Chapter 21

bhīmasena uvāca |
tathā bhadre kariṣyāmi yathā tvaṃ bhīru bhāṣase |
adya taṃ sūdayiṣyāmi kīcakaṃ sahabāndhavam || 1 ||
[Analyze grammar]

asyāḥ pradoṣe śarvaryāḥ kuruṣvānena saṃgamam |
duḥkhaṃ śokaṃ ca nirdhūya yājñaseni śucismite || 2 ||
[Analyze grammar]

yaiṣā nartanaśālā vai matsyarājena kāritā |
divātra kanyā nṛtyanti rātrau yānti yathāgṛham || 3 ||
[Analyze grammar]

tatrāsti śayanaṃ bhīru dṛḍhāṅgaṃ supratiṣṭhitam |
tatrāsya darśayiṣyāmi pūrvapretānpitāmahān || 4 ||
[Analyze grammar]

yathā ca tvāṃ na paśyeyuḥ kurvāṇāṃ tena saṃvidam |
kuryāstathā tvaṃ kalyāṇi yathā saṃnihito bhavet || 5 ||
[Analyze grammar]

vaiśaṃpāyana uvāca |
tathā tau kathayitvā tu bāṣpamutsṛjya duḥkhitau |
rātriśeṣaṃ tadatyugraṃ dhārayāmāsaturhṛdā || 6 ||
[Analyze grammar]

tasyāṃ rātryāṃ vyatītāyāṃ prātarutthāya kīcakaḥ |
gatvā rājakulāyaiva draupadīmidamabravīt || 7 ||
[Analyze grammar]

sabhāyāṃ paśyato rājñaḥ pātayitvā padāhanam |
na caivālabhathāstrāṇamabhipannā balīyasā || 8 ||
[Analyze grammar]

pravādena hi matsyānāṃ rājā nāmnāyamucyate |
ahameva hi matsyānāṃ rājā vai vāhinīpatiḥ || 9 ||
[Analyze grammar]

sā sukhaṃ pratipadyasva dāso bhīru bhavāmi te |
ahnāya tava suśroṇi śataṃ niṣkāndadāmyaham || 10 ||
[Analyze grammar]

dāsīśataṃ ca te dadyāṃ dāsānāmapi cāparam |
rathaṃ cāśvatarīyuktamastu nau bhīru saṃgamaḥ || 11 ||
[Analyze grammar]

draupadyuvāca |
ekaṃ me samayaṃ tvadya pratipadyasva kīcaka |
na tvāṃ sakhā vā bhrātā vā jānīyātsaṃgataṃ mayā || 12 ||
[Analyze grammar]

avabodhāddhi bhītāsmi gandharvāṇāṃ yaśasvinām |
evaṃ me pratijānīhi tato'haṃ vaśagā tava || 13 ||
[Analyze grammar]

kīcaka uvāca |
evametatkariṣyāmi yathā suśroṇi bhāṣase |
eko bhadre gamiṣyāmi śūnyamāvasathaṃ tava || 14 ||
[Analyze grammar]

samāgamārthaṃ rambhoru tvayā madanamohitaḥ |
yathā tvāṃ nāvabhotsyanti gandharvāḥ sūryavarcasaḥ || 15 ||
[Analyze grammar]

draupadyuvāca |
yadidaṃ nartanāgāraṃ matsyarājena kāritam |
divātra kanyā nṛtyanti rātrau yānti yathāgṛham || 16 ||
[Analyze grammar]

tamisre tatra gacchethā gandharvāstanna jānate |
tatra doṣaḥ parihṛto bhaviṣyati na saṃśayaḥ || 17 ||
[Analyze grammar]

vaiśaṃpāyana uvāca |
tamarthaṃ pratijalpantyāḥ kṛṣṇāyāḥ kīcakena ha |
divasārdhaṃ samabhavanmāsenaiva samaṃ nṛpa || 18 ||
[Analyze grammar]

kīcako'tha gṛhaṃ gatvā bhṛśaṃ harṣapariplutaḥ |
sairandhrīrūpiṇaṃ mūḍho mṛtyuṃ taṃ nāvabuddhavān || 19 ||
[Analyze grammar]

gandhābharaṇamālyeṣu vyāsaktaḥ sa viśeṣataḥ |
alaṃcakāra so''tmānaṃ satvaraḥ kāmamohitaḥ || 20 ||
[Analyze grammar]

tasya tatkurvataḥ karma kālo dīrgha ivābhavat |
anucintayataścāpi tāmevāyatalocanām || 21 ||
[Analyze grammar]

āsīdabhyadhikā cāsya śrīḥ śriyaṃ pramumukṣataḥ |
nirvāṇakāle dīpasya vartīmiva didhakṣataḥ || 22 ||
[Analyze grammar]

kṛtasaṃpratyayastatra kīcakaḥ kāmamohitaḥ |
nājānāddivasaṃ yāntaṃ cintayānaḥ samāgamam || 23 ||
[Analyze grammar]

tatastu draupadī gatvā tadā bhīmaṃ mahānase |
upātiṣṭhata kalyāṇī kauravyaṃ patimantikāt || 24 ||
[Analyze grammar]

tamuvāca sukeśāntā kīcakasya mayā kṛtaḥ |
saṃgamo nartanāgāre yathāvocaḥ paraṃtapa || 25 ||
[Analyze grammar]

śūnyaṃ sa nartanāgāramāgamiṣyati kīcakaḥ |
eko niśi mahābāho kīcakaṃ taṃ niṣūdaya || 26 ||
[Analyze grammar]

taṃ sūtaputraṃ kaunteya kīcakaṃ madadarpitam |
gatvā tvaṃ nartanāgāraṃ nirjīvaṃ kuru pāṇḍava || 27 ||
[Analyze grammar]

darpācca sūtaputro'sau gandharvānavamanyate |
taṃ tvaṃ praharatāṃ śreṣṭha naḍaṃ nāga ivoddhara || 28 ||
[Analyze grammar]

aśru duḥkhābhibhūtāyā mama mārjasva bhārata |
ātmanaścaiva bhadraṃ te kuru mānaṃ kulasya ca || 29 ||
[Analyze grammar]

bhīmasena uvāca |
svāgataṃ te varārohe yanmā vedayase priyam |
na hyasya kaṃcidicchāmi sahāyaṃ varavarṇini || 30 ||
[Analyze grammar]

yā me prītistvayākhyātā kīcakasya samāgame |
hatvā hiḍimbaṃ sā prītirmamāsīdvaravarṇini || 31 ||
[Analyze grammar]

satyaṃ bhrātṝṃśca dharmaṃ ca puraskṛtya bravīmi te |
kīcakaṃ nihaniṣyāmi vṛtraṃ devapatiryathā || 32 ||
[Analyze grammar]

taṃ gahvare prakāśe vā pothayiṣyāmi kīcakam |
atha cedavabhotsyanti haṃsye matsyānapi dhruvam || 33 ||
[Analyze grammar]

tato duryodhanaṃ hatvā pratipatsye vasuṃdharām |
kāmaṃ matsyamupāstāṃ hi kuntīputro yudhiṣṭhiraḥ || 34 ||
[Analyze grammar]

draupadyuvāca |
yathā na saṃtyajethāstvaṃ satyaṃ vai matkṛte vibho |
nigūḍhastvaṃ tathā vīra kīcakaṃ vinipātaya || 35 ||
[Analyze grammar]

bhīmasena uvāca |
evametatkariṣyāmi yathā tvaṃ bhīru bhāṣase |
adṛśyamānastasyādya tamasvinyāmanindite || 36 ||
[Analyze grammar]

nāgo bilvamivākramya pothayiṣyāmyahaṃ śiraḥ |
alabhyāmicchatastasya kīcakasya durātmanaḥ || 37 ||
[Analyze grammar]

vaiśaṃpāyana uvāca |
bhīmo'tha prathamaṃ gatvā rātrau channa upāviśat |
mṛgaṃ haririvādṛśyaḥ pratyākāṅkṣatsa kīcakam || 38 ||
[Analyze grammar]

kīcakaścāpyalaṃkṛtya yathākāmamupāvrajat |
tāṃ velāṃ nartanāgāre pāñcālīsaṃgamāśayā || 39 ||
[Analyze grammar]

manyamānaḥ sa saṃketamāgāraṃ prāviśacca tam |
praviśya ca sa tadveśma tamasā saṃvṛtaṃ mahat || 40 ||
[Analyze grammar]

pūrvāgataṃ tatastatra bhīmamapratimaujasam |
ekāntamāsthitaṃ cainamāsasāda sudurmatiḥ || 41 ||
[Analyze grammar]

śayānaṃ śayane tatra mṛtyuṃ sūtaḥ parāmṛśat |
jājvalyamānaṃ kopena kṛṣṇādharṣaṇajena ha || 42 ||
[Analyze grammar]

upasaṃgamya caivainaṃ kīcakaḥ kāmamohitaḥ |
harṣonmathitacittātmā smayamāno'bhyabhāṣata || 43 ||
[Analyze grammar]

prāpitaṃ te mayā vittaṃ bahurūpamanantakam |
tatsarvaṃ tvāṃ samuddiśya sahasā samupāgataḥ || 44 ||
[Analyze grammar]

nākasmānmāṃ praśaṃsanti sadā gṛhagatāḥ striyaḥ |
suvāsā darśanīyaśca nānyo'sti tvādṛśaḥ pumān || 45 ||
[Analyze grammar]

bhīmasena uvāca |
diṣṭyā tvaṃ darśanīyo'si diṣṭyātmānaṃ praśaṃsasi |
īdṛśastu tvayā sparśaḥ spṛṣṭapūrvo na karhicit || 46 ||
[Analyze grammar]

vaiśaṃpāyana uvāca |
ityuktvā taṃ mahābāhurbhīmo bhīmaparākramaḥ |
samutpatya ca kaunteyaḥ prahasya ca narādhamam |
bhīmo jagrāha keśeṣu mālyavatsu sugandhiṣu || 47 ||
[Analyze grammar]

sa keśeṣu parāmṛṣṭo balena balināṃ varaḥ |
ākṣipya keśānvegena bāhvorjagrāha pāṇḍavam || 48 ||
[Analyze grammar]

bāhuyuddhaṃ tayorāsītkruddhayornarasiṃhayoḥ |
vasante vāśitāhetorbalavadgajayoriva || 49 ||
[Analyze grammar]

īṣadāgalitaṃ cāpi krodhāccalapadaṃ sthitam |
kīcako balavānbhīmaṃ jānubhyāmākṣipadbhuvi || 50 ||
[Analyze grammar]

pātito bhuvi bhīmastu kīcakena balīyasā |
utpapātātha vegena daṇḍāhata ivoragaḥ || 51 ||
[Analyze grammar]

spardhayā ca balonmattau tāvubhau sūtapāṇḍavau |
niśīthe paryakarṣetāṃ balinau niśi nirjane || 52 ||
[Analyze grammar]

tatastadbhavanaśreṣṭhaṃ prākampata muhurmuhuḥ |
balavaccāpi saṃkruddhāvanyonyaṃ tāvagarjatām || 53 ||
[Analyze grammar]

talābhyāṃ tu sa bhīmena vakṣasyabhihato balī |
kīcako roṣasaṃtaptaḥ padānna calitaḥ padam || 54 ||
[Analyze grammar]

muhūrtaṃ tu sa taṃ vegaṃ sahitvā bhuvi duḥsaham |
balādahīyata tadā sūto bhīmabalārditaḥ || 55 ||
[Analyze grammar]

taṃ hīyamānaṃ vijñāya bhīmaseno mahābalaḥ |
vakṣasyānīya vegena mamanthainaṃ vicetasam || 56 ||
[Analyze grammar]

krodhāviṣṭo viniḥśvasya punaścainaṃ vṛkodaraḥ |
jagrāha jayatāṃ śreṣṭhaḥ keśeṣveva tadā bhṛśam || 57 ||
[Analyze grammar]

gṛhītvā kīcakaṃ bhīmo virurāva mahābalaḥ |
śārdūlaḥ piśitākāṅkṣī gṛhītveva mahāmṛgam || 58 ||
[Analyze grammar]

tasya pādau ca pāṇī ca śiro grīvāṃ ca sarvaśaḥ |
kāye praveśayāmāsa paśoriva pinākadhṛk || 59 ||
[Analyze grammar]

taṃ saṃmathitasarvāṅgaṃ māṃsapiṇḍopamaṃ kṛtam |
kṛṣṇāyai darśayāmāsa bhīmaseno mahābalaḥ || 60 ||
[Analyze grammar]

uvāca ca mahātejā draupadīṃ pāṇḍunandanaḥ |
paśyainamehi pāñcāli kāmuko'yaṃ yathā kṛtaḥ || 61 ||
[Analyze grammar]

tathā sa kīcakaṃ hatvā gatvā roṣasya vai śamam |
āmantrya draupadīṃ kṛṣṇāṃ kṣipramāyānmahānasam || 62 ||
[Analyze grammar]

kīcakaṃ ghātayitvā tu draupadī yoṣitāṃ varā |
prahṛṣṭā gatasaṃtāpā sabhāpālānuvāca ha || 63 ||
[Analyze grammar]

kīcako'yaṃ hataḥ śete gandharvaiḥ patibhirmama |
parastrīkāmasaṃmattaḥ samāgacchata paśyata || 64 ||
[Analyze grammar]

tacchrutvā bhāṣitaṃ tasyā nartanāgārarakṣiṇaḥ |
sahasaiva samājagmurādāyolkāḥ sahasraśaḥ || 65 ||
[Analyze grammar]

tato gatvātha tadveśma kīcakaṃ vinipātitam |
gatāsuṃ dadṛśurbhūmau rudhireṇa samukṣitam || 66 ||
[Analyze grammar]

kvāsya grīvā kva caraṇau kva pāṇī kva śirastathā |
iti sma taṃ parīkṣante gandharveṇa hataṃ tadā || 67 ||
[Analyze grammar]