Chapter 135

lomaśa uvāca |
eṣā madhuvilā rājansamaṅgā saṃprakāśate |
etatkardamilaṃ nāma bharatasyābhiṣecanam || 1 ||
[Analyze grammar]

alakṣmyā kila saṃyukto vṛtraṃ hatvā śacīpatiḥ |
āplutaḥ sarvapāpebhyaḥ samaṅgāyāṃ vyamucyata || 2 ||
[Analyze grammar]

etadvinaśanaṃ kukṣau mainākasya nararṣabha |
aditiryatra putrārthaṃ tadannamapacatpurā || 3 ||
[Analyze grammar]

enaṃ parvatarājānamāruhya puruṣarṣabha |
ayaśasyāmasaṃśabdyāmalakṣmīṃ vyapanotsyatha || 4 ||
[Analyze grammar]

ete kanakhalā rājanṛṣīṇāṃ dayitā nagāḥ |
eṣā prakāśate gaṅgā yudhiṣṭhira mahānadī || 5 ||
[Analyze grammar]

sanatkumāro bhagavānatra siddhimagātparām |
ājamīḍhāvagāhyaināṃ sarvapāpaiḥ pramokṣyase || 6 ||
[Analyze grammar]

apāṃ hradaṃ ca puṇyākhyaṃ bhṛgutuṅgaṃ ca parvatam |
tūṣṇīṃ gaṅgāṃ ca kaunteya sāmātyaḥ samupaspṛśa || 7 ||
[Analyze grammar]

āśramaḥ sthūlaśiraso ramaṇīyaḥ prakāśate |
atra mānaṃ ca kaunteya krodhaṃ caiva vivarjaya || 8 ||
[Analyze grammar]

eṣa raibhyāśramaḥ śrīmānpāṇḍaveya prakāśate |
bhāradvājo yatra kaviryavakrīto vyanaśyata || 9 ||
[Analyze grammar]

yudhiṣṭhira uvāca |
kathaṃyukto'bhavadṛṣirbharadvājaḥ pratāpavān |
kimarthaṃ ca yavakrīta ṛṣiputro vyanaśyata || 10 ||
[Analyze grammar]

etatsarvaṃ yathāvṛttaṃ śrotumicchāmi lomaśa |
karmabhirdevakalpānāṃ kīrtyamānairbhṛśaṃ rame || 11 ||
[Analyze grammar]

lomaśa uvāca |
bharadvājaśca raibhyaśca sakhāyau saṃbabhūvatuḥ |
tāvūṣaturihātyantaṃ prīyamāṇau vanāntare || 12 ||
[Analyze grammar]

raibhyasya tu sutāvāstāmarvāvasuparāvasū |
āsīdyavakrīḥ putrastu bharadvājasya bhārata || 13 ||
[Analyze grammar]

raibhyo vidvānsahāpatyastapasvī cetaro'bhavat |
tayoścāpyatulā prītirbālyātprabhṛti bhārata || 14 ||
[Analyze grammar]

yavakrīḥ pitaraṃ dṛṣṭvā tapasvinamasatkṛtam |
dṛṣṭvā ca satkṛtaṃ viprai raibhyaṃ putraiḥ sahānagha || 15 ||
[Analyze grammar]

paryatapyata tejasvī manyunābhipariplutaḥ |
tapastepe tato ghoraṃ vedajñānāya pāṇḍava || 16 ||
[Analyze grammar]

susamiddhe mahatyagnau śarīramupatāpayan |
janayāmāsa saṃtāpamindrasya sumahātapāḥ || 17 ||
[Analyze grammar]

tata indro yavakrītamupagamya yudhiṣṭhira |
abravītkasya hetostvamāsthitastapa uttamam || 18 ||
[Analyze grammar]

yavakrīruvāca |
dvijānāmanadhītā vai vedāḥ suragaṇārcita |
pratibhāntviti tapye'hamidaṃ paramakaṃ tapaḥ || 19 ||
[Analyze grammar]

svādhyāyārthe samārambho mamāyaṃ pākaśāsana |
tapasā jñātumicchāmi sarvajñānāni kauśika || 20 ||
[Analyze grammar]

kālena mahatā vedāḥ śakyā gurumukhādvibho |
prāptuṃ tasmādayaṃ yatnaḥ paramo me samāsthitaḥ || 21 ||
[Analyze grammar]

indra uvāca |
amārga eṣa viprarṣe yena tvaṃ yātumicchasi |
kiṃ vighātena te vipra gacchādhīhi gurormukhāt || 22 ||
[Analyze grammar]

lomaśa uvāca |
evamuktvā gataḥ śakro yavakrīrapi bhārata |
bhūya evākarodyatnaṃ tapasyamitavikrama || 23 ||
[Analyze grammar]

ghoreṇa tapasā rājaṃstapyamāno mahātapāḥ |
saṃtāpayāmāsa bhṛśaṃ devendramiti naḥ śrutam || 24 ||
[Analyze grammar]

taṃ tathā tapyamānaṃ tu tapastīvraṃ mahāmunim |
upetya balabhiddevo vārayāmāsa vai punaḥ || 25 ||
[Analyze grammar]

aśakyo'rthaḥ samārabdho naitadbuddhikṛtaṃ tava |
pratibhāsyanti vai vedāstava caiva pituśca te || 26 ||
[Analyze grammar]

yavakrīruvāca |
na caitadevaṃ kriyate devarāja mamepsitam |
mahatā niyamenāhaṃ tapsye ghorataraṃ tapaḥ || 27 ||
[Analyze grammar]

samiddhe'gnāvupakṛtyāṅgamaṅgaṃ hoṣyāmi vā maghavaṃstannibodha |
yadyetadevaṃ na karoṣi kāmaṃ mamepsitaṃ devarājeha sarvam || 28 ||
[Analyze grammar]

lomaśa uvāca |
niścayaṃ tamabhijñāya munestasya mahātmanaḥ |
prativāraṇahetvarthaṃ buddhyā saṃcintya buddhimān || 29 ||
[Analyze grammar]

tata indro'karodrūpaṃ brāhmaṇasya tapasvinaḥ |
anekaśatavarṣasya durbalasya sayakṣmaṇaḥ || 30 ||
[Analyze grammar]

yavakrītasya yattīrthamucitaṃ śaucakarmaṇi |
bhāgīrathyāṃ tatra setuṃ vālukābhiścakāra saḥ || 31 ||
[Analyze grammar]

yadāsya vadato vākyaṃ na sa cakre dvijottamaḥ |
vālukābhistataḥ śakro gaṅgāṃ samabhipūrayan || 32 ||
[Analyze grammar]

vālukāmuṣṭimaniśaṃ bhāgīrathyāṃ vyasarjayat |
setumabhyārabhacchakro yavakrītaṃ nidarśayan || 33 ||
[Analyze grammar]

taṃ dadarśa yavakrīstu yatnavantaṃ nibandhane |
prahasaṃścābravīdvākyamidaṃ sa munipuṃgavaḥ || 34 ||
[Analyze grammar]

kimidaṃ vartate brahmankiṃ ca te ha cikīrṣitam |
atīva hi mahānyatnaḥ kriyate'yaṃ nirarthakaḥ || 35 ||
[Analyze grammar]

indra uvāca |
bandhiṣye setunā gaṅgāṃ sukhaḥ panthā bhaviṣyati |
kliśyate hi janastāta taramāṇaḥ punaḥ punaḥ || 36 ||
[Analyze grammar]

yavakrīruvāca |
nāyaṃ śakyastvayā baddhuṃ mahānoghaḥ kathaṃcana |
aśakyādvinivartasva śakyamarthaṃ samārabha || 37 ||
[Analyze grammar]

indra uvāca |
yathaiva bhavatā cedaṃ tapo vedārthamudyatam |
aśakyaṃ tadvadasmābhirayaṃ bhāraḥ samudyataḥ || 38 ||
[Analyze grammar]

yavakrīruvāca |
yathā tava nirartho'yamārambhastridaśeśvara |
tathā yadi mamāpīdaṃ manyase pākaśāsana || 39 ||
[Analyze grammar]

kriyatāṃ yadbhavecchakyaṃ mayā suragaṇeśvara |
varāṃśca me prayacchānyānyairanyānbhavitāsmyati || 40 ||
[Analyze grammar]

lomaśa uvāca |
tasmai prādādvarānindra uktavānyānmahātapāḥ |
pratibhāsyanti te vedāḥ pitrā saha yathepsitāḥ || 41 ||
[Analyze grammar]

yaccānyatkāṅkṣase kāmaṃ yavakrīrgamyatāmiti |
sa labdhakāmaḥ pitaramupetyātha tato'bravīt || 42 ||
[Analyze grammar]