Chapter 36

vidura uvāca |
atraivodāharantīmamitihāsaṃ purātanam |
ātreyasya ca saṃvādaṃ sādhyānāṃ ceti naḥ śrutam || 1 ||
[Analyze grammar]

carantaṃ haṃsarūpeṇa maharṣiṃ saṃśitavratam |
sādhyā devā mahāprājñaṃ paryapṛcchanta vai purā || 2 ||
[Analyze grammar]

sādhyā devā vayamasmo maharṣe dṛṣṭvā bhavantaṃ na śaknumo'numātum |
śrutena dhīro buddhimāṃstvaṃ mato naḥ kāvyāṃ vācaṃ vaktumarhasyudārām || 3 ||
[Analyze grammar]

haṃsa uvāca |
etatkāryamamarāḥ saṃśrutaṃ me dhṛtiḥ śamaḥ satyadharmānuvṛttiḥ |
granthiṃ vinīya hṛdayasya sarvaṃ priyāpriye cātmavaśaṃ nayīta || 4 ||
[Analyze grammar]

ākruśyamāno nākrośenmanyureva titikṣitaḥ |
ākroṣṭāraṃ nirdahati sukṛtaṃ cāsya vindati || 5 ||
[Analyze grammar]

nākrośī syānnāvamānī parasya mitradrohī nota nīcopasevī |
na cātimānī na ca hīnavṛtto rūkṣāṃ vācaṃ ruśatīṃ varjayīta || 6 ||
[Analyze grammar]

marmāṇyasthīni hṛdayaṃ tathāsūnghorā vāco nirdahantīha puṃsām |
tasmādvācaṃ ruśatīṃ rūkṣarūpāṃ dharmārāmo nityaśo varjayīta || 7 ||
[Analyze grammar]

aruṃtudaṃ paruṣaṃ rūkṣavācaṃ vākkaṇṭakairvitudantaṃ manuṣyān |
vidyādalakṣmīkatamaṃ janānāṃ mukhe nibaddhāṃ nirṛtiṃ vahantam || 8 ||
[Analyze grammar]

paraścedenamadhividhyeta bāṇairbhṛśaṃ sutīkṣṇairanalārkadīptaiḥ |
viricyamāno'pyatiricyamāno vidyātkaviḥ sukṛtaṃ me dadhāti || 9 ||
[Analyze grammar]

yadi santaṃ sevate yadyasantaṃ tapasvinaṃ yadi vā stenameva |
vāso yathā raṅgavaśaṃ prayāti tathā sa teṣāṃ vaśamabhyupaiti || 10 ||
[Analyze grammar]

vādaṃ tu yo na pravadenna vādayedyo nāhataḥ pratihanyānna ghātayet |
yo hantukāmasya na pāpamicchettasmai devāḥ spṛhayantyāgatāya || 11 ||
[Analyze grammar]

avyāhṛtaṃ vyāhṛtācchreya āhuḥ satyaṃ vadedvyāhṛtaṃ taddvitīyam |
priyaṃ vadedvyāhṛtaṃ tattṛtīyaṃ dharmyaṃ vadedvyāhṛtaṃ taccaturtham || 12 ||
[Analyze grammar]

yādṛśaiḥ saṃvivadate yādṛśāṃścopasevate |
yādṛgicchecca bhavituṃ tādṛgbhavati pūruṣaḥ || 13 ||
[Analyze grammar]

yato yato nivartate tatastato vimucyate |
nivartanāddhi sarvato na vetti duḥkhamaṇvapi || 14 ||
[Analyze grammar]

na jīyate nota jigīṣate'nyānna vairakṛccāpratighātakaśca |
nindāpraśaṃsāsu samasvabhāvo na śocate hṛṣyati naiva cāyam || 15 ||
[Analyze grammar]

bhāvamicchati sarvasya nābhāve kurute matim |
satyavādī mṛdurdānto yaḥ sa uttamapūruṣaḥ || 16 ||
[Analyze grammar]

nānarthakaṃ sāntvayati pratijñāya dadāti ca |
rāddhāparāddhe jānāti yaḥ sa madhyamapūruṣaḥ || 17 ||
[Analyze grammar]

duḥśāsanastūpahantā na śāstā nāvartate manyuvaśātkṛtaghnaḥ |
na kasyacinmitramatho durātmā kalāścaitā adhamasyeha puṃsaḥ || 18 ||
[Analyze grammar]

na śraddadhāti kalyāṇaṃ parebhyo'pyātmaśaṅkitaḥ |
nirākaroti mitrāṇi yo vai so'dhamapūruṣaḥ || 19 ||
[Analyze grammar]

uttamāneva seveta prāpte kāle tu madhyamān |
adhamāṃstu na seveta ya icchecchreya ātmanaḥ || 20 ||
[Analyze grammar]

prāpnoti vai vittamasadbalena nityotthānātprajñayā pauruṣeṇa |
na tveva samyaglabhate praśaṃsāṃ na vṛttamāpnoti mahākulānām || 21 ||
[Analyze grammar]

dhṛtarāṣṭra uvāca |
mahākulānāṃ spṛhayanti devā dharmārthavṛddhāśca bahuśrutāśca |
pṛcchāmi tvāṃ vidura praśnametaṃ bhavanti vai kāni mahākulāni || 22 ||
[Analyze grammar]

vidura uvāca |
tapo damo brahmavittvaṃ vitānāḥ puṇyā vivāhāḥ satatānnadānam |
yeṣvevaite sapta guṇā bhavanti samyagvṛttāstāni mahākulāni || 23 ||
[Analyze grammar]

yeṣāṃ na vṛttaṃ vyathate na yonirvṛttaprasādena caranti dharmam |
ye kīrtimicchanti kule viśiṣṭāṃ tyaktānṛtāstāni mahākulāni || 24 ||
[Analyze grammar]

anijyayāvivāhaiśca vedasyotsādanena ca |
kulānyakulatāṃ yānti dharmasyātikrameṇa ca || 25 ||
[Analyze grammar]

devadravyavināśena brahmasvaharaṇena ca |
kulānyakulatāṃ yānti brāhmaṇātikrameṇa ca || 26 ||
[Analyze grammar]

brāhmaṇānāṃ paribhavātparivādācca bhārata |
kulānyakulatāṃ yānti nyāsāpaharaṇena ca || 27 ||
[Analyze grammar]

kulāni samupetāni gobhiḥ puruṣato'śvataḥ |
kulasaṃkhyāṃ na gacchanti yāni hīnāni vṛttataḥ || 28 ||
[Analyze grammar]

vṛttatastvavihīnāni kulānyalpadhanānyapi |
kulasaṃkhyāṃ tu gacchanti karṣanti ca mahadyaśaḥ || 29 ||
[Analyze grammar]

mā naḥ kule vairakṛtkaścidastu rājāmātyo mā parasvāpahārī |
mitradrohī naikṛtiko'nṛtī vā pūrvāśī vā pitṛdevātithibhyaḥ || 30 ||
[Analyze grammar]

yaśca no brāhmaṇaṃ hanyādyaśca no brāhmaṇāndviṣet |
na naḥ sa samitiṃ gacchedyaśca no nirvapetkṛṣim || 31 ||
[Analyze grammar]

tṛṇāni bhūmirudakaṃ vākcaturthī ca sūnṛtā |
satāmetāni geheṣu nocchidyante kadācana || 32 ||
[Analyze grammar]

śraddhayā parayā rājannupanītāni satkṛtim |
pravṛttāni mahāprājña dharmiṇāṃ puṇyakarmaṇām || 33 ||
[Analyze grammar]

sūkṣmo'pi bhāraṃ nṛpate syandano vai śakto voḍhuṃ na tathānye mahījāḥ |
evaṃ yuktā bhārasahā bhavanti mahākulīnā na tathānye manuṣyāḥ || 34 ||
[Analyze grammar]

na tanmitraṃ yasya kopādbibheti yadvā mitraṃ śaṅkitenopacaryam |
yasminmitre pitarīvāśvasīta tadvai mitraṃ saṃgatānītarāṇi || 35 ||
[Analyze grammar]

yadi cedapyasaṃbandho mitrabhāvena vartate |
sa eva bandhustanmitraṃ sā gatistatparāyaṇam || 36 ||
[Analyze grammar]

calacittasya vai puṃso vṛddhānanupasevataḥ |
pāriplavamaternityamadhruvo mitrasaṃgrahaḥ || 37 ||
[Analyze grammar]

calacittamanātmānamindriyāṇāṃ vaśānugam |
arthāḥ samativartante haṃsāḥ śuṣkaṃ saro yathā || 38 ||
[Analyze grammar]

akasmādeva kupyanti prasīdantyanimittataḥ |
śīlametadasādhūnāmabhraṃ pāriplavaṃ yathā || 39 ||
[Analyze grammar]

satkṛtāśca kṛtārthāśca mitrāṇāṃ na bhavanti ye |
tānmṛtānapi kravyādāḥ kṛtaghnānnopabhuñjate || 40 ||
[Analyze grammar]

arthayedeva mitrāṇi sati vāsati vā dhane |
nānarthayanvijānāti mitrāṇāṃ sāraphalgutām || 41 ||
[Analyze grammar]

saṃtāpādbhraśyate rūpaṃ saṃtāpādbhraśyate balam |
saṃtāpādbhraśyate jñānaṃ saṃtāpādvyādhimṛcchati || 42 ||
[Analyze grammar]

anavāpyaṃ ca śokena śarīraṃ copatapyate |
amitrāśca prahṛṣyanti mā sma śoke manaḥ kṛthāḥ || 43 ||
[Analyze grammar]

punarnaro mriyate jāyate ca punarnaro hīyate vardhate punaḥ |
punarnaro yācati yācyate ca punarnaraḥ śocati śocyate punaḥ || 44 ||
[Analyze grammar]

sukhaṃ ca duḥkhaṃ ca bhavābhavau ca lābhālābhau maraṇaṃ jīvitaṃ ca |
paryāyaśaḥ sarvamiha spṛśanti tasmāddhīro naiva hṛṣyenna śocet || 45 ||
[Analyze grammar]

calāni hīmāni ṣaḍindriyāṇi teṣāṃ yadyadvartate yatra yatra |
tatastataḥ sravate buddhirasya chidrodakumbhādiva nityamambhaḥ || 46 ||
[Analyze grammar]

dhṛtarāṣṭra uvāca |
tanuruccaḥ śikhī rājā mithyopacarito mayā |
mandānāṃ mama putrāṇāṃ yuddhenāntaṃ kariṣyati || 47 ||
[Analyze grammar]

nityodvignamidaṃ sarvaṃ nityodvignamidaṃ manaḥ |
yattatpadamanudvignaṃ tanme vada mahāmate || 48 ||
[Analyze grammar]

vidura uvāca |
nānyatra vidyātapasornānyatrendriyanigrahāt |
nānyatra lobhasaṃtyāgācchāntiṃ paśyāmi te'nagha || 49 ||
[Analyze grammar]

buddhyā bhayaṃ praṇudati tapasā vindate mahat |
guruśuśrūṣayā jñānaṃ śāntiṃ tyāgena vindati || 50 ||
[Analyze grammar]

anāśritā dānapuṇyaṃ vedapuṇyamanāśritāḥ |
rāgadveṣavinirmuktā vicarantīha mokṣiṇaḥ || 51 ||
[Analyze grammar]

svadhītasya suyuddhasya sukṛtasya ca karmaṇaḥ |
tapasaśca sutaptasya tasyānte sukhamedhate || 52 ||
[Analyze grammar]

svāstīrṇāni śayanāni prapannā na vai bhinnā jātu nidrāṃ labhante |
na strīṣu rājanratimāpnuvanti na māgadhaiḥ stūyamānā na sūtaiḥ || 53 ||
[Analyze grammar]

na vai bhinnā jātu caranti dharmaṃ na vai sukhaṃ prāpnuvantīha bhinnāḥ |
na vai bhinnā gauravaṃ mānayanti na vai bhinnāḥ praśamaṃ rocayanti || 54 ||
[Analyze grammar]

na vai teṣāṃ svadate pathyamuktaṃ yogakṣemaṃ kalpate nota teṣām |
bhinnānāṃ vai manujendra parāyaṇaṃ na vidyate kiṃcidanyadvināśāt || 55 ||
[Analyze grammar]

saṃbhāvyaṃ goṣu saṃpannaṃ saṃbhāvyaṃ brāhmaṇe tapaḥ |
saṃbhāvyaṃ strīṣu cāpalyaṃ saṃbhāvyaṃ jñātito bhayam || 56 ||
[Analyze grammar]

tantavo'pyāyatā nityaṃ tantavo bahulāḥ samāḥ |
bahūnbahutvādāyāsānsahantītyupamā satām || 57 ||
[Analyze grammar]

dhūmāyante vyapetāni jvalanti sahitāni ca |
dhṛtarāṣṭrolmukānīva jñātayo bharatarṣabha || 58 ||
[Analyze grammar]

brāhmaṇeṣu ca ye śūrāḥ strīṣu jñātiṣu goṣu ca |
vṛntādiva phalaṃ pakvaṃ dhṛtarāṣṭra patanti te || 59 ||
[Analyze grammar]

mahānapyekajo vṛkṣo balavānsupratiṣṭhitaḥ |
prasahya eva vātena śākhāskandhaṃ vimarditum || 60 ||
[Analyze grammar]

atha ye sahitā vṛkṣāḥ saṃghaśaḥ supratiṣṭhitāḥ |
te hi śīghratamānvātānsahante'nyonyasaṃśrayāt || 61 ||
[Analyze grammar]

evaṃ manuṣyamapyekaṃ guṇairapi samanvitam |
śakyaṃ dviṣanto manyante vāyurdrumamivaikajam || 62 ||
[Analyze grammar]

anyonyasamupaṣṭambhādanyonyāpāśrayeṇa ca |
jñātayaḥ saṃpravardhante sarasīvotpalānyuta || 63 ||
[Analyze grammar]

avadhyā brāhmaṇā gāvaḥ striyo bālāśca jñātayaḥ |
yeṣāṃ cānnāni bhuñjīta ye ca syuḥ śaraṇāgatāḥ || 64 ||
[Analyze grammar]

na manuṣye guṇaḥ kaścidanyo dhanavatāmapi |
anāturatvādbhadraṃ te mṛtakalpā hi rogiṇaḥ || 65 ||
[Analyze grammar]

avyādhijaṃ kaṭukaṃ śīrṣarogaṃ pāpānubandhaṃ paruṣaṃ tīkṣṇamugram |
satāṃ peyaṃ yanna pibantyasanto manyuṃ mahārāja piba praśāmya || 66 ||
[Analyze grammar]

rogārditā na phalānyādriyante na vai labhante viṣayeṣu tattvam |
duḥkhopetā rogiṇo nityameva na budhyante dhanabhogānna saukhyam || 67 ||
[Analyze grammar]

purā hyukto nākarostvaṃ vaco me dyūte jitāṃ draupadīṃ prekṣya rājan |
duryodhanaṃ vārayetyakṣavatyāṃ kitavatvaṃ paṇḍitā varjayanti || 68 ||
[Analyze grammar]

na tadbalaṃ yanmṛdunā virudhyate miśro dharmastarasā sevitavyaḥ |
pradhvaṃsinī krūrasamāhitā śrīrmṛduprauḍhā gacchati putrapautrān || 69 ||
[Analyze grammar]

dhārtarāṣṭrāḥ pāṇḍavānpālayantu pāṇḍoḥ sutāstava putrāṃśca pāntu |
ekārimitrāḥ kuravo hyekamantrā jīvantu rājansukhinaḥ samṛddhāḥ || 70 ||
[Analyze grammar]

meḍhībhūtaḥ kauravāṇāṃ tvamadya tvayyādhīnaṃ kurukulamājamīḍha |
pārthānbālānvanavāsaprataptāngopāyasva svaṃ yaśastāta rakṣan || 71 ||
[Analyze grammar]

saṃdhatsva tvaṃ kauravānpāṇḍuputrairmā te'ntaraṃ ripavaḥ prārthayantu |
satye sthitāste naradeva sarve duryodhanaṃ sthāpaya tvaṃ narendra || 72 ||
[Analyze grammar]