Chapter 4

yudhiṣṭhira uvāca |
karmāṇyuktāni yuṣmābhiryāni tāni kariṣyatha |
mama cāpi yathābuddhi rucitāni viniścayāt || 1 ||
[Analyze grammar]

purohito'yamasmākamagnihotrāṇi rakṣatu |
sūdapaurogavaiḥ sārdhaṃ drupadasya niveśane || 2 ||
[Analyze grammar]

indrasenamukhāśceme rathānādāya kevalān |
yāntu dvāravatīṃ śīghramiti me vartate matiḥ || 3 ||
[Analyze grammar]

imāśca nāryo draupadyāḥ sarvaśaḥ paricārikāḥ |
pāñcālāneva gacchantu sūdapaurogavaiḥ saha || 4 ||
[Analyze grammar]

sarvairapi ca vaktavyaṃ na prajñāyanta pāṇḍavāḥ |
gatā hyasmānapākīrya sarve dvaitavanāditi || 5 ||
[Analyze grammar]

dhaumya uvāca |
vidite cāpi vaktavyaṃ suhṛdbhiranurāgataḥ |
ato'hamapi vakṣyāmi hetumātraṃ nibodhata || 6 ||
[Analyze grammar]

hantemāṃ rājavasatiṃ rājaputrā bravīmi vaḥ |
yathā rājakulaṃ prāpya caranpreṣyo na riṣyati || 7 ||
[Analyze grammar]

durvasaṃ tveva kauravyā jānatā rājaveśmani |
amānitaiḥ sumānārhā ajñātaiḥ parivatsaram || 8 ||
[Analyze grammar]

diṣṭadvāro labheddvāraṃ na ca rājasu viśvaset |
tadevāsanamanvicchedyatra nābhiṣajetparaḥ || 9 ||
[Analyze grammar]

nāsya yānaṃ na paryaṅkaṃ na pīṭhaṃ na gajaṃ ratham |
ārohetsaṃmato'smīti sa rājavasatiṃ vaset || 10 ||
[Analyze grammar]

atha yatrainamāsīnaṃ śaṅkeranduṣṭacāriṇaḥ |
na tatropaviśejjātu sa rājavasatiṃ vaset || 11 ||
[Analyze grammar]

na cānuśiṣyedrājānamapṛcchantaṃ kadācana |
tūṣṇīṃ tvenamupāsīta kāle samabhipūjayan || 12 ||
[Analyze grammar]

asūyanti hi rājāno janānanṛtavādinaḥ |
tathaiva cāvamanyante mantriṇaṃ vādinaṃ mṛṣā || 13 ||
[Analyze grammar]

naiṣāṃ dāreṣu kurvīta maitrīṃ prājñaḥ kathaṃcana |
antaḥpuracarā ye ca dveṣṭi yānahitāśca ye || 14 ||
[Analyze grammar]

vidite cāsya kurvīta kāryāṇi sulaghūnyapi |
evaṃ vicarato rājño na kṣatirjāyate kvacit || 15 ||
[Analyze grammar]

yatnāccopacaredenamagnivaddevavacca ha |
anṛtenopacīrṇo hi hiṃsyādenamasaṃśayam || 16 ||
[Analyze grammar]

yacca bhartānuyuñjīta tadevābhyanuvartayet |
pramādamavahelāṃ ca kopaṃ ca parivarjayet || 17 ||
[Analyze grammar]

samarthanāsu sarvāsu hitaṃ ca priyameva ca |
saṃvarṇayettadevāsya priyādapi hitaṃ vadet || 18 ||
[Analyze grammar]

anukūlo bhaveccāsya sarvārtheṣu kathāsu ca |
apriyaṃ cāhitaṃ yatsyāttadasmai nānuvarṇayet || 19 ||
[Analyze grammar]

nāhamasya priyo'smīti matvā seveta paṇḍitaḥ |
apramattaśca yattaśca hitaṃ kuryātpriyaṃ ca yat || 20 ||
[Analyze grammar]

nāsyāniṣṭāni seveta nāhitaiḥ saha saṃvaset |
svasthānānna vikampeta sa rājavasatiṃ vaset || 21 ||
[Analyze grammar]

dakṣiṇaṃ vātha vāmaṃ vā pārśvamāsīta paṇḍitaḥ |
rakṣiṇāṃ hyāttaśastrāṇāṃ sthānaṃ paścādvidhīyate |
nityaṃ vipratiṣiddhaṃ tu purastādāsanaṃ mahat || 22 ||
[Analyze grammar]

na ca saṃdarśane kiṃcitpravṛddhamapi saṃjapet |
api hyetaddaridrāṇāṃ vyalīkasthānamuttamam || 23 ||
[Analyze grammar]

na mṛṣābhihitaṃ rājño manuṣyeṣu prakāśayet |
yaṃ cāsūyanti rājānaḥ puruṣaṃ na vadecca tam || 24 ||
[Analyze grammar]

śūro'smīti na dṛptaḥ syādbuddhimāniti vā punaḥ |
priyamevācaranrājñaḥ priyo bhavati bhogavān || 25 ||
[Analyze grammar]

aiśvaryaṃ prāpya duṣprāpaṃ priyaṃ prāpya ca rājataḥ |
apramatto bhavedrājñaḥ priyeṣu ca hiteṣu ca || 26 ||
[Analyze grammar]

yasya kopo mahābādhaḥ prasādaśca mahāphalaḥ |
kastasya manasāpīcchedanarthaṃ prājñasaṃmataḥ || 27 ||
[Analyze grammar]

na coṣṭhau nirbhujejjātu na ca vākyaṃ samākṣipet |
sadā kṣutaṃ ca vātaṃ ca ṣṭhīvanaṃ cācarecchanaiḥ || 28 ||
[Analyze grammar]

hāsyavastuṣu cāpyasya vartamāneṣu keṣucit |
nātigāḍhaṃ prahṛṣyeta na cāpyunmattavaddhaset || 29 ||
[Analyze grammar]

na cātidhairyeṇa caredgurutāṃ hi vrajettathā |
smitaṃ tu mṛdupūrveṇa darśayeta prasādajam || 30 ||
[Analyze grammar]

lābhe na harṣayedyastu na vyathedyo'vamānitaḥ |
asaṃmūḍhaśca yo nityaṃ sa rājavasatiṃ vaset || 31 ||
[Analyze grammar]

rājānaṃ rājaputraṃ vā saṃvartayati yaḥ sadā |
amātyaḥ paṇḍito bhūtvā sa ciraṃ tiṣṭhati śriyam || 32 ||
[Analyze grammar]

pragṛhītaśca yo'mātyo nigṛhītaśca kāraṇaiḥ |
na nirbadhnāti rājānaṃ labhate pragrahaṃ punaḥ || 33 ||
[Analyze grammar]

pratyakṣaṃ ca parokṣaṃ ca guṇavādī vicakṣaṇaḥ |
upajīvī bhavedrājño viṣaye cāpi yo vaset || 34 ||
[Analyze grammar]

amātyo hi balādbhoktuṃ rājānaṃ prārthayettu yaḥ |
na sa tiṣṭhecciraṃ sthānaṃ gacchecca prāṇasaṃśayam || 35 ||
[Analyze grammar]

śreyaḥ sadātmano dṛṣṭvā paraṃ rājñā na saṃvadet |
viśeṣayenna rājānaṃ yogyābhūmiṣu sarvadā || 36 ||
[Analyze grammar]

amlāno balavāñśūraśchāyevānapagaḥ sadā |
satyavādī mṛdurdāntaḥ sa rājavasatiṃ vaset || 37 ||
[Analyze grammar]

anyasminpreṣyamāṇe tu purastādyaḥ samutpatet |
ahaṃ kiṃ karavāṇīti sa rājavasatiṃ vaset || 38 ||
[Analyze grammar]

uṣṇe vā yadi vā śīte rātrau vā yadi vā divā |
ādiṣṭo na vikalpeta sa rājavasatiṃ vaset || 39 ||
[Analyze grammar]

yo vai gṛhebhyaḥ pravasanpriyāṇāṃ nānusaṃsmaret |
duḥkhena sukhamanvicchetsa rājavasatiṃ vaset || 40 ||
[Analyze grammar]

samaveṣaṃ na kurvīta nātyuccaiḥ saṃnidhau haset |
mantraṃ na bahudhā kuryādevaṃ rājñaḥ priyo bhavet || 41 ||
[Analyze grammar]

na karmaṇi niyuktaḥ sandhanaṃ kiṃcidupaspṛśet |
prāpnoti hi harandravyaṃ bandhanaṃ yadi vā vadham || 42 ||
[Analyze grammar]

yānaṃ vastramalaṃkāraṃ yaccānyatsaṃprayacchati |
tadeva dhārayennityamevaṃ priyataro bhavet || 43 ||
[Analyze grammar]

saṃvatsaramimaṃ tāta tathāśīlā bubhūṣavaḥ |
atha svaviṣayaṃ prāpya yathākāmaṃ cariṣyatha || 44 ||
[Analyze grammar]

yudhiṣṭhira uvāca |
anuśiṣṭāḥ sma bhadraṃ te naitadvaktāsti kaścana |
kuntīmṛte mātaraṃ no viduraṃ ca mahāmatim || 45 ||
[Analyze grammar]

yadevānantaraṃ kāryaṃ tadbhavānkartumarhati |
tāraṇāyāsya duḥkhasya prasthānāya jayāya ca || 46 ||
[Analyze grammar]

vaiśaṃpāyana uvāca |
evamuktastato rājñā dhaumyo'tha dvijasattamaḥ |
akarodvidhivatsarvaṃ prasthāne yadvidhīyate || 47 ||
[Analyze grammar]

teṣāṃ samidhya tānagnīnmantravacca juhāva saḥ |
samṛddhivṛddhilābhāya pṛthivīvijayāya ca || 48 ||
[Analyze grammar]

agniṃ pradakṣiṇaṃ kṛtvā brāhmaṇāṃśca tapodhanān |
yājñasenīṃ puraskṛtya ṣaḍevātha pravavrajuḥ || 49 ||
[Analyze grammar]