Chapter 134

aṣṭāvakra uvāca |
atrograsenasamiteṣu rājansamāgateṣvapratimeṣu rājasu |
na vai vivitsāntaramasti vādināṃ mahājale haṃsaninādināmiva || 1 ||
[Analyze grammar]

na me'dya vakṣyasyativādimāninglahaṃ prapannaḥ saritāmivāgamaḥ |
hutāśanasyeva samiddhatejasaḥ sthiro bhavasveha mamādya bandin || 2 ||
[Analyze grammar]

bandyuvāca |
vyāghraṃ śayānaṃ prati mā prabodhaya āśīviṣaṃ sṛkkiṇī lelihānam |
padāhatasyeva śiro'bhihatya nādaṣṭo vai mokṣyase tannibodha || 3 ||
[Analyze grammar]

yo vai darpātsaṃhananopapannaḥ sudurbalaḥ parvatamāvihanti |
tasyaiva pāṇiḥ sanakho viśīryate na caiva śailasya hi dṛśyate vraṇaḥ || 4 ||
[Analyze grammar]

sarve rājño maithilasya mainākasyeva parvatāḥ |
nikṛṣṭabhūtā rājāno vatsā anaduho yathā || 5 ||
[Analyze grammar]

lomaśa uvāca |
aṣṭāvakraḥ samitau garjamāno jātakrodho bandinamāha rājan |
ukte vākye cottaraṃ me bravīhi vākyasya cāpyuttaraṃ te bravīmi || 6 ||
[Analyze grammar]

bandyuvāca |
eka evāgnirbahudhā samidhyate ekaḥ sūryaḥ sarvamidaṃ prabhāsate |
eko vīro devarājo nihantā yamaḥ pitṝṇāmīśvaraścaika eva || 7 ||
[Analyze grammar]

aṣṭāvakra uvāca |
dvāvindrāgnī carato vai sakhāyau dvau devarṣī nāradaḥ parvataśca |
dvāvaśvinau dve ca rathasya cakre bhāryāpatī dvau vihitau vidhātrā || 8 ||
[Analyze grammar]

bandyuvāca |
triḥ sūyate karmaṇā vai prajeyaṃ trayo yuktā vājapeyaṃ vahanti |
adhvaryavastriṣavaṇāni tanvate trayo lokāstrīṇi jyotīṃṣi cāhuḥ || 9 ||
[Analyze grammar]

aṣṭāvakra uvāca |
catuṣṭayaṃ brāhmaṇānāṃ niketaṃ catvāro yuktā yajñamimaṃ vahanti |
diśaścatasraścaturaśca varṇāścatuṣpadā gaurapi śaśvaduktā || 10 ||
[Analyze grammar]

bandyuvāca |
pañcāgnayaḥ pañcapadā ca paṅktiryajñāḥ pañcaivāpyatha pañcendriyāṇi |
dṛṣṭā vede pañcacūḍāśca pañca loke khyātaṃ pañcanadaṃ ca puṇyam || 11 ||
[Analyze grammar]

aṣṭāvakra uvāca |
ṣaḍādhāne dakṣiṇāmāhureke ṣaḍeveme ṛtavaḥ kālacakram |
ṣaḍindriyāṇyuta ṣaṭkṛttikāśca ṣaṭsādyaskāḥ sarvavedeṣu dṛṣṭāḥ || 12 ||
[Analyze grammar]

bandyuvāca |
sapta grāmyāḥ paśavaḥ sapta vanyāḥ sapta chandāṃsi kratumekaṃ vahanti |
saptarṣayaḥ sapta cāpyarhaṇāni saptatantrī prathitā caiva vīṇā || 13 ||
[Analyze grammar]

aṣṭāvakra uvāca |
aṣṭau śāṇāḥ śatamānaṃ vahanti tathāṣṭapādaḥ śarabhaḥ siṃhaghātī |
aṣṭau vasūñśuśruma devatāsu yūpaścāṣṭāsrirvihitaḥ sarvayajñaḥ || 14 ||
[Analyze grammar]

bandyuvāca |
navaivoktāḥ sāmidhenyaḥ pitṝṇāṃ tathā prāhurnavayogaṃ visargam |
navākṣarā bṛhatī saṃpradiṣṭā navayogo gaṇanāmeti śaśvat || 15 ||
[Analyze grammar]

aṣṭāvakra uvāca |
daśā daśoktāḥ puruṣasya loke sahasramāhurdaśa pūrṇaṃ śatāni |
daśaiva māsānbibhrati garbhavatyo daśerakā daśa dāśā daśārṇāḥ || 16 ||
[Analyze grammar]

bandyuvāca |
ekādaśaikādaśinaḥ paśūnāmekādaśaivātra bhavanti yūpāḥ |
ekādaśa prāṇabhṛtāṃ vikārā ekādaśoktā divi deveṣu rudrāḥ || 17 ||
[Analyze grammar]

aṣṭāvakra uvāca |
saṃvatsaraṃ dvādaśa māsamāhurjagatyāḥ pādo dvādaśaivākṣarāṇi |
dvādaśāhaḥ prākṛto yajña ukto dvādaśādityānkathayantīha viprāḥ || 18 ||
[Analyze grammar]

bandyuvāca |
trayodaśī tithiruktā mahogrā trayodaśadvīpavatī mahī ca || 19 ||
[Analyze grammar]

lomaśa uvāca |
etāvaduktvā virarāma bandī ślokasyārdhaṃ vyājahārāṣṭavakraḥ |
trayodaśāhāni sasāra keśī trayodaśādīnyaticchandāṃsi cāhuḥ || 20 ||
[Analyze grammar]

tato mahānudatiṣṭhanninādastūṣṇīṃbhūtaṃ sūtaputraṃ niśamya |
adhomukhaṃ dhyānaparaṃ tadānīmaṣṭāvakraṃ cāpyudīryantameva || 21 ||
[Analyze grammar]

tasmiṃstathā saṃkule vartamāne sphīte yajñe janakasyātha rājñaḥ |
aṣṭāvakraṃ pūjayanto'bhyupeyurviprāḥ sarve prāñjalayaḥ pratītāḥ || 22 ||
[Analyze grammar]

aṣṭāvakra uvāca |
anena vai brāhmaṇāḥ śuśruvāṃso vāde jitvā salile majjitāḥ kila |
tāneva dharmānayamadya bandī prāpnotu gṛhyāpsu nimajjayainam || 23 ||
[Analyze grammar]

bandyuvāca |
ahaṃ putro varuṇasyota rājñastatrāsa satraṃ dvādaśavārṣikaṃ vai |
satreṇa te janaka tulyakālaṃ tadarthaṃ te prahitā me dvijāgryāḥ || 24 ||
[Analyze grammar]

ete sarve varuṇasyota yajñaṃ draṣṭuṃ gatā iha āyānti bhūyaḥ |
aṣṭāvakraṃ pūjaye pūjanīyaṃ yasya hetorjanitāraṃ sameṣye || 25 ||
[Analyze grammar]

aṣṭāvakra uvāca |
viprāḥ samudrāmbhasi majjitāste vācā jitā medhayā āvidānāḥ |
tāṃ medhayā vācamathojjahāra yathā vācamavacinvanti santaḥ || 26 ||
[Analyze grammar]

agnirdahañjātavedāḥ satāṃ gṛhānvisarjayaṃstejasā na sma dhākṣīt |
bāleṣu putreṣu kṛpaṇaṃ vadatsu tathā vācamavacinvanti santaḥ || 27 ||
[Analyze grammar]

śleṣmātakī kṣīṇavarcāḥ śṛṇoṣi utāho tvāṃ stutayo mādayanti |
hastīva tvaṃ janaka vitudyamāno na māmikāṃ vācamimāṃ śṛṇoṣi || 28 ||
[Analyze grammar]

janaka uvāca |
śṛṇomi vācaṃ tava divyarūpāmamānuṣīṃ divyarūpo'si sākṣāt |
ajaiṣīryadbandinaṃ tvaṃ vivāde nisṛṣṭa eṣa tava kāmo'dya bandī || 29 ||
[Analyze grammar]

aṣṭāvakra uvāca |
nānena jīvatā kaścidartho me bandinā nṛpa |
pitā yadyasya varuṇo majjayainaṃ jalāśaye || 30 ||
[Analyze grammar]

bandyuvāca |
ahaṃ putro varuṇasyota rājño na me bhayaṃ salile majjitasya |
imaṃ muhūrtaṃ pitaraṃ drakṣyate'yamaṣṭāvakraściranaṣṭaṃ kahoḍam || 31 ||
[Analyze grammar]

lomaśa uvāca |
tataste pūjitā viprā varuṇena mahātmanā |
udatiṣṭhanta te sarve janakasya samīpataḥ || 32 ||
[Analyze grammar]

kahoḍa uvāca |
ityarthamicchanti sutāñjanā janaka karmaṇā |
yadahaṃ nāśakaṃ kartuṃ tatputraḥ kṛtavānmama || 33 ||
[Analyze grammar]

utābalasya balavānuta bālasya paṇḍitaḥ |
uta vāviduṣo vidvānputro janaka jāyate || 34 ||
[Analyze grammar]

bandyuvāca |
śitena te paraśunā svayamevāntako nṛpa |
śirāṃsyapāharatvājau ripūṇāṃ bhadramastu te || 35 ||
[Analyze grammar]

mahadukthyaṃ gīyate sāma cāgryaṃ samyaksomaḥ pīyate cātra satre |
śucīnbhāgānpratijagṛhuśca hṛṣṭāḥ sākṣāddevā janakasyeha yajñe || 36 ||
[Analyze grammar]

lomaśa uvāca |
samutthiteṣvatha sarveṣu rājanvipreṣu teṣvadhikaṃ suprabheṣu |
anujñāto janakenātha rājñā viveśa toyaṃ sāgarasyota bandī || 37 ||
[Analyze grammar]

aṣṭāvakraḥ pitaraṃ pūjayitvā saṃpūjito brāhmaṇaistairyathāvat |
pratyājagāmāśramameva cāgryaṃ jitvā bandiṃ sahito mātulena || 38 ||
[Analyze grammar]

atra kaunteya sahito bhrātṛbhistvaṃ sukhoṣitaḥ saha vipraiḥ pratītaḥ |
puṇyānyanyāni śucikarmaikabhaktirmayā sārdhaṃ caritāsyājamīḍha || 39 ||
[Analyze grammar]