥ || 14 ||
[Analyze grammar]

yo hi dharmaṃ vyapāśritya hitvā bhartuḥ priyāpriye |
apriyāṇyāha pathyāni tena rājā sahāyavān || 15 ||
[Analyze grammar]

tyajetkulārthe puruṣaṃ grāmasyārthe kulaṃ tyajet |
grāmaṃ janapadasyārthe ātmārthe pṛthivīṃ tyajet || 16 ||
[Analyze grammar]

āpadarthaṃ dhanaṃ rakṣeddārānrakṣeddhanairapi |
ātmānaṃ satataṃ rakṣeddārairapi dhanairapi || 17 ||
[Analyze grammar]

uktaṃ mayā dyūtakāle'pi rājannaivaṃ yuktaṃ vacanaṃ prātipīya |
tadauṣadhaṃ pathyamivāturasya na rocate tava vaicitravīrya || 18 ||
[Analyze grammar]

kākairimāṃścitrabarhānmayūrānparājaiṣṭhāḥ pāṇḍavāndhārtarāṣṭraiḥ |
hitvā siṃhānkroṣṭukāngūhamānaḥ prāpte kāle śocitā tvaṃ narendra || 19 ||
[Analyze grammar]

yastāta na krudhyati sarvakālaṃ bhṛtyasya bhaktasya hite ratasya |
tasminbhṛtyā bhartari viśvasanti na cainamāpatsu parityajanti || 20 ||
[Analyze grammar]

na bhṛtyānāṃ vṛttisaṃrodhanena bāhyaṃ janaṃ saṃjighṛkṣedapūrvam |
tyajanti hyenamucitāvaruddhāḥ snigdhā hyamātyāḥ parihīnabhogāḥ || 21 ||
[Analyze grammar]

kṛtyāni pūrvaṃ parisaṃkhyāya sarvāṇyāyavyayāvanurūpāṃ ca vṛttim |
saṃgṛhṇīyādanurūpānsahāyānsahāyasādhyāni hi duṣkarāṇi || 22 ||
[Analyze grammar]

abhiprāyaṃ yo viditvā tu bhartuḥ sarvāṇi kāryāṇi karotyatandrīḥ |
vaktā hitānāmanurakta āryaḥ śaktijña ātmeva hi so'nukampyaḥ || 23 ||
[Analyze grammar]

vākyaṃ tu yo nādriyate'nuśiṣṭaḥ pratyāha yaścāpi niyujyamānaḥ |
prajñābhimānī pratikūlavādī tyājyaḥ sa tādṛktvarayaiva bhṛtyaḥ || 24 ||
[Analyze grammar]

astabdhamaklībamadīrghasūtraṃ sānukrośaṃ ślakṣṇamahāryamanyaiḥ |
arogajātīyamudāravākyaṃ dūtaṃ vadantyaṣṭaguṇopapannam || 25 ||
[Analyze grammar]

na viśvāsājjātu parasya gehaṃ gacchennaraścetayāno vikāle |
na catvare niśi tiṣṭhennigūḍho na rājanyāṃ yoṣitaṃ prārthayīta || 26 ||
[Analyze grammar]

na nihnavaṃ satragatasya gacchetsaṃsṛṣṭamantrasya kusaṃgatasya |
na ca brūyānnāśvasāmi tvayīti sakāraṇaṃ vyapadeśaṃ tu kuryāt || 27 ||
[Analyze grammar]

ghṛṇī rājā puṃścalī rājabhṛtyaḥ putro bhrātā vidhavā bālaputrā |
senājīvī coddhṛtabhakta eva vyavahāre vai varjanīyāḥ syurete || 28 ||
[Analyze grammar]

guṇā daśa snānaśīlaṃ bhajante balaṃ rūpaṃ svaravarṇapraśuddhiḥ |
sparśaśca gandhaśca viśuddhatā ca śrīḥ saukumāryaṃ pravarāśca nāryaḥ || 29 ||
[Analyze grammar]

guṇāśca ṣaṇmitabhuktaṃ bhajante ārogyamāyuśca sukhaṃ balaṃ ca |
anāvilaṃ cāsya bhavedapatyaṃ na cainamādyūna iti kṣipanti || 30 ||
[Analyze grammar]

akarmaśīlaṃ ca mahāśanaṃ ca lokadviṣṭaṃ bahumāyaṃ nṛśaṃsam |
adeśakālajñamaniṣṭaveṣametāngṛhe na prativāsayīta || 31 ||
[Analyze grammar]

kadaryamākrośakamaśrutaṃ ca varākasaṃbhūtamamānyamāninam |
niṣṭhūriṇaṃ kṛtavairaṃ kṛtaghnametānbhṛśārto'pi na jātu yācet || 32 ||
[Analyze grammar]

saṃkliṣṭakarmāṇamatipravādaṃ nityānṛtaṃ cādṛḍhabhaktikaṃ ca |
vikṛṣṭarāgaṃ bahumāninaṃ cāpyetānna seveta narādhamānṣaṭ || 33 ||
[Analyze grammar]

sahāyabandhanā hyarthāḥ sahāyāścārthabandhanāḥ |
anyonyabandhanāvetau vinānyonyaṃ na sidhyataḥ || 34 ||
[Analyze grammar]

utpādya putrānanṛṇāṃśca kṛtvā vṛttiṃ ca tebhyo'nuvidhāya kāṃcit |
sthāne kumārīḥ pratipādya sarvā araṇyasaṃstho munivadbubhūṣet || 35 ||
[Analyze grammar]

hitaṃ yatsarvabhūtānāmātmanaśca sukhāvaham |
tatkuryādīśvaro hyetanmūlaṃ dharmārthasiddhaye || 36 ||
[Analyze grammar]

buddhiḥ prabhāvastejaśca sattvamutthānameva ca |
vyavasāyaśca yasya syāttasyāvṛttibhayaṃ kutaḥ || 37 ||
[Analyze grammar]

paśya doṣānpāṇḍavairvigrahe tvaṃ yatra vyatherannapi devāḥ saśakrāḥ |
putrairvairaṃ nityamudvignavāso yaśaḥpraṇāśo dviṣatāṃ ca harṣaḥ || 38 ||
[Analyze grammar]

bhīṣmasya kopastava cendrakalpa droṇasya rājñaśca yudhiṣṭhirasya |
utsādayellokamimaṃ pravṛddhaḥ śveto grahastiryagivāpatankhe || 39 ||
[Analyze grammar]

tava putraśataṃ caiva karṇaḥ pañca ca pāṇḍavāḥ |
pṛthivīmanuśāseyurakhilāṃ sāgarāmbarām || 40 ||
[Analyze grammar]

dhārtarāṣṭrā vanaṃ rājanvyāghrāḥ pāṇḍusutā matāḥ |
mā vanaṃ chindhi savyāghraṃ mā vyāghrānnīnaśo vanāt || 41 ||
[Analyze grammar]

na syādvanamṛte vyāghrānvyāghrā na syurṛte vanam |
vanaṃ hi rakṣyate vyāghrairvyāghrānrakṣati kānanam || 42 ||
[Analyze grammar]

na tathecchantyakalyāṇāḥ pareṣāṃ vedituṃ guṇān |
yathaiṣāṃ jñātumicchanti nairguṇyaṃ pāpacetasaḥ || 43 ||
[Analyze grammar]

arthasiddhiṃ parāmicchandharmamevāditaścaret |
na hi dharmādapaityarthaḥ svargalokādivāmṛtam || 44 ||
[Analyze grammar]

yasyātmā virataḥ pāpātkalyāṇe ca niveśitaḥ |
tena sarvamidaṃ buddhaṃ prakṛtirvikṛtiśca yā || 45 ||
[Analyze grammar]

yo dharmamarthaṃ kāmaṃ ca yathākālaṃ niṣevate |
dharmārthakāmasaṃyogaṃ so'mutreha ca vindati || 46 ||
[Analyze grammar]

saṃniyacchati yo vegamutthitaṃ krodhaharṣayoḥ |
sa śriyo bhājanaṃ rājanyaścāpatsu na muhyati || 47 ||
[Analyze grammar]

balaṃ pañcavidhaṃ nityaṃ puruṣāṇāṃ nibodha me |
yattu bāhubalaṃ nāma kaniṣṭhaṃ balamucyate || 48 ||
[Analyze grammar]

amātyalābho bhadraṃ te dvitīyaṃ balamucyate |
dhanalābhastṛtīyaṃ tu balamāhurjigīṣavaḥ || 49 ||
[Analyze grammar]

yattvasya sahajaṃ rājanpitṛpaitāmahaṃ balam |
abhijātabalaṃ nāma taccaturthaṃ balaṃ smṛtam || 50 ||
[Analyze grammar]

yena tvetāni sarvāṇi saṃgṛhītāni bhārata |
yadbalānāṃ balaṃ śreṣṭhaṃ tatprajñābalamucyate || 51 ||
[Analyze grammar]

mahate yo'pakārāya narasya prabhavennaraḥ |
tena vairaṃ samāsajya dūrastho'smīti nāśvaset || 52 ||
[Analyze grammar]

strīṣu rājasu sarpeṣu svādhyāye śatruseviṣu |
bhoge cāyuṣi viśvāsaṃ kaḥ prājñaḥ kartumarhati || 53 ||
[Analyze grammar]

prajñāśareṇābhihatasya jantościkitsakāḥ santi na cauṣadhāni |
na homamantrā na ca maṅgalāni nātharvaṇā nāpyagadāḥ susiddhāḥ || 54 ||
[Analyze grammar]

sarpaścāgniśca siṃhaśca kulaputraśca bhārata |
nāvajñeyā manuṣyeṇa sarve te hyatitejasaḥ || 55 ||
[Analyze grammar]

agnistejo mahalloke gūḍhastiṣṭhati dāruṣu |
na copayuṅkte taddāru yāvanno dīpyate paraiḥ || 56 ||
[Analyze grammar]

sa eva khalu dārubhyo yadā nirmathya dīpyate |
tadā tacca vanaṃ cānyannirdahatyāśu tejasā || 57 ||
[Analyze grammar]

evameva kule jātāḥ pāvakopamatejasaḥ |
kṣamāvanto nirākārāḥ kāṣṭhe'gniriva śerate || 58 ||
[Analyze grammar]

latādharmā tvaṃ saputraḥ śālāḥ pāṇḍusutā matāḥ |
na latā vardhate jātu mahādrumamanāśritā || 59 ||
[Analyze grammar]

vanaṃ rājaṃstvaṃ saputro'mbikeya siṃhānvane pāṇḍavāṃstāta viddhi |
siṃhairvihīnaṃ hi vanaṃ vinaśyetsiṃhā vinaśyeyurṛte vanena || 60 ||
[Analyze grammar]